Apokaliipsis 11

Uvaʼs tilt Xhun kam uvaʼ ex ibʼan kaʼvaʼl inqʼa ootzaqin tetz quBʼaal Tiuxh vatz u txʼavaʼ

1Yaʼne aqʼax val u aj s-ve uvaʼ, eche invaʼq pajbʼal. Tul ech tal val u qul s-ve s-eche: —Nal axh. Tul paj u tostiuxh tetz quBʼaal Tiuxh. Atz paj u natxhkʼuulabʼal uvaʼ at vatz u tostiuxh. Tul atxha jatvaʼl inqʼa xaol, inqʼa nik natxhkʼuulan Tiuxh tuulbʼal u tostiuxh uvaʼa.#Esekieel 40.3 2Pet viqʼanalil u tostiuxh, tan til tzij. Yeʼ laʼ apaja. Tan aqʼel vet ka te inqʼa jit tij imam Israeel, inqʼa yeʼ ootzaqin tetz quBʼaal Tiuxh. Tan tira toq iyansa ka u loqʼola Jerusaleen tuulbʼal kaʼvaʼl toxkʼal (42) ichʼ 3Tul laʼ vaqʼ tiqleʼm kaʼvaʼl inqʼa ootzaqin vetz. Tul laʼ tal inuqul vinyol. Tul tuulbʼal invaʼl mil yaʼbʼ tuchʼ oxlaval toʼkʼal (1,260) qʼij laʼ tal vinyolbʼal. Tul atoʼk qitxhkin saarka oksaʼm tetz txumuʼm taʼn laʼ ibʼana.

4Aʼetz nik elkaʼp kaʼvaʼl inqʼa ootzaqin vetz, kaʼviʼl inqʼa oliivo. Atz antxh nik elkaʼpun kaʼvaʼl inqʼa tatibʼ txiqubʼal uvaʼ at vatz quBʼaal Tiuxh, u aj etz u vatz txʼavaʼ.#Sakariias 4.3, 11-14 5Oqetz jaʼl invaʼq laʼ saʼon ibʼanax yeʼbʼaʼn te kaʼvaʼl inqʼa ootzaqin vetz, tul yatzʼel laʼ tel taʼn. Tan laʼ eluʼl xamal titziʼ, tul yek laʼ isotzsa el inqʼa laʼ bʼanon yeʼbʼaʼn s-te. Echetz xamal laʼ yatzʼon el jaʼl uvaʼ laʼ xeʼt kʼatz inqʼa ootzaqin vetz. Tul kamchil tetz jaʼl uvaʼ laʼ kuxh xeʼt kʼatz inqʼa ootzaqin vetz. 6Tul at tiqleʼm laʼ motx ibʼana. Tan aʼ laʼ motx alon oq laʼ utxh ikuʼ jabʼal, atzoq yeʼ laʼ utxh ikuʼ jabʼal tuulbʼal inqʼa qʼij uvaʼs laʼ talt viyolbʼal quBʼaal Tiuxh. Atz at tiqleʼm paqte laʼ motx ibʼana, tul laʼ taqʼ bʼen u aʼ s-kaq. Atz atat tiqleʼm paqte laʼ ibʼana, tul laʼ iyansa u vatz txʼavaʼ tuchʼ yaabʼil, atz tuchʼ kam tel kuxhtuʼ. Atz aʼ laʼ motx saʼon jatpaqul u kʼaxkʼo laʼ isaʼ taqʼaxeʼ.#1 Reeyes 17.1; Eeksodo 7.17-19

7Laʼ naletz oleʼv inqʼa ootzaqin vetz tiʼ talax inqʼa inyol, yaʼne laʼ jaʼul val u yaabʼla txoo tuul val u mam jul uvaʼ yeʼl iyaʼebʼal at bʼen. Tul laʼ xeʼt tiʼ itxhʼaʼoil inqʼa ootzaqin vetz. Tul laʼ el iqʼij taʼn u txoo tetxhal iyatzʼtaʼ.#Danieel 7.3, 21 8Tul aʼ laʼ kajk vitxhiʼoʼl kaʼvaʼl inqʼa ootzaqin vetz tinikʼa u tenam Jerusaleen uvaʼ tira elnaʼq t-bʼey sinvatz. Aʼetz vet ibʼij vaʼn Sodooma tuchʼ Ejiipto. Tul aʼ u tename uvaʼ aqʼaxik jaʼ quBʼaal JesuKriisto vatz kurus. 9Tul laʼ ilix vitxhiʼoʼl inqʼa ootzaqin vetz tuulbʼal oxvaʼl qʼij tuchʼ nikʼa. Tan yeʼ laʼ kuyux imuquxeʼ. Tul laʼ ilix taʼn jankʼal kam kuxh xaolil; atz laʼ ilix taʼn inqʼa kʼuxh kamxh ixaʼnil; atz laʼ ilix taʼn jankʼal inqʼa xaol, kʼuxh kamxh iyolbʼal; atz laʼ ilix taʼn jankʼal mam tenam s-kaqaayil. 10Tul mam chiibʼichil, atz mam txuqʼtxunchil laʼ ibʼan jankʼal inqʼa xaol vatz u txʼavaʼ tiʼ vikam kaʼvaʼl inqʼa ootzaqin vetz. Tul laʼ motx ibʼan vet inimla qʼij. Atz laʼ motx taqʼ tibʼ ioya s-vatzaqil. Aʼetz s-tiʼil laʼ motx chiibʼik vet inqʼa xaol, tiʼ uvaʼ laʼ yaʼ vet vikʼaxbʼisal taʼn inqʼa ootzaqin vetz.

11Yaʼne laʼ pal vet paʼl oxvaʼl qʼij tuchʼ nikʼa tatin vitxhiʼoʼl inqʼa ootzaqin vetz, tul laʼ taqʼ vet quBʼaal Tiuxh ixev inpaqte. Tul laʼ itzʼeʼv vet taʼn quBʼaal Tiuxh. Atz laʼ txakeʼv veteʼ. Tul mam xoʼval laʼ ibʼan vet jankʼal inqʼa laʼ motx ilon.

12Yaʼne laʼ motx tabʼi vet kaʼvaʼl inqʼa ootzaqin vetz val u qul uvaʼ oqxh isichʼin laʼ tel bʼen tu amlikaʼ. Tul ech laʼ tal s-te s-eche: «Ejaʼvaq ul tzitza,» chaq eʼli. Tul laʼetz palaq vet jaʼ t-amlikaʼ tuul val u suʼtzʼ. Tul ech ivatz inqʼa xaol, inqʼa nikich itxhiʼan s-tiʼ, laʼ jaʼaq vet ul t-amlikaʼ. 13Tuulbʼaletz uvaʼs laʼ ijaʼaq vet ul inqʼa ootzaqin vetz t-amlikaʼ, tul laʼ pal val u mam kabʼnaano. Tul tira laʼ motx jinp tanul otzotz te laval tanul tuulbʼal u mam tenam. Tul juqvaʼlen mil (7,000) xaol laʼ motx kam taʼn u kabʼnaano. Jankʼateletz vet inqʼa xaol inqʼa yeʼ laʼ motx kami, tul laʼ motx xoʼvaq veteʼ. Atz laʼ motx toksa iqʼij u quBʼaal Tiuxh uvaʼ tu amlikaʼ, —xeʼt u qul s-ve.

14Aʼetz vikaʼv txumlebʼale uvaʼ laʼ koʼp tiibʼa inqʼa xaol vatz u txʼavaʼ. Pet il vet vitoxv txumlebʼal yaʼn tuleʼ uvaʼ toq koʼpoq tiibʼa inqʼa xaol vatz u txʼavaʼ.

Uvaʼs tilt Xhun toqʼsat vijuqv aanxel vitrompeeta

15Yaʼne toqʼsa vet vijuqv aanxel vitrompeeta. Tul vabʼi vet ivululkabʼin jolol inqʼa qul uvaʼ, aʼ ixhaakalile. Tul ech nikich motx tal s-eche:

—Jankʼalxh inqʼa iqʼesal inqʼa nimla txhaq tenam, inqʼa nikich bʼanon iqʼesalil vatz txʼavaʼ, tan qat oky vet jaqʼ viqʼesalil quBʼaal Tiuxh, atz tiqʼabʼ u Kriisto, vitxajoʼm. Tul aʼ vet u Kriisto laʼ bʼanon iqʼesalil s-tiibʼa s-txheel, atz tinjattant inqʼa yaʼbʼ uvaʼ bʼenaʼl kuxh ibʼen toq tuleʼ, —chichich inqʼa qul.

16Yaʼne aʼetz vet vinaq kajvaʼl inqʼa iqʼon iviʼ, inqʼa kʼuqlelich tu kʼuqeʼvbʼal vatz quBʼaal Tiuxh, motx natxhkʼuulan vet Tiuxh, tetxhal ijoqbʼa kuʼ tibʼ vatz txʼavaʼ vatz quBʼaal Tiuxh. 17Tul ech motx tal s-eche:

—Toq qaqʼ taʼntiuxh see, quBʼaal Tiuxh, axh quBʼaal Tiuxh uvaʼ yeʼxhkam invaʼq tzaʼl ibʼanax savatz, axh quBʼaal Tiuxh uvaʼ at axh s-txheel; atz axh, uvaʼ atichxh axh. Tan txheel vet toq akʼutxh u mam aviqleʼm tiibʼa inqʼa xaol, inqʼa palsan yol. Tul toq abʼan vet iqʼesalil tiibʼa inqʼa xaol s-kaqaayil. 18Tul laʼ ul iviʼ inqʼa mam tenam see tiʼ vabʼant iqʼesalil s-tiibʼa. Tan opoony vet viqʼiil aaqʼt kuʼ inqʼa yol tinuqul tiʼ inqʼa mam tenam. Tul opoonyat vet viqʼiil inpaqte tiʼ aaqʼt kuʼ inqʼa yol tinuqul tiʼ inqʼa xaol, inqʼa kamnaʼqle. Tul opoonyetz vet aaqʼt u kʼaxkʼo s-tiibʼa.

Atz opoonyat vet viqʼiil asotzsat el inqʼa xaol uvaʼ nik yansan u vatz txʼavaʼ. Atz opoonyat vet viqʼiil aaqʼt itxʼaqaʼm inqʼa avaqʼonvil, inqʼa qʼexsan tetz vayol, atz te inqʼa loqʼola niman eetz, atz te jankʼal inqʼa kʼuxh yeʼl tiqleʼm, atz kʼuxh at tiqleʼm, —chichich inqʼa iqʼon iviʼ.

19Yaʼne jaqp vet u tatibʼal quBʼaal Tiuxh uvaʼ tu amlikaʼ. Tul naʼlich vet okaʼp val u kaaxha uvaʼ atich kuʼ vibʼekʼbʼal quBʼaal Tiuxh s-tuul. Tul litzʼkabʼinyichxh vet kotzʼinebʼ. Atz ibʼan vet raaya uvaʼ oqxhich ixhaakalile. Tul vululkabʼinyichxh veteʼ. Tul ibʼan vet kabʼnaano. Atz kuʼ vet mam saqbʼatz.

Currently Selected:

Apokaliipsis 11: ixlC

Highlight

Copy

Compare