Apokaliipsis 13

Uvaʼs tilt Xhun val u qʼesal yaabʼla txooil maar

1Yaʼne vil ijaʼul vaʼt u mamaʼ yaabʼla txoo tuul u maar, iqʼesal txooil maar. Tul juqvaʼlenich iviʼ. Atz lavalenich itukʼ. Tul jununil itukʼ atich jaʼ juunil ikoroona. Tul ech bʼij atich ok tiʼ junun inqʼa iviʼ s-eche: ‹eesan tetz iqʼij qubʼaal tiuxh,› chichiche. 2Aʼetz viqʼesal txooil maar uvaʼ echich, eche xuʼmiʼ bʼalam vila. Tul echich inqʼa toq, eche toq ooso. Tul echich vitziʼ, eche itziʼ bʼalam. Tul sibʼ tiqleʼm u qʼesal yaabʼla txooil maar aqʼax vet taʼn vaʼt u mamaʼ yaabʼla txoo, uvaʼ echiche oʼan. Tul aqʼax vaʼl vikʼuqeʼvbʼal s-te tiʼ ibʼant iqʼesalil tiibʼa inqʼa xaol uvaʼ nikich motx niman. 3Tul vila uvaʼ akʼonaʼqlich vaʼl viviʼ u qʼesal yaabʼla txooil maar. Tul tira kam vaʼl viviʼ. Pet itzʼeʼv inpaqte. Tan nal kuxh tiqʼo tibʼ viviʼ u txoo inpaqte. Tul tira kaj taanima jankʼal inqʼa xaol vatz txʼavaʼ tiʼ tiqʼot tibʼ viviʼ u qʼesal txooil maar. Tul motx ok vet bʼen inqʼa xaol tiʼ inimal u qʼesal yaabʼla txooil maar.

4Yaʼne inatxhkʼuula vet inqʼa xaol u mamaʼ yaabʼla txoo, uvaʼ echiche oʼan. Aʼetz uvaʼe, aqʼon vet tiqleʼm vaʼt u qʼesal yaabʼla txooil maar. Tul inatxhkʼuulaat vet inqʼa xaol u mamaʼ yaabʼla txooil maar inpaqte. Tul ech motx tal vet s-eche: —Yeʼxhabʼil invaʼq ech, eche u qʼesal yaabʼla txooil maar. Tul yeʼxhabʼil invaʼq laʼ pal itxhʼaʼoin s-viʼ, —chichichaq veteʼ.

5Tul aqʼaxat vet tiqleʼm u qʼesal yaabʼla txooil maar tiʼ iyoloneʼ taʼn u mamaʼ iqʼesal yaabʼla txoo, uvaʼ eche oʼan. Tul mam vet yol nikich tal tiʼ toksat iqʼij s-junal. Atz mam vet yol nikich tal tiʼ teesal iqʼij quBʼaal Tiuxh. Tul aqʼaxat tiqleʼm paqte tiʼ ibʼant iqʼesalil tiibʼa inqʼa xaol tuulbʼal kuxh kaʼvaʼl toxkʼal (42) ichʼ. 6Yaʼne xeʼt vet u qʼesal txooil maar tiʼ iyolon tiʼ teesal iqʼij quBʼaal Tiuxh. Tul xeʼt vet tiʼ teesal iqʼij vibʼij quBʼaal Tiuxh. Atz xeʼt vet tiʼ teesal iqʼij u tatibʼal quBʼaal Tiuxh. Atz xeʼt vet tiʼ teesal iqʼij inqʼa at tu amlikaʼ. 7Tul kuyux vet ibʼant u qʼesal txooil maar txhʼaʼo tuchʼ inqʼa niman tetz Jesuus, tetxhal toleʼv s-tiʼ. Tul aqʼax vet tiqleʼm tiibʼa jankʼal inqʼa vaʼl kuxh ixaʼnil, atz tiibʼa jankʼal inqʼa kamxh xaolil, atz tiibʼa jankʼal xaol, kʼuxh kamxh yolbʼalil nik iyolbʼe, atz tiibʼa jankʼal inqʼa mam tenam. 8Tul natxhkʼuulal vet u qʼesal txooil maar taʼn jankʼal inqʼa xaol, inqʼa vatz txʼavaʼ, inqʼa yeʼl ibʼij tzʼibʼamal tuul u uʼ tetz qʼij saq kʼatz quBʼaal Tiuxh, [u uʼ, u tetz JesuKriisto, uvaʼ ech tilix, eche chelem karneʼl, uvaʼ yatzʼel tela, atz uvaʼ atichxhtuʼ. Aʼetz u uʼe tal uvaʼ tzʼibʼamal vibʼij inqʼa niman tetz Jesuus, inqʼa tzʼibʼamalxh vet ibʼij uvaʼs iviinqixsat quBʼaal Tiuxh u vatz txʼavaʼ].

9Jaʼletz ex, uvaʼ nik saʼon tootzaqileʼ kam talax vinyol, tul bʼanvaq yaʼl tiʼ ibʼen sete.

10Tul aʼetzxh laʼ ibʼanvat inqʼa niman vetz yaʼl tiʼ ikʼuqbʼat ikʼuul s-viʼ, atz tiʼ ikotxʼt ivatz tiʼ ipal t-inqʼa itzaʼlal. Tan at inqʼa laʼ ikuy quBʼaal Tiuxh itxeypeʼ, tul laʼ txeyp vet bʼen. Atz at inqʼa laʼ ikuy iyatzʼaxeʼ, tul laʼ yatzʼax vet el.

Uvaʼs tilt Xhun ijaʼul vaʼt u mamaʼ yaabʼla txoo tuul txʼavaʼ, iqʼesal txooil txʼavaʼ

11Yaʼne vil ijaʼul vaʼt u mamaʼ yaabʼla txoo tuul u txʼavaʼ, iqʼesal txooil txʼavaʼ. Tul kaʼvaʼl itukʼ atiche, eche itukʼ karneʼl. Pet echatichxh iyolon tiʼ teesal inqʼa xaol t-bʼey, eche u mamaʼ yaabʼla txoo, uvaʼ echiche oʼan. 12Tul mamala kuxh kam nikich ibʼan u qʼesal txooil txʼavaʼ tuchʼ u tiqleʼm uvaʼ aqʼaxi. Tul antxh nikich ibʼan, eche uvaʼ nikich ibʼan u qʼesal txooil maar tuchʼ u tiqleʼm tiibʼa inqʼa xaol. Tul jankʼal inqʼa xaol jeqlel vatz txʼavaʼ, natxhkʼuulan vet u qʼesal txooil maar, uvaʼ akʼon vaʼl viviʼ uvaʼ tetxhichxh ikam taʼn, tul nal kuxh iputzqʼeʼ. 13Tul kamaq kuxh mam kaebʼal aanima nikich ikʼutxh u mamaʼ iqʼesal yaabʼla txooil txʼavaʼ vatz jankʼal inqʼa xaol. Tul ech ivatz inqʼa xaol nikich ibʼaneʼ uvaʼ nik itzaj xamal t-amlikaʼ taʼn, tul yek vatz txʼavaʼ. 14Echetz nikich ibʼane tiʼ teesal jankʼal inqʼa xaol t-bʼey, inqʼa jeqlel vatz txʼavaʼ, tuchʼ inqʼa kaebʼal aanima nikich motx ibʼaneʼ. Tul ech ivatz u qʼesal txooil maar nikich ibʼaneʼ. Tul ibʼekʼ vet jankʼal inqʼa xaol tiʼ ibʼitix vaʼl ivatzibʼal u qʼesal txooil maar uvaʼ tzokʼox s-espaada, tul itzʼeʼv paqte.

15Tul kuyux vet itxhej ixev vivatzibʼal u qʼesal txooil maar. Tul laʼich yolon veteʼ. Tul laʼich ibʼekʼ vet iyatzʼax el jaʼl uvaʼ yeʼlich laʼ natxhkʼuulan. 16Aʼetz ibʼan vet u qʼesal txooil maar uvaʼ jankʼal vet inqʼa xaol toksa tetxhlal tiqʼabʼ, visebʼal, atzoq tipala. Kʼuxh nitxaʼ, kʼuxh qʼesla aanima, tan ok tetxhlal. Atz kʼuxh txʼiol iqʼij, atz kʼuxh meebʼaʼ, tan ok tetxhlal. Atz kʼuxh inqʼa loqʼel tok tiʼ aqʼon, atz kʼuxh jit loqʼel tok tiʼ aqʼon, tan ok tetxhlal. Tan tira vaʼlxh motx tok tetxhlal. 17Tul yeʼxhabʼil invaʼq nikich tutxh vet iloqʼoneʼ, atz ikʼayineʼ oq yeʼl tetxhlal. Pet taʼnxh vet inqʼa xaol nikich tutxh iloqʼoneʼ, atz ikʼayineʼ, inqʼa ok tetxhlal vibʼij u qʼesal yaabʼla txooil maar s-tiʼ, atz maq u tatxhul vibʼij. 18Poro aʼ isaʼ uvaʼ atxh qootzaqibʼal s-bʼaʼn, atz laʼ bʼen s-qe kam talax u tatxhul vibʼij. Tul laʼ qutxhabʼa qel s-tuul kam nik elkaʼp u tatxhul u qʼesal txooil maar. Tan ant kuxh inqʼa atxh uvaʼ nik ibʼanbʼe inqʼa xaol, aʼe inqʼa atxh uvaʼa: 666.{*}#13.18 ¿Kam talax u yol ‹tatxhul vibʼij› u mam iqʼesal yaabʼla txooil maar? Atichetz vaʼl txumbʼal nikich ibʼanbʼe inqʼa xaol tiʼ itzʼibʼal u atxh s-naʼyla yol xoʼl inqʼa grieego, atz xoʼl inqʼa tij imam Israeel. Tan antxh inqʼa tzʼibʼ nikich motx ibʼanbʼe tiʼ itzʼibʼal inqʼa atxh. Atz qal kuxh s-tiʼ, tiʼ u tzʼibʼ u ‹a.› Tan tiʼ uvaʼ bʼaxa tzʼibʼ xoʼl jankʼal inqʼa tzʼibʼ t-quyolbʼal, tul ‹1› chaqetz vet oʼ s-tiʼ. Atz ech txhane u tzʼibʼ ‹bʼ.› Tan aʼe vikajv tzʼibʼ, tul ‹4› chaqetz vet oʼe s-tiʼ. Echetz nikich toksal vet tatxhul vibʼij inqʼa xaol tiʼ kam tatxhul tzʼibʼ nikich ikʼul tibʼ s-tuchʼ. Qal kuxh s-tiʼ uvaʼ Luʼ ibʼij vaʼq mam iqʼesal. Tul 16 nik elkaʼp tatxhul u ‹L› xoʼl inqʼa tzʼibʼ t-quyolbʼal. Pet u tzʼibʼ u ‹u,› tan aʼ nik elkaʼpun 35 xoʼl inqʼa tzʼibʼ. Pet u tzʼibʼ ‹ʼ,› tan aʼ nik elkaʼpun 42. Tan aʼ vete viyaʼebʼal tzʼibʼ. Laʼetz qaqʼ vet ikʼul tibʼ inqʼa atxh, tul aʼetz vete u ‹163542› nik elkaʼp u tatxhul. Echetz nik elkaʼp tatxhul vibʼij Luʼe. Echetze u txumbʼal uvaʼe, tan aʼ ibʼij ‹germetría› tu kastiiya. Atetz kaʼl inqʼa aj txumbʼal motx bʼanbʼen u qermetriia tiʼ tiqʼol eluʼl tatxhul vibʼij inqʼa yaabʼla mam iqʼesal tu Rooma, inqʼa nikich kʼaxbʼisan inqʼa tij imam Israeel, atz inqʼa niman tetz Jesuus, tuulbʼal uvaʼs atich Xhun vatz txʼavaʼ. Aʼ vibʼij inqʼa yaabʼla mam iqʼesal tu Rooma inqʼaa: Neroon, Vespasiaano, Tiito, Domisiaano. Pet motxetz itxhok inqʼa aj txumbʼal teluʼl u 666, uvaʼ nik tal u versiikulo vajxaqlaval, tiʼ taqʼax ikʼul tibʼ inqʼa tzʼibʼ tetz vibʼij inqʼa mam iqʼesal, tul tira yeʼ nik ikʼul tibʼ s-tuchʼ. Echetz yeʼ ootzaqimal kam bʼijil nik ikʼul tibʼ tuchʼ u 666, atz jaʼl ibʼij nik taleʼ.

Currently Selected:

Apokaliipsis 13: ixlC

Highlight

Copy

Compare