Filipeenses ALBʼAL INUQUL U YOL TIʼ U Uʼ
ALBʼAL INUQUL U YOL TIʼ U Uʼ
FILIPEENSES
Uvaʼs toq qootzaqitaʼ jaʼl tzʼibʼan u uʼ Filipeenses
Antetzxh Paʼp tzʼibʼan u uʼ uvaʼ Filipeenses ibʼij. Tan antxh u uʼ nik alon uvaʼ Paʼp tzʼibʼan, eche uvaʼ nik tal tu Filipeenses 1.1.
Uvaʼs toq qootzaqitaʼ kam s-tuul tzʼibʼal u uʼ Filipeenses
Aʼetz itzʼibʼat Paʼp u uʼ Filipeenses tu yaʼbʼ kaʼvaʼl imutxʼ (62) m.t.J. Tul ant atich jaʼ Paʼp t-tzeʼ uvaʼs itzʼibʼat u uʼ Efeesios uvaʼs ibʼant tu yaʼbʼ vaʼl imutxʼ (61) m.t.J. Tan tiʼ ipaxsal inqʼa bʼaʼnla txhaq yol tiʼ Jesuus aqʼaxik jaʼ Paʼp t-tzeʼ tuulbʼal uvaʼs atich ok Neroon s-mam iqʼesal tu mam tenam Rooma. Jankʼalxh uvaʼ ipalebʼe Paʼp tuchʼ Siilas tu tenam Filiipos tiʼ ipaxsal viyolbʼal quBʼaal Tiuxh. Aʼetz uvaʼe, nik tal t-Vibʼanoʼm inqʼa Apoostol 16.6-40.
Uvaʼs toq qootzaqitaʼ kame u taqʼil vitxhusun Paʼp tuul u tuʼ Filipeenses
Aʼetz taqʼil viyol Paʼp uvaʼ nik taqʼ taʼntiuxh te quBʼaal Tiuxh tiʼ inqʼa oya uvaʼ taqʼ inqʼa niman tetz Jesuus s-te, inqʼa atich tu tenam Filiipos. Tul taqʼ bʼen Paʼp taʼntiuxh s-te. Aʼetz vaʼl u tuʼ Paʼpe uvaʼ mam chiibʼichil, atz mam aqʼo taʼntiuxh te Tiuxh nik tal s-tuul.
Atz nikat tal Paʼp tiʼ u taqʼt itxumbʼal inqʼa niman tetz Jesuus, inqʼa nikich motx imol tibʼ tu tenam Filiipos. Tan aʼ nikich ikʼaq Paʼp tok bʼaʼnil xoʼl kaʼvaʼl inqʼa ixoq, inqʼa yeʼ nikich motx ikʼul vet tibʼ iyol s-vatzaq tu tenam Filiipos.
Uvaʼs toq qootzaqitaʼ kam ulbʼemal ijatxp ixoʼl inqʼa yol tu uʼ Filipeenses
U uʼ Filipeenses, tan juqvaʼlen tanul elnaʼq inqʼa yol uvaʼ nik tal s-tuul.
Filipeenses 1.1-2
Aʼetz ixeʼtebʼe Paʼp talax tiʼ jaʼl nik tzʼibʼan u uʼ, tul jaʼl nik kʼulun. Yaʼne taqʼ vet bʼen Paʼp bʼaʼnil ikʼuul inqʼa niman tetz Jesuus.
1. Filipeenses 1.3-11
U bʼaxa tanul yol, tan aʼ tal Paʼp, tiʼ uvaʼ nikich inatxh Paʼp Tiuxh tiʼ inqʼa niman tetz Jesuus. Tul nikich taqʼ bʼen Paʼp bʼaʼnilaq ikʼuul. Tul nikich taqʼ taʼntiuxh te Tiuxh, tiʼ uvaʼ laʼ motx tiqʼo tibʼ tibʼaʼnil s-vatzaq tiʼ inimal inqʼa bʼaʼnla txhaq yol tiʼ Jesuus. Atz nikatich taqʼ Paʼp taʼntiuxh te Tiuxh, tiʼ uvaʼ vaʼlichaq iyol tuchʼ Paʼp. Tul eelaxh nikich motx tel tiʼ ipaxsal viyolbʼal quBʼaal Tiuxh. Tan nikich ilotxhon inqʼa niman tetz Jesuus tuchʼ puaq. Tul yeʼ nikich motx ichʼixv te viyolbʼal quBʼaal Tiuxh kʼuxh atich jaʼ Paʼp t-tzeʼ s-tiʼ. Tul nikich tabʼi Paʼp te quBʼaal Tiuxh uvaʼ yeʼ laʼ motx yaʼ inqʼa niman tetz Jesuus tiʼ ibʼanax inqʼa bʼaʼnla txhaq txumbʼal, atz inqʼa jikla txhaq bʼanoʼm. Echetz laʼ toksal tel iqʼij u quBʼaal Tiuxhe s-tiʼ. Echetz uvaʼe nikich ibʼan Paʼp tiʼ inatxhax Tiuxh tiʼ inqʼa niman tetz Jesuus.
2. Filipeenses 1.12-18
Vikaʼv tanul yol, tan aʼ tal Paʼp tiʼ kame uvaʼ ipalebʼe uvaʼs atich jaʼ t-tzeʼ. Tan kʼuxh atichxh jaʼ Paʼp t-tzeʼ, tan nikich ipaxsa Paʼp viyolbʼal quBʼaal Tiuxh xoʼl inqʼa sol, atz te jolt inqʼa xaol, inqʼa nikich taqʼbʼ solin tu tatibʼal inqʼa sol. Tul nikichetz til inqʼa niman tetz Jesuus kam uvaʼ nikich ibʼan Paʼp, tiʼ uvaʼ yeʼl Paʼp nikich tuql tiʼ ipaxsal viyolbʼal quBʼaal Tiuxh kʼuxh atich jaʼ Paʼp t-tzeʼ. Tul aʼletzxh nikich motx itxhej vet iyakʼil tiʼ talax viyolbʼal quBʼaal Tiuxh.
Tul aʼ nikich titzʼa Paʼp uvaʼ tuchʼ vinatxht inqʼa niman tetz Jesuus Tiuxh tiʼ Paʼp, tul laʼich el Paʼp t-tzeʼ tiʼ ibʼen tiʼ isolil inqʼa niman tetz Jesuus tu tenam Filiipos. Tul itzoqpisaetz kuxh vet Paʼp viyol tiʼ taqʼax itial inqʼa niman tetz Jesuus, tul tal vet Paʼp paqte te inqʼa niman tetz Jesuus tiʼ kam laʼ motx ibʼan tiʼ tiqʼol vinuqul inqʼa bʼaʼnla txhaq yol tiʼ u quBʼaal Jesuus uvaʼ ikʼulelxhtuʼ laʼ nimali. Tul laʼ motx itxhabʼa itxakeʼv tiʼ ibʼant vaʼl titzʼabʼal. Tul vaʼl iyol s-vatzaq laʼ motx ibʼan tiʼ yeʼ ikuyt tel iqʼij inqʼa bʼaʼnla txhaq yol tiʼ Jesuus, inqʼa nimamal vet taʼn. Tul tira yeʼ laʼ motx xoʼv te inqʼa xaol, inqʼa nik maqon tiʼ talax el viyolbʼal quBʼaal Tiuxh. Tan aʼ nik ikʼutxh veteʼ uvaʼ at vet qʼij isaq uvaʼ yeʼl iyaʼebʼal imotxebʼal.
3. Filipeenses 2.1-18
Vitoxv tanul yol, tan aʼ tal Paʼp, tiʼ uvaʼ tetxhalxh laʼ motx tiqʼo kuʼl tibʼ inqʼa niman tetz Jesuus s-vatzaq. Pet yeʼ laʼ motx taqʼ bʼen tibʼ s-nim xoʼl inqʼa imol. Tan vaʼl kuxh motx tok s-niman tetz Jesuus; atz vaʼl kuxh motx ikʼult viTiuxhil Tiuxh; atz vaʼl kuxh taanima s-tibʼilaq s-vatzaq laʼ ibʼana. Tan ech uvaʼe ibʼan u quBʼaal Jesuus tiʼ tiqʼot kuʼl tibʼ. Tul taqʼ ka quBʼaal Jesuus u nimla tatineʼ, atz u tatinich kʼatz quBʼaal Tiuxh. Tul taqʼ bʼen tibʼ s-vaʼl alam aanima. Tul tiqʼo kuʼl tibʼ s-vaʼl kʼuulanal tuchʼ vitxumbʼal. Tuulbʼaletz uvaʼ alam aanimaich veteʼ, tul tiqʼo kuʼl tibʼ. Atz tira nimal u quBʼaal Tiuxh taʼn, tetxhal topoon vatz u kamchil; atz tetxhal ichʼixvisaleʼ. Tan een ex kamk vet vatz kurus. Echetz uvaʼe laʼ ibʼan inqʼa niman tetz Jesuus. Tan ech uvaʼe nik tal tu Filipeenses 2.1-11.
Yaʼne nik taqʼ Paʼp itxumbʼal inqʼa niman tetz Jesuus tiʼ kam laʼ motx ibʼan tiʼ tiqʼol viyolbʼal quBʼaal Tiuxh. Tan aʼ nik tal Paʼp uvaʼ nuqla jiklaxh vet kʼaol imeʼal quBʼaal Tiuxh laʼ motx ibʼana. Echetz yeʼ laʼ itxhej kantxhaqla yole s-tiʼ. Tul aʼ laʼ ikʼutxh vet inqʼa bʼaʼnla txhaq txumbʼal xoʼl inqʼa xaol, inqʼa bʼanolaq tetz yeʼbʼaʼn, inqʼa elnaʼq kuxh iviʼ t-bʼey. Tul echetz vet tatin xoʼl inqʼa xaol laʼ ibʼan tiʼ ikʼutxhux vibʼey, eche txiqubʼal tu tokto tzitza vatz txʼavaʼ, eche uvaʼ nik tal tu Filipeenses 2.12-18.
4. Filipeenses 2.19-30
Vikajv tanul yol, tan aʼ tal Paʼp, tiʼ uvaʼ kam nik ibʼan jolt inqʼa imol tiʼ taqʼonv s-kʼatza tiʼ viyolbʼal quBʼaal Tiuxh, jankʼale tiʼ Timoteeo tuchʼ Epafrodiito.
5. Filipeenses 3.1-21
Vitoʼv tanul yol, tan aʼ tal Paʼp tiʼ taqʼt jolt itxumbʼal inqʼa niman tetz Jesuus, tiʼ uvaʼ yeʼ laʼ motx taqʼ tibʼ eesaloq t-bʼey te inqʼa xaol, inqʼa yaʼtelich kuxh talt inimal inqʼa bʼekʼbʼal. Pet aʼ laʼ inima vet jankʼax uvaʼ taqʼ quBʼaal Jesuus tootzaqi. Tul aʼetz vet inqʼa bʼekʼbʼale laʼ motx inima. Atz vaʼl kuxh vet titzʼabʼal laʼ motx ibʼan tiʼ inimaleʼ. Tul nik tal Paʼp uvaʼ, aʼ laʼ motx tilvat tetz kʼatz Paʼp tiʼ inimal u quBʼaal Jesuus.
6. Filipeenses 4.1-9
Vivaqaq tanul yol, tan aʼ tal Paʼp, tiʼ u talt bʼen te kaʼvaʼl inqʼa ixoq uvaʼ laʼ motx ibʼan vaʼl iyol s-kaʼbʼil. Tul laʼ motx chiibʼ tiʼ inimal u quBʼaal Jesuus. Tul aʼ laʼ ibʼane uvaʼ ayaʼlaqxh bʼaʼn s-te laʼ motx ibʼana. Tul aʼ vibʼaʼnil u quBʼaal Jesuus laʼ atin t-inqʼa taanima. Tul nik tal Paʼp uvaʼ, aʼ u bʼaʼnil laʼ titzʼa tiʼ vimol. Aʼ laʼ titzʼa vinuqul tiʼ vimol. Aʼ laʼ titzʼa u jik tuchʼ u bʼaʼnil tiʼ vimol. Aʼ laʼ titzʼa kam u bʼaʼn nik ibʼan vimol. Aʼ laʼ titzʼa jabʼiste uvaʼ laʼ ok iqʼij vimol s-tiʼ.
7. Filipeenses 4.10-20
Vijuqv tanul yol, tan aʼ tal Paʼp, tiʼ uvaʼ nik taqʼ Paʼp taʼntiuxh te inqʼa niman tetz Jesuus tiʼ u puaq uvaʼ motx taqʼ te Paʼp. Aʼe u puaq uvaʼ motx taqʼ bʼen tiʼ Epafrodiito, tul ex taqʼ te Paʼp.
Filipeenses 4.21-23
Tiyaʼtebʼaletz vet viyol Paʼp, tul nik taqʼ bʼen Paʼp bʼaʼnil ikʼuul inqʼa niman tetz Jesuus tu tenam Filiipos. Tul jitetz kuxh taʼn Paʼp aqʼon bʼen u bʼaʼnil kʼuul, pet antich jolt inqʼa niman tetz Jesuus, atz antich jolt inqʼa jeqlich tu tatibʼal u mam iqʼesal.
Currently Selected:
Filipeenses ALBʼAL INUQUL U YOL TIʼ U Uʼ: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.