Filipeenses 1

FILIPEENSES

Uvaʼs taqʼt bʼen Paʼp bʼaʼnil ikʼuul inqʼa niman tetz Jesuus tu tenam Filiipos

1In Paʼp. Inmol vibʼ tuchʼ Timoteeo, oʼ inqʼa taqʼonvil quBʼaal JesuKriisto.

Niketz qutzʼibʼa bʼen val u uʼ sete, ex inqʼa chʼexel vet ex taʼn quBʼaal Tiuxh, inqʼa tu tenam Filiipos. Atz nik qutzʼibʼa opoon sete, ex inqʼa nik iqʼon iviʼ xoʼl inqʼa niman tetz Jesuus; atz ex inqʼa kʼuulanal s-xoʼl.

2Tul aʼ vibʼaʼnil Tiuxh, u quBʼaal, tuchʼ u quBʼaal JesuKriisto laʼ atin sekʼatza; tul aʼ laʼ motx aqʼon vibʼaʼnil tetaanima.

Uvaʼs talt Paʼp vinatxht Tiuxh tiʼ inqʼa niman tetz Jesuus

3Txhaqpaqetz etul sinkʼuul, tul nik vaqʼ taʼntiuxh te vinBʼaal Tiuxh setiʼ. 4Atz txhaqpaq innatxht Tiuxh, tul nik inchiibʼ tiʼ tabʼil te quBʼaal Tiuxh uvaʼ laʼ ilotxh ex sekaqaayil. 5Atz nik inchiibʼeʼ, tan eela nik qupaxsat u bʼaʼnla txhaq yol tiʼ Jesuus setuchʼ. Tul ayaʼx tzaan exeʼt uvaʼs etabʼit inqʼa bʼaʼnla txhaq yol tiʼ Jesuus, tul antxh nik ebʼane s-txheel. 6Tan tira vootzaqle uvaʼ tetxhalxh toq oleʼvoq u quBʼaal JesuKriisto tiʼ itzoqpixsal u bʼaʼnla aqʼon uvaʼ xeʼtisamal tzaan taʼn setiʼ, tetxhal topoon u qʼij uvaʼs laʼ tul inpaqte.

7Tul ikʼulelxhtuʼ uvaʼ nik inchiibʼ setiʼ sekaqaayil. Tan at ex t-vaanima. Tan nik innatxheʼ uvaʼ, eche ant ex inmol tiʼ ipaxsal inqʼa bʼaʼnla txhaq yol tuulbʼal uvaʼ at jaʼ in t-tzeʼ. Atz ant ex inmol nik innatxheʼ tuulbʼal uvaʼs yeʼ nik inkuyt tel iqʼij inqʼa bʼaʼnla txhaq yol vatz inqʼa nik itxhiʼaneʼ. Atz ant ex inmol nik innatxheʼ tiʼ vaqʼt ootzaqiloq vinuqul. Echetz ant ex inmol tiʼ ibʼanax u aqʼon uvaʼ qukʼul taʼn vibʼaʼnil quBʼaal Tiuxh. 8Tul tootzaql quBʼaal Tiuxh, atz antxh quBʼaal Tiuxh nik kʼutxhun, uvaʼ atxh vaanima setiʼ sekaqaayil. Tan ech uvaʼe nik taqʼ u quBʼaal JesuKriisto tu vaanima setiʼ.

9Tul nikat injaq te quBʼaal Tiuxh uvaʼ laʼ taqʼ tel etxumbʼal, atz laʼ taqʼ tel etootzaqibʼal tiʼ kam laʼ motx ebʼana, tiʼ uvaʼ atxh etaanima setiʼ sevatzaq. 10Atz laʼat bʼen sete kam laʼ ebʼan tiʼ echʼij tiʼ viyolbʼal quBʼaal Tiuxh. Tul inuqulxh laʼ motx etala kam uvaʼ at tetaanima. Echetz yeʼ laʼ itxhej invaʼq kantxhaqla yole setiʼ tu qʼij uvaʼs laʼ tul u quBʼaal JesuKriisto inpaqte. 11Aʼetz ekʼutxh vatz inqʼa xaol inqʼa jikla txumbʼal uvaʼ nik ilotxh ex u quBʼaal JesuKriisto tiʼ ibʼanaxeʼ. Echetz ekʼutxht, eche viʼoq tzeʼ uvaʼ miʼlelxh ivatz. Tan laʼ til inqʼa xaol u bʼaʼnla txumbʼal sekʼatza, echetz laʼ toksat iqʼije u quBʼaal Tiuxh, atz laʼ taqʼ bʼen s-nim.

Uvaʼs talt Paʼp uvaʼ tira ikʼayi tibʼ Paʼp tiʼ ibʼanax u taqʼon quBʼaal Jesuus, atz kʼuxh kamxh itzaʼlal laʼ palk tuulbʼal u qʼij isaq

12Jankʼal ex inmol s-niman tetz Jesuus, toqetz vaqʼ etootzaqi, kʼuxh mamala kuxh itzaʼlal nik palk in, aloq il inqʼa bʼaʼnla txhaq yol tiʼ Jesuus aʼl nik ipaxineʼ. 13Tul jitetz kuxh taʼne, pet aʼl mamala xaol ootzaqin tetz uvaʼ il in qitzel in s-kadeena tiʼ ipaxsal inqʼa bʼaʼnla txhaq yol tiʼ Jesuus. Tul jankʼalxh inqʼa sol, inqʼa molel tibʼ tu tatibʼal inqʼa xeen tetz u tatibʼal u mam iqʼesal, qat abʼin inqʼa bʼaʼnla txhaq yol tiʼ Jesuus. Tul mamala tel kuxh xaol, inqʼa at sinkʼatza, qat abʼin inqʼa bʼaʼnla txhaq yol tiʼ Jesuus.{*}#1.13 Aʼetz ibʼan inqʼa aj Rooma uvaʼ nikich motx taqʼ jaʼ vaʼl tatibʼal u mam iqʼesal tuul inqʼa tenam, inqʼa nikich motx tok jaqʼ ibʼekʼbʼal. Tuulbʼaletz u tatibʼal u mam iqʼesal, tan atich u atibʼal tetz ivatbʼal u mam iqʼesal. Atz atich atibʼal tetz tabʼibʼal. Atz atich atibʼal tetz ivatbʼal inqʼa sol; atz ataq kolbʼal kamaq tetz, eche iespaada. Atz atichaq nima vatzul atibʼal tal uvaʼ nik aqʼaxik jaʼ inqʼa pereexho t-tzeʼ. Tul tzitzietz ex aqʼlik jaʼ Paʼp t-tzeʼ tu tenam Filiipos. 14Aʼetz vet ibʼaʼnil vinqitzix jaʼ t-tzeʼ, tan mamala vet inqʼa niman tetz Jesuus yeʼlaq vet ixoʼval tiʼ ibʼant yaʼl tiʼ ipaxsat inqʼa bʼaʼnla txhaq yol uvaʼ tzajnaʼq xeʼ quBʼaal Tiuxh. Tan aʼl qat tiqʼot iyakʼil tiʼ ikʼuqbʼat ikʼuul tiʼ quBʼaal JesuKriisto.

15Poro nuqxhtuʼ uvaʼ at xaol nik paxsan inqʼa bʼaʼnla txhaq yol tiʼ Jesuus; pet aloq tuchʼ etxha ibʼ sinkʼatza nik ibʼanvat. Tan aʼ nik itxhiʼan tiʼ kam uvaʼ nik inbʼaneʼ. Pet at xaol nik paxsan inqʼa bʼaʼnla txhaq yol tiʼ Jesuus, tuchʼ ayaʼl ikʼuul. Tul yeʼxhkam nik itxhiʼan s-viʼ. 16Pet inqʼa xaol, inqʼa nik saʼon in, inqʼa yeʼl txhiʼanchil t-taanima tiʼ ipaxsal inqʼa bʼaʼnla txhaq yol tiʼ Jesuus, tan tootzaqle uvaʼ quBʼaal Tiuxh chʼexon in, tiʼ yeʼ inkuyt teesal iqʼij inqʼa bʼaʼnla txhaq yol tiʼ Jesuus te inqʼa xaol tuulbʼal uvaʼs at jaʼ in t-tzeʼ. 17Pet at jolt xaol nik paxsan inqʼa bʼaʼnla txhaq yol tiʼ Jesuus, aloq tuchʼ etxha ibʼ sinkʼatza nik ibʼanvat. Tul bʼane uvaʼ tuchʼ koqxh taanima nik ibʼanvat, pet at vaʼt nik titzʼa s-tiʼ. Tan aʼaq kuxh nik motx titzʼa uvaʼ aʼl tel laʼ intxumun, tiʼ uvaʼ qitzel jaʼ in t-tzeʼ. 18Poro yeʼxhkam nik vitzʼa s-tiʼ, kʼuxh at xaol uvaʼ tuchʼ txhiʼanchil nik ipaxsavat inqʼa bʼaʼnla txhaq yol tiʼ Jesuus, atz kʼuxh tuchʼ taanima nik ipaxsavat. Pet taʼn kuxh loqʼ uvaʼ il inqʼa bʼaʼnla txhaq yol tiʼ Jesuus nik ipaxsaleʼ. Niketz inchiibʼ s-tiʼ. Tul toq tel kuxh chiibʼoq in. 19Tan vootzaqle uvaʼ tiʼ venatxht Tiuxh s-viʼ, atz tuchʼ vilotxht in viTiuxhil quBʼaal JesuKriisto, tul toq txhaqpoq el in tu tzeʼ. 20Poro aʼ nik insaʼeʼ uvaʼ yeʼxhabʼil laʼ xoʼvisan in tiʼ valt vinuqul inqʼa yol tiʼ quBʼaal JesuKriisto s-txheel, eche uvaʼ nikichxh inbʼaneʼ uvaʼ tuchʼxh ayaʼl inkʼuul. Tan yeʼ insaʼ uvaʼ chʼixvebʼal laʼ elkaʼp in, oq laʼ xoʼvisal in; pet tuchʼxh tial laʼ valvat. Tan aʼ nik intxʼebʼ uvaʼ laʼ oksal iqʼij u quBʼaal JesuKriisto tiʼ kam uvaʼ toq yaʼk in, kʼuxh tuulbʼal uvaʼ itzʼlel in, atz kʼuxh maʼt inkameʼ. 21Tan tuulbʼal uvaʼ itzʼlel in, tul aʼ u quBʼaal JesuKriisto laʼ voksa iqʼij tuchʼ u vatineʼ. Atz oqetz laʼ kam vet in, tul vaʼl nimla txʼak s-ve laʼ ibʼana. 22Oqetz toq itzʼatxhoq tel in tuchʼ vintxhiʼoʼl vatz u txʼavaʼ, tul bʼaʼnetz kuxh s-ve. Tan aʼl tel toq inbʼant u taqʼon quBʼaal Tiuxh. Echetz yeʼ vet vootzaqle jabʼiste uvaʼ bʼaʼn s-ve. 23Tan kaʼvaʼlen uvaʼ nik txeyon in. Tan nik insaʼeʼ uvaʼ laʼ el bʼen in tzitza vatz u txʼavaʼ, tul laʼ bʼen in atinoq kʼatz u quBʼaal JesuKriisto. Tul aʼletz tira bʼaʼn s-ve. 24Pet aloq aʼlat bʼaʼn sete uvaʼ yeʼl in laʼ el bʼen in tzitza vatz u txʼavaʼ. Tan nik tel kuxh isaʼon sete uvaʼ atoq tel in sexoʼl. 25Poro kʼuqlel inkʼuul uvaʼ toq atinoq tel in vatz txʼavaʼ. Tul toq atinoq tel in sexoʼl sekaqaayil. Echetz toq etilt tel ibʼaʼnil inqʼa bʼaʼnla txhaq yole tiʼ Jesuus uvaʼ nik qunima. Tul laʼ chiibʼ ex s-tiʼ. 26Tul laʼatetz etoksa tel iqʼij u quBʼaal JesuKriisto uvaʼs laʼ vaqʼbʼ sexoʼl inpaqte.

27Pet aʼxh ebʼan yaʼl tiʼ tiqʼol vinuqul inqʼa bʼaʼnla txhaq yol tiʼ Jesuus uvaʼ ikʼulelxhtuʼ laʼ nimali. Tan kʼuxh laʼ aqʼbʼ in sexoʼl, atz kʼuxh yeʼle, pet taʼn kuxh nik insaʼeʼ laʼ vabʼi setiʼ uvaʼ txhabʼamal etxakeʼv tiʼ ebʼant vaʼl etitzʼabʼal, tul vaʼl eyol tiʼ yeʼ ekuyt tel iqʼij inqʼa bʼaʼnla txhaq yol tiʼ Jesuus, inqʼa nimamal vet qaʼn. 28Tul tira yeʼl ex laʼ xoʼv ex te inqʼa xaol, inqʼa nik maqon ex tiʼ inqʼa bʼaʼnla txhaq yol tiʼ Jesuus. Tan tzitzi nik motx ikʼutxhvat uvaʼ, aʼ vet u kʼaxkʼo kʼaqel taʼn. Pet ex, tan aʼ nik ekʼutxh veteʼ uvaʼ chitel vet ex vatz u kʼaxkʼo. Tan quBʼaal Tiuxh nik bʼanon. 29Tan u quBʼaal Tiuxh aqʼon vibʼaʼnil sete tiʼ ikuyux vepaʼv. Tan jit kuxh taʼn qat ibʼan quBʼaal Tiuxh venimat u quBʼaal JesuKriisto, pet qatat ikuy vepal titzaʼlal tiʼ inimaleʼ. 30Tul echat kuxh nik epale titzaʼlal taʼn inqʼa nitxhiʼan setiʼ, eche uvaʼ nikich etilt inpal titzaʼlal uvaʼs atich in sexoʼl. Tul ilate nik etabʼi paqte s-txheel uvaʼ il in nik in pal s-tuul inpaqte.#Vibʼanoʼm inqʼa Apoostol 16.22-24

Currently Selected:

Filipeenses 1: ixlC

Highlight

Copy

Compare