Efeesios 6

Uvaʼs taqʼt Paʼp itxumbʼal inqʼa nitxaʼ tuchʼ inqʼa bʼaala

1Atz echat exe inqʼa kʼaola, atz inqʼa meʼala, nimavaq etxutx ebʼaal, tan aʼetz u txumbʼale uvaʼ jikxh vatz quBʼaal Tiuxh. 2Tan ech nik tal viyolbʼal quBʼaal Tiuxh uvaʼ tzʼibʼamal ka s-eche: —Oksa iqʼij atxutx abʼaal, —chich u yol. Tan aʼ u bʼaxa bʼekʼbʼale uvaʼ tal ka quBʼaal Tiuxh tiʼ etilt u bʼaʼnil tiʼ vinimaleʼ. 3Oqetz ech laʼ ebʼane, tul bʼaʼnetz laʼ elkaʼp ex. Tul niimxh qʼij saq laʼ etil vatz u txʼavaʼ.#Eeksodo 20.12; Deuteronoomio 5.16

4Atz echat exe inqʼa bʼaala, yeʼ laʼ etulsa iviʼ inqʼa enitxaʼa. Pet laʼ echiansa s-te tiʼ imaqt tibʼ tiʼ ibʼanax inqʼa yeʼbʼaʼn. Atz laʼ etoksa t-bʼey tiʼ kam uvaʼ nik isaʼ quBʼaal Tiuxh.

Uvaʼs taqʼt Paʼp itxumbʼal inqʼa xaol, inqʼa loqʼel tok tiʼ aqʼon, atz inqʼa bʼaal aqʼon

5Atz echat kuxh exe, inqʼa aqʼonvil, ex inqʼa loqʼel etok tiʼ aqʼon, nimavaq inqʼa bʼaal etaqʼon vatz txʼavaʼ. Tul at tatin u bʼaal etaqʼon sevatz laʼ ebʼana. Atz jikxh ex laʼ ebʼan tiʼ ibʼanax u aqʼon. Tul aʼ laʼ ebʼana uvaʼ, eche taqʼon quBʼaal JesuKriisto nik ebʼaneʼ laʼ enatxha. 6Tul jit yaʼn laʼ etaqʼonveʼ uvaʼ sebʼt etilix taʼn u bʼaal etaqʼon, tiʼ etxhokt toksal eqʼij. Pet aqʼonvoq kuxh ex, kʼuxh yeʼl ex nik etilix taʼn u bʼaal aqʼon. Tul aʼ laʼ etitzʼa uvaʼ, eche ex taqʼonvil quBʼaal JesuKriisto laʼ ebʼana. Tul tuchʼxh etaanima laʼ aqʼonvik ex. Atz aʼ ebʼan kam uvaʼ nik isaʼ quBʼaal Tiuxh. 7Tul ayaʼlxh ekʼuul laʼ aqʼonv ex. Tul jit kuxh vatz invaʼq vinaq laʼ ebʼanvat u aqʼon, pet vatz quBʼaal JesuKriisto. 8Tan etootzaqle uvaʼ, aʼ laʼ taqʼ quBʼaal Tiuxh itxʼaqaʼm junun inqʼa xaol tiʼ kam u bʼaʼn uvaʼ qat ibʼana, kʼuxh loqʼel tok tiʼ aqʼon, atz kʼuxh jit loqʼel tokeʼ.

9Atz echat kuxh exe inqʼa bʼaal aqʼon, tan echat kuxh u bʼaʼnile laʼ ebʼan te inqʼa etaqʼonvil. Tanbʼavaq ixoʼvisal inqʼa etaqʼonvil. Ulsavaq sekʼuul uvaʼ at vaʼt eQʼesal tu amlikaʼ, aʼe u quBʼaal Tiuxh, uvaʼ at setiibʼa tuchʼ inqʼa etaqʼonvil. Tul yeʼl nim, atz yeʼl txhʼoj s-vatz.

Uvaʼs talt Paʼp uvaʼ, aʼ kolbʼal tibʼ inqʼa niman tetz Jesuus u nimla tiqleʼm quBʼaal Jesuus

10Poro toq val kaʼt iyaʼebʼal vinyol sete. Aʼ nik vale uvaʼ taʼnxh etxhokvat lotxhbʼal kʼatz u quBʼaal Jesuus. Tan taʼnxh laʼ eleqvat etial kʼatz u nimla tiqleʼm u quBʼaal Jesuus. 11Pet kolvaq etibʼ vatz inqʼa yaabʼla txumbʼal nik itxhok Satanaas tiʼ ekuʼ tu paʼv. Tul nuq txakbʼavaq etibʼ tuchʼ u tiqleʼm quBʼaal Tiuxh. Ech ebʼan, eche laʼ ikolt tibʼ vaʼq sol tuchʼ toksataq txhʼitxhʼ tetz kolbʼal ibʼ s-tiʼ. 12Tan jit tuchʼ invaʼq xaol uvaʼ at itxhiʼoʼl ikaqal nik qubʼanvat txhʼaʼo. Pet aʼ nik qutxhʼaʼoivat qibʼ tuchʼ jankʼal inqʼa demoonio, inqʼa nik ipal t-inqʼa amlikaʼ. Tan aʼ inqʼa iqʼesale, inqʼa nik ibʼekʼon tiibʼa jatvatzul inqʼa iqʼesal at vatz u txʼavaʼ, inqʼa yeʼ ootzaqin tetz quBʼaal Tiuxh. Tan aʼ inqʼa iqʼesal demoonioe, inqʼa nik itxhaqtziin tiibʼa jankʼal inqʼa mam iqʼesal, tiibʼa jankʼal inqʼa iqʼon iviʼ, atz tiibʼa jankʼal inqʼa bʼekʼonal, inqʼa itzʼlel tintanul inqʼa yaʼbʼ s-txheel, inqʼa ataq bʼen titzʼabʼal tu tokto.#Danieel 10.13

13Echetz nik valte sete uvaʼ bʼanbʼevaq jankʼal inqʼa kam uvaʼ nik taqʼ quBʼaal Tiuxh sete tiʼ ekolt etibʼ t-inqʼa qʼij uvaʼs laʼ itxhokt Satanaas yaabʼla txumbʼal tiʼ ekuʼ t-paʼv. Echetz laʼ etxʼakt epale t-inqʼa itzaʼlal uvaʼ laʼ ul setiibʼa. Kʼuxhetz laʼxh pal ex t-inqʼa itzaʼlal, poro ant nuq txakloq ex kʼatz quBʼaal Tiuxh.

14Echetz nik valte sete uvaʼ nuq txakloqxh ex tiʼ ekolt etibʼ vatz inqʼa itzaʼlal uvaʼ laʼ kʼaxbʼisan ex. Tul aʼxh laʼ enima vinuqul inqʼa bʼaʼnla txhaq yol tiʼ Jesuus, inqʼa tzajnaʼql kʼatz quBʼaal Tiuxh. Oqetz ech laʼ ebʼane, tul echetz nik ebʼane, eche ijekʼt sol xeʼ tuul tuchʼ u txhʼitxhʼ u kolbʼal xeʼ tuul.

Tul aʼxh laʼ ebʼan jabʼiste u jik nik tal viyolbʼal quBʼaal Tiuxh. Oqetz ech laʼ ebʼane, tul echetz nik ebʼane, eche toksat sol txhʼitxhʼ tziʼ taanima s-kolbʼal tibʼ.

15Tul bʼanoq kuxh etutxh tiʼ ipaxsal inqʼa bʼaʼnla txhaq yol uvaʼ nik oksan bʼaʼnil xoʼl inqʼa xaol tuchʼ quBʼaal Tiuxh. Oqetz ech laʼ ebʼane, tul echetz nik ebʼane, eche nik ibʼan invaʼq sol uvaʼ txhabʼamal kuxh tok ixaʼp taʼn.

16Tul ant kuxh kʼuqloq ekʼuul tiʼ u quBʼaal Jesuus tiʼ ekolt etibʼ vatz inqʼa yeʼbʼaʼn uvaʼ nik itxhok Satanaas setiʼ, tiʼ ekuʼ t-paʼv. Ech ekʼuqbʼat ekʼuul, eche nik ikʼuqbʼat invaʼq sol ikʼuul tiʼ u kolbʼal tibʼ uvaʼ atoʼk tiqʼabʼ. Tan aʼ u kolbʼal tibʼ invaʼq sol nik kolon vatz u xamal uvaʼ nik taqʼax tzaan s-tiʼ. Echetz aʼ vekʼuqbʼat ekʼuul tiʼ quBʼaal Jesuus laʼ kolon ex vatz vitxhokt Satanaas ekuʼ t-paʼv.

17Tul tira kʼuqbʼavaq ekʼuul uvaʼ chitel vet ex taʼn u quBʼaal Jesuus, tan aʼetz uvaʼe, laʼ maqon itxhokt Satanaas txumbʼal setiʼ. Oqetz ech laʼ ebʼane, tul echetz nik ebʼane, eche nik ikolt sol iviʼ tuchʼ u txhʼitxhʼ u kolbʼal tibʼ.

Tul aʼ viyolbʼal quBʼaal Tiuxh uvaʼ nik tulsa viTiuxhil Tiuxh sekʼuul laʼ etxakunsa tiʼ ekolt etibʼ vatz Satanaas, eche itxakunsat sol viespaada.

18Tul bʼenamen enatxht Tiuxh tuchʼ viTiuxhil. Tul nima vatzlen kuxh natxho Tiuxh laʼ ebʼana. Tul aʼ laʼ etal te quBʼaal Tiuxh kam uvaʼ laʼ tulsa viTiuxhil Tiuxh sekʼuul. Tul itzʼloq ex, atz bʼiitxhaqul tuul laʼ enatxht Tiuxh. Tul laʼ etoksa etibʼ vatz quBʼaal Tiuxh tiʼ ejaqt lotxhbʼal tiʼ jankʼal inqʼa niman tetz Jesuus, inqʼa chʼexel vet taʼn.

19Atz laʼat enatxh Tiuxh s-viʼ. Tul Tiuxh laʼ bʼanon uvaʼ jikxh laʼ valt inqʼa yol uvaʼs laʼ inyoloneʼ. Atz yeʼl inxoʼval tiʼ vaqʼt ootzaqiloq inqʼa bʼaʼnla txhaq yol tiʼ Jesuus, inqʼa yaʼn nik taqʼ quBʼaal Tiuxh ootzaqiloq. 20Tiʼetz taqʼax ootzaqiloq inqʼa bʼaʼnla txhaq yol tiʼ Jesuus te inqʼa xaol, tul aʼ in ivatzil u quBʼaal Jesuus. Tiʼetz kuxh vaqʼt ootzaqiloq inqʼa bʼaʼnla txhaq yol s-tiʼ, tul il in qitzel in s-kadeena. Echetz natxhvaq Tiuxh s-viʼ, tiʼ uvaʼ yeʼl in laʼ xoʼv in tiʼ talax inqʼa bʼaʼnla txhaq yol tiʼ Jesuus. Tan aʼ uvaʼe, ikʼulel laʼ inbʼana.

Uvaʼs taqʼt bʼen Paʼp bʼaʼnil ikʼuul inqʼa niman tetz Jesuus, tul yaʼ vet tiʼ itzʼibʼal bʼen viyol

21Iletz Tiikiko nik intxhaq bʼen sexoʼl tiʼ bʼen taqʼt ootzaqiloq tel inqʼa yol sete, inqʼa nik palk in, atz kam inqʼa nik inbʼaneʼ. Tan niman tetz Jesuus Tiikiko, uvaʼ nik inchiibʼ s-tiʼ, atz uvaʼ kʼuqlebʼxh kʼuul tatin sinkʼatza tiʼ inlotxhox tiʼ ibʼanax u taqʼon quBʼaal Jesuus. 22Xaʼtetze nik intxhaq bʼen Tiikiko sexoʼl tiʼ etootzaqitaʼ kame uvaʼ nik qupalebʼe tzitza. Aʼetz Tiikiko bʼen kʼuqbʼan ekʼuul tuchʼ inqʼa yol.

23Tul aʼ u Tiuxh, u quBʼaal, tuchʼ u quBʼaal JesuKriisto, laʼ aqʼon vibʼaʼnil tetaanima, ex inqʼa niman tetz. Atz aʼ laʼ bʼanon uvaʼ at etaanima setiʼ sevatzaq. Tul aʼat laʼ bʼanon uvaʼ laʼ ekʼuqbʼa ekʼuul s-tiʼ. 24Tul aʼ vibʼaʼnil quBʼaal Tiuxh laʼ atin sekʼatza, jankʼal ex inqʼa at etaanima tiʼ u quBʼaal JesuKriisto, uvaʼ yeʼl paqul laʼ eleʼl etaanima s-tiʼ.

[Tul echxh laʼ ibʼane.]

Currently Selected:

Efeesios 6: ixlC

Highlight

Copy

Compare