Filemoon ALBʼAL INUQUL U YOL TIʼ U Uʼ
ALBʼAL INUQUL U YOL TIʼ U Uʼ
FILEMOON
Uvaʼs toq qootzaqitaʼ jaʼl tzʼibʼan u uʼ Filemoon
Aʼetz u uʼe uvaʼ Filemoon ibʼij, uvaʼ itzʼibʼa Paʼp. Tan antxh u uʼ nik alon uvaʼ Paʼp tzʼibʼan, eche uvaʼ nik tal tu Filemoon 1 tuchʼ 19.
Uvaʼs toq qootzaqitaʼ kam s-tuul tzʼibʼal u uʼ Filemoon
Aʼetz itzʼibʼat Paʼp u uʼ Filemoon tuulbʼal u yaʼbʼ vaʼl imutxʼ (61) m.t.J. Tul aʼ itzʼibʼavat Paʼp tu mam tenam Rooma uvaʼs atich jaʼ Paʼp t-tzeʼ tiʼ ipaxsal inqʼa bʼaʼnla txhaq yol tiʼ Jesuus tuulbʼal uvaʼs atich ok Neroon s-mam iqʼesal tu mam tenam Rooma. Eenichetz Filemoon tu tenam Koloosas tuulbʼal Aasia uvaʼs taqʼt opoon Paʼp u tuʼ te Filemoon. Aʼetz Tiikiko iqʼon bʼen u tuʼ Paʼp te Filemoon.
Uvaʼs toq qootzaqitaʼ kame u taqʼil vitxhusun Paʼp tuul u tuʼ Filemoon
Tuulbʼaletz uvaʼs atich vet jaʼ Paʼp t-tzeʼ, tul aqʼbʼ val u vinaq tu tzeʼ tal uvaʼ atich Paʼp. Tan aʼ u vinaq ojqʼeʼl xeʼ bʼaal taqʼon. Echetz s-tiʼile ex aqʼaxoq vet jaʼ t-tzeʼ. Oneesimoich ibʼij u vinaq. Poro taqʼonvilich bʼak Filemoon, val u niman tetz Jesuus uvaʼ aj Koloosasiche. Tul tootzaqich tibʼ Filemoon tuchʼ Paʼp, tan nikich tex Paʼp xeʼ Filemoon. Pet eenichetz Paʼp t-tzeʼ, tul tal vet Paʼp inuqul viyolbʼal quBʼaal Tiuxh te Oneesimo. Tul oketz vet Oneesimo s-niman tetz Jesuus. Tootzaqietz vet Paʼp uvaʼ taj aqʼonvilich Filemoon Oneesimo. Tan loqʼelich tok Oneesimo tiʼ aqʼon taʼn Filemoon. Tul antxh aj Koloosas Oneesimo paqte, eche uvaʼ nik tal t-Koloseenses 4.9. Echetz s-tiʼile aʼich isaʼ vet Paʼp uvaʼ laʼich ikuy Filemoon ipaʼv Oneesimo. Atz laʼich ikʼul Filemoon Oneesimo inpaqte. Tul tira nikich iyaʼlu Paʼp te Filemoon uvaʼ laʼich ikʼul Filemoon Oneesimo inpaqte. Tul tira atich tatin Paʼp vatz Filemoon, tan aʼ Paʼp alon inqʼa bʼaʼnla txhaq yol tiʼ Jesuus te Filemoon. Echetz toksat vet tibʼ Filemoone s-niman tetz Jesuus.
Uvaʼs toq qootzaqitaʼ kam ulbʼemal ijatxp ixoʼl inqʼa yol tu uʼ Filemoon
U uʼ Filemoon, uvaʼ itzʼibʼa ka Paʼp, tan oxvaʼlen tanul elnaʼq inqʼa yol uvaʼ nik tal s-tuul.
Filemoon 1-3
Aʼetz ixeʼtebʼe Paʼp talax tiʼ jaʼl nik tzʼibʼan u uʼ, tul jaʼl nik kʼulun. Yaʼne nik taqʼ vet bʼen Paʼp bʼaʼnil ikʼuul Filemoon tuchʼ tixqel, atz tuchʼaq initxaʼa. Tul nik taqʼ bʼaʼnil ikʼuul inqʼa niman tetz Jesuus inqʼa nikich imol tibʼ t-totzotz Filemoon.
1. Filemoon 4-7
U bʼaxa tanul yol, tan aʼ tal Paʼp, tiʼ uvaʼ nik taqʼ Paʼp taʼntiuxh te quBʼaal Tiuxh tiʼ Filemoon. Tan at taanima Filemoon tiʼ inqʼa niman tetz Jesuus, inqʼa nikich imol tibʼ tu tenam Koloosas. Tul aʼl nikich itxhej itial Paʼp taʼn.
2. Filemoon 8-11
Vikaʼv tanul yol, tan aʼ tal Paʼp, tiʼ u talt bʼen te Filemoon uvaʼ laʼ ikuy Filemoon ipaʼv Oneesimo tiʼ jankʼal inqʼa el Oneesimo t-bʼey s-tiʼ. Tul laʼ ikʼul Filemoon Oneesimo inpaqte tu totzotz. Tan aʼ nik elkaʼp vibʼij Oneesimo uvaʼ: ‹At itxakunbʼal,› chiche. Echetz talt vet Paʼpe uvaʼ aʼl niim vet itxakunbʼal Oneesimo te Filemoon laʼ ibʼana, tiʼ uvaʼ niman tetz Jesuusich vet Oneesimo.
3. Filemoon 12-16
Vitoxv tanul yol, tan aʼ tal Paʼp, tiʼ uvaʼ nikich isaʼ Paʼp uvaʼ laʼich kaj Oneesimo kʼatz Paʼp tiʼ ilotxhoxeʼ. Pet aʼe tan, yeʼxhkam abʼimalich te Filemoon taʼn Paʼp. Xaʼtetze titzʼa vet Paʼp uvaʼ bʼaxa laʼich tabʼi Paʼp te Filemoon. Pet aloq aʼ titzʼa vet Paʼp uvaʼ kamal niimich vet itxakunbʼal Oneesimo laʼich ibʼan veteʼ, tan maʼtich ijalp vet itxumbʼal Oneesimo.
4. Filemoon 17-21
Vikajv tanul yol, tan aʼ tal Paʼp, tiʼ uvaʼ oq at itxʼoq Oneesimo xeʼ Filemoon, tul aʼ vet Paʼp laʼ txhoon te Filemoon.
Filemoon 22-25
Tiyaʼtebʼaletz vet viyolon Paʼp, tul nik taqʼ bʼen Paʼp bʼaʼnil ikʼuul Filemoon. Tul ant Epaafras tuchʼ Kuxh tuchʼ Aristaarko tuchʼ Deemas tuchʼ Luk aqʼon bʼen bʼaʼnil ikʼuul Filemoon.
Currently Selected:
Filemoon ALBʼAL INUQUL U YOL TIʼ U Uʼ: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.