Filemoon 1

FILEMOON

Uvaʼs taqʼt bʼen Paʼp bʼaʼnil ikʼuul Filemoon

1In Paʼp; il in pereexho in tiʼ ibʼanax u taqʼon quBʼaal JesuKriisto. Inmol vibʼ tuchʼ Timoteeo, u qumol s-niman tetz Jesuus.

Nik intzʼibʼa bʼen val u uʼ see, Filemoon, axh, uvaʼ at vaanima seʼe, atz axh, uvaʼ ant axh lotxhol qetz tiʼ u taqʼon quBʼaal JesuKriisto.

2Atz nikat intzʼibʼa bʼen u uʼ te ixoq Aapia, u qumol s-niman tetz Jesuus, [uvaʼ at vaanima s-tiʼ.]

Atz nikat intzʼibʼa bʼen u uʼ te Arkiipo, u qumol tiʼ ibʼanax yaʼl tiʼ viyolbʼal quBʼaal Tiuxh, eche vaʼq sol uvaʼ nik ibʼan yaʼl tiʼ ibʼanax txhʼaʼo.

Atz nikat intzʼibʼa bʼen u uʼ te inqʼa niman tetz Jesuus, inqʼa aʼ nik ikʼulvat tibʼ tavotzotz.

3Tul aʼ vibʼaʼnil u Tiuxh, u quBʼaal, laʼ atin sexoʼl, atz tuchʼ vibʼaʼnil quBʼaal JesuKriisto. Tul laʼ atin vibʼaʼnil tetaanima jununil ex.

Uvaʼs taqʼt Paʼp taʼntiuxh te Tiuxh tiʼ visaʼt Filemoon inqʼa niman tetz Jesuus

4Nik vaqʼ taʼntiuxh te quBʼaal Tiuxh, tul txhaqpaq nik viqʼo tzaan axh s-tuul, uvaʼs nik innatxht Tiuxh. 5Tan nik vabʼi uvaʼ kʼuqlelxh akʼuul tiʼ quBʼaal Jesuus. Tul nik vabʼi uvaʼ atxh avaanima tiʼ inqʼa niman tetz Jesuus. 6Tul nikat vabʼi te quBʼaal Tiuxh seʼe uvaʼ laʼ til tel inqʼa niman tetz Jesuus ibʼaʼnil vakʼuqbʼat akʼuul tiʼ quBʼaal JesuKriisto. Tul aʼ laʼ motx til inqʼa niman tetz Jesuus inqʼa bʼaʼnla txhaq txumbʼal uvaʼ at vet sakʼatza. Tul tiʼ tilt vabʼaʼnla txumbʼal, tul laʼat ibʼan vet tetz. Tan niim tel kuxh bʼaʼnla txumbʼal laʼ utxh ebʼantaʼ tiʼ vekʼuqbʼat ekʼuul tiʼ quBʼaal JesuKriisto.

7Axh, inmol s-niman tetz Jesuus, tiʼetz uvaʼ, atxh avaanima tiʼ inqʼa xaol, tul tira nik inchiibʼ s-tiʼ. Tul nik aaqʼ intial s-tuchʼ. Tul nikat aaqʼ intial paqte, tiʼ uvaʼ nik aaqʼ itial inqʼa niman tetz Jesuus.

Uvaʼs toksat tibʼ Paʼp tiʼ Oneesimo

8Pet, tiʼetz uvaʼ, atxh avaanima tiʼ inqʼa niman tetz Jesuus, tul toq injaq vaʼl bʼaʼnil see. Kʼuxh at vokebʼal, atz at viqleʼm taʼn quBʼaal JesuKriisto tiʼ abʼekʼex tiʼ ibʼanax kam uvaʼ ikʼulel laʼ abʼana, pet aloq yeʼletz axh laʼ inbʼekʼ axh. 9Pet nik injaq bʼaʼnil see tiʼ uvaʼ atxh vaanima seʼe, atz atatxh avaanima s-viʼ. Tul aʼetz koq vet s-txheel, tan il in qʼesbʼiy vet in. Tul il in at jaʼ in t-tzeʼ tiʼ ibʼanax u taqʼon quBʼaal JesuKriisto. 10Pet toqetz injaq bʼaʼnil see tiʼ Oneesimo uvaʼ, eche vaʼq inkʼaol tatin sinvatz, tan in qat alon inqʼa bʼaʼnla txhaq yol s-te tiʼ quBʼaal JesuKriisto. Tul qat ok vet s-niman tetz Jesuus tuulbʼal uvaʼs at jaʼ in t-tzeʼ s-tuchʼ. 11Yeʼxhkamichetz itxaʼk Oneesimo savatz s-jatxhaq tzaan. Pet s-txheel, tan at vet itxaʼk s-ve, atz see inpaqte toq ibʼaneʼ.{*}#11 Atetz talaxe u bʼij Oneesimo tu yolbʼal grieego. Aʼ nik elkaʼpun s-eche: ‹At itxakunbʼal,› chiche. Echetz s-tiʼile nik tiqʼo tzaan Paʼp u yol uvaʼ yeʼxhkamich itxaʼk, pet s-txheel, tan at vet itxaʼk.

12Tan toq intxhaq bʼen Oneesimo inpaqte saxeʼ, uvaʼ at vaanima s-tiʼ. Kʼuletza, tul eche in laʼ akʼul in laʼ anatxha. 13Nik insaʼeʼ uvaʼ laʼ kaj Oneesimo sinkʼatza. Tul laʼ ilotxh in savatzil tuulbʼal uvaʼ at jaʼ in t-tzeʼ tiʼ ipaxsal inqʼa bʼaʼnla txhaq yol tiʼ Jesuus. 14Pet yeʼ laʼ isaʼa uvaʼ laʼ kuxh inbʼan sinjunal, tul oq jit axh laʼ alon. Tan yeʼ laʼ utxhi uvaʼ, aʼ, in laʼ yaʼlun axh tiʼ u bʼaʼnil. Pet bʼaʼn uvaʼ tavaanimaxh laʼ tzaj ka. 15Tan kamal quBʼaal Tiuxh qat kuyun uvaʼ qat el bʼen Oneesimo joloq qʼij saxeʼ, tiʼ uvaʼ laʼ ootzaqil inqʼa bʼaʼnla txhaq yol tiʼ Jesuus taʼn. Tul tira laʼ atin vet saxeʼ s-bʼenamen toq ibʼaneʼ. 16Tan jit vet eela Oneesimo tuchʼ invaʼq xaol uvaʼ loqʼel tok tiʼ aqʼon toq ibʼan saxeʼ. Pet palnaʼq vet tatin viʼ vaʼl xaol uvaʼ loqʼel tok tiʼ aqʼon, tan niman vet tetz Jesuus. Tul atetz vet vaanima s-tiʼ, atz niim vet talax sinvatz. Aʼetz koq axh, tan niimat vet talax savatz toq ibʼaneʼ, tiʼ uvaʼ avaqʼonvil, atz tiʼ uvaʼ qumol vet s-niman tetz quBʼaal Jesuus.

17Niketz injaq vaʼl bʼaʼnil see, tiʼ uvaʼ, axh inmol s-bʼanol taqʼon quBʼaal JesuKriisto, tul kʼul Oneesimo inpaqte. Tul eche in laʼ akʼul in laʼ anatxha. 18Oqetz kam invaʼq yeʼbʼaʼn tulbʼe ka axh, atz maq at itxʼoq saxeʼ, aʼetz vet in, laʼ iqatzin itxhojpeʼ. 19In nik tzʼibʼan vet bʼen u yol see inqʼaa, tuchʼ inqʼabʼ: Intxhojeʼn vitxʼoq Oneesimo see. Pet aloq jit aʼ laʼ val txha vet see, tiʼ uvaʼ at atxʼoq siinxeʼ, tiʼ uvaʼ in along bʼaʼnla txhaq yol see tiʼ quBʼaal JesuKriisto, tul ok vet axh s-niman tetz Jesuus. 20Pet bʼan bʼaʼnil s-ve, txa inmol s-niman tetz Jesuus. Tul aqʼ itial vatz vaanima tiʼ akʼult Oneesimo inpaqte. Tan vaʼl kuxh qatin tuchʼ quBʼaal JesuKriisto savuchʼ.

21Niketz intzʼibʼa bʼen u yol see, tan vootzaqle uvaʼ toq abʼaneʼ kam uvaʼ nik valeʼ. Tul vootzaqle uvaʼ palnaʼq tel u bʼaʼnil toq abʼaneʼ, tiʼ uvaʼ nik val see.

22Tul laʼat abʼan tutxh vatibʼal tal uvaʼ laʼ atink in. Tan nik intxʼebʼeʼ uvaʼ, tiʼ venatxht Tiuxh s-viʼ, tul toq txhaqpik in. Tul laʼ aqʼbʼ in sexoʼl inpaqte.

Uvaʼs taqʼt bʼen Paʼp bʼaʼnil ikʼuul Filemoon tul yaʼ vet tiʼ itzʼibʼal bʼen viyol

23Nik taqʼ bʼen Epaafras bʼaʼnil akʼuul, vinmol uvaʼ at jaʼ in t-tzeʼ s-tuchʼ tiʼ ibʼanax u taqʼon quBʼaal JesuKriisto. 24Atz nikat taqʼ bʼen Kuxh bʼaʼnil akʼuul tuchʼ Aristaarko, tuchʼ Deemas, atz tuchʼ Luk, inqʼa lotxholaq vetz tiʼ u taqʼon quBʼaal JesuKriisto.

25Tul aʼ vibʼaʼnil u quBʼaal JesuKriisto laʼ atin tetaanima.

[Tul echxh laʼ ibʼane.]

Currently Selected:

Filemoon 1: ixlC

Highlight

Copy

Compare