Evreeos ALBʼAL INUQUL U YOL TIʼ U Uʼ
ALBʼAL INUQUL U YOL TIʼ U Uʼ
EVREEOS
Uvaʼs toq qootzaqitaʼ jaʼl tzʼibʼan u uʼ Evreeos
U uʼ Evreeos, tan yeʼ nik ilotxh oʼ tiʼ tootzaqileʼ jaʼl tzʼibʼan. Tan yeʼ nik tal tibʼ u tzʼibʼan tetz tuul u uʼ jaʼl uvaʼ tzʼibʼan. Tul yeʼxhal inqʼa bʼaxa niman tetz Jesuus nik alon inuqul tiʼ jaʼl tzʼibʼan u uʼ Evreeos. Echetz nimalen kuxh bʼij nik talaxeʼ tiʼ jaʼl tzʼibʼan u uʼ. Tan nik talaxeʼ uvaʼ Paʼp tzʼibʼan. Atz nik talaxeʼ uvaʼ Luk. Atz nik talax paqte uvaʼ Vernavee. Tul nikat talaxeʼ uvaʼ Siilas tzʼibʼan. Atz nik talaxeʼ uvaʼ Piʼl. Atz nikat talaxeʼ uvaʼ Apoolos tzʼibʼan u uʼ Evreeos.
Jatvaʼletz inqʼa nik talax s-tzʼibʼan tetz u uʼ Evreeos, poro jitetz ayaʼl inqʼae tzʼibʼan. Pet taʼn kuxh nik txhejk iyakʼil u yol, tiʼ uvaʼ antxh Paʼp tzʼibʼan. Tan aʼ nik aqʼon iyakʼil u yol uvaʼ nik tiqʼol tzaan Timoteeo s-tuul. Ech uvaʼe nik tal tu Evreeos 13.23. Pet taʼnetz kuxh laʼ qukʼuqbʼa qukʼuul, s-tiʼ uvaʼ kamal vaʼq inqʼa apoostol tzʼibʼan, atz maq aʼ vaʼq imol inqʼa iapoostol quBʼaal Jesuus. Tul aʼ laʼ qukʼuqbʼa qukʼuul, s-tiʼ uvaʼ, aʼ viTiuxhil Tiuxh alon te u tzʼibʼan tetz. Echetz yeʼl oʼ laʼ kuxh eloʼkin qitzʼabʼal tiʼ yeʼ qukʼuqbʼat qukʼuul tiʼ u uʼ Evreeos.
Uvaʼs toq qootzaqitaʼ kam s-tuul tzʼibʼal u uʼ Evreeos
Tul kamal aʼ itzʼibʼal u uʼ Evreeos tuulbʼal u yaʼbʼ oʼvaʼl imutxʼ (65) m.t.J. Yeʼxhabʼiletz invaʼq ootzaqin tetz tal tzʼibʼalik u uʼ Evreeos. Tan nik talaxeʼ uvaʼ, aʼ tzʼibʼalik tu tenam Alejandriia tuulbʼal Ejiipto tal uvaʼ jeqlich mamala tijaq imam Israeel. Tul aʼ aqʼaxik bʼen u uʼ te inqʼa niman tetz Jesuus tu mam tenam Rooma.
Pet at jolt utxhchil nik alon uvaʼ, aʼ tzʼibʼalik u uʼ Evreeos tu mam tenam Rooma. Tan aʼ nik tiqʼol tzaan u yol uvaʼ nik tal tuul u uʼ uvaʼ ech nik tal s-eche: —Nik taqʼ bʼen inqʼa niman tetz Jesuus bʼaʼnil ekʼuul, ex inqʼa aj Itaalia, —chich tuul u uʼ. Ech uvaʼe nik tal tu Evreeos 13.24.
Kʼuxhetz yeʼ ootzaqimal jaʼl tzʼibʼan u uʼ, pet aloq aʼ nik tal u uʼ uvaʼ te jolol inqʼa tij imam Israeel uvaʼ maʼtich tok s-niman tetz Jesuus.
Uvaʼs toq qootzaqitaʼ kame u taqʼil vitxhusun u uʼ Evreeos
Aʼetz u taqʼil viyol u tzʼibʼan tetz u uʼ Evreeos, tiʼ uvaʼ, aʼ quBʼaal Jesuus u Mesiias. Aʼe, uvaʼ ul jeqbʼan u kaʼv iyol quBʼaal Tiuxh tuchʼ inqʼa niman tetz. Atz nikat ibʼan u tzʼibʼan tetz u uʼ Evreeos yaʼl te inqʼa niman tetz Jesuus, tiʼ uvaʼ yeʼ laʼ itanbʼa inimal inqʼa bʼaʼnla txhaq yol tiʼ Jesuus.
Tul nikat tal u tzʼibʼan tetz u uʼ Evreeos te inqʼa tij imam Israeel, tiʼ uvaʼ tira palnaʼq tiqleʼm Jesuus viʼ jolt inqʼa qʼexsan tetz iyol quBʼaal Tiuxh. Palnaʼq tiqleʼm quBʼaal Jesuus viʼ inqʼa aanxel; atz palnaʼq tiqleʼm viʼ Melkisedeek, uvaʼ, aʼiche u oksan yol vatz Tiuxh tuulbʼal uvaʼs atich Avraʼaam vatz txʼavaʼ; atz palnaʼq tiqleʼm viʼ Moisees; atz palnaʼq tiqleʼm viʼ inqʼa qʼesal oksan yol vatz Tiuxh xoʼl inqʼa tij imam Israeel t-Jerusaleen.
Atz nikat tal u tzʼibʼan tetz u uʼ Evreeos te inqʼa tij imam Israeel, inqʼa niman tetz Jesuus, tiʼ uvaʼ yeʼ laʼ intanbʼa ikʼuqeʼv ikʼuul tiʼ inimal u kaʼv iyol quBʼaal Tiuxh, uvaʼ ijeqbʼa tiʼ u quBʼaal Jesuus. Tan tetxhal laʼ til ibʼaʼnil vinimaleʼ, eche uvaʼ toq tilt jolol inqʼa kʼuy imam vibʼaʼnil vikʼuqbʼat ikʼuul tiʼ viyol quBʼaal Tiuxh. Ech uvaʼe, nik tal tu kapiitulo 11.
Uvaʼs toq qootzaqitaʼ kam ulbʼemal ijatxp ixoʼl inqʼa yol tu uʼ Evreeos
U uʼ Evreeos, tan vajxaqlen nimla tanul elnaʼq inqʼa yol uvaʼ nik tal s-tuul.
1. Evreeos 1.1-14; 2.5-9
U bʼaxa txumbʼal nik tal u tzʼibʼan tetz u uʼ Evreeos, uvaʼ, aʼ quBʼaal Jesuus palnaʼq tiqleʼm viʼ inqʼa aanxel. Tan aʼ nikich inima inqʼa tij imam Israeel uvaʼ, aʼ inqʼa aanxel niimich tiqleʼm.
2. Evreeos 2.1-4; 3.7-19; 5.11—6.20; 12.1-29
Vikaʼv txumbʼal nik tal u tzʼibʼan tetz u uʼ Evreeos, uvaʼ yeʼ la itanbʼa inqʼa niman tetz Jesuus ikʼuqeʼv ikʼuul tiʼ quBʼaal Jesuus.
3. Evreeos 3.1-6; 4.14-16; 5.1-10
Vitoxv txumbʼal nik tal u tzʼibʼan tetz u uʼ Evreeos, uvaʼ, aʼ quBʼaal Jesuus palnaʼq tiqleʼm viʼ Moisees, atz viʼ inqʼa iqʼesal oksan yol vatz Tiuxh xoʼl inqʼa tij imam Israeel, eche uvaʼ ibʼan Moisees tuchʼ Aroon s-bʼaxa, kʼuxh sibʼichaq tiqleʼm tiʼ toksal yol vatz quBʼaal Tiuxh vatz inqʼa tij imam Israeel.
4. Evreeos 4.1-13
Vikajv txumbʼal nik tal u tzʼibʼan tetz u uʼ Evreeos, tiʼ u ilanchil uvaʼ laʼ ibʼan inqʼa niman tetz Jesuus.
5. Evreeos 7.1-28
Vitoʼv txumbʼal nik tal u tzʼibʼan tetz u uʼ Evreeos uvaʼ, aʼ u quBʼaal Jesuus palnaʼq tiqleʼm viʼ Melkisedeek, viqʼesal oksan yol vatz Tiuxh. Tan aʼ quBʼaal Jesuus ul taqʼ tibʼ kamoq vatz kurus tiʼ itxhoox vipaʼv inqʼa xaol, sivatzil inqʼa txoo uvaʼ nikich toksal vatz quBʼaal Tiuxh tiʼ itxhoox vipaʼv inqʼa xaol. Pet aʼe tan, yeʼ nikich ibʼix tiviʼ inqʼa tij imam Israeel uvaʼ, aʼ u Kriisto laʼich ul taqʼ tibʼ kʼaxbʼoq tiʼ itxhoox inqʼa ipaʼv.
6. Evreeos 8.1-13; 9.1—10.39
Vivaqaq txumbʼal nik tal u tzʼibʼan tetz u uʼ Evreeos, uvaʼ laʼich bʼen te inqʼa niman tetz Jesuus, uvaʼ, aʼ vet vikam quBʼaal Jesuus vatz kurus ul jeqbʼan vikaʼv iyol quBʼaal Tiuxh, tiʼ uvaʼ jununil vet niman tetz Jesuus laʼ natxhkʼuulan quBʼaal Tiuxh. Tul aʼ vet vikaʼv iyol quBʼaal Tiuxh bʼen sivatzil u bʼaxa iyol quBʼaal Tiuxh; aʼe inqʼa bʼekʼbʼal uvaʼ itzʼibʼa ka Moisees.
Pet aʼe tan, oqxh itzaʼlal teleʼl tiviʼ inqʼa tij imam Israeel uvaʼ tira laʼich motx taqʼ ka inimal vet inqʼa bʼekʼbʼal, tul aʼ laʼ inima vet kam uvaʼ ul ijeqbʼa quBʼaal Jesuus. Tan kamal atich joloq niman tetz Jesuus nikich iqʼaʼv tiʼ inimal inqʼa bʼekʼbʼal. Xaʼtetze nikich taqʼ u tzʼibʼan tetz u uʼ Evreeos itxumbʼal inqʼa niman tetz Jesuus, tul yeʼ laʼ motx qʼaʼv vet paqte tiʼ inimal inqʼa bʼekʼbʼal.
7. Evreeos 11.1-40
Vijuqv txumbʼal nik tal u tzʼibʼan tetz u uʼ Evreeos te inqʼa niman tetz Jesuus tiʼ taqʼax itial tiʼ ikʼuqeʼv ikʼuul tiʼ inimal u quBʼaal Tiuxh, eche uvaʼ ibʼan jolol inqʼa tij imam Israeel. Tul kʼuxh bʼeeno nikich ikʼaxbʼisal inqʼa niman tetz Jesuus tzitza vatz u txʼavaʼ, tan tetxhal laʼich motx ibʼan yaʼl tiʼ inimal quBʼaal Jesuus. Tul tetxhal laʼich motx bʼen til u mam bʼaʼnil kʼatz quBʼaal Tiuxh.
8. Evreeos 13.1-21
Vivajxaq txumbʼal nik tal u tzʼibʼan tetz u uʼ Evreeos, aʼe tiʼ jatvatzul inqʼa txumbʼal, jankʼal eche tiʼ isaʼt tibʼ inqʼa niman tetz Jesuus s-tibʼilaq.
Evreeos 13.22-25
Tiyaʼtebʼaletz vet viyolon u tzʼibʼan tetz u uʼ Evreeos, nik taleʼ uvaʼ laʼ ikʼotxʼ inqʼa sikʼlen tetz u uʼ ivatz tiʼ inqʼa iyol. Atz nikat tal paqte tiʼ vitxhaqpeʼl Timoteeo t-tzeʼ. Tul nik tal bʼen bʼaʼnla yol tiʼ inqʼa niman tetz Jesuus, inqʼa Evreeos, inqʼa kʼulun u uʼ.
Currently Selected:
Evreeos ALBʼAL INUQUL U YOL TIʼ U Uʼ: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.