Santiaago 4

Uvaʼs talt Santiaago uvaʼ jit aʼ laʼ bʼenk taanima inqʼa niman tetz Jesuus tiʼ inqʼa paʼv uvaʼ nik ibʼan inqʼa xaol vatz txʼavaʼ inqʼa yeʼ ootzaqimal quBʼaal Jesuus taʼn

1¿Keʼchetz nik itxhej u txhʼaʼo tuchʼ u yao ibʼ sexoʼl nik enatxheʼ? Toq val sete tal nik txhejka. Aʼetz nik txhejk tiʼ kam uvaʼ nik etatxhva. Tan mam etxha ibʼ nik ibʼan u atxhaʼv sekʼatza tuchʼ u jikla itzʼabʼal uvaʼ nik isaʼ quBʼaal Tiuxh laʼ ebʼana. 2Tan nik motx etatxhva itxhej kam etetz, poro yeʼ nik motx eleqeʼ. Yaʼne nik exeʼt vet txhiʼan tiʼ iyatzʼax el vemol uvaʼ at tetz. Tul kʼuxh qatxh etitzʼa s-eche, poro jitoq qat oleʼv ex tiʼ itxhej kam etetz. Kʼuxhetz nik ebʼan yaʼl, atz nik etxhʼaʼoin tiʼ itxhej kam uvaʼ nik esaʼeʼ, poro jitoq qat oleʼv ex tiʼ kam uvaʼ nik etatxhva, tiʼ uvaʼ tan, yeʼ nik etabʼi te quBʼaal Tiuxh.

3Atz kʼuxhetzxh nik motx etabʼi te quBʼaal Tiuxh, poro yeʼ nik motx ekʼuleʼ, tiʼ uvaʼ tan, aʼ kuxh vetetz nik etoksa s-tiʼ. Tan ajtetz qat aqʼax sete, tul aʼ qat esotzsavat tiʼ kam uvaʼ nik etatxhva tiʼ etoksat eqʼij.

4Echetz jit kʼuqlebʼal kʼuul ex vatz u quBʼaal Tiuxh, eche invaʼq u xaol uvaʼ nik iyansa tibʼ tuchʼ uvaʼ jitich ikʼulel tibʼ s-tuchʼ. Tan etootzaqle tiʼ jaʼl uvaʼ, aʼ nik bʼenk taanima tiʼ ibʼanax inqʼa paʼv uvaʼ nik ibʼan inqʼa xaol vatz u txʼavaʼ, inqʼa yeʼ ootzaqin tetz quBʼaal Tiuxh, tul aʼetz uvaʼe, at txhiʼtxhoil s-xoʼl tuchʼ quBʼaal Tiuxh.

5Pet maq aʼ nik etitzʼa uvaʼ yeʼl tokebʼal viyolbʼal quBʼaal Tiuxh uvaʼ tzʼibʼamal ka uvaʼ ech nik tal s-eche:

—ViTiuxhil Tiuxh uvaʼ

qat ikuy quBʼaal Tiuxh

ijeqatxh t-qaanima,

tan tira tzʼeʼyxh s-qiʼ, tiʼ uvaʼ,

aʼ u bʼaʼn laʼ qubʼana,

—chich u yol.#Jeenesis 6.3-7; Eeksodo 20.5; Sakariias 1.14

6Tan sibʼxh u bʼaʼnil uvaʼ aqʼel s-qe taʼn quBʼaal Tiuxh tiʼ qulotxhoxeʼ. Echetz s-tiʼile ech nik tal val u yol uvaʼ tzʼibʼamal ka t-viyolbʼal quBʼaal Tiuxh s-eche:

—Tira yeʼ nik ikʼul tibʼ

taanima quBʼaal Tiuxh

tuchʼ inqʼa nik motx

toksa iqʼij.

Pet koq inqʼa nik tiqʼo kuʼl

tibʼ vatz quBʼaal Tiuxh,

tan tira nik taqʼ

quBʼaal Tiuxh vibʼaʼnil s-te,

—chich u yol.#Proveervios 3.34

7Echetz oksavaq ok etibʼ jaqʼ vibʼekʼoʼm quBʼaal Tiuxh tiʼ inimaleʼ. Tul tij ex ebʼan vatz u diaavlo tiʼ kam inqʼa kantxhaq uvaʼ nik isaʼeʼ laʼ ebʼana, echetz toq itzʼeqt tibʼ u diaavloe sevatz. 8Tul aʼ ejetxhvat ok etibʼ kʼatz u quBʼaal Tiuxh, echetz toq ijetxhtoʼk tibʼ quBʼaal Tiuxhe sekʼatza. Atz jatvaʼl ex, uvaʼ, aʼ u paʼv nik ebʼaneʼ, tul bʼanvaq etutxh vatz u quBʼaal Tiuxh, eche nik ibʼan invaʼq xaol tiʼ itxʼajt iqʼabʼ tiʼ teleʼl u tzʼil. Atz kʼuxh ex inqʼa kaʼl kuxh ekʼuul, bʼanvaq etutxh vatz quBʼaal Tiuxh. Tul txʼajvaq vetaanima vatz quBʼaal Tiuxh, eche nik isujux el invaʼq tzʼil tuul invaʼq kam tiʼ ibʼen s-saq.

9Kʼaxavaqetz etibʼ tiʼ u kantxhaq uvaʼ nik ebʼaneʼ, tul txumunoqvaq ex s-tiʼ, atz oqʼoqvaq ex s-tiʼ. Tul bʼenoq inqʼa etzeʼeʼm s-oqʼel; atz bʼenoq inqʼa echiibʼichil s-txumuʼm. 10Iqʼovaq kuʼl etibʼ vatz u quBʼaal Tiuxh, aʼetz vet u quBʼaal Tiuxh toq oksan eqʼij.

Uvaʼs talt Santiaago uvaʼ yeʼ laʼ motx iyol tibʼ inqʼa niman tetz Jesuus s-vatzaq

11Ex inmol s-niman tetz Jesuus, toq val sete uvaʼ yeʼ laʼ motx etxhuli ipaʼv emol. Tan jaʼl uvaʼ laʼ alon yol tiʼ vimol. Tul aʼetz vete nik aqʼon jaʼp u yol tiibʼa vimol, tul aʼetz vet u bʼekʼbʼal nik teesa iqʼij. Tan aʼ nik tal u bʼekʼbʼal uvaʼ laʼ qusaʼ qibʼ s-quvatzaq; tul yeʼ laʼ teesa tibʼ quqʼij. Atz aʼ vet nik ipalan tetz viʼ u bʼekʼbʼal. Oqetz nik etaleʼ uvaʼ kantxhaq uvaʼ nik tal u bʼekʼbʼal, tul jitetz vet ex, niman tetz inqʼa bʼekʼbʼal. Atz aʼ vet ex at etiqleʼm tiʼ teesal iqʼij vemol nik enatxheʼ. 12Poro toqetz val sete uvaʼ taʼn kuxh u quBʼaal Tiuxhe, u Aqʼol tetz inqʼa bʼekʼbʼal. Tan taʼn kuxh quBʼaal Tiuxh at tiqleʼm tiʼ taqʼax kuʼ yol tinuqul s-qiibʼa, kʼuxh tiʼ qukʼaxbʼisaleʼ, atz maq tiʼ quchitix tiʼ yeʼ qubʼen tu kʼaxkʼo tiʼ inqʼa qupaʼv. Petetz ex, tan tira yeʼl etokebʼal, tiʼ uvaʼ, aʼ vet ex laʼ alon yol tiʼ vetetz tzʼalol.#Tio 7.1-5

Uvaʼs talt Santiaago uvaʼ yeʼ laʼ toksa inqʼa niman tetz Jesuus iqʼij tiʼ kamxh bʼanoʼm laʼ ibʼana

13Pet abʼivaqetz kam uvaʼ toq valeʼ, ex inqʼa ech nik motx etal s-eche: —Txheel, atz maq s-eqal, tul nik qubʼen t-invaʼl tenam. Tul vaʼl yaʼbʼ bʼen qubʼan tzitzi. Tul bʼen oʼ yakon, atz bʼen qutxʼak qupuaq, —chich ex.

14Poro yeʼetz laʼ utxhi, ech laʼ etale, tan yeʼ etootzaqle matz itzʼlel ex s-eqal. Tan tira yeʼ etootzaqle jankʼat qʼij esaq ati. Tan ech kuxh u qʼij esaq, eche suʼtzʼ uvaʼ bʼiil kuxh nik ul ibʼaneʼ; tul ajt kuxh qat ilixi uvaʼ yeʼxhkam veteʼ.

15Pet aʼl bʼaʼn uvaʼ ech laʼ etal s-eche: —Oq quBʼaal Tiuxh laʼ saʼon, atz oq quBʼaal Tiuxh laʼ kuyun tel qatineʼ, tul toqetz qubʼan uvaʼe, atz inqʼae, —chaq ex s-eche.

16Aʼetz kol laʼ etal txhae, atz tira aʼl nik etoksat eqʼij s-bʼaʼn. Echetz jankʼalxh inqʼa oksa qʼijil, eche uvaʼ nik ebʼaneʼ, tan tira kantxhaq. 17Jaʼletz u xaol uvaʼ tootzaq veteʼ uvaʼ, aʼ u bʼaʼn laʼ ibʼana, tul oqetz yeʼ nik ibʼaneʼ, paʼvetz vete nik ibʼan s-eche.

Currently Selected:

Santiaago 4: ixlC

Highlight

Copy

Compare