Santiaago 3

Uvaʼs talt Santiaago yol tiʼ ixeet tibʼ inqʼa niman tetz Jesuus tiʼ iyoloneʼ

1Ex inmol s-niman tetz Jesuus, yeʼ laʼ utxhi uvaʼ mamala kuxh ex laʼ etal etibʼ s-txhusul tetz viyolbʼal quBʼaal Tiuxh. Tan etootzaqle uvaʼ aʼl laʼ ipal iviʼ ijaʼp u yol s-qiibʼa taʼn quBʼaal Tiuxh, oʼ inqʼa txhusul, oq jit aʼ vinuqul viyolbʼal quBʼaal Tiuxh laʼ qala. 2Tan nuqlaxh yol uvaʼ jankʼalxh oʼ nik qel t-bʼey bʼiitxhaqul tuul tiʼ qalt invaʼq kantxhaqla yol. Pet jaʼletz u xaol uvaʼ nik itxʼol imaqt tibʼ tiʼ talax kantxhaqla yol, tul yeʼl imol nik ikʼaxbʼisa tuchʼ yol. Tul aʼetz uvaʼe, qʼanbʼinaʼq vet s-bʼaʼn taʼn viyolbʼal quBʼaal Tiuxh. Ape oqetz nik itxʼol imaqt tibʼ tiʼ iyoloneʼ, tul echatetz kuxh toq itxʼolt imaqaxe vitxhiʼoʼl s-kaqaayil tiʼ yeʼ ipaʼvineʼ.

3Jankʼal eche qoksat inqʼa talaq qʼiʼbʼal tetz itziʼ inqʼa chej, tan nik qoleʼv s-tiʼ, tiʼ inimat oʼ. Tul nik qoleʼv vet tiʼ iqʼiʼiyul jankʼal vitxhiʼoʼl u txoo taʼn u qʼiʼbʼal.

4Atz jankʼal eche inqʼa vaarko, tan kʼuxh sibʼxh ichʼijeʼ, atz kʼuxh mam kaqiqʼ nik iqan bʼen, poro tuchʼ kuxh vaʼl tal qʼiʼbʼal tetz, tul nik iqʼiʼ bʼen u qʼiʼol tetz tal uvaʼ laʼ isaʼvat tiqʼoleʼ.

5Atz jankʼal eche u qaqʼ, tan tira txhʼoj kuxh tatin kʼatz u qutxhiʼoʼl. Poro mamala oksa qʼijil nik taleʼ. Atz echat kuxh bʼanel taʼn inbʼeeq u xamale. Tan kʼuxh bʼiil kuxhtuʼ, poro oqetz laʼ ok bʼen, tul tira laʼ ibʼolbʼa invaʼq mam txʼakabʼen oq uvaʼ yeʼ laʼ maqaxi.

6Echatetz kuxh bʼanel taʼn u qaqʼe, tan mam yansaʼm nik qubʼan s-tuchʼ, oq kantxhaq inqʼa nik qaleʼ. Tan mam kuxh oksa qʼij nik qal tuchʼ u qaqʼ. Tzitzietz nik qukʼutxhvat uvaʼ mamala kantxhaq at s-qukʼatza. Tul niketz iyansa vet jankʼal u qitzʼabʼal, atz tuchʼ jankʼal inqʼa qubʼanoʼm, eche vaʼq xamal uvaʼ tira laʼ ibʼoqo vet tzaan jankʼal iviinqixsaʼm quBʼaal Tiuxh tiʼ itzʼeʼsaleʼ, eche inqʼa tzeʼ, atz s-xaq tzeʼ, inqʼa at txala u xamal. Tan antxh nik tzajk u yansaʼm uvaʼ nik ibʼan u qaqʼ kʼatz u mam xamal.{*}#3.6 Eche u mam xamal uvaʼ nik tal u versiikulo uvaʼa, aʼ nik tal tiʼ Satanaas. Tan aʼ nik tzajk inqʼa yansaʼm kʼatz Satanaas, pet jit uvaʼ tu xamal koqxhtuʼ.

7Jankʼal eche inqʼa jaqʼ tzeʼil txoo, tan tetxhal kuxh nik toleʼv inqʼa xaol tiʼ iqʼiʼixeʼ. Kʼuxh inqʼa xichʼomla txoo, atz kʼuxh inqʼa txoo uvaʼ aʼl nik ijuxu tibʼ tiʼ ixaoneʼ, atz kʼuxh inqʼa at qʼij isaq xeʼ maar. Tul nik toleʼv inqʼa xaol tiʼ iqʼiʼix jatvatzulxh txoo vatz u txʼavaʼ. 8Petetz koq u qaqʼ uvaʼ nik yolonsan oʼ, tan yeʼxhabʼil invaʼq xaol nik toleʼv tiʼ iqʼiʼixeʼ. Tan yeʼxhabʼil invaʼq nik toleʼv tiʼ imaqax tiʼ u kantxhaq uvaʼ nik taleʼ. Tan ech nik ikʼaxbʼisan u qaqʼ, eche chij itziʼ kan uvaʼ tetxhal ikam invaʼq xaol taʼn.

9Tan antxh u qaqʼ nik qubʼanbʼe tiʼ talax bʼaʼnla txhaq yol tiʼ Tiuxh, u quBʼaal. Atz antxh u qaqʼ nik qubʼanbʼe tiʼ talax yol uvaʼ yoqʼbʼal tetz inqʼa xaol, inqʼa antxh tziabʼal ivatzibʼal quBʼaal Tiuxh. 10¡Kametz s-tiʼil uvaʼ ant txhan kuxh nik elkuʼl u yol tetz oksabʼ iqʼij qumol t-qutziʼ, tul antxh nik elk txhan ul u yol tetz yoqʼbʼal tetz qumol t-qutziʼ! Toq val sete, ex inqʼa inmol s-niman tetz Jesuus, yeʼ laʼ ebʼan s-eche.

11Eche inqʼa viʼal aʼ, tan bʼane paqul koq laʼ taqʼ eluʼl sulaʼ aʼ, tul paqt koq laʼ taqʼ eluʼl aʼ uvaʼ at tatzʼmil.

12Ex inqʼa inmol s-niman tetz Jesuus, toq val sete uvaʼ aseituuna koq ivatz tzeʼ u iigo laʼ taqʼa. Atz bʼane iigoat koq ivatz u uuva laʼ taqʼa. Echatetz bʼanel taʼne u viʼal aʼ. Tan paqul koq laʼ taqʼ sulaʼ aʼ, tul paqt koq laʼ taqʼ aʼ uvaʼ at tatzʼmil.

Uvaʼs talt Santiaago uvaʼ een nik tzajk u bʼaʼnla txumbʼal kʼatz quBʼaal Tiuxh t-amlikaʼ

13Jaʼletz ex, uvaʼ atxh vet etxumbʼal s-bʼaʼn tiʼ inqʼa kam, tul atetz vet etootzaqibʼale tiʼ inqʼa kam, kʼutxhvaqetz vet tuchʼ vebʼant inqʼa bʼaʼnla bʼanoʼm. Atz toqetz ikʼutxh veteʼe vetxumbʼal uvaʼ nik etiqʼo kuʼl etibʼ uvaʼs nik ebʼant inqʼa bʼaʼnla bʼanoʼm.

14Pet oqetz txhiʼany kuxh ex tuchʼ kʼayunchil tetaanima tiʼ emol, tul tira etal vinuqul, pet jit aʼ laʼ etale uvaʼ yeʼxhkam at tetaanima. Atz jit aʼ laʼ etale uvaʼ niim ex tuchʼ etatineʼ. Atz echat kuxhte oq aʼ kuxh etxha ibʼ kʼatz vemol atoʼk tetaanima, tul tiraat etal vinuqul, pet jit aʼ laʼ etale uvaʼ yeʼxhkam at tetaanima. 15Oqetz ech vetxumbʼal nik ebʼane, tul yaabʼla txumbʼaletze uvaʼe. Tul jitetz aʼ nik ebʼane kam uvaʼ nik isaʼ quBʼaal Tiuxh uvaʼ een t-amlikaʼ. Pet aʼ kuxh u txumbʼal tetz vatz txʼavaʼ nik ekʼutxheʼ uvaʼ nik ibʼan inqʼa xaol tzitza vatz txʼavaʼ, inqʼa yeʼ ootzaqin tetz quBʼaal Tiuxh. Tan aʼ kuxh atoʼk tiviʼ ibʼanax u tatxhaʼv vitxhiʼoʼl, eche vaʼq txoo. Atz aʼ kuxh atoʼk tiviʼ ibʼanax kam uvaʼ nik isaʼ Satanaas laʼ ibʼana. 16Tan jaʼl u xaol uvaʼ, aʼ kuxh u txhiʼtxhoil at tu taanima, atz aʼ kuxh etxha ibʼ nik ibʼan kʼatz imol, tul kam tel kuxh sotznaʼq kʼuulla txhaq txumbʼal nik ibʼan inpaqte. Tul jatvatzul tel kuxh kantxhaqla txumbʼal nik ibʼaneʼ.

17Pet aʼ laʼ ibʼan inqʼa niman tetz Jesuus u bʼaʼnla txumbʼal tzajnaʼq kʼatz quBʼaal Tiuxh, u quBʼaal Tiuxh uvaʼ een tu amlikaʼ. Tan aʼ vibʼoʼqʼol laʼ ibʼan inqʼa niman tetz Jesuus; aʼe u jik. Atz aʼetz vaʼt laʼ ibʼana uvaʼ laʼ itxhok txumbʼal tiʼ tatin tibʼaʼnil tuchʼaq imol. Tul ayaʼlxh bʼaʼn s-te laʼ ibʼana. Tul laʼ motx inima tibʼ tuchʼ inqʼa imol. Atz laʼat toybʼa ivatz imol. Atz aʼ laʼ ibʼan kam kuxh bʼaʼnla bʼanoʼm. Tul jit vaʼl kuxh tajbʼaʼn laʼ ibʼan xoʼl inqʼa xaol, pet kaqaay kuxh laʼ ilotxha. Atz jitoq kaʼvatz laʼ ibʼan tiʼ ibʼanax invaʼq kam. 18Tul aʼl bʼaʼn uvaʼ nik ibʼan u xaol uvaʼ, aʼ nik itxʼol tok bʼaʼnil s-xoʼl tuchʼ vimol. Echetz kaqaayil vet nik tatin tibʼaʼnil, tul aʼ vet u jik nik motx ibʼan s-vatzaq.

Currently Selected:

Santiaago 3: ixlC

Highlight

Copy

Compare