Evreeos 6
6
Aʼ u yole, tiʼ uvaʼ yeʼ laʼ itanbʼa inqʼa niman tetz Jesuus inimal viyolbʼal quBʼaal Tiuxh
1Echetze ex, jit kuxh aʼ etitzʼa uvaʼ ant tel kuxh laʼ etxhus etibʼ tiʼ inqʼa txhusbʼal uvaʼ ixeʼtebʼalxhtuʼ, inqʼa alel vet sete qaʼn tiʼ u quBʼaal JesuKriisto. Pet aʼ vet qukʼaq qibʼ s-tiʼ setuchʼ, tiʼ itxhabʼal tel joltoʼq iyolbʼal quBʼaal Tiuxh uvaʼ aʼl tel laʼ quchʼij kʼatz quBʼaal Tiuxh taʼn. Tan eche taqʼax jaʼ vaʼq otzotz, tan jit jatpaqul kuxh laʼ aqʼax kuʼ vixeʼ. Echetz jit jatpaqul kuxh laʼ qʼaʼv ex tiʼ itxhusux inqʼa abʼimalxh vet etaʼn. Jankʼale vetootzaqit tiʼ yeʼ ibʼanax inqʼa kantxhaq uvaʼ nimamich kuxh etaʼn s-naʼya, tul aʼ kuxh u kamchil vatz quBʼaal Tiuxh kʼaqel taʼn; atz tuchʼ uvaʼ kʼuqlel vet ekʼuul tiʼ u quBʼaal Tiuxh; 2atz tuchʼat tiʼ vekuʼ xeʼ aʼ; atz tuchʼ tiʼ taqʼax jaʼ eqʼabʼ tiviʼ inqʼa xaol tiʼ ikʼult viTiuxhil Tiuxh; atz tuchʼ tiʼ titzʼeʼv inqʼa kamnaʼq; atz tuchʼ tiʼ u taqʼt kuʼ quBʼaal Tiuxh yol tinuqul tiʼ tatin inqʼa xaol s-vatz; atz tiʼ uvaʼ tal laʼ motx bʼenka uvaʼ yeʼl iyaʼebʼal imotxebʼal. 3Pet aʼl teletz laʼ qutxhust tel inuqul viyolbʼal quBʼaal Tiuxh tiʼ inqʼa ootzaqimal vet qaʼn, oq quBʼaal Tiuxh laʼ saʼon.
4Tan qat etootzaqil vet viyolbʼal quBʼaal Tiuxh s-bʼaʼn, eche etxiqul vet taʼn vaʼq txiqubʼal. Tul qat enatxhl vet vibʼaʼnil u oya tetz chitpichil uvaʼ taqʼ quBʼaal Tiuxh uvaʼ een t-amlikaʼ. Atz qat ekʼull vet vibʼaʼnil viTiuxhil Tiuxh. 5Tul tira qat bʼeny vet sete vibʼaʼnil viyolbʼal quBʼaal Tiuxh. Atz qat motx etill inqʼa mam bʼaʼnil qat bʼanax vatz txʼavaʼ tuchʼ u nimla vatz tiqleʼm quBʼaal Tiuxh, atz tiʼ ibʼaxabʼsal ikʼutxhux inqʼa mam bʼaʼnil, inqʼa yaʼn tuleʼ.
6Qatetzxh motx etabʼil inqʼa nik val sete, tul xamtel at txhan vet jolol sexoʼl nik alon uvaʼ yeʼ laʼ inima txha veteʼ. Pet abʼivaq s-bʼaʼn kam uvaʼ nik valeʼ. Tan oqetz laʼ etanbʼa inimal viyolbʼal quBʼaal Tiuxh, yeʼletz laʼ utxh veteʼ uvaʼ tikʼ laʼ etitzʼa txha vet etibʼ inpaqte tiʼ inimal u Kriisto, atz laʼ ekʼaxa txha vet etibʼ paqte tiʼ etel ka tiʼ viyolbʼal quBʼaal Tiuxh. Tan oqetz ech laʼ ebʼane, tul eelaetz kuxh vete s-tuchʼ uvaʼ ant kuxh etaqʼt jaʼ viKʼaol quBʼaal Tiuxh vatz kurus tiʼ iyatzʼax el. Atz eelaatetz kuxh vete s-tuchʼ uvaʼ ex nik chʼixvisan viKʼaol quBʼaal Tiuxh inpaqte.{*}#6.6 Aʼ nik tal u versiikulo tiʼ inqʼa tij imam Israeel, inqʼa maʼt tok vet s-niman tetz Jesuus. Tan aʼ nikich motx titzʼa vet iqʼaʼv ka, atz yeʼlich laʼ motx nimal vet quBʼaal Jesuus taʼn. Pet antxh laʼich motx inima vet u tuqʼeʼybʼal inqʼa tij imam Israeel inpaqte tuchʼ inqʼa bʼekʼbʼal itzʼibʼa ka Moisees nikich motx taleʼ. Jatvaʼletz inqʼa niman tetz Jesuus uvaʼ nikich iqʼaʼv tiʼ inimal u tuqʼeʼybʼal inqʼa tij imam Israeel, tan tetxhal nikich motx tex vatz inqʼa iqʼesal uqʼeʼybʼal xoʼl inqʼa tij imam Israeel. Tul tetxhal nik nalich taleʼ uvaʼ yeʼ vet laʼ txhʼuyeʼv tiʼ inimal inqʼa txhusbʼal tiʼ Jesuus uvaʼ nimamalich taʼn. Atz vaʼt iyol nikich motx taleʼ uvaʼ jit iKʼaol Tiuxh quBʼaal Jesuus s-vatz. Atz nikich motx taleʼ uvaʼ ant kuxh tiʼ ipaʼv quBʼaal Jesuus yatzʼaxik el, atz aqʼax jaʼ vatz kurus. Pet jit tiʼ vipaʼv inqʼa xaol yatzʼaxik el quBʼaal Jesuus. Atz itoxv iyol nikich motx tal tiʼ quBʼaal Jesuus uvaʼ Satanaas nikich aqʼon tiqleʼm quBʼaal Jesuus tiʼ ibʼanax inqʼa mam kaebʼal aanima. Jit quBʼaal Tiuxh aqʼon. Aʼetz oxvaʼl viyol inqʼa niman tetz Jesuuse laʼich tal s-bʼaxa vatz inqʼa qʼesal uqʼeʼybʼal, echetz laʼich inimal vete taʼn inqʼa tij imam Israeel uvaʼ jit vet niman tetz Jesuus. Echetz nik tiqʼot tzaan u tzʼibʼan tetz u versiikuloe u yol, tiʼ uvaʼ laʼ kʼaxbʼisal quBʼaal Jesuus inpaqte taʼn. Niketz ibʼan u tzʼibʼan tetz Evreeos yaʼl tiʼ talax te inqʼa niman tetz Jesuus, tan aʼ kʼaqel taʼn uvaʼ yeʼ laʼ motx qʼaʼv ka inqʼa niman tetz Jesuus tiʼ inimal quBʼaal Jesuus.
7Echetz jankʼal inqʼa xaol, inqʼa nik ichʼij kʼatz quBʼaal Tiuxh, tan ech bʼanel taʼn s-eche. Tan jankʼale tatin u txʼavaʼ, tan bʼiitxhaqul tuul ikuʼ jabʼal s-tiibʼa, tul nik takʼeʼ. Echetz nik taqʼt vet u txhiko ivatze te jaʼl uvaʼ nik koon u txʼavaʼ, tul nik tav s-tuul. Echatetz nik tul vibʼaʼnil quBʼaal Tiuxhe tiibʼa inqʼa xaol, inqʼa nik niman.
8Pet jankʼal inqʼa xaol, inqʼa nik iqʼaʼv s-tiʼ, tan ech bʼanel taʼn s-eche. Tan jankʼale tatin tantoʼq u txʼavaʼ uvaʼ kʼuxh nik ikuʼ jabʼal s-tiibʼa, tul chʼiʼx kuxh laʼ itzʼ s-tuul, tuchʼ paʼl, yeʼxhkametz itxaʼk. Atz yeʼl ibʼaʼnil quBʼaal Tiuxh s-tiibʼa, pet aʼl laʼ taqʼax vet jaʼp yeʼ bʼaʼnla s-tiibʼa, atz tzʼeʼsamal laʼ tel veteʼ.#Jeenesis 3.7-18 9Kʼuxhetz kʼaxkʼo bʼeeq tabʼil inqʼa yol nik qal sete, ex niman tetz Jesuus, ex inqʼa nik quchiibʼ setiʼ, pet at s-tiʼile nik qalvat sete. Tan aʼ nik qitzʼa setiʼ uvaʼ yeʼl ex laʼ el ka ex. Tul aʼ nik qitzʼa setiʼ uvaʼ laʼ ekʼul u bʼaʼnil. Tan chitel vet ex t-inqʼa epaʼv. 10Poro jikxh u quBʼaal Tiuxh, tan bʼane laʼ koq sotz s-kʼuul taqʼax vetxʼaqaʼm tiʼ vetaqʼon qat ebʼan s-vatz, atz, tiʼ uvaʼ at etaanima tiʼ quBʼaal Tiuxh qat ebʼana. Tan nikich elotxh inqʼa niman tetz Jesuus, tul ile ant kuxh sebʼt ex tiʼ lotxhoʼm s-txheel.
11Pet aʼ nik qusaʼeʼ uvaʼ yeʼ laʼ motx etanbʼa ibʼanax u lotxhoʼm uvaʼ nik ebʼaneʼ. Pet aʼl tel eyaʼlut etibʼ tiʼ u kʼuulaʼm uvaʼ laʼ ebʼan tuulbʼal jankʼal qʼij esaq vatz u txʼavaʼ. Echetz laʼ ikʼuqeʼv ekʼuule tiʼ ikʼulux u txʼak uvaʼ nik etxʼebʼ kʼatz quBʼaal Tiuxh. 12Tul jit kuxh qʼeʼyil laʼ ebʼana. Pet ech ebʼan, eche ibʼan jolol inqʼa xaol, inqʼa kʼuqlichxh ikʼuul tiʼ itxʼebʼt inqʼa bʼaʼnil uvaʼ alelich ka taqʼax s-te taʼn quBʼaal Tiuxh. Tul yeʼ nikich ipal ikʼuul tiʼ itxʼebʼex u bʼaʼnil.
Aʼ u yole, tiʼ uvaʼ kʼuqlebʼ kʼuul viyol quBʼaal Tiuxh uvaʼ tal tiʼ taqʼax val u mam bʼaʼnil te Avraʼaam, aʼe u quBʼaal Jesuus
13Echetze uvaʼ ibʼan quBʼaal Tiuxh uvaʼs talt taqʼax u bʼaʼnil te Avraʼaam, tan tetxhal itxʼebʼ Avraʼaam kam uvaʼ tal quBʼaal Tiuxh s-te. Tan tal ka quBʼaal Tiuxh viyol. Tul tetxhal elaʼpun uvaʼ tala. Tan antxh quBʼaal Tiuxh tiqʼo tzaan tibʼ s-tuul tiʼ taltaʼ uvaʼ tetxhal laʼich inima viyol. Tan yeʼxhabʼil invaʼtoʼq atich tiibʼa quBʼaal Tiuxh uvaʼ niim koq s-tiibʼa tul laʼich tiqʼo tzaan s-tuul tiʼ inimal viyol. 14Poro ech tal quBʼaal Tiuxh s-eche:
—Laʼ opoon vaʼl qʼij,
tul mam yol laʼ vaqʼt vinbʼaʼnil seebʼa.
Tul laʼ innaʼsa inqʼa avij amam.
Tul elom koq vet tatxhul laʼ ibʼana,
—xeʼt quBʼaal Tiuxh.#Jeenesis 22.16-17
15Tul yeʼl Avraʼaam pal ikʼuul tiʼ itxʼebʼex u bʼaʼnil. Echetz ikʼult Avraʼaame u bʼaʼnil uvaʼ maʼtich talt quBʼaal Tiuxh taqʼax s-te.
16Jankʼale nik ibʼan invaʼq xaol tiʼ ikʼuqbʼat vaʼq iyol, tan ech ivatz vaʼq vimol uvaʼ palnaʼq tiqleʼm s-tiibʼa nik talvat uvaʼ tetxhal laʼ inima viyol. Aʼetz vet talaxe uvaʼ tetxhal laʼ inima vet viyol uvaʼ qat tal vatz uvaʼ palnaʼq tiqleʼm s-viʼ.
17Echetz uvaʼe ibʼan quBʼaal Tiuxh tiʼ ikʼuqbʼat viyol te Avraʼaam. Tan aʼich isaʼ quBʼaal Tiuxh uvaʼ tira laʼich ikʼutxh te inqʼa xaol uvaʼ laʼich kʼulun u bʼaʼnil uvaʼ alelich ka taʼn. Tul mij paqul laʼich qʼaʼv quBʼaal Tiuxh tiʼ viyol. 18Xaʼtetze kaʼvaʼl iyol quBʼaal Tiuxh ikʼuqbʼa tiʼ talt viyol, echetz yeʼlich laʼ utxh ijalpeʼ. Tan yeʼl paqul laʼ itzʼeq quBʼaal Tiuxh tzij. Echetz laʼ itxhej kʼuqlebʼ qukʼuule, jankʼal oʼ, uvaʼ tira ayaʼl qukʼuul qat leqon u bʼaʼnil uvaʼ nik qutxʼebʼeʼ uvaʼ taltzii quBʼaal Tiuxh taqʼax s-qe. Tul nik itxhej qutial taʼn u mam bʼaʼnil. 19Tan u bʼaʼnil uvaʼ nik qutxʼebʼeʼ, tan kʼuqlebʼal kʼuul. Tul txhabʼamal vet tatin s-qukʼatza, eche invaʼq txhʼitxhʼ uvaʼ nik txhabʼan tatin vaʼq vaarko viʼ u aʼ; tul yeʼ laʼ vuuli. Tul kʼuqlebʼ kʼuul, tan tetxhal qokaʼp vatz quBʼaal Tiuxh. Tan yeʼ vet oʼ nik qumaqax taʼn u bʼuʼq u qʼanbʼal tetz tuul u Tatibʼal quBʼaal Tiuxh.#Leviitiko 16.2; Tio 27.51 20Tan aʼ u quBʼaal Jesuus bʼaxich ipaloʼk s-qiʼ. Tan aʼ iqʼon bʼey s-quvatz tiʼ tok s-mam iqʼesal oksan yol vatz Tiuxh. Tul ech vet tok siqʼesal oksan yol s-bʼenamen, eche tok Melkisedeek siqʼesal oksan yol vatz Tiuxh taʼn quBʼaal Tiuxh.#Saalmo 110.4
Currently Selected:
Evreeos 6: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.