Evreeos 7
7
Aʼ u yole tiʼ u quBʼaal Jesuus uvaʼ taʼn kuxh palnaʼq tiqleʼm viʼ jatvaʼlxh inqʼa iqʼesal oksan yol vatz Tiuxh
1Tan aʼ Melkisedeek niim tiqleʼm, tan mam iqʼesal tu tenam Saleem. Tul aʼ u nimla quBʼaal Tiuxh oksan Melkisedeek siqʼesal oksan yol vatz Tiuxh. Tul taqʼ Melkisedeek bʼaʼnil tiibʼa Avraʼaam uvaʼs iqʼaʼv vet Avraʼaam tu txhʼaʼo tiʼ teesal iqʼij jolol inqʼa mam iqʼesal. Tan ul kʼuluxoq Avraʼaam taʼn Melkisedeek. 2Tul taqʼ Avraʼaam juunil te txhaq laalavil inqʼa kam te Melkisedeek, tul kaʼvaʼlen nik elkaʼpun u bʼij Melkisedeek. Ech nik elkaʼpun u bʼaxa s-eche: ‹Mam iqʼesal uvaʼ jikxh nik taqʼt kuʼ yol tinuqul,› chich telaʼpun. Ikaʼv nik elkaʼpun: ‹Mam iqʼesal t-tenam Saleem,› chiche. Tan aʼ nik elkaʼpun u yol Saleem: ‹Taqʼax bʼaʼnil xoʼl inqʼa xaol,› chiche.#Jeenesis 14.17-20
3Poro yeʼich ootzaqimal itxutx ibʼaal Melkisedeek. Tul yeʼ tzʼibʼamal kʼuyaq imam; atz yeʼ ootzaqimal vixeʼtebʼal u qʼij isaq; atz yeʼ ootzaqimal vimotxebʼal u qʼij isaq. Pet eelaich kuxh bʼiil tatin Melkisedeek tuchʼ viKʼaol quBʼaal Tiuxh tiʼ toksal yol vatz quBʼaal Tiuxh. Pet viKʼaol quBʼaal Tiuxh, tan txhabʼamal kuxh tatin tiʼ toksal yol vatz Tiuxh s-bʼenamen.
4Bʼenoqetz sete uvaʼ nimla vinaqich tatin Melkisedeek, tan aʼ taqʼvat Avraʼaam, u kʼuy qumam, juunil te txhaq laalavil inqʼa kam te Melkisedeek, inqʼa kam uvaʼ tiqʼo vet tzaan Avraʼaam uvaʼs toleʼv tiʼ u txhʼaʼo. Tul aʼich Avraʼaam uvaʼ niimich tatin s-quvatz.
5Tul qootzaqletza uvaʼ quBʼaal Tiuxh bʼekʼon uvaʼ, aʼ laʼich aqʼaxik juunil te txhaq laalavil inqʼa kam te inqʼa oksan yol vatz Tiuxh, inqʼa tij imam Levii. Tetxhal laʼich ikʼul inqʼa tij imam Levii juunil te txhaq laalavil inqʼa kam uvaʼ nik itxʼak u tenam itxhejaʼ, kʼuxh antxh imol s-tijaq imam Avraʼaam.#Nuumeros 18.21
6Echetze Melkisedeek, tan bʼane tij imam Leviich koq, tul ikʼul Melkisedeek juunil te txhaq laalavil inqʼa kam te Avraʼaam. Tul taqʼ Melkisedeek bʼaʼnil tiibʼa Avraʼaam uvaʼ maʼtich talt quBʼaal Tiuxh taqʼax u bʼaʼnil s-te. 7Tul yeʼxh tzaʼl nik ibʼen s-qe, tan jaʼl uvaʼ nik aqʼon bʼaʼnil tiibʼa vimol, tul aʼetz uvaʼe palnaʼq tiqleʼm viʼ uvaʼ nik kʼulun u bʼaʼnil. Eche uvaʼ ibʼan Melkisedeek te Avraʼaam.
8Poro jankʼaletzxh inqʼa tij imam Levii nikich kʼulun juunil te txhaq laalavil inqʼa kam, kʼuxh laʼich motx kami. Pet koq Melkisedeek, tan aqʼax u bʼaʼnil s-te taʼn quBʼaal Tiuxh. Echetz eela tuchʼ uvaʼ ile ant kuxh itzʼlele, tan yeʼxhkam tzʼibʼamal ka vikamebʼal.
9Aʼetz nik elkaʼpun uvaʼ, aʼ Avraʼaam xeʼtisan taqʼax juunil te txhaq laalavil inqʼa kam. Pet xamtich ikʼul vet inqʼa tij imam Levii juunil te txhaq laalavil inqʼa kam te u tenam. Aʼetz talaxe uvaʼ, aʼxh Avraʼaam bʼaxich ixeʼt tiʼ taqʼax laalavil inqʼa kam, xamteletz ikʼul vet Levii te inqʼa tij imam Israeel. 10Tan yeʼnaqich titzʼal tul Levii tzitza vatz txʼavaʼ uvaʼs ul ikʼulux Avraʼaam taʼn Melkisedeek. Ape kʼuxhetz yeʼnaqich uloq Levii vatz txʼavaʼ, poro aʼ vet Avraʼaam, u kʼuy imam Levii, bʼaxich tuleʼ. Tul xamtel laʼich txhej vet tij imam.
Aʼ u yoleʼ tiʼ kaʼvaʼl u txumbʼal uvaʼ ijeqbʼa ka quBʼaal Tiuxh tiʼ toksal yol vatz Tiuxh
11Kʼuxh atichxh vet inqʼa oksan yol vatz Tiuxh s-iqʼon iviʼ tuqʼeʼybʼal inqʼa tij imam Levii, inqʼa bʼekʼbʼal nikich motx oksan, tul jitoq nikich itzʼeq itziʼ ivatz ibʼen inqʼa tij imam Israeel s-bʼaʼn vatz quBʼaal Tiuxh taʼn. Atz yeʼ nikich toleʼv tiʼ ijetxhonaq ok kʼatz quBʼaal Tiuxh. Xaʼtetze tikʼ taqʼ vet quBʼaal Tiuxh vaʼt oksan yol s-vatz. Tan eche uvaʼ nikich koq itzʼeq itziʼ ivatz ibʼen inqʼa xaol s-bʼaʼn vatz quBʼaal Tiuxh, tul jitetz tetxhale laʼich ul invaʼtoʼq iqʼesal oksan yol uvaʼ echich, eche Melkisedeek. 12Pet tiʼetz uvaʼ qat jalpul vet inqʼa txumbʼal tiʼ u oksa yol vatz Tiuxh, tul antetz vet inqʼa bʼekʼbʼal motx jalpi.
13Aʼetz nik qalvat tiʼ Vaʼl u qʼesal oksan yol vatz Tiuxh uvaʼ jit eela ixaʼnil tuchʼ ixaʼnil jolt inqʼa oksan yol. Tan jitich Levii koq kʼuy imam. Atz jitoq atich kʼuy imam uvaʼ oksanich koq yol vatz Tiuxh tiʼ tok oya viʼ u natxhkʼuulabʼal. 14Pet ootzaqimaletza uvaʼ een elnaʼq tzaan quBʼaal Jesuus xoʼl inqʼa ixaʼnil Judaa. Tul yeʼxhkam tal ka Moisees uvaʼ, aʼ laʼich txhejk invaʼq oksan yol vatz Tiuxh xoʼl inqʼa tij imam Judaa.
15Poro tira nik ibʼen s-qe uvaʼ, ex jalpoq kam uvaʼ alelich taʼn quBʼaal Tiuxh tiʼ toksal yol vatz Tiuxh. Tan nik qileʼ uvaʼ ex txheoq vaʼt oksan yol vatz Tiuxh, uvaʼ eche itxhej Melkisedeek, uvaʼ jalel tibʼ tuchʼ inqʼa tij imam Levii. 16Tan jitetz vet s-tiʼ jaʼl kʼuy imam, eche uvaʼ nik tal inqʼa bʼekʼbʼal. Pet oketz s-oksan yol vatz Tiuxh, tiʼ uvaʼ quBʼaal Tiuxh aqʼon qʼij isaq uvaʼ yeʼl iyaʼebʼal imotxebʼal.
17Tan ech tzʼibʼamal ka t-viyolbʼal quBʼaal Tiuxh tiʼ tok u Kriisto siqʼesal oksan yol vatz Tiuxh s-eche:
—Poro yeʼl iyaʼebʼal imotxebʼal
avok siqʼesal oksan yol sinvatz.
Ech avatin tiʼ toksal yol,
eche uvaʼ ibʼan Melkisedeek,
—chich u yol.#Saalmo 110.4
18Echetz tel vet ka iqʼije inqʼa naʼyla txhaq bʼekʼbʼal, tan yeʼ oleʼv tiʼ ibʼen inqʼa tij imam Israeel s-jik vatz quBʼaal Tiuxh tiʼ inimaleʼ. Atz inqʼa jitoq elaʼpun taʼn kam uvaʼ isaʼ quBʼaal Tiuxh. 19Tan tira yeʼ oleʼv inqʼa naʼyla txhaq bʼekʼbʼal tiʼ ibʼen inqʼa tij imam Israeel s-jik vatz quBʼaal Tiuxh tiʼ inimal inqʼa bʼekʼbʼal. Pet tikʼen itxhok quBʼaal Tiuxh vaʼt txumbʼal tiʼ ibʼen s-jik s-vatz. Aʼetz uvaʼe, oleʼv vet tiʼ ijetxhon ok inqʼa xaol kʼatz quBʼaal Tiuxh. Atz nikat ikʼutxh vet val u bʼaʼnil s-qe uvaʼ nik qutxʼebʼ veteʼ uvaʼ tira palnaʼq vet tiqleʼm. Tiʼetz uvaʼ at vet vaʼl bʼaʼnil nik qutxʼebʼeʼ, echetz nik qujetxhon oke kʼatz quBʼaal Tiuxh.
20Tul quBʼaal Tiuxh alon toksal u Kriisto siqʼesal oksan yol s-vatz. Tul tiqʼo tzaan quBʼaal Tiuxh val u yol tiʼ ijeqbʼat viyol s-tiʼ. Pet kʼuxhetz ok jolt inqʼa oksan yol vatz Tiuxh xoʼl inqʼa tij imam Israeel, aloq yeʼl vaʼq yol tiqʼo tzaan quBʼaal Tiuxh tiʼ ijeqbʼat tokeʼ. 21Pet koq u Kriisto uvaʼ nik qaleʼ, tan ech tal quBʼaal Tiuxh s-tiʼ s-eche:
—Qat tal quBʼaal Tiuxh vaʼl iyol s-tiʼ.
Tul yeʼl paqul laʼ qʼaʼv tiʼ viyol
uvaʼs ech tal s-eche:
«Poro yeʼl iyaʼebʼal imotxebʼal
avok siqʼesal oksan yol sinvatz.
[Ech avatin laʼ ibʼan, eche Melkisedeek,]»
xeʼt quBʼaal Tiuxh,
—chich u yol tiʼ u Kriisto.#Saalmo 110.4
22Echetz s-tiʼile uvaʼ, aʼ vet quBʼaal Jesuus toksa quBʼaal Tiuxh s-jeqbʼan tetz vaʼt viyol uvaʼ palnaʼq viʼ uvaʼ ijeqbʼa s-bʼaxa.
23Poro eche inqʼa oksan yol vatz Tiuxh, inqʼa tij imam Levii, tan sibʼalen vet tatxhul ex ibʼaneʼ. Tan nikich motx itzʼeq qʼij isaq vatz txʼavaʼ, tul nik ikameʼ. Tzitzietz nikich motx tel vet ele t-tiqleʼm s-oksa yolil.
24Pet koq u quBʼaal Jesuus, tan yeʼl telabʼal tiʼ tatin siqʼesal oksan yol vatz Tiuxh. Tan tira yeʼl iyaʼebʼal imotxebʼal u qʼij isaq. 25Echetz s-tiʼile tira chitel kuxh vet taʼn quBʼaal Jesuus, jatvaʼl inqʼa nik ijetxhoʼk tibʼ kʼatz quBʼaal Tiuxh taʼn quBʼaal Jesuus. Tan at tiqleʼm, atz bʼenamen at kuxh tiʼ ijaqax kuya te quBʼaal Tiuxh tiʼ inqʼa niman tetz.
26Tul ikʼulelxhtuʼ uvaʼ, aʼ vet quBʼaal JesuKriisto ok siqʼesal oksan yol vatz Tiuxh, uvaʼ ech tatin s-eche: Mij taʼn vaʼq ipaʼv. Yeʼl vaʼq paʼv nik tul s-kʼuul. Atz yeʼl invaʼq kantxhaq ibʼana. Tul jetxhich vet el tibʼ kʼatz inqʼa aj paʼvom. Atz aqʼax tiqleʼm tu amlikaʼ viʼ jankʼal inqʼa at tu amlikaʼ.
27Jitetz ech, eche inqʼa iqʼesal oksan yol vatz Tiuxh xoʼl inqʼa tij imam Israeel, tan jit tetxhal koq kuxh laʼ itzʼeʼsa ok inqʼa oya vatz quBʼaal Tiuxh jun qʼij. Tan eche inqʼa oksan yol xoʼl inqʼa tij imam Israeel, tan bʼaxa nik motx itzʼeʼsa ok inqʼa oya vatz Tiuxh tiʼ inqʼa ipaʼv, yaʼne nik ijaq kuya te quBʼaal Tiuxh tiʼ vipaʼv inqʼa xaol.
Pet koq quBʼaal Jesuus, tan paqul kuxh taqʼ tibʼ kamoq tiʼ ijaqax kuya tiʼ jankʼal vipaʼv inqʼa xaol.#Leviitiko 9.17
28Aʼetz nik ibʼen s-qe uvaʼ taʼn kuxh ibʼan inqʼa bʼekʼbʼal toksalaq iqʼesal oksan yol vatz Tiuxh, inqʼa yeʼl iyakʼil tiʼ imaqt tibʼ tiʼ ibʼanax inqʼa paʼv.
Pet koq u yol uvaʼ tal ka quBʼaal Tiuxh tiʼ tok u Kriisto s-oksan yol vatz Tiuxh, tan xamtich vet ibʼana, maʼtich taqʼax ka inqʼa bʼekʼbʼal uvaʼ itzʼibʼa ka Moisees. Tan aʼ vet viKʼaol quBʼaal Tiuxh toksa siqʼesal oksan yol vatz Tiuxh tuchʼ u kaʼv iyol. Tan tira jiklel kuxh tatin taanxelal vatz quBʼaal Tiuxh, tul yeʼl iyaʼebʼal imotxebʼal tatineʼ.
Currently Selected:
Evreeos 7: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.