Evreeos 5
5
1Tan jankʼalxh inqʼa iqʼesal oksan yol vatz Tiuxh, tan xoʼl inqʼa xaol nik chʼexpika. Tan aʼ itxaʼk toksal inqʼa xaol vatz quBʼaal Tiuxh tiʼ kam laʼ ijaq s-te. Atz aʼ itxaʼk toksal oya tetz aqʼbʼal taʼntiuxh te quBʼaal Tiuxh. Atz aʼ itxaʼk itzʼeʼsal ok oya s-jaqbʼal kuybʼal paʼv vatz quBʼaal Tiuxh. 2Atz aʼat itxaʼk u qʼesal oksan yol, tiʼ uvaʼ ayaʼl kuxh bʼaʼn s-te laʼ ibʼan te inqʼa yeʼl itxumbʼal vatz quBʼaal Tiuxh, atz te inqʼa tzʼeqxinaʼq titzʼabʼal vatz quBʼaal Tiuxh. Tan echat kuxh inqʼa iqʼesal oksan yole, tan yeʼlaq iyakʼil tiʼ imaqt tibʼ tiʼ yeʼ ibʼanax inqʼa paʼv, eche inqʼa xaol, inqʼa yeʼlat iyakʼil tiʼ imaqt tibʼ tiʼ yeʼ ibʼanax inqʼa paʼv. 3Xaʼtetze tetxhal kuxh nik itzʼeʼsa ok oya s-jaqbʼal kuya te quBʼaal Tiuxh tiʼ inqʼa ipaʼv, atz tiʼ vipaʼv u tenam inpaqte.#Leviitiko 9.7
4Tul yeʼl u qʼesal oksan yol vatz Tiuxh junt koq kuxh laʼ tal tibʼ siqʼesal oksan yol vatz Tiuxh tiʼ ikʼulux nimla tiqleʼm. Pet aʼ laʼ ok siqʼesal uvaʼ quBʼaal Tiuxh laʼ saʼon s-tiʼ. Eche uvaʼ isaʼax Aroon siqʼesal oksan yol vatz Tiuxh taʼn quBʼaal Tiuxh.#Eeksodo 28.1
5Echetz uvaʼe, ibʼan quBʼaal JesuKriisto. Tan yeʼl quBʼaal JesuKriisto junt koq toksa iqʼij tiʼ tok siqʼesal oksan yol vatz Tiuxh. Pet aʼ quBʼaal Tiuxh alon tokeʼ. Tul ech tal quBʼaal Tiuxh tiʼ u Kriisto s-eche:
—Axh inKʼaol.
In qat kʼaolan axh s-txheel,
—xeʼt quBʼaal Tiuxh.#Saalmo 2.7
6Atz echat nik tal vaʼt u yol uvaʼ tzʼibʼamal ka t-viyolbʼal quBʼaal Tiuxh s-eche:
—Poro yeʼl iyaʼebʼal imotxebʼal
avok siqʼesal oksan yol sinvatz.
Ech avatin tiʼ toksal yol,
eche uvaʼ ibʼan Melkisedeek,
—chich u yol.#Saalmo 110.4
7Tul inatxh quBʼaal Jesuus Tiuxh uvaʼs atich vatz txʼavaʼ tuchʼ vitxhiʼoʼl uvaʼ atich ikamebʼal, tul tira nikich ijaq vaʼl kam te quBʼaal Tiuxh tuchʼ mam oqʼel, atz tuchʼ mam txumuʼm, tan tootzaqliche uvaʼ taʼn kuxh quBʼaal Tiuxh laʼich kolon tiʼ yeʼ ipal tu kamchil. Tul abʼil viyol quBʼaal Jesuus taʼn quBʼaal Tiuxh, tan aʼ ibʼan kam uvaʼ tal quBʼaal Tiuxh s-te, atz tiʼ uvaʼ atich tiqleʼm quBʼaal Tiuxh s-vatz tuulbʼal uvaʼs atich vatz u txʼavaʼ.#Tio 26.36-46; Kuxh 14.32-42; Luk 22.39-46 8Kʼuxhetz iKʼaolichxh quBʼaal Tiuxh u quBʼaal JesuKriisto, poro tetxhal kuxh pal t-vitzaʼlal, tul tetxhal kuxh nimal u quBʼaal Tiuxh taʼn. Tetxhal ex itzoqpisa inimal u quBʼaal Tiuxh. 9Maʼtichetz inimat vet quBʼaal Jesuus kaqaayil viyol viBʼaal, yaʼne aʼ vet quBʼaal JesuKriisto bʼen s-aqʼol tetz chitpichil te inqʼa xaol tiʼ inqʼa ipaʼv. Tul yeʼletz vet iyaʼebʼal imotxebʼal u chitpichil t-inqʼa paʼv vatz quBʼaal Tiuxh, te jatvaʼl inqʼa xaol laʼ niman quBʼaal Jesuus. 10Tul aʼ vet quBʼaal Jesuus ok siqʼesal oksan yol vatz Tiuxh taʼn quBʼaal Tiuxh, eche tok Melkisedeek.
Aʼ u yole tiʼ inqʼa niman tetz Jesuus, inqʼa yeʼ nik isaʼ ikʼulux tel jolt txhusbʼal tiʼ viyolbʼal quBʼaal Tiuxh
11Poro mamala tel kuxh yol toq qal sete tiʼ u quBʼaal Jesuus. Pet aʼe tan, tzaʼl kuxh talax sete, tan yeʼ nik ibʼix teviʼ. 12Tan aʼ vet ekʼulel uvaʼ, aʼ koq vet ex laʼ txhusun ex, tiʼ uvaʼ naʼy tzaan etok s-niman tetz Jesuus. Pet aʼe tan, aʼ tel kuxh nik esaʼeʼ uvaʼ ant koqxh oʼ txhusun tel ex; tul ant koq kuxh qutxhus sete inqʼa iyolbʼal quBʼaal Tiuxh uvaʼ bʼaxaxh qutxhustaʼ. Tan ech tel kuxh etatin nik ebʼan, eche invaʼq neʼ uvaʼ taʼl txhʼuʼ tel kuxh isaʼ, tul aʼ vet ikʼulel uvaʼ txʼix vet laʼ tetxhbʼu. 13Echetz jatvaʼl inqʼa aʼ koq kuxh qutxhus s-te inqʼa txhusel vet s-te qaʼn nik taleʼ. Tan aʼ yeʼ nik motx topoon tiʼ tootzaqileʼ jabʼistee uvaʼ laʼ motx ibʼan tiʼ tatin vatz quBʼaal Tiuxh, maq aʼ u bʼaʼn, atz maq u yeʼbʼaʼn. Tan ech kuxh tatin, eche vaʼq neʼ uvaʼ taʼl txhʼuʼ tel kuxh isaʼ.#1 Koriintios 3.2
14Pet jatvaʼletz inqʼa txhabʼamal vet tiqʼol viyolbʼal quBʼaal Tiuxh taʼn, tan aʼetz inqʼae, at vet itxumbʼal tiʼ ibʼen s-te jabʼistee u bʼaʼn, atz jabʼistee u kantxhaq vatz quBʼaal Tiuxh. Tul tootzaqle kam laʼ ibʼan txhaqpaq tiʼ inqʼa tatineʼ. Aʼetz inqʼae qʼest vet tatin vatz quBʼaal Tiuxh, eche tatin inqʼa qʼesla xaol uvaʼ txʼix vet nik tetxhbʼu.
Currently Selected:
Evreeos 5: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.