Evreeos 1

EVREEOS

Aʼ u yole tiʼ viKʼaol quBʼaal Tiuxh uvaʼ jeqbʼan vet vaʼt viyol quBʼaal Tiuxh

1Nima paquletz yolon quBʼaal Tiuxh s-naʼya te inqʼa kʼuy qumam, aʼe inqʼa tij imam Israeel; tul aʼ tal quBʼaal Tiuxh s-te kam uvaʼ nikich isaʼ s-te. Tul kam kuxh txumbʼal nikich ibʼan quBʼaal Tiuxh s-vatz tiʼ ibʼenaq s-te. Poro aʼ inqʼa qʼexsan tetz viyol quBʼaal Tiuxh nikich ibʼanbʼe tiʼ talax inuqul inqʼa yol te inqʼa kʼuy qumam. 2Petetz vet tuulbʼal inqʼa imotxebʼal qʼij s-txheel, tan aʼ vet viKʼaol quBʼaal Tiuxh nik ibʼanbʼe tiʼ talax inuqul inqʼa yol s-qe. Tan aʼ qat toksavat quBʼaal Tiuxh inqʼa kam s-kaqaayil tiqʼabʼ viKʼaol. Tan tuchʼ viKʼaol quBʼaal Tiuxh, tul motx iviinqixsa ka inqʼa kam s-kaqaayil.{*}#1.2 ¿Kam nik elkaʼpun u yol tiʼ?: —...inqʼa imotxebʼal qʼij s-txheel, —chiche. Aʼ nik elkaʼpun vatz inqʼa apoostol, tiʼ uvaʼ, aʼ u Mesiias ul tzoqpisan inqʼa bʼekʼbʼal uvaʼ tal ka quBʼaal Tiuxh s-naʼya te inqʼa tij imam Israeel. Tul laʼ toksa vet vaʼt akʼ yol, maq tzitzi laʼich motxk vet u qʼij saq, atz maq laʼich toksaaq vaʼtoʼq iqʼesalil s-xoʼl. Pet aʼxh kʼaqichaq taʼn uvaʼ, aʼ u Mesiias laʼich ul tzoqpisan vimotxebʼal qʼij saq s-vatz. 3Atz aʼ viKʼaol u quBʼaal Tiuxh nik kʼutxhun u nimla tatin quBʼaal Tiuxh. Tul kamxh vitxiqun u quBʼaal Tiuxh, atz jankʼalxh u tatin quBʼaal Tiuxh, tul echatxh viKʼaole. Tul aʼ viKʼaol quBʼaal Tiuxh nik atinsan jankʼal inqʼa kam tuchʼ kuxh u taltaʼ, atz tuchʼ u tiqleʼm. Tul aʼ viKʼaol quBʼaal Tiuxh qat oleʼv tiʼ ijeqbʼal vaʼt yol tiʼ itxʼaax u taanxelal inqʼa xaol t-inqʼa paʼv.

Maʼtichetz toleʼv vet u Kʼaola tiʼ jankʼal inqʼae, tul bʼen vet kʼuqeʼvoq tisebʼal quBʼaal Tiuxh tu nimla tatineʼ, atz tuchʼ vilitzʼkabʼin tu amlikaʼ tiʼ ibʼanax viqʼesalil. 4Tul sibʼ tiqleʼm u Kʼaola aqʼax viʼ inqʼa aanxel taʼn quBʼaal Tiuxh. Tul sibʼ talax vet vibʼij u Kʼaola, tiʼ uvaʼ sibʼxh palnaʼq vet vibʼekʼon tiibʼa inqʼa kam viʼ vibʼekʼon inqʼa aanxel.

Aʼ viKʼaol quBʼaal Tiuxh palnaʼq tiqleʼm viʼ inqʼa aanxel

5Tan mij invaʼq inqʼa aanxel uvaʼ ech koq tal quBʼaal Tiuxh s-te s-eche:

—Axh inKʼaol.

In qat kʼaolan axh s-txheel,

—xeʼt koq quBʼaal Tiuxh.#Saalmo 2.7; Vibʼanoʼm inqʼa Apoostol 13.33{*}#1.5 Saalmo 2.7; Vibʼanoʼm inqʼa Apoostol 13.33. Tzitza t-vitoʼv versiikulo, tetxhal topoon t-kajlav versiikulo, nik ex tiqʼo tzaan u tzʼibʼan tetz Evreeos juqvaʼl inqʼa yol. Aʼ ex tiqʼo tzaan inqʼa yol uvaʼ nik ex tal tiʼ u Mesiias uvaʼ itzʼibʼa ka inqʼa qʼexsanich tetz viyol quBʼaal Tiuxh s-naʼya.

Tul jitoq tiʼ invaʼq aanxel talvat quBʼaal Tiuxh vaʼt viyol uvaʼ ech nik tal s-eche:

—In iBʼaal laʼ ibʼana.

Atz inKʼaol uvaʼe laʼ ibʼana,

—chich koq quBʼaal Tiuxh tiʼ invaʼq aanxel.#2 Samueel 7.14; 1 Kroonikas 17.13

6Atz tal quBʼaal Tiuxh vaʼt u yol tiʼ viKʼaol uvaʼs tatinsat vatz txʼavaʼ, viKʼaol quBʼaal Tiuxh uvaʼ sibʼ tiqleʼm taqʼa. Tul ech tal quBʼaal Tiuxh s-eche:

—Natxhkʼuulaloq taʼn inqʼa inaanxel, in u Tiuxh,

—chich u yol.#Deuteronoomio 32.43; Saalmo 97.7

7Bʼantan echxhte qʼaoq inqʼa yol uvaʼ nik tal tiʼ inqʼa aanxel uvaʼ ech s-eche:

—Nik taqʼ bʼen inqʼa iaanxel s-eche kaqiqʼ

tiʼ ibʼanax itxhaq.

Atz nikat taqʼ bʼen inqʼa lotxhol tetz

s-eche taqʼ xamal tiʼ ibʼanax u taqʼon,

—chich u yol tiʼ inqʼa aanxel.#Saalmo 104.4

8Pet tiʼ u Kʼaola, tan ech vaʼt u yol tal s-tiʼ s-eche:

—QuBʼaal Tiuxh, yeʼl iyaʼebʼal imotxebʼal

vabʼant iqʼesalil tuul vakʼuqlebʼal, u tetz iqleʼm.

Tul tuchʼ vinuqul laʼ bʼekʼonk axh

txhaqpaq tuulbʼal uvaʼs atoʼk vabʼaara taqʼabʼ

tiʼ inqʼa bʼekʼoʼm laʼ aala tuulbʼal vabʼant iqʼesalil.

9Tan nik achiibʼ tiʼ ibʼanax kam uvaʼ jikxhtuʼ;

tul tira nik iyan avaanima te inqʼa kantxhaq.

Echetz qat ichʼext axhe, u Tiuxh,

aʼe vaBʼaal,

tiʼ abʼant iqʼesalil.

Tuchʼ chiibʼichil qat ichʼexvat el axh

xoʼl jolt inqʼa amol;

tul niim vet axh s-viʼ qat ibʼana.

Tul qat taqʼ jaʼ aseeite taviʼ

tetxhlal uvaʼ axh ichʼexoʼm,

—chich u yol.#Saalmo 45.6-7

10Atz ech nik tal vaʼt u yol s-eche:

—InBʼaal, axh tijbʼixsan ka

tatin u txʼavaʼ s-kaqaayil

uvaʼs ixeʼt tzaan u qʼij saq.

Tul axh bʼanon ka u amlikaʼ

uvaʼs aaqʼteʼl vaqʼabʼ tiʼ ibʼanaxeʼ.

11Jankʼaletzxh uvaʼ tu amlikaʼ,

tan laʼ motx sotzi.

Pet ech koq axh, tan bʼen qʼij saq avatineʼ.

Tul jankʼalxh inqʼa tu amlikaʼ,

tan ech laʼ motx iqʼaj,

eche laʼ iqʼaj invaʼq oksaʼm.

12Tul ech laʼ abʼosqʼit el,

eche vaʼq qinkin bʼuʼq.

Tul ech laʼ ulbʼel teleʼl,

eche ichʼexpul el vaʼq oksaʼm.

Pet ech koq axh, tan bʼen qʼij saq avatineʼ.

Tul yeʼl itzʼeqebʼal ayaʼbʼ laʼ ibʼana,

—chich u yol.#Saalmo 102.25-27

13Tan mij invaʼq inqʼa aanxel uvaʼ ech koq tal quBʼaal Tiuxh s-te s-eche:

—Kʼuqeʼven tinsebʼal

tiʼ abʼant iqʼesalil,

tan toqnal oleʼvoq in tiʼ teesal iqʼij

inqʼa nik itxhiʼan seʼe;

tul laʼ kaj jaqʼ avoq,

s-eche vaʼq tzeqʼbʼal avoq,

—chich u yol.#Saalmo 110.1

14Echetz aʼ itxaʼk inqʼa aanxel s-bʼanol tetz taqʼon quBʼaal Tiuxh. Tul aʼ txhaqel tzaan tiʼ qulotxhoxeʼ, oʼ inqʼa laʼ kʼulun u nimla qatin kʼatz quBʼaal Tiuxh.

Currently Selected:

Evreeos 1: ixlC

Highlight

Copy

Compare