Gaalatas 1

GAALATAS

Uvaʼs taqʼt bʼen Paʼp bʼaʼnil ikʼuul inqʼa niman tetz Jesuus tuulbʼal Galaasia

1In Paʼp, vaʼl te inqʼa iapoostol quBʼaal JesuKriisto. Tul jit joloq vinaq qat oksan in, atz jitoq invaʼq vinaq qat txhaqon in. Pet aʼ u quBʼaal JesuKriisto tuchʼ u quBʼaal Tiuxh qat txhaqon in, u quBʼaal Tiuxh uvaʼ itzʼeʼvsan u quBʼaal JesuKriisto inpaqte kʼuxh maʼtich ikam veteʼ. 2Inmoletz vibʼ tuchʼ jankʼal inqʼa niman tetz Jesuus, inqʼa at sinkʼatza.

Tul nik qaqʼ bʼen val u uʼ sete, ex inqʼa niman tetz Jesuus, ex inqʼa tuulbʼal Galaasia.#Vibʼanoʼm inqʼa Apoostol 13.14

3Tul aʼ vibʼaʼnil quBʼaal Tiuxh tuchʼ u quBʼaal JesuKriisto laʼ atin sekʼatza; tul aʼ vibʼaʼnil laʼ atin tetaanima. 4Tan qat ul taqʼ tibʼ u quBʼaal JesuKriisto kamoq tiʼ itxhojt inqʼa qupaʼv, atz tiʼ quchitix el vatz u kʼaxbʼichil uvaʼ ile at jaʼp tiibʼa inqʼa palsan yol, inqʼa yeʼ ootzaqin tetz quBʼaal Tiuxh, inqʼa at vatz u txʼavaʼ s-txheel. Tan echich u titzʼabʼal u quTiuxhe s-qiʼ, aʼe u quBʼaal. 5Echetz taʼnxh u quBʼaal Tiuxh uvaʼ yeʼl iyaʼebʼal imotxebʼal toksal iqʼij tuulbʼal jattanulxh yaʼbʼ uvaʼ bʼenaʼl kuxh ibʼen toq tuleʼ. Tul echxh laʼ ibʼane.

Uvaʼs talt Paʼp uvaʼ yeʼl invaʼtoʼq yol laʼ ibʼan eela tuchʼ inqʼa bʼaʼnla txhaq yol tiʼ u quBʼaal Jesuus

6Poro tira nik isotz inkʼuul, tiʼ uvaʼ yeʼ kuxh taqla qat el ka ex tiʼ inimal quBʼaal Tiuxh, uvaʼ qat saʼon tzaan ex tiʼ ikʼulux u bʼaʼnil uvaʼ nik taqʼ u quBʼaal JesuKriisto. Tul aʼ nik okk txhan vet bʼen ex tiʼ invaʼt txhusbʼal uvaʼ nik talax s-bʼaʼnla yol uvaʼ jit eela tuchʼ inqʼa alel vet sete qaʼn. 7Tan yeʼl invaʼtoʼq txhusbʼal at tiibʼa inqʼa bʼaʼnla txhaq yol tiʼ quBʼaal JesuKriisto. Pet aʼ kuxh isaʼ jolol inqʼa xaol sexoʼl isotz ekʼuul. Tul nik iyuj inqʼa bʼaʼnla txhaq yol tiʼ quBʼaal JesuKriisto tuchʼ jolt yol. 8Yeʼletz laʼ enima invaʼtoʼq yol uvaʼ laʼ bʼen alaxoq sete, oq jit aʼ inqʼa bʼaʼnla txhaq yol tiʼ Jesuus uvaʼ ex qal sete. Atz kʼuxh invaʼq oʼ, atz kʼuxh invaʼq aanxel laʼ tzaj t-amlikaʼ, atz kʼuxh jaʼlxh invaʼtoʼq laʼ bʼen alon invaʼtoʼq yol sete, tul yeʼ laʼ eqea. Tan jaʼl u xaol uvaʼ vaʼten vet u yol laʼ bʼen taleʼ, tul ¡aʼ quBʼaal Tiuxh laʼ aqʼon jaʼp u yol s-tiibʼa tiʼ bʼen tilt u kʼaxbʼichil! 9Poro aloq alel vet sete qaʼn. Pet in kuxh vete nik kaʼpaqun talax sete: Jaʼl u xaol laʼ bʼen alon invaʼtoʼq txhusbʼal uvaʼ jit eela tuchʼ inqʼa bʼaʼnla txhaq yol uvaʼ qal sete, tul ¡kʼaxbʼisaloqnetz taʼn quBʼaal Tiuxh!

10Echetze in, tan jit aʼ nik intxhok uvaʼ laʼ alax in s-bʼaʼn taʼn inqʼa xaol, eche uvaʼ nik talax s-viʼ. Pet aʼ nik intxhok uvaʼ bʼaʼn in vatz quBʼaal Tiuxh laʼ ibʼana. Atz jit aʼ nik intxhok toksal inqʼij taʼn inqʼa xaol. Tan oq aʼ uvaʼe laʼ intxhoka, tul jitetz vet in taqʼonvil quBʼaal JesuKriistoe.

Uvaʼs talt Paʼp uvaʼ quBʼaal Tiuxh oksan tzaan Paʼp tiʼ ibʼanax u taqʼon

11Pet toqetz vaqʼ etootzaqi, ex inmol s-niman tetz Jesuus, tiʼ jankʼalxh inqʼa bʼaʼnla txhaq yol uvaʼ nik motx inpaxsa sexoʼl, tan jit kuxh invaʼq xaole txhulin. 12Tan yeʼxhabʼil invaʼq vinaq qat txhusun in s-tiʼ. Tul jit kʼatz invaʼq vinaq qat intxhabʼavat. Pet aʼ u quBʼaal JesuKriisto qat aqʼon vootzaqi.

13Tan abʼimal etaʼn kam uvaʼ nikich inbʼan s-jatxhaq tzaan. Tan tira txʼakich ok vaanima tiʼ inimal u uqʼeʼybʼal uvaʼ nikich qunima, oʼ inqʼa tij imam Israeel. Tul kamal abʼimal etaʼn uvaʼ tira nikich vojqeʼla inqʼa niman tetz Jesuus, inqʼa chʼexich taʼn quBʼaal Tiuxh. Tul tira aʼ nikich insaʼ isotzsal el. 14Tul aʼxh nikich innima u uqʼeʼybʼal uvaʼ nimamich tzaan taʼn inqʼa kʼuy inmam, inqʼa tij imam Israeel. Tul tira pal iviʼ nikich innimat viʼ jolt inqʼa inmol, inqʼa inchʼijel vibʼ s-tuchʼ tuulbʼal vintenam. Tul txʼakich ok vaʼn tiʼ talax te inqʼa xaol uvaʼ tetxhal laʼich inima inqʼa qejoʼm uvaʼ jeqelich tzaan taʼn inqʼa kʼuy inmam. 15Pet isaʼetz te u quBʼaal Tiuxh, tul yekich ichʼex in uvaʼs yeʼxnaqich alamal in taʼn intxutx. Tul qatetz isaʼ vet tzaan in quBʼaal Tiuxh inpaqte tiʼ inkʼult u qʼij saq uvaʼ yeʼl iyaʼebʼal imotxebʼal taʼn vibʼaʼnil. 16Tul aʼ quBʼaal Tiuxh aqʼon vootzaqi viKʼaol, tiʼ uvaʼ laʼ inpaxsa inqʼa bʼaʼnla txhaq yol s-tiʼ xoʼl inqʼa xaol, inqʼa jit tij imam Israeel. Tul yekich inkʼul u yol te quBʼaal Jesuus. Echetz yeʼl in nal koq inbʼen tiʼ tabʼil inuqul te invaʼtoʼq xaol.#Vibʼanoʼm inqʼa Apoostol 9.3-6 17Atz yeʼlat in, uvaʼ nal koq inbʼen jaʼ tu tenam Jerusaleen tiʼ tabʼil inuqul u yol tiʼ quBʼaal JesuKriisto te inqʼa apoostol, inqʼa bʼaxich iqejt Jesuus sinvatz. Pet aʼl aʼ yekich in tu txʼavaʼ Araavia. Yaʼne xamtel qʼaʼv vet in inpaqte tu tenam Damaasko.

18Eletz vet oxvaʼl yaʼbʼ, yaʼne bʼen vet jaʼ in tu tenam Jerusaleen tiʼ tilix Luʼ. Tul oʼlaval qʼij atin in xeʼ Luʼ. 19Eenichetz in tzitzi, tul taʼn kuxh Jakoovo vila, u titzʼin quBʼaal Jesuus. Pet yeʼxhabʼil vaʼtoʼq apoostol vila. 20Tul vatz quBʼaal Tiuxh uvaʼ nuqxh inqʼa yol inqʼa nik intzʼibʼa bʼen sete. Pet jit tzʼeqo tzij uvaʼ nik valeʼ. 21Eletz vet bʼen in tu tenam Jerusaleen, tul yekich vet in tuulbʼal Siiria, atz tuulbʼal Siliisia. 22Yeʼnaqichetz ootzaqimal in taʼn inqʼa niman tetz Jesuus t-junun inqʼa tenam tuulbʼal Judeea. 23Pet nikich kuxh motx tabʼi inyolox taʼn jolt inqʼa niman tetz Jesuus. Tul ech nikich motx tal inqʼa niman tetz Jesuus s-viʼ s-eche: —U vinaq uvaʼ nikich ojqeʼlan oʼ tiʼ inimal Jesuus, tan il bʼak vete nik ipaxsa inqʼa bʼaʼnla txhaq yol tiʼ Jesuus uvaʼ nimamal qaʼn. Aʼetz vet uvaʼe, nik tal s-txheel, kʼuxh nikich teesa iqʼij s-bʼaxa, —chichich kuxh tabʼitaq inqʼa niman tetz Jesuus inyoloxeʼ. 24Tul nikich motx toksa vet inqʼa xaol iqʼij quBʼaal Tiuxh, tiʼ uvaʼ jalpinaʼqich vet vintxumbʼal taʼn quBʼaal Tiuxh.

Currently Selected:

Gaalatas 1: ixlC

Highlight

Copy

Compare