Gaalatas ALBʼAL INUQUL U YOL TIʼ U Uʼ
ALBʼAL INUQUL U YOL TIʼ U Uʼ
GAALATAS
Uvaʼs toq qootzaqitaʼ jaʼl tzʼibʼan u uʼ Gaalatas
Aʼetz u uʼe uvaʼ Gaalatas ibʼij, uvaʼ itzʼibʼa Paʼp. Tan antxh u uʼ nik alon uvaʼ Paʼp tzʼibʼan, eche uvaʼ nik tal tu Gaalatas 1.1.
Uvaʼs toq qootzaqitaʼ kam s-tuul tzʼibʼal u uʼ Gaalatas
Aʼetz nik tal jolol inqʼa aj txumbʼal, ootzaqin tetz inqʼa uʼ uvaʼ tzʼibʼamal ka tuul viyolbʼal quBʼaal Tiuxh, uvaʼ, aʼ itzʼibʼal u uʼ Gaalatas tixoʼl inqʼa yaʼbʼ vajxaqil toxkʼal (48) m.t.J. tuchʼ tu oxkʼalal (60).
Tul aʼ nik motx taleʼ uvaʼ kamal aʼ tzʼibʼalik tu tenam Antiokiia uvaʼ at tuulbʼal Siiria, atz maq tu mam tenam Rooma.
Tul aʼ tzʼibʼalik bʼen te inqʼa xaol, inqʼa maʼtich tok vet s-niman tetz Jesuus tuulbʼal Galaasia. Tan aʼ motx tok s-niman tetz Jesuus uvaʼs ipal paʼl Paʼp s-xoʼl tuchʼ Vernavee tiʼ ipaxsal inqʼa bʼaʼnla txhaq yol tiʼ Jesuus. Tan aʼ uvaʼe, nik tal tu uʼ Vibʼanoʼm inqʼa Apoostol 13.13 tetxhal topoon tu 14.23. Tul tetxhal opoon u yol xoʼl inqʼa niman tetz Jesuus tu tenam Antiokiia, Ikoonio, Liistra tuchʼ t-Deerve tuulbʼal Galaasia.
Uvaʼs toq qootzaqitaʼ kame u taqʼil vitxhusun Paʼp tuul u tuʼ Gaalatas
Aʼetz u taqʼil viyol Paʼp uvaʼ itzʼibʼa te inqʼa niman tetz Jesuus uvaʼ at tuulbʼal Galaasia, aʼe, uvaʼ yeʼ laʼ motx qʼaʼv tiʼ inimal inqʼa tuqʼeʼybʼal inqʼa tij imam Israeel inpaqte. Tan atich jolol inqʼa tij imam Israeel uvaʼ tira yeʼ nikich motx itxʼol taqʼax ka inqʼa tuqʼeʼybʼal, kʼuxh maʼtich tok vet s-niman tetz Jesuus, tiʼ uvaʼ, aʼ quBʼaal Jesuuse u Kriisto. Echetz s-tiʼile nikich motx iyaʼlu inqʼa tij imam Israeel inqʼa jit tij imam Israeel tiʼ iqeex u tuqʼeʼybʼal. Echetz s-tiʼile iyaj bʼen Paʼp inqʼa niman tetz Jesuus tuulbʼal Galaasia. Tul tziʼtzotxhichxh ibʼen Paʼp tiʼ talax inuqul junun inqʼa yol. Tan nikich tal Paʼp kam viyeʼbʼaʼnil u tuqʼeʼybʼal inqʼa tij imam Israeel, tul kam vibʼaʼnil viqeex inqʼa bʼaʼnla txhaq yol tiʼ Jesuus.
Uvaʼs toq qootzaqitaʼ kam ulbʼemal ijatxp ixoʼl inqʼa yol tu uʼ Gaalatas
U uʼ Gaalatas, uvaʼ itzʼibʼa ka Paʼp, tan juqvaʼlen tanul elnaʼq inqʼa yol uvaʼ nik tal s-tuul.
Gaalatas 1.1-5
Aʼetz ixeʼtebʼe Paʼp talax tiʼ jaʼl nik tzʼibʼan u uʼ, atz jaʼl nik kʼulun. Yaʼne taqʼ vet bʼen Paʼp bʼaʼnil ikʼuul inqʼa niman tetz Jesuus, inqʼa nikich imol tibʼ t-inqʼa tenam, inqʼa tuulbʼal Galaasia. Tul nik tal bʼaʼnla txhaq yol s-tiʼ. Tan ech uvaʼe nik ibʼan Paʼp txhaqpaq tiʼ itzʼibʼal inqʼa tuʼ.
1. Gaalatas 1.6—2.21
U bʼaxa tanul yol, tan aʼ tal Paʼp tiʼ viyajt bʼen inqʼa aj Gaalatas tiʼ tok bʼen tiʼ iqeex u tuqʼeʼybʼal inqʼa tij imam Israeel inpaqte. Tan aʼ nikich tal jolol inqʼa iqʼon iviʼ xoʼl inqʼa niman tetz Jesuus uvaʼ antxh laʼ motx iqej kam uvaʼ nik tal inqʼa bʼekʼbʼal uvaʼ itzʼibʼa ka Moisees. Echetz nikich motx ibʼane tiʼ iyuux u uqʼeʼybʼal tuchʼ viqeex Jesuus. Pet aʼetz nikich tal Paʼp uvaʼ yeʼ laʼ utxh iyujtaʼ. Pet aʼich laʼ motx inima kamxhte uvaʼ kʼutxhux te Paʼp taʼn u quBʼaal Jesuus. Tan ech s-tiʼile el ka Paʼp tiʼ iqeex u tuqʼeʼybʼal inqʼa tij imam Israeel. Tan mamala kam kʼutxhux s-te taʼn quBʼaal Jesuus tiʼ iqeex inqʼa bʼaʼnla txhaq yol tiʼ Jesuus. Echetz iyajt tibʼ Paʼpe tuchʼ Luʼ, tan nikich itzaqʼbʼe Luʼ iyuux u tuqʼeʼybʼal inqʼa tij imam Israeel tuchʼ viqeex inqʼa bʼaʼnla txhaq yol tiʼ Jesuus. Pet aʼ nikich tal Paʼp uvaʼ taʼn kuxh laʼich chiton inqʼa xaol vatz u kʼaxkʼo t-inqʼa ipaʼv viqeex kame uvaʼ pal ibʼan u quBʼaal Jesuus vatz txʼavaʼ. Pet jit tiʼ ibʼanax jankʼal uvaʼ nik tal inqʼa bʼekʼbʼal.
2. Gaalatas 3.1-5
Vikaʼv tanul yol, tan aʼ tal Paʼp tiʼ vibʼokʼtziil inqʼa niman tetz Jesuus, tiʼ uvaʼ yeʼ laʼ itanbʼa inimal inqʼa bʼaʼnla txhaq yol tiʼ Jesuus, aʼe, uvaʼ mam yol motx ikʼult inqʼa aj Galaasia viTiuxhil Tiuxh tiʼ inimal inqʼa bʼaʼnla txhaq yol tiʼ Jesuus. Pet jit tiʼ viqeex inqʼa tuqʼeʼybʼal inqʼa tij imam Israeel.
3. Gaalatas 3.6-18
Vitoxv tanul yol, tan aʼ tal Paʼp tiʼ vikʼuqeʼv ikʼuul inqʼa xaol tiʼ quBʼaal Tiuxh tiʼ ikuyux inqʼa ipaʼv. Tul jit vet aj paʼvom vatz quBʼaal Tiuxh laʼ ibʼana. Tan ech uvaʼe ibʼan quBʼaal Tiuxh tuchʼ Avraʼaam. Pet jit aʼ kuypik vipaʼv inqʼa xaol tiʼ iqeex inqʼa bʼekʼbʼal.
4. Gaalatas 3.19—4.7
Vikajv tanul yol, tan aʼ tal Paʼp tiʼ kam itxaʼk inqʼa bʼekʼbʼal uvaʼ tzʼibʼamal ka uvaʼ tal ka quBʼaal Tiuxh te Moisees. Tan aʼ itxaʼk ikʼutxht bʼen inqʼa tij imam Israeel tiʼ tul u Kriisto. Tiʼetz vikʼuqbʼat inqʼa xaol ikʼuul tiʼ u Kriisto, tul laʼ kuyux inqʼa ipaʼv taʼn quBʼaal Tiuxh, kʼuxh kamxh xaolil. Echetz s-tiʼil aʼ ex yaʼk vet itxakunbʼal inqʼa bʼekʼbʼal uvaʼs tul vet u Kriisto. Uletz vet u Kriisto, tul tzitzi tzoqpik vet inimal inqʼa bʼekʼbʼal.
5. Gaalatas 4.8—5.15
Vitoʼv tanul yol, tan aʼ tal Paʼp, tiʼ uvaʼ ibʼan Paʼp eela inimal inqʼa bʼekʼbʼal tuchʼ invaʼq xaol uvaʼ loqʼel tok tiʼ ibʼanax aqʼon. Tan qʼiil aqʼbʼal taqʼonv u aqʼonvil jankʼal uvaʼ laʼ tal u bʼaal taqʼon s-te, jankʼal echiche tatin Agaar kʼatz Avraʼaam. Tan loqʼelich Agaar tiʼ ibʼanax aqʼon. Echatetz kuxh uvaʼe nikich ibʼan inqʼa xaol tiʼ inimal jankʼal inqʼa bʼekʼbʼal. Tan mam yol inimal jankʼal inqʼa bʼekʼbʼal. Echetz tira txeyelich tibʼ inqʼa xaol tuchʼ inqʼa bʼekʼbʼal nikich inatxheʼ.
Pet aʼetz vet nik ibʼan Paʼp eela inqʼa niman tetz Jesuus tuchʼ inqʼa xaol uvaʼ jit loqʼel nik tok tiʼ aqʼon, jankʼal eche uvaʼ ibʼan Saara, tan bʼane loqʼelich koq tok Saara tiʼ aqʼon. Pet tira chitpinaʼqich kuxh tatin Saara tiʼ ipaleʼ. Tan tiʼ kuxh vikʼuqbʼataq inqʼa niman tetz Jesuus ikʼuul tiʼ u quBʼaal Jesuus, tul chitelaq vet tiʼ inimal jankʼal inqʼa bʼekʼbʼal. Jitetz kuxh vet, tiʼ uvaʼ chitele, pet mamala bʼaʼnil nik taltzii quBʼaal Tiuxh s-te tiʼ u tatin tuchʼ u quBʼaal Jesuus. Echetz nik ibʼant Paʼp yaʼle tiʼ talax te inqʼa aj Galaasia uvaʼ yeʼ laʼ motx qʼaʼv tiʼ inimal inqʼa uqʼeʼybʼal tetz inqʼa tij imam Israeel.
6. Gaalatas 5.16—6.10
Vivaqaq tanul yol, tan aʼ tal Paʼp, tiʼ uvaʼ laʼ motx ikʼutxha uvaʼ, aʼ vet viTiuxhil Tiuxh nik ibʼekʼon s-kʼatza. Tan aʼ nik isaʼ quBʼaal Tiuxh te inqʼa xaol uvaʼ ech laʼ motx ikʼutxht u bʼaʼnil, eche nik ikʼutxht inviʼoq tzeʼ bʼaʼnla ivatz. Eche uvaʼ nik tal inqʼa yol inqʼaa: At taanima tiʼ imol. Laʼ chiibʼ tiʼ u taqʼonv quBʼaal Tiuxh s-kʼatza. Laʼ toksa bʼaʼnil xoʼl xaol. Laʼ ikotxʼ ivatz tuulbʼal inqʼa itzaʼlal. Ayaʼlxh bʼaʼn s-te laʼ ibʼana. Laʼ ilotxh imol. Tul kʼuqlebʼalxh kʼuul tatin laʼ ibʼana. Tzʼuʼkinla xaol laʼ ibʼana. Laʼ imaq tibʼ tiʼ kamxh paʼvil.
Tul tal Paʼp uvaʼ yeʼ laʼ taqʼ tibʼ inqʼa xaol bʼekʼloq taʼn tatxhaʼv vitxhiʼoʼl, tan yeʼxhkam laʼ taqʼa; jankʼal eche inqʼa yol inqʼaa: Inqʼa yansa ibʼ tuchʼ vaʼt xaol uvaʼ jit ikʼulel tibʼ s-tuchʼ; u yansa ibʼ s-bʼaxa uvaʼs yeʼnaq tzʼalonoq; inqʼa txoqebʼal kʼuulla txumbʼal, atz inqʼa palsan iviʼ tiʼ tatxhaʼv vitxhiʼoʼl; atz vinatxhkʼuulal inqʼa bʼitichla tiuxh; atz u kunaʼm; jankʼal inqʼa txhiʼtxhoil; txhʼaʼo; txhoʼnichil kʼuul; kʼaʼnal; inqʼa yajo ibʼ; atz uvaʼ yeʼ nik ikʼul tibʼ iyol; atz inqʼa nik jalpun talax viyolbʼal quBʼaal Tiuxh; atz u txhiʼanchil kʼuul; u yatzʼoʼm; qʼabʼaʼm; inimal nimla qʼij uvaʼ, aʼ kuxh u yeʼbʼaʼn nik ibʼanax s-tuul.
7. Gaalatas 6.11-17
Vijuqv tanul yol, tan aʼ tal Paʼp, tiʼ uvaʼ tira nik ichiibʼ Paʼp tiʼ jankʼal uvaʼ qat ibʼan quBʼaal Jesuus tiʼ itxhoox ipaʼv jankʼal inqʼa niman tetz. Tan junal chitelaq vet tiʼ yeʼ ibʼen tu kʼaxkʼo tiʼ inqʼa ipaʼv. Atz chitelaq vet tiʼ yeʼ iqejt jankʼal inqʼa bʼekʼbʼal tetz u tuqʼeʼybʼal inqʼa tij imam Israeel, jankʼal eche vitzokʼox el inbʼiil te vitxhiʼoʼl inqʼa vinaq. Echetz tira nik ichiibʼ Paʼp tiʼ inqʼa bʼaʼnil uvaʼ nik ikʼul inqʼa niman tetz Jesuus tiʼ viyatzʼax el quBʼaal Jesuus vatz kurus. Tan aʼ viyatzʼax el quBʼaal Jesuus vatz u kurus oleʼv tiʼ itxhoox vipaʼv inqʼa xaol vatz quBʼaal Tiuxh. Atz aʼ viyatzʼax el quBʼaal Jesuus vatz kurus oleʼv tiʼ iyaʼsal inimal inqʼa bʼekʼbʼal. Echetz kʼuxh txoqebʼal kʼuul viyatzʼax u Kriisto vatz kurus vatz inqʼa tij imam Israeel, poro mam bʼaʼnil vatz inqʼa niman tetz Jesuus.
Gaalatas 6.18
Tiyaʼtebʼaletz veteʼ, tul nik taqʼ bʼen Paʼp bʼaʼnil ikʼuul inqʼa niman tetz Jesuus, inqʼa at tuulbʼal Galaasia. Tul nik iyaʼ vet iyoloneʼ.
Currently Selected:
Gaalatas ALBʼAL INUQUL U YOL TIʼ U Uʼ: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.