Gaalatas 2

Uvaʼs talt Paʼp tiʼ vibʼant eela vitxhusbʼal tuchʼ vitxhusbʼal inqʼa iqʼon iviʼ xoʼl inqʼa niman tetz Jesuus tu tenam Jerusaleen

1Eletz vet kajlaval yaʼbʼ, tul bʼen vet jaʼ in inpaqte tu tenam Jerusaleen tuchʼ Vernavee. Tul ant Tiito viqʼo s-viʼ. 2Poro aʼ u quBʼaal Tiuxh kʼutxhun s-ve, tul bʼen jaʼ in tu tenam Jerusaleen. Tul tira ex inbʼan kʼula vatz tuchʼ inqʼa nik ikʼutxheʼ uvaʼ iqʼesal tatineʼ. Tul ex vaqʼ tootzaqi maq antxhte inqʼa txhusbʼal nikich val tiʼ Jesuus xoʼl inqʼa jit tij imam Israeel. Tan yeʼich insaʼ uvaʼ laʼich kuxh inbʼutxh vibʼ tiʼ talax inqʼa bʼaʼnla txhaq yol, tul xamel laʼ eesal iqʼij. 3Poro yeʼl vaʼq inqʼa ataqich tiqleʼm alon iqolpeʼl inbʼeeq te vitxhiʼoʼl Tiito uvaʼ txhʼuyich s-viʼ, tul kʼuxh tootzaqlichaqe uvaʼ jitich tij imam Israeel Tiito.{*}#2.3 Aʼ uvaʼe, ‹circuncisión› tu kastiiya.

4Tul kʼuxhetz itxhok kaʼl inqʼa qumol s-tijaq imam Israeel ipaloʼk s-quxoʼl, inqʼa taqʼ kuxh bʼen tibʼ s-niman tetz Jesuus, tan aʼaqich kuxh isaʼ uvaʼ antxh laʼich inima inqʼa niman tetz Jesuus, inqʼa jit tij imam Israeel, inqʼa bʼekʼbʼal uvaʼ itzʼibʼa ka Moisees. Tul ijutxietz kuxh ipaloʼk s-quxoʼl, tan aʼaqich kuxh isaʼ tabʼitaʼ jatvoʼq vet inqʼa bʼekʼbʼal nikich quxoʼla ka tiʼ inimal u chitpichil tiʼ inimal u quBʼaal JesuKriisto. Tul aʼaqichetz isaʼ uvaʼ tetxhal laʼich ok oʼ jaqʼ inqʼa bʼekʼbʼal inpaqte, tul tetxhal laʼich qunima inqʼa bʼekʼbʼal nikich motx taleʼ. Tul aʼetz nikich motx taleʼ uvaʼ tira aʼl laʼich qokoʼk jaqʼ vitatxhʼt oʼ inqʼa bʼekʼbʼal. 5Poro yeʼl inbʼeeq qutzaqʼbʼeaq tiʼ inimal inqʼa iyol uvaʼ motx tal tiʼ iqolpeʼl inbʼeeq te vitxhiʼoʼl inqʼa niman tetz Jesuus, inqʼa jit tij imam Israeel. Tan yeʼ qusaʼ laʼ jalp inqʼa bʼaʼnla txhaq yol uvaʼ nimamal etaʼn. 6Poro yeʼxhkametz vaʼtoʼq yol tal inqʼa ataqich tiqleʼm, tiʼ inqʼa txhusbʼal nikich val tiʼ quBʼaal Jesuus xoʼl inqʼa jit tij imam Israeel. Tul yeʼl vokebʼal tiʼ tootzaqileʼ kam tatin inqʼa ataqich tiqleʼm, maq sibʼ palnaʼq tiqleʼm s-jatxhaq tzaan, atz maq yeʼle. Pet taʼn kuxh vootzaq uvaʼ yeʼl txhʼoj, atz yeʼl nim vatz quBʼaal Tiuxh. 7Tul yeʼl invaʼtoʼq yol motx tala. Tul aʼl ibʼenaq vet s-te uvaʼ quBʼaal Tiuxh txhaqon in tiʼ talax inqʼa bʼaʼnla txhaq yol tiʼ quBʼaal JesuKriisto xoʼl inqʼa jit tij imam Israeel. Tul yekichetz kuxh motx bʼen vet s-te uvaʼ echatxh intxhaqax tiʼ talax inqʼa bʼaʼnla txhaq yol xoʼl inqʼa jit tij imam Israeel, eche uvaʼ itxhaqax Luʼ xoʼl inqʼa tij imam Israeel. 8Tan aʼ u quBʼaal JesuKriisto nik bʼanbʼen Luʼ tiʼ ipaxsal inqʼa bʼaʼnla txhaq yol xoʼl inqʼa tij imam Israeel. Tul antxh u quBʼaal JesuKriisto nikat bʼanbʼen in tiʼ ipaxsal inqʼa bʼaʼnla txhaq yol xoʼl inqʼa jit tij imam Israeel. 9Aʼichetz Jakoovo tuchʼ Luʼ tuchʼ Xhun iqʼon iviʼ. Tul motx bʼenaq vet s-te uvaʼ, aʼ vibʼaʼnil quBʼaal JesuKriisto nikich bʼanbʼen in tiʼ ipaxsal inqʼa bʼaʼnla txhaq yol tiʼ quBʼaal JesuKriisto xoʼl inqʼa jit tij imam Israeel. Echetz motx ikuyt vet inbʼene tuchʼ Vernavee tiʼ ipaxsaleʼ. Pet antetzxh motx ipaxsavat vet inqʼa bʼaʼnla txhaq yol tiʼ quBʼaal JesuKriisto xoʼl inqʼa tij imam Israeel. 10Aʼetz kuxh ibʼekʼ bʼen oxvaʼl inqʼa iqʼon iviʼ s-qe uvaʼ laʼ qulotxh inqʼa qumol s-niman tetz Jesuus, inqʼa meebʼaʼ tatin tu mam tenam Jerusaleen. Tul aʼetz uvaʼe, nik tel vaanima tiʼ ibʼanaxeʼ.

Uvaʼs talt Paʼp tiʼ viyaʼl Luʼ taʼn Paʼp tu tenam Antiokiia

11Tul aqʼbʼetz vet Luʼ tu tenam Antiokiia, tul vila uvaʼ kantxhaq uvaʼ nikich ibʼan Luʼ. Tul inyaj vet Luʼ s-tiʼ. 12Tan nikich ibʼan Luʼ uvaʼ s-bʼaxa uvaʼs ex isolit inqʼa niman tetz Jesuus tu Antiokiia. Tul nikich itxʼaʼon Luʼ xoʼl inqʼa jitich tij imam Israeel. Yaʼne aqʼbʼ vet jolol inqʼa tij imam Israeel kʼatz Luʼ uvaʼ txhaqelich taʼn Santiaago nikich taleʼ. Tiletz vet Luʼ uvaʼ ataqich vet inqʼa tij imam Israeel, tul qʼoon itxhok vet Luʼ ijetxhon el kʼatz inqʼa jitich tij imam Israeel. Tul yeʼl Luʼ nikich iyolon vet s-tuchʼ. Tan nikich ixoʼv vet Luʼ tiʼ kam laʼich tal vet inqʼa imol s-tijaq imam Israeel tu tenam Jerusaleen. 13Tul antxh ibʼan txha vet jolt inqʼa tij imam Israeel, inqʼa jeqlich tu tenam Antiokiia, inqʼa niman tetz Jesuus, kam uvaʼ ibʼan Luʼ. Tan motx ijetxhaq vet el tibʼ kʼatz inqʼa jit tij imam Israeel. Atz ant vet Vernavee bʼoqol tiʼ ibʼanax inqʼa txumbʼal uvaʼ bʼan vatz kuxh nikich motx ibʼan veteʼ.

14Viletz veteʼ uvaʼ yeʼ nikich ikʼul vet tibʼ kam uvaʼ nikich ibʼan Luʼ tuchʼ inqʼa bʼaʼnla txhaq yol tiʼ Jesuus, yaʼne ech ivatz inqʼa niman tetz Jesuus, tul ech val te Luʼ s-eche: —Txa Luʼ, nik kuxh asotzsa ikʼuul inqʼa xaol, inqʼa nik niman vet inqʼa bʼaʼnla txhaq yol tiʼ Jesuus tuchʼ vatxumbʼal uvaʼ nik abʼaneʼ. Tan jatxhaq tzaan vete aaqʼ ka inimal inqʼa iqejoʼm inqʼa tij imam Israeel, kʼuxh axh tij imam Israeel. Pet ¡kantxhaqetz vet uvaʼ nik abʼaneʼ! Tan antxh txhan vet axh nik yaʼlun inqʼa jit tij imam Israeel inpaqte tiʼ inimal inqʼa qejoʼm.

15Echetze oʼ, tan oʼxh tij imam Israeel s-qalaleʼ. Echetz nikich qunimate inqʼa bʼekʼbʼal. Tan aʼ nikich qale uvaʼ jit ech qupaʼvin, eche inqʼa jit tij imam Israeel, tiʼ uvaʼ yeʼ nikich motx inima inqʼa bʼekʼbʼal. 16Tul qootzaqletz veteʼ uvaʼ jit aʼ vinimal inqʼa bʼekʼbʼal, uvaʼ itzʼibʼa ka Moisees, qat bʼanon uvaʼ jit vet oʼ aj paʼvom vatz quBʼaal Tiuxh. Pet aʼ u quqejt u quBʼaal JesuKriisto qat bʼanon uvaʼ jit vet oʼ aj paʼvom vatz quBʼaal Tiuxh. Echetz kʼuxh oʼ tij imam Israeel, tan qat quqej vet u quBʼaal JesuKriisto. Tiʼetz vet uvaʼ qat quqej u quBʼaal JesuKriisto, tul jit vet oʼ aj paʼvom vatz quBʼaal Tiuxh. Pet jit vet tiʼ qunimat inqʼa bʼekʼbʼal, tul jit vet oʼ aj paʼvom vatz quBʼaal Tiuxh. Tan yeʼxhabʼil invaʼq laʼ bʼen s-jit aj paʼvom vatz quBʼaal Tiuxh tiʼ vinimal inqʼa bʼekʼbʼal.

17Pet aʼ qat qutxhoke uvaʼ laʼ tal vet oʼ quBʼaal Tiuxh s-jit aj paʼvom, oʼ inqʼa tij imam Israeel, tiʼ quqejt u quBʼaal JesuKriisto. Echetz, tiʼ uvaʼ nik qutxhok qubʼen s-jit aj paʼvom vatz quBʼaal Tiuxh, oʼ inqʼa tij imam Israeel, aʼetz nik ex elkaʼpune uvaʼ eela kuxh oʼ s-aj paʼvomil tuchʼ inqʼa jit tij imam Israeel.

Tul atetz vet xaol ech nik alon s-eche: «Tiʼetzebʼ kuxh iqejex JesuKriisto, tul aj paʼvom vet oʼ, Tan yeʼ nik qunima vet inqʼa bʼekʼbʼal,» chich vet inqʼa xaol. Yeʼle. 18Tan yeʼxhkam laʼ taqʼa oq laʼ qʼaʼv oʼ inpaqte tiʼ inimal inqʼa bʼekʼbʼal. Aʼl aj paʼvom vet oʼ laʼ ibʼana, tan maʼt qeesat iqʼij inqʼa bʼekʼbʼal tiʼ qunimat inqʼa bʼaʼnla txhaq yol tiʼ Jesuus. Jankʼal eche vaʼq bʼitol otzotz, tan oq laʼ kuxh xeʼt tiʼ ibʼitix jaʼ u qʼaʼl otzotz inpaqte uvaʼ maʼt itilput el. 19Pet qatetz bʼeny vet s-ve, uvaʼ jit aʼ vinimal inqʼa bʼekʼbʼal laʼ bʼanon, tul jit vet oʼ aj paʼvom vatz quBʼaal Tiuxh laʼ ibʼana. Xaʼtetze qat intanbʼa vet inimal inqʼa bʼekʼbʼal. Tul eelaetz vete s-tuchʼ uvaʼ, aʼ vet qat kameʼl u naʼyla txumbʼal. Tul aʼ laʼ inbʼan vet u akʼla txumbʼal uvaʼ nik isaʼ quBʼaal Tiuxh s-ve. 20Tan aʼ tel vet ka iqʼij inqʼa naʼyla txumbʼal uvaʼs ikam u quBʼaal JesuKriisto vatz kurus. Echetz jit vet aʼ, in nik bʼekʼon u vatineʼ, pet aʼ vet u quBʼaal JesuKriisto nik bʼekʼon in. Tan ile at sinkʼatza. Jankʼaletz uvaʼ nik inbʼan tuchʼ u vatineʼ, tul taʼn kuxh nik inkʼuqbʼavat inkʼuul tiʼ viKʼaol quBʼaal Tiuxh; tul nik inbʼaneʼ. Niketz inkʼuqbʼa inkʼuul s-tiʼ, tan aʼ uvaʼe, el taanima s-viʼ. Tul ul taqʼ tibʼ kamoq s-viʼ. 21Xaʼtetze aʼ nik voksa iqʼij vibʼaʼnil quBʼaal Tiuxh. Pet eche uvaʼ tiʼ koq inimal inqʼa bʼekʼbʼal, tul jit vet aj paʼvom inqʼa xaol vatz quBʼaal Tiuxh, tul yeʼxhkametz tokebʼale vikamebʼal quBʼaal JesuKriisto tiʼ inqʼa xaol, —xeʼt in te Luʼ.

Currently Selected:

Gaalatas 2: ixlC

Highlight

Copy

Compare