Efeesios 1

EFEESIOS

Uvaʼs taqʼt bʼen Paʼp bʼaʼnil ikʼuul inqʼa niman tetz Jesuus tu tenam Eefeso

1In Paʼp, vaʼl te inqʼa iapoostol quBʼaal JesuKriisto, tan ech u titzʼabʼal quBʼaal Tiuxhe s-viʼ.

Niketz vaqʼ bʼen val u uʼ sete, ex inqʼa chʼexel ex taʼn quBʼaal Tiuxh, ex inqʼa tu tenam Eefeso, ex inqʼa kʼuqlebʼxh kʼuul etatin vet tiʼ inimal u quBʼaal JesuKriisto.

2Tul aʼ vibʼaʼnil Tiuxh, u quBʼaal, tuchʼ u quBʼaal JesuKriisto, laʼ atin sexoʼl. Tul aʼ vibʼaʼnil laʼ atin tetaanima.{*}#1.2 U yol ‹gracia› tu kastiiya uvaʼ nik tal u versiikulo uvaʼa, tan ‹bʼaʼnil› nik elkaʼp t-quyolbʼal. Aʼetz u bʼaʼnile tiʼ u kuybʼal ipaʼv inqʼa xaol uvaʼ oy kuxhtuʼ, inqʼa laʼ niman quBʼaal Jesuus. Pet u yol ‹paz› tu kastiiya uvaʼ nik tal u versiikulo uvaʼa inpaqte, tan ‹bʼaʼnil tetaanima› nik elkaʼp t-quyolbʼal. Aʼetz u bʼaʼnile, tiʼ uvaʼ bʼaʼn laʼ tatin inqʼa niman tetz Jesuus vatz quBʼaal Tiuxh tiʼ vinimal u quBʼaal Jesuus.

Uvaʼs inatxht Paʼp Tiuxh tiʼ inqʼa niman tetz Jesuus, atz taqʼ taʼntiuxh tiʼ inqʼa mam bʼaʼnil uvaʼ nikich ikʼul inqʼa niman tetz Jesuus, inqʼa tu tenam Eefeso, tiʼ inimal u quBʼaal Jesuus

3Qoksavaqetz iqʼij u quBʼaal Tiuxh, viBʼaal u quBʼaal JesuKriisto, tiʼ inqʼa mam bʼaʼnil uvaʼ qat taqʼ s-qe s-kʼatza t-inqʼa amlikaʼ tal uvaʼ nik ibʼanvat quBʼaal Tiuxh iqʼesalil. Tul tiʼetz u qatin tuchʼ quBʼaal JesuKriisto nik isaʼvat taqʼax inqʼa mam bʼaʼnil s-qe. 4Yekichetzxh ichʼex oʼ u quBʼaal Tiuxh tiʼ qubʼen sitenam uvaʼs yeʼxnaqich iviinqixsat u qʼij saq. Tan tootzaqich vet quBʼaal Tiuxh uvaʼ laʼich qubʼan vaʼl quyol tuchʼ u quBʼaal JesuKriisto, atz tiʼ uvaʼ laʼ qujetxhoʼk qibʼ kʼatz quBʼaal Tiuxh, atz tiʼ uvaʼ yeʼl vet invaʼtoʼq yeʼbʼaʼn laʼ til s-qiʼ, eche vaʼq oksaʼm uvaʼ mij vet bʼeeq tzʼil s-tiʼ. 5Tan tiʼ uvaʼ atxh taanima quBʼaal Tiuxh s-qiʼ, tul yekichxh tal quBʼaal Tiuxh uvaʼ tira laʼich toksa vet oʼ s-kʼaol imeʼal taʼn vibʼaʼnil u quBʼaal JesuKriisto. Echetz ibʼant quBʼaal Tiuxhe, tan aʼ u bʼaʼnil kʼaqich taʼn tiʼ taqʼax s-qe. 6Tan aʼ isaʼ quBʼaal Tiuxh uvaʼ laʼ oksal iqʼij tiʼ u atxhvebʼalla bʼaʼnil uvaʼ qat ibʼana. Tan qat ijalpu oʼ tiʼ qubʼen s-bʼaʼn s-vatz tiʼ u qatin tuchʼ u quBʼaal JesuKriisto, uvaʼ atxh taanima quBʼaal Tiuxh s-tiʼ. 7Tul aʼ u quBʼaal JesuKriisto qat ul chiton el oʼ jaqʼ u yol uvaʼ atich vet jaʼp s-qiibʼa, tiʼ tel vikaqal tiʼ qukuyuxeʼ. Tan sibʼxhte vibʼaʼnil quBʼaal Tiuxh s-qiʼ. 8Poro elom koqxhte uvaʼ nik taqʼ quBʼaal Tiuxh s-qe. Tan qat taqʼ mamala qutxumbʼal tiʼ jankʼal inqʼa ul ibʼan quBʼaal JesuKriisto vatz txʼavaʼ. Atz qat taqʼ mamala qootzaqibʼal s-tiʼ. 9Atz qat taqʼ quBʼaal Tiuxh qootzaqi u titzʼabʼal s-qiʼ, inqʼa yaʼn nik taqʼ ootzaqiloq s-txheel. Tan aʼ u bʼaʼnil kʼaqich taʼn tiʼ taqʼax s-qe, tan ech uvaʼe alelich tzaan s-qiʼ taʼn s-bʼaxa. Tul tiʼetz u qatin tuchʼ quBʼaal JesuKriisto taqʼvat ootzaqiloq. 10Tan tetxhal laʼich opoon vaʼl qʼij uvaʼ laʼich itzoqpisa elaʼpun quBʼaal Tiuxh kam inqʼa bʼaʼn uvaʼ alelich taʼn. Tul tetxhal kuxh vaʼl vet laʼich ibʼant quBʼaal JesuKriisto iqʼesalil tiibʼa inqʼa kam s-kaqaayil, inqʼa vatz txʼavaʼ, atz inqʼa t-amlikaʼ.

11Echetz tiʼ u qatin tuchʼ u quBʼaal JesuKriisto, tul itxaj oʼ quBʼaal Tiuxh, atz tiʼ uvaʼ, oʼ oksan iqʼij u quBʼaal Tiuxh laʼ ibʼana. Tan bʼanelxh vet ka taʼn quBʼaal Tiuxh uvaʼ laʼich bʼen oʼ s-niman tetz. Tan antxh quBʼaal Tiuxh nik bʼanon uvaʼ ech laʼ elkaʼpun inqʼa yole uvaʼ itzʼamich tzaan taʼn tiʼ ibʼanaxeʼ. 12Tan aʼ titzʼabʼal quBʼaal Tiuxh s-qiʼ, oʼ inqʼa tij imam Israeel, uvaʼ, aʼ, oʼ laʼ oksan iqʼij tiʼ u nimla tatineʼ, oʼ inqʼa bʼaxa nik qutxʼebʼon tiʼ tul u Kriisto. 13Echatetz kuxh titzʼabʼal quBʼaal Tiuxhe setiʼ. Tan ant ex motx qeon inqʼa bʼaʼnla txhaq yol tiʼ Jesuus. Tan qat etabʼi inqʼa yol uvaʼ qal sete uvaʼ inuqulxhtuʼ. Tul qat motx eqeja, echetz qat motx echitpe t-inqʼa epaʼv. Yaʼne qat ok vet viTiuxhil Tiuxh tetaanxelal, viTiuxhil Tiuxh uvaʼ alel veteʼ uvaʼ laʼ aqʼax s-qe taʼn quBʼaal Jesuus. Tan aʼ viTiuxhil Tiuxh qat okka setetxhlal uvaʼ tira ex vet niman tetz u quBʼaal JesuKriisto. 14Aʼetz vet viTiuxhil Tiuxh xheenya s-qiʼ, txʼebʼbʼal tetz, tiʼ uvaʼ atel kam laʼ taqʼ quBʼaal Tiuxh s-qe. Tan tetxhal kuxh laʼ opoon u qʼij, tul laʼ ichit quBʼaal Tiuxh vitenam uvaʼ chʼexel vet taʼn, echetz laʼ qoksat vet iqʼij u quBʼaal Tiuxhe s-tiʼ.

Uvaʼs talt Paʼp uvaʼ antxh quBʼaal Tiuxh laʼ aqʼon tootzaqibʼal inqʼa niman tetz tiʼ tilix vinuqul

15Niketz vaqʼ taʼntiuxh te quBʼaal Tiuxh, tiʼ uvaʼ ant kuxh al u kʼuqlebʼ ekʼuul tiʼ quBʼaal JesuKriisto. Atz nikat vaqʼ taʼntiuxh te quBʼaal Tiuxh, tiʼ uvaʼ nik ekʼutxheʼ uvaʼ at etaanima tiʼ inqʼa emol s-niman tetz Jesuus s-kaqaayil. 16Echetz yeʼl in nik inyaʼ tiʼ taqʼax taʼntiuxh te quBʼaal Tiuxh setiʼ, tan nik viqʼo tzaan ex s-tuul uvaʼs nik innatxht Tiuxh. 17Tul aʼ nik vabʼi te quBʼaal Tiuxh, viBʼaal u quBʼaal JesuKriisto uvaʼ mam yol tatineʼ, uvaʼ laʼ taqʼ etxumbʼal tiʼ etootzaqit tel inuqul inqʼa yol tiʼ u quBʼaal Tiuxh taʼn viTiuxhil. Echetz laʼ ikʼutxhte sete s-bʼaʼn kam bʼanel taʼn tatin u quBʼaal Tiuxh. 18Tul nikat vabʼi te quBʼaal Tiuxh uvaʼ laʼ ijaq vetitzʼabʼal tiʼ etootzaqit tiʼ kam bʼaʼnil nik itxʼebʼon kʼatz quBʼaal Tiuxh uvaʼ toq taqʼ sete. Tan tiʼ uvaʼ qat isaʼ tzaan ex, tul atetz vet etokebʼal tiʼ ekʼultaʼ. Atz laʼat etootzaqi uvaʼ tira mam bʼaʼnil laʼ ekʼul tu nimla tatin quBʼaal Tiuxh, tiʼ uvaʼ, ex niman tetz, atz chʼexel vet ex taʼn. 19Atz laʼat etootzaqi uvaʼ yeʼxhkam invaʼtoʼq laʼ ibʼan eela tuchʼ u nimla tiqleʼm quBʼaal Tiuxh tiʼ qulotxhoxeʼ, oʼ inqʼa niman tetz Jesuus. Tan tira sebʼt kuxh taqʼonv u nimla tiqleʼm s-qiʼ uvaʼ tira at itxakunbʼal s-qe. 20Tan tuchʼ u tiqleʼm quBʼaal Tiuxh, tul itzʼeʼv u quBʼaal JesuKriisto inpaqte, kʼuxh maʼtich vet ikameʼ. Tul tuchʼat u tiqleʼm quBʼaal Tiuxh, tul kʼuqeʼv vet u quBʼaal JesuKriisto tisebʼal quBʼaal Tiuxh t-inqʼa amlikaʼ tiʼ ibʼant viqʼesalil. 21Tul aʼetz vet quBʼaal JesuKriisto iqʼesal s-txheel tiibʼa jankʼal iqʼesal, atz inqʼa at tiqleʼm, inqʼa aj yol, tuchʼ inqʼa bʼekʼonal, inqʼa at vatz txʼavaʼ. Tan yeʼxhkam invaʼtoʼq bʼij tetz iqleʼm palnaʼq tiibʼa u quBʼaal JesuKriisto, kʼuxh tintanul inqʼa yaʼbʼ s-txheel, atz kʼuxh tinjattant yaʼbʼ uvaʼ laʼ uli. 22Echetz aʼ vet u quBʼaal Tiuxh qat oksan jankʼal inqʼa kam jaqʼ u tiqleʼm quBʼaal JesuKriisto. Atz qat toksa siqʼesal tiibʼa inqʼa kam s-kaqaayil, atz tiibʼa inqʼa niman tetz. Tan ech tatin quBʼaal JesuKriisto tiibʼa inqʼa niman tetz, eche tatin quviʼ tiibʼa u qutxhiʼoʼl. 23Aʼetz vet inqʼa niman tetz Jesuus, ech tatin kʼatz quBʼaal Jesuus, eche tatin jatvatzul u qutxhiʼoʼl. Tan aʼ u quBʼaal JesuKriisto nik bʼanon iqʼesalil xoʼl inqʼa niman tetz. Tan aʼ quBʼaal JesuKriisto tira nik tzʼeqsan jankʼal inqʼa motx iviinqixsa. Atz jankʼal inqʼa kam viinqixsamal taʼn, nik tzʼeqsan tatin u quBʼaal JesuKriisto inpaqte.

Currently Selected:

Efeesios 1: ixlC

Highlight

Copy

Compare