Efeesios ALBʼAL INUQUL U YOL TIʼ U Uʼ
ALBʼAL INUQUL U YOL TIʼ U Uʼ
EFEESIOS
Uvaʼs toq qootzaqitaʼ jaʼl tzʼibʼan u uʼ Efeesios
Antetzxh Paʼp tzʼibʼan u uʼ uvaʼ Efeesios ibʼij. Tan antxh u uʼ nik alon uvaʼ Paʼp tzʼibʼan, eche uvaʼ nik tal tu Efeesios 1.1.
Uvaʼs toq qootzaqitaʼ kam s-tuul tzʼibʼal u uʼ Efeesios
Aʼetz itzʼibʼat Paʼp u uʼ Efeesios tu yaʼbʼ vaʼl imutxʼ (61) m.t.J. Tul aʼ itzʼibʼavat Paʼp tu mam tenam Rooma uvaʼs atich jaʼ Paʼp t-tzeʼ tiʼ ipaxsal inqʼa bʼaʼnla txhaq yol tiʼ Jesuus tuulbʼal uvaʼs atich ok Neroon s-mam iqʼesal tu mam tenam Rooma.
Echetze uvaʼ taqʼbʼ viyolbʼal quBʼaal Tiuxh tu tenam Eefeso tuulbʼal Aasia Menoor, tan ile nik tal t-Vibʼanoʼm inqʼa Apoostol 18.24, tetxhal topoon tu 19.41. Tan aʼ Akiila tuchʼ Prisiila lotxhon tiʼ ipaxsal viyolbʼal quBʼaal Tiuxh tzitzi. Tul antich Apoolos, u paxsan tetz viyolbʼal quBʼaal Tiuxh, nikich ilotxhoneʼ.
Yaʼne xamtel aqʼbʼ vet Paʼp. Tul mam yol ibʼan tiʼ ipaxsal viyolbʼal quBʼaal Tiuxh, atz tiʼ itxhusun tuulbʼal u tenam Eefeso, atz tuulbʼal inqʼa tenam uvaʼ atich s-naqli.
Uvaʼs toq qootzaqitaʼ kame inqʼa kʼaxkʼo motx palk inqʼa niman tetz Jesuus taʼn inqʼa iqʼesal tu mam tenam Rooma tuulbʼal uvaʼs itzʼibʼat Paʼp u uʼ Efeesios
Tuulbʼal uvaʼs nikich ipaxsat Paʼp inqʼa bʼaʼnla txhaq yol tiʼ Jesuus, tul oqxhich itzaʼlal ipaxsal inqʼa bʼaʼnla txhaq yol tuulbʼal Aasia tuchʼ jolt inqʼa tenam, eche u tenam Eefeso. Tan naʼynaqich motx ixeʼt tiʼ inatxhkʼuulal jolol inqʼa bʼitichla tiuxh s-xoʼl, jankʼal eche u tuqʼeʼybʼal inqʼa grieego. Tan atich val u bʼitichla tiuxh nikich iqej inqʼa aj Eefeso uvaʼ Diaanaich ibʼij. Tul mamala xaol nikich motx qeon. Ech uvaʼe nik tal t-Vibʼanoʼm inqʼa Apoostol 19.23-41.
Jitetz kuxh taʼn inqʼa uqʼeʼybʼal inqʼae, pet atich jolt inqʼa bʼitichla tiuxh nikich inima inqʼa mam iqʼesal tuulbʼal u mam tenam Rooma, jankʼal eche u bʼitichla tiuxh u Maarte. Tan aʼ nikich motx taleʼ uvaʼ, aʼ uvaʼe, nikich iqʼon iviʼ inqʼa txhʼaʼo. Atz kʼuxh vaʼt viqʼesal bʼitichla tiuxh, u Seeus, nikich tal inqʼa iqʼesal, tan aʼ atich jaʼ u tatibʼal, u tetz natxhkʼuulabʼal, tinikʼa u mam tenam Rooma. Tul nikich motx itzʼeʼsa inqʼa xaol txoo s-vatz s-oya. Jatvaʼletzxh inqʼa tenam uvaʼ atich ok jaqʼ ibʼekʼbʼal u mam tenam Rooma, tan tetxhal kuxh nikich ibʼekʼex inqʼa tenam inqʼae taʼn inqʼa mam iqʼesal tiʼ inimal inqʼa bʼitichla tiuxh.
Jitetz kuxh taʼne, pet xeʼt vet inqʼa mam iqʼesal tiʼ ibʼekʼex inqʼa xaol, tiʼ uvaʼ laʼich itzʼeʼsa inqʼa xaol txoo s-oya vatz inqʼa mam iqʼesal. Echetz s-tiʼile tira yeʼ nikich ijaʼ ivatz inqʼa mam iqʼesal te u tuqʼeʼybʼal inqʼa tij imam Israeel, atz jitoq te inqʼa bʼaʼnla txhaq yol tiʼ Jesuus. Echetz s-tiʼile eesal el inqʼa tij imam Israeel tu txʼavaʼ Itaalia taʼn u mam iqʼesal uvaʼ Klaaudioich ibʼij. Tan ech uvaʼe nik tal t-Vibʼanoʼm inqʼa Apoostol 11.28 tuchʼ 18.2. Aʼetz ibʼantaʼ uvaʼs atich ok Klaaudio siqʼesalil tu mam tenam Rooma tu yaʼbʼ vaʼl toxkʼal, tetxhal topoon tu yaʼbʼ kajlaval toxkʼal (41-54) m.t.J.
Jitetz kuxh taʼn Klaaudio bʼanon. Pet echatxh ibʼane jolt inqʼa mam iqʼesal, inqʼa motx ok siqʼesalil, jankʼal eche Neroon, uvaʼ ok s-mam iqʼesal uvaʼs ibʼant tu yaʼbʼ kajlaval toxkʼal, tetxhal topoon tu vajxaqil imutxʼ (54-68) m.t.J. Tul txhiʼanyichxh Neroon tiʼ inqʼa niman tetz Jesuus. Tan motx tiqle itzʼeʼsal val u tal tenam tuulbʼal Rooma. Echetz s-tiʼile xeʼt Neroon tiʼ ikʼaxbʼisal inqʼa niman tetz Jesuus, tetxhal tal iyatzʼax el Paʼp, atz iyatzʼax el Luʼ. Tul kamal aʼ ibʼant tu yaʼbʼ vajxaqil imutxʼ, atz maq tu bʼelval imutxʼ (68-69) m.t.J.
Yaʼne ok vet Kaliigula s-mam iqʼesal tu yaʼbʼ vajxaqil imutxʼ, tetxhal tul tu yaʼbʼ bʼelval imutxʼ (68-69) m.t.J. Tul aʼ vet Vespasiaano ok s-mam iqʼesal uvaʼs ibʼant tu yaʼbʼ bʼelval imutxʼ, tetxhal tul tu yaʼbʼ bʼelelaval imutxʼ (69-79) m.t.J. Tuulbʼaletz uvaʼs yeʼnaqich okoq Vespasiaano s-mam iqʼesal, tul aʼich Vespasiaano mam iqʼesal sol tetz u mam tenam Rooma. Tul aʼ Vespasiaano tuchʼ vikʼaol, uvaʼ Tiitoich ibʼij, sotzsan jolol inqʼa tenam tetz inqʼa tij imam Israeel. Tul ant u tenam Jerusaleen sotzsali. Tul tira taqʼ koʼp Tiito vitostiuxh inqʼa tij imam Israeel tziʼ txʼavaʼ.
Yaʼne mam xaol, inqʼa tij imam Israeel, motx iyatzʼa, atz mam xaol motx tiqʼo bʼen s-pereexhoil tiʼ ikʼayil tu mam tenam Rooma. Tul tzitzi tzoqpik vet telaʼp u yol uvaʼ ibʼaxabʼsa Jesuus talax tiʼ ikʼaxbʼisal inqʼa tij imam Israeel. Tan tira yeʼ motx jaʼ ivatz te quBʼaal Jesuus uvaʼs tul quBʼaal Jesuus s-xoʼl. Ech uvaʼe nik tal tu Tio 23.29-39 tuchʼ tu Luk 23.18-31.
Yaʼne aʼ vet vaʼl vikʼaol Vespasiaano ok s-mam iqʼesal, uvaʼ Tiitoich ibʼij. Tul aʼ tok vet siqʼesalil tu yaʼbʼ bʼelelaval imutxʼ, tetxhal tul tu yaʼbʼ vaʼl toʼkʼal. (79-81) m.t.J. Tul echatichxh vitxumbʼal Tiito, eche vibʼaal. Tan yeʼ nikich isaʼ Tiito u tuqʼeʼybʼal inqʼa tij imam Israeel, atz jitoq iqeex inqʼa bʼaʼnla txhaq yol tiʼ Jesuus. Pet aʼ nikich ibʼane uvaʼ, aʼ inqʼa tuqʼeʼybʼal tuchʼ inqʼa ibʼitichla tiuxh tetz Rooma nikich toksa ok xoʼl inqʼa xaol.
Kametz vet Tiito, tul aʼ vet Domisiaano ok s-mam iqʼesalil tu mam tenam Rooma tu yaʼbʼ vaʼl toʼkʼal, tetxhal topoon tu yaʼbʼ vaqlaval toʼkʼal (81-96) m.t.J. Tul aʼl tira pal iviʼ u yeʼbʼaʼn ibʼan Domisiaano te inqʼa niman tetz Jesuus viʼ jolt inqʼa iqʼesal, inqʼa palnaʼqich vet ka. Tan mamala niman tetz Jesuus ibʼekʼ iyatzʼax el.
Uvaʼs toq qootzaqitaʼ kame u taqʼil vitxhusun Paʼp tuul u tuʼ Efeesios
Aʼetz u taqʼil viyol Paʼp uvaʼ tal te inqʼa niman tetz Jesuus tu tenam Eefeso uvaʼ vaʼl koqxh iyol laʼich motx ibʼan s-vatzaq. Tul yeʼich koq laʼ motx teesa tibʼ iqʼij, tiʼ uvaʼ tij imam Israeel, atz maq tiʼ uvaʼ jit tij imam Israeel. Atz yeʼich koq laʼ motx teesa tibʼ iqʼij, tiʼ uvaʼ at itxhusbʼal s-bʼaʼn, atz maq yeʼl itxhusbʼal. Tan aʼxh nikich isaʼ Paʼp uvaʼ, aʼ laʼich inima inqʼa xaol kame uvaʼ tal u quBʼaal Jesuus tiʼ isaʼt tibʼ s-vatzaq. Echetz laʼich ibʼant quBʼaal Jesuus iqʼesalile tu taanima. Tul aʼ vet viTiuxhil Tiuxh laʼ bʼekʼon t-inqʼa taanima, tiʼ uvaʼ ech laʼ ibʼan inqʼa niman tetz Jesuus, eche uvaʼ nik tal tu Efeesios 4.13: —...vaʼlxh quyol tiʼ inimal inqʼa bʼaʼnla txhaq yol tiʼ Jesuus. Atz vaʼlxh quyol tiʼ qootzaqit viKʼaol quBʼaal Tiuxh; atz tetxhal quchʼij tuchʼ u qutxumbʼal kʼatz quBʼaal Tiuxh, atz tuchʼ u qutxhabʼat tiqʼol viyolbʼal quBʼaal Tiuxh s-bʼaʼn, tetxhal qopoon tiʼ qubʼant eela tuchʼ vitxumbʼal u quBʼaal JesuKriisto, —chiche.
Uvaʼs toq qootzaqitaʼ kam ulbʼemal ijatxp ixoʼl inqʼa yol tu uʼ Efeesios
U uʼ Efeesios uvaʼ itzʼibʼa ka Paʼp, tan juqvaʼlen tanul elnaʼq inqʼa yol uvaʼ nik tal s-tuul.
Efeesios 1.1-2
Aʼetz ixeʼtebʼe Paʼp talax tiʼ jaʼl nik tzʼibʼan u uʼ, tul jaʼl nik kʼulun. Yaʼne taqʼ vet bʼen Paʼp bʼaʼnil ikʼuul inqʼa niman tetz Jesuus, inqʼa nikich imol tibʼ tu tenam Eefeso.
1. Efeesios 1.3-23
U bʼaxa tanul yol, tan aʼ tal Paʼp, tiʼ uvaʼ nik inatxh Paʼp Tiuxh, tul nik itzʼibʼa inqʼa yol tiʼ inqʼa niman tetz Jesuus tu Eefeso. Tul nik taqʼ taʼntiuxh te Tiuxh tiʼ teleʼl jolol inqʼa aj Eefeso t-inqʼa txumbʼal uvaʼ kantxhaq kuxhtuʼ. Tul nik motx tok vet s-niman tetz Jesuus, tiʼ uvaʼ tan, chʼexelich vet taʼn quBʼaal Tiuxh.
Tul nik taqʼ Paʼp taʼntiuxh te Tiuxh, tiʼ uvaʼ tan, nik motx ikʼutxh vet inqʼa niman tetz Jesuus bʼaʼnla txumbʼal vatz jolt inqʼa aj Eefeso. Tul nik taqʼ Paʼp taʼntiuxh te Tiuxh tiʼ inqʼa mam bʼaʼnil uvaʼ laʼ taqʼ quBʼaal Tiuxh te inqʼa niman tetz Jesuus. Tul nikat taqʼ Paʼp taʼntiuxh te Tiuxh, tiʼ uvaʼ at vet viTiuxhil Tiuxh t-taanima inqʼa aj Eefeso, inqʼa at vet ok s-niman tetz Jesuus.
Tul nik ijaq Paʼp te quBʼaal Tiuxh uvaʼ quBʼaal Tiuxh laʼ aqʼon mamala txumbʼal te inqʼa niman tetz Jesuus tiʼ tootzaqit tel jankʼal inqʼa bʼaʼnil uvaʼ aqʼel vet te inqʼa niman tetz Jesuus tiʼ vikʼuqbʼataq ikʼuul tiʼ u quBʼaal Jesuus.
2. Efeesios 2.1-22
Vikaʼv tanul yol, tan aʼ tal Paʼp tiʼ uvaʼ nik tulsa Paʼp s-kʼuul inqʼa aj Eefeso, inqʼa niman tetz Jesuus tiʼ kame uvaʼ qat motx ichitp t-inqʼa ipaʼv taʼn vikam quBʼaal Jesuus vatz u kurus. Atz kame uvaʼ qat ibʼan u quBʼaal Jesuus tiʼ tok u bʼaʼnil xoʼl inqʼa xaol tuchʼ quBʼaal Tiuxh.
3. Efeesios 3.1-21
Vitoxv tanul yol, tan aʼ tal Paʼp tiʼ vipaxsat inqʼa bʼaʼnla txhaq yol tiʼ Jesuus xoʼl inqʼa xaol, inqʼa jit tij imam Israeel. Echetz laʼ tootzaqite inqʼa xaol uvaʼ mamala txumbʼal at xeʼ quBʼaal Tiuxh tiʼ taqʼt ootzaqiloq jankʼal inqʼa iqleʼm at vet tiqʼabʼ inqʼa niman tetz Jesuus tiʼ teesal iqʼij inqʼa yeʼbʼaʼn. Kʼuxhetz atich kuʼ Paʼp t-tzeʼ, tan nikich taqʼ bʼen Paʼp itial inqʼa niman tetz Jesuus. Tul aʼ nikich tal Paʼp uvaʼ at taanima u quBʼaal Jesuus tiʼ inqʼa niman tetz, tan sibʼxh tiqleʼm tiʼ ibʼant mamala kam kʼatz inqʼa niman tetz. Tan aʼl nik ipal iviʼ ibʼant inqʼa bʼaʼnil viʼ kam inqʼa laʼ tabʼi inqʼa niman tetz s-te.
4. Efeesios 4.1-32
Vikajv tanul yol, tan aʼ tal Paʼp, tiʼ uvaʼ kʼuxh jalelaqich tibʼ itxumbʼal inqʼa niman tetz Jesuus s-vatzaq, atz tiʼ u tatineʼ, atz kʼuxh kam inqʼa nikich motx iqejeʼ, pet s-txheel, tan vaʼlaqxh vet iyol qat ibʼan s-vatzaq tiʼ inimat inqʼa bʼaʼnla txhaq yol tiʼ Jesuus. Tan vaʼlaqxh vet iyol qat ibʼan s-vatzaq tiʼ ikʼulux viTiuxhil Tiuxh tu taanima. Atz vaʼlaq kuxh iyol qat ibʼan tiʼ ikuʼaq xeʼ aʼ tiʼ ikʼutxhtaʼ uvaʼ niman vet tetz Jesuus. Tul eela kuxh nik motx itxʼebʼon vet tiʼ tul u quBʼaal Jesuus inpaqte. Echetz ikʼulelxhtuʼ uvaʼ laʼ motx itanbʼa ibʼanax inqʼa txumbʼal uvaʼ chianaʼq kuxh ibʼanax s-te. Tul aʼ vet laʼ motx ikʼutxh inqʼa bʼaʼnla txumbʼal uvaʼ taqʼ quBʼaal Tiuxh s-te uvaʼs motx tok s-niman tetz Jesuus. Tan aʼ u akʼ txumbʼal iviinqixsa quBʼaal Tiuxh s-kʼatza. Echetz aʼ laʼ motx ibʼan u jik; atz laʼ ijetxhoʼk tibʼ kʼatz quBʼaal Tiuxh. Ech uvaʼe nik tal inqʼa bʼaʼnla txhaq yol uvaʼ inuqulxhtuʼ.
5. Efeesios 5.1-20
Vitoʼv tanul yol, tan aʼ tel tal Paʼp tiʼ inqʼa bʼaʼnla txumbʼal tiʼ kam laʼ motx tulbʼe tiqʼot viyolbʼal quBʼaal Tiuxh. Tul nikat tal Paʼp uvaʼ yeʼ laʼ motx taqʼ tibʼ eesaloq t-bʼey taʼn jolt inqʼa uqʼeʼybʼal. Tan tira kʼuqlebʼal kʼuul taqʼonv viTiuxhil Tiuxh kʼatz inqʼa niman tetz Jesuus.
6. Efeesios 5.21—6.20
Vivaqaq tanul yol, tan aʼ tal Paʼp, tiʼ uvaʼ laʼ motx itxʼol tiqʼot tibʼ s-vatzaq, atz ibʼantaq eela iyol. Tul laʼ motx inima tibʼ. Tul nik tal Paʼp kam laʼ motx tiqʼot tibʼ inqʼa xaol s-vatzaq, inqʼa tzʼalonaʼql veteʼ. Atz nik taqʼ Paʼp txumbʼal tiʼ kam laʼ motx tiqʼot tibʼ inqʼa txutxa bʼaala tuchʼ inqʼa initxaʼa.
7. Efeesios 6.10-20
Vijuqv tanul yol, tan aʼ tal Paʼp, tiʼ uvaʼ kam laʼ tule inqʼa niman tetz Jesuus imaqt tibʼ tiʼ ibʼanax u yeʼbʼaʼn vatz quBʼaal Tiuxh. Tul txumbʼalimal nik ibʼant Paʼp eela tuchʼ vaʼl sol uvaʼ nik toksa jankʼal bʼanbʼal txhʼaʼo s-tiʼ, tiʼ ibʼen bʼan txhʼaʼo. Jankʼaletz u yol uvaʼ nik tal Paʼp tzitza, tan aʼ nikich elk itxumbʼal Paʼp te inqʼa sol, inqʼa nikich til Paʼp iviqtaq tibʼ tiʼ ibʼen bʼan txhʼaʼo. Tan tuulbʼal uvaʼs atich jaʼ Paʼp t-tzeʼ, tul nikich til Paʼp kam nik ibʼan inqʼa sol. Aʼetz val u tetxhlal uvaʼ nikich itxhok Paʼp tiʼ ibʼen te inqʼa xaol, tiʼ uvaʼ laʼ motx ibʼan tutxh tibʼ vatz quBʼaal Tiuxh tiʼ teesal iqʼij inqʼa yeʼbʼaʼn uvaʼ nikich motx bʼanon. Tul aʼ nik yolonk Paʼp tiʼ inqʼa iqleʼm uvaʼ at kʼatz inqʼa niman tetz Jesuus tiʼ itxhejaq iyakʼil tiʼ tel iqʼij inqʼa yeʼbʼaʼn.
Tul nik tal Paʼp uvaʼ laʼxh bʼen inuqul viyolbʼal quBʼaal Tiuxh s-qe, tan taʼnxh vinuqule. Tul taʼnxh laʼ qubʼan u jik vatz quBʼaal Tiuxh, atz vatz inqʼa xaol. Tul aʼ laʼ qutxhok tok u bʼaʼnil s-quxoʼl tuchʼ inqʼa xaol. Tul aʼ laʼ qukʼuqbʼavat qukʼuul tiʼ quBʼaal Jesuus kʼuxh kamxh itzaʼlal laʼ palk oʼ. Tan aʼ laʼ qoksa t-quviʼ uvaʼ chitel vet oʼ taʼn vibʼaʼnil u quBʼaal Jesuus tiʼ yeʼ bʼen qilt u kʼaxkʼo. Tul taʼnxh laʼ ikʼuqbʼavat inqʼa niman tetz Jesuus ikʼuul tiʼ viTiuxhil Tiuxh tiʼ ipaxsal inqʼa bʼaʼnla txhaq yol. Tul yeʼ laʼ motx xoʼv tiʼ talaxeʼ. Atz yeʼ laʼ motx yaʼ tiʼ inatxhkʼuulal quBʼaal Tiuxh. Jankʼaletzxh inqʼa kam inqʼae, tan aʼetz inqʼae, laʼ qubʼan txhʼaʼo s-tiʼ. Tan mamala kuxh kam nik itxhok u yeʼbʼaʼn s-qiʼ.
Efeesios 6.21-24
Tiyaʼtebʼaletz veteʼ, tul nik tal Paʼp tiʼ vitxhaqt bʼen Tiikiko tiʼ taqʼax ka u tuʼ te inqʼa niman tetz Jesuus uvaʼ at t-Efeeso. Tul laʼ bʼen tal Tiikiko jankʼal uvaʼ nik ipalebʼe Paʼp tu tzeʼ. Tul nik tal Paʼp bʼaʼnil tiibʼa inqʼa niman tetz Jesuus, inqʼa nik kʼulun u uʼ.
Currently Selected:
Efeesios ALBʼAL INUQUL U YOL TIʼ U Uʼ: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.