Koloseenses 4

1Atz kʼuxh ex inqʼa bʼaal aqʼon, tan aʼ u jik laʼ ebʼana; atz aʼxh vinuqul laʼ ebʼan te inqʼa etaqʼonvil. Tan kʼuxh ex bʼaal aqʼon, tan etootzaqle uvaʼ at vaʼl eQʼesal tu amlikaʼ.

2Tul bʼiitxhaq tuul enatxht Tiuxh. Atz tzʼinloqxh etitzʼabʼal tiʼ etaqʼt taʼntiuxh te quBʼaal Tiuxh. 3Tul laʼat enatxh Tiuxh s-qiʼ, tiʼ uvaʼ, aʼ u quBʼaal Tiuxh laʼ iqʼon qubʼey tiʼ itxhej qokebʼal tiʼ qupaxsat inqʼa bʼaʼnla txhaq yol. Echetz laʼ qaqʼte ootzaqiloq inqʼa yol tiʼ quBʼaal JesuKriisto, inqʼa yeʼich ootzaqimal, inqʼa il in at jaʼ in t-tzeʼ s-tiʼ. 4Atz natxhvaq Tiuxh s-viʼ, tiʼ uvaʼ tira laʼ intzanbʼa eluʼl talax vinuqul inqʼa yol. Tan ech uvaʼe viqatzi taʼn quBʼaal Tiuxh. 5Tul txhokvaq txumbʼal tiʼ kam laʼ etule ekʼutxht viyolbʼal quBʼaal Tiuxh vatz inqʼa yeʼx okoq s-niman tetz quBʼaal JesuKriisto. Tul sebʼtoq kuxh ex tiʼ talaxeʼ, oq tal laʼ isaʼvat tokeʼ. 6Tul tibʼaʼnil laʼ etalvat inqʼa yol te inqʼa xaol, txhaqpaq laʼ eyoloneʼ. Echetz laʼ etxhabʼat itzaqʼbʼel junun xaole. Tan ech vet veyolon laʼ ebʼana, eche ichiibʼisal invaʼq etxhbʼubʼal taʼn u atzʼam.

Uvaʼs taqʼt bʼen Paʼp bʼaʼnil ikʼuul inqʼa niman tetz Jesuus, tul yaʼ vet tiʼ itzʼibʼal bʼen viyol

7Pet kam teletzxh uvaʼ nik inpalebʼe tzitza, tul aʼ Tiikiko laʼ bʼen alon inuqul sete, Tiikiko, u qumol s-niman tetz Jesuus uvaʼ at vaanima s-tiʼ, atz uvaʼ kʼuqlebʼxh kʼuul tatin sinkʼatza tiʼ inlotxhox tiʼ ibʼanax u taqʼon quBʼaal Jesuus. 8Tul nikat intxhaq bʼen Tiikiko sexoʼl tiʼ tootzaqileʼ kam yaʼel oʼ. Tul aʼ Tiikiko bʼen aqʼon etial. 9Tul tzum toq intxhaqt bʼen Tiikiko tuchʼ Oneesimo, uvaʼ at vaanima s-tiʼ, u qumol s-niman tetz Jesuus, Oneesimo uvaʼ een tzajnaʼql sexoʼl. Tul tzum bʼen talt Tiikiko tuchʼ Oneesimo inuqul inqʼa yol sexoʼl inqʼa nik qupalebʼe.#Filemoon 1-24

10Niketz taqʼ bʼen Aristaarko bʼaʼnil ekʼuul, uvaʼ at jaʼ in t-tzeʼ s-tuchʼ. Atz nikat taqʼ bʼen Kuxh bʼaʼnil ekʼuul, u kʼaol itxhʼoj Vernavee, uvaʼ alel vet inqʼa yol s-tiʼ sete vaʼn. Oqetz laʼ aqʼbʼ Kuxh sexoʼl, tul laʼ ekʼul Kuxh tibʼaʼnil. 11Atz nikat taqʼ bʼen Txhuus bʼaʼnil ekʼuul, uvaʼ nik talax s-Juusto. Tan taʼnxh inqʼa tij imam Israeele inqʼa nik lotxhon in tiʼ talax inuqul vibʼant quBʼaal Tiuxh iqʼesalil t-taanima inqʼa xaol. Echetz aʼ inqʼae, nik aqʼon kʼuqlebʼal inkʼuul. 12Atz nikat taqʼ bʼen Epaafras bʼaʼnil ekʼuul, uvaʼ een tzajnaʼql sexoʼl, u bʼanol tetz taqʼon u quBʼaal JesuKriisto. Tul bʼenamenxh inatxht Epaafras Tiuxh setiʼ, tiʼ uvaʼ nuq txakloqxh ex tiʼ ekʼuqbʼat ekʼuul tiʼ u quBʼaal Tiuxh. Atz txhabʼamoqxh tiqʼol viyolbʼal quBʼaal Tiuxh etaʼn. Atz tzʼeqel koqxh vet ex tiʼ ibʼanax jankʼal uvaʼ nik isaʼ quBʼaal Tiuxh. 13Echetz nik valte inqʼa yol tiʼ Epaafras, tan tira nik titzʼa ex Epaafras, atz tiʼ jolt inqʼa niman tetz Jesuus, inqʼa tu tenam Laodiseea, atz tiʼ inqʼa niman tetz Jesuus tu tenam Ieraapolis. 14Tul nikat taqʼ bʼen Luk bʼaʼnil ekʼuul, uvaʼ at vaanima s-tiʼ, Luk u aj tzʼak. Atz nikat taqʼ bʼen Deemas bʼaʼnil ekʼuul. 15Tul echatetz exe, laʼ etaqʼ bʼen bʼaʼnil ikʼuul inqʼa niman tetz Jesuus uvaʼ een tu tenam Laodiseea. Atz laʼat etaqʼ bʼaʼnil ikʼuul ixoq u Niinfas tuchʼ jankʼal inqʼa niman tetz Jesuus uvaʼ nik ikʼul tibʼ tu totzotz ixoq.

16Laʼetz tzoqp vet isikʼlel u uʼ seviʼ, tul laʼ etaqʼ opoon u uʼ te inqʼa niman tetz Jesuus tu tenam Laodiseea. Tul laʼat motx isikʼle. Poro laʼatetz ekʼul u uʼ uvaʼ toq vaqʼ opoon te inqʼa Laodiseea, tul laʼatetz esikʼle.{*}#4.16 Eche u uʼ uvaʼ itzʼibʼa bʼen Paʼp te inqʼa niman tetz Jesuus tu tenam Laodiseea, tan yeʼ ootzaqimal tal ikʼaqa. Tan yeʼxhkam at tuul u Viivlia, eche jolt inqʼa uʼ.

17Pet ech laʼ etal te Arkiipo s-eche: —«Bʼan yaʼl tiʼ ibʼanax u aqʼon uvaʼ qat taqʼ quBʼaal Jesuus see,» chich Paʼp, —chaq ex te Arkiipo.

18Poro inetz vet nik tzʼibʼan bʼen inqʼa yol tuchʼ inqʼabʼ tiʼ vaqʼt bʼen bʼaʼnil ekʼuul. Tul nik vulsa sekʼuul inpaqte uvaʼ laʼxh enatxh Tiuxh s-viʼ, tan il in at jaʼ in t-tzeʼ, tul il in qitzel in.

Tul vibʼaʼnil u quBʼaal Tiuxh laʼ atin sexoʼl.

[Tul echxh laʼ ibʼane.]

Currently Selected:

Koloseenses 4: ixlC

Highlight

Copy

Compare