Koloseenses 3

1Tiʼetz uvaʼ qat eqej u quBʼaal JesuKriisto, tul itzʼlel vet ex vatz u quBʼaal Tiuxh. Tiʼetz u titzʼeʼv u quBʼaal JesuKriisto inpaqte, tul xaʼte at vet etokebʼal tiʼ etitzʼeʼv kʼatz quBʼaal Tiuxh. Echetz aʼ okk bʼen ex tiʼ inimal inqʼa bʼaʼnla txhaq yol uvaʼ tzajnaʼql kʼatz quBʼaal Tiuxh tu amlikaʼ. Jitetz kuxh taʼne, pet aʼ okk bʼen ex tiʼ isaqil bʼen inqʼa txumbʼal uvaʼ nik ibʼan Kriisto tu amlikaʼ s-txheel. Tan il u quBʼaal JesuKriisto kʼuqlel tisebʼal u quBʼaal Tiuxh tiʼ ibʼanax iqʼesalil. 2Tul antxh okk bʼen ex tiʼ isaqil jaʼ inqʼa bʼaʼnil uvaʼ ile txʼebʼoʼm al setiʼ tu amlikaʼ. Pet jit kuxh vet aʼ etitzʼa ibʼanax inqʼa yeʼbʼaʼn uvaʼ nik ibʼan inqʼa xaol vatz txʼavaʼ, inqʼa yeʼ ootzaqin tetz quBʼaal Tiuxh. 3Tan qat motx eyaʼsa tatxhval ibʼanax inqʼa paʼv, eche kamchil qat eteleʼl s-vatz. Pet at vet qʼij esaq vatz quBʼaal Tiuxh tiʼ eqejt u quBʼaal JesuKriisto, kʼuxh yeʼxhabʼil nik ilon kam vetxeyt etibʼ tuchʼ u quBʼaal JesuKriisto. 4Pet laʼetz ul vet u quBʼaal JesuKriisto, tul ant vet ex laʼ ilix ex, uvaʼs jalpinaʼq vet etatineʼ, eche tatin u quBʼaal JesuKriisto. Tul ant vet ex laʼ atin ex s-kʼatza tu nimla tatineʼ. Echetzxh laʼ ibʼane, tan quBʼaal JesuKriisto nik aqʼon qʼij esaq yeʼl iyaʼebʼal imotxebʼal tiʼ venimataʼ.

Uvaʼs itxhust Paʼp inqʼa niman tetz Jesuus, tiʼ uvaʼ jit vet aʼ laʼ ibʼan u paʼv eche uvaʼ nikich ibʼan s-naʼya

5Echetz tira eesavaq el inqʼa paʼv tetitzʼabʼal, inqʼa paʼv uvaʼ nik ibʼan inqʼa xaol vatz txʼavaʼ, inqʼa yeʼ ootzaqimal quBʼaal Tiuxh taʼn. Pet eche kamchil ebʼan tiʼ eteleʼl vatz inqʼa paʼv. Tan ayaʼl kuxh inqʼa paʼve inqʼaa: yansa ibʼ tuchʼ uvaʼ jit ikʼulel tibʼ s-tuchʼ; atz inqʼa eesa ibʼ t-bʼey; atz inqʼa yaabʼla txhaq atxhaʼv uvaʼ tzʼeʼy kuxh u txhiʼoʼl tiʼ ibʼanaxeʼ; inqʼa atxhaʼv tiʼ ibʼanax u yeʼbʼaʼn; atz inqʼa jiqʼal tiʼ tatxhval kam. Echetze u jiqʼal tiʼ inqʼa kam, tan eela kuxh tuchʼ inatxhkʼuulal bʼitichla tiuxh. 6Jatvaʼletz inqʼa xaol uvaʼ nik bʼanon inqʼa paʼv inqʼae, tul aʼetz inqʼae, laʼ ul vikʼaʼnal quBʼaal Tiuxh s-tiibʼa tuchʼ kʼaxbʼichil, tan tiʼ vipalsanaq yol. 7Ayaʼletz kuxh inqʼa yeʼbʼaʼne nikich ebʼane s-naʼya, tan atich ex tuulbʼal inqʼa paʼv. 8Pet s-txheel, tan yeʼ ebʼan vet jolt inqʼa paʼv inqʼaa: kʼaʼnal, lakpichil viʼ, tial kʼuul, eesa qʼij, atz inqʼa kamaq kuxh xoqʼla txhaq yolil nik teluʼl tetziʼ. 9Tul yeʼ laʼ motx etzʼeq tzij sevatzaqil. Tan qat eteesal vet el etibʼ tuul inqʼa naʼyla txhaq txumbʼal, inqʼa chianaʼqich kuxh ibʼanax sete. Tan ech qat eteesat el, eche ikʼonil el invaʼq kam uvaʼ qʼaʼl veteʼ.

10Tul aʼ vet u akʼla txumbʼal iqʼomoq etaʼn; aʼe u txumbʼal uvaʼ qat iviinqixsa quBʼaal Tiuxh sekʼatza. Ech ebʼan, eche nik ibʼan vaʼq xaol tiʼ ijalput el u qʼaʼl toksaʼm, tul aʼ vet u akʼla oksaʼm laʼ toksa. Tul il ex aalemal nik ichʼij u bʼaʼnla txumbʼal sekʼatza, tetxhal etootzaqit vitxumbʼal quBʼaal Tiuxh s-bʼaʼn. 11Oqetz ech laʼ ebʼane, tul yeʼletz vet jalbʼal etibʼe sevatzaq, kʼuxh ex tij imam Israeel, atz kʼuxh jit ex tij imam Israeel; atz kʼuxh qolel el inbʼeeq te vetxhiʼoʼl, atz kʼuxh yeʼ qolel el inbʼeeq te vetxhiʼoʼl; atz kʼuxh at etxhusbʼal, atz kʼuxh yeʼl etxhusbʼal; atz kʼuxh ex inqʼa loqʼel etok tiʼ aqʼon, atz kʼuxh ex inqʼa jit loqʼel etok tiʼ aqʼon. Pet taʼn kuxh quBʼaal JesuKriisto laʼ etitzʼa. Atz taʼn kuxh quBʼaal JesuKriisto nik taqʼonv tetaanima, jankʼal ex inqʼa niman tetz.

12Tiʼetz uvaʼ chʼexel vet ex taʼn u quBʼaal Tiuxh, tul tiʼ uvaʼ qat jetxhon ok ex s-kʼatza, atz tiʼ uvaʼ at taanima setiʼ, tul kʼutxhvaq u bʼaʼnla txumbʼal, eche toksat invaʼq xaol bʼaʼnla oksaʼm s-tiʼ. Aʼetz laʼ ebʼan inqʼa txumbʼal inqʼaa: Oybʼavaq ivatz emol; atz ayaʼlxh bʼaʼn sete ebʼana; atz etiqʼovaq kuʼl etibʼ sevatzaq; atz tzʼuʼkin kuxh ex ebʼana; atz laʼ ekotxʼ evatz t-inqʼa itzaʼlal. 13Tul kotxʼvaq evatz sevatzaq; atz kuyvaq etibʼ sevatzaq tiʼ kam invaʼq yol laʼ ok sexoʼl tuchʼ emol. Tul echatetzxh laʼ ekuyt ipaʼv vemol, eche uvaʼ ikuyt quBʼaal Jesuus vepaʼv. 14Atetz invaʼt yol uvaʼ niim talax tiibʼa inqʼa yol qat motx vall sete. Aʼe, uvaʼ atoqxh etaanima setiʼ sevatzaq. Tan oq atxh etaanima setiʼ sevatzaq, tul bʼaʼnetza. Tan aʼxh taqʼil vetatine sevatzaq. 15Tul aʼxh taqʼil vetatin sevatzaq tuchʼ bʼaʼnil oq nik ibʼan quBʼaal JesuKriisto viqʼesalil tetaanima. Tan aʼ s-tiʼile qat isaʼvat ex quBʼaal Tiuxh, tiʼ uvaʼ vaʼl kuxh vet eyol sevatzaq laʼ ibʼana, eche u qutxhiʼoʼl uvaʼ nimlen elnaʼqle, poro vaʼl kuxhtuʼ. Tul aqʼvaq taʼntiuxh setiʼ sevatzaq, atz te quBʼaal Tiuxh. 16Tul aʼxh laʼ enima inqʼa bʼaʼnla txhaq yol tiʼ u quBʼaal JesuKriisto. Tul tira enatxha uvaʼ, aʼ vet u quBʼaal JesuKriisto jeqlel tetaanima. Tul aʼ inqʼa bʼaʼnla txhaq yol laʼ etxakunsa tiʼ etxhust etibʼ. Atz aʼ laʼ ebʼanbʼe tiʼ etoksat etibʼ t-bʼey sevatzaq; tul tuchʼ txumbʼal laʼ ebʼanvat.

Tul bʼitzlevaq inqʼa bʼitz,

inqʼa tu Saalmo.

Atz bʼitzlevaq bʼitz

te quBʼaal Tiuxh.

Atz bʼitzlevaq bʼitz uvaʼ

nik itxhej tetaanima

taʼn viTiuxhil Tiuxh.

Tul tzaoqxh tetaanima

vibʼitzlel quBʼaal Tiuxh.

17Echetz kamxh invaʼq uvaʼ laʼ etala, atz kamxh uvaʼ laʼ ebʼana, tul bʼanvaq, atz alvaq tiʼ ekʼutxht vatz inqʼa xaol uvaʼ, ex niman tetz Jesuus, atz at tiqleʼm sekʼatza. Tul aqʼvaq taʼntiuxh te Tiuxh, u quBʼaal, tiʼ u quBʼaal Jesuus.

Uvaʼs talt Paʼp yol te inqʼa niman tetz Jesuus tiʼ kam laʼ motx tulbʼe tatin s-vatzaq tuchʼ bʼaʼnil

18Jatvaʼletz ex inqʼa ixoq, uvaʼ at vet etzumel, nimavaq vetzumel. Tan aʼetz uvaʼe, ikʼulelxh laʼ ebʼana tiʼ etatin tuchʼ u quBʼaal JesuKriisto.

19Atz ex inqʼa tzumela, kʼayivaq etaanima tiʼ isaʼax vetixqel. Tul jit kuxh ex kitxhkin te vetixqel.

20Tul kʼuxh ex inqʼa kʼaola, atz inqʼa meʼala, nimavaq jankʼal uvaʼ laʼ tal etxutx ebʼaal sete. Tan aʼ uvaʼe, nik ichiibʼ quBʼaal Tiuxh s-tiʼ oq ech laʼ ebʼane.

21Atz kʼuxh ex, inqʼa txutxa bʼaala, tan yeʼ laʼ etulsa iviʼ inqʼa enitxaʼa. Echetz yeʼ laʼ ibʼant inqʼa nitxaʼ kaʼl ikʼuule tiʼ kam u bʼaʼn nik ibʼaneʼ.

22Atz echat kuxh exe inqʼa aqʼonvil, tan laʼ enima inqʼa bʼaal etaqʼon tzitza vatz u txʼavaʼ, tiʼ kamxh aqʼonil laʼ tal sete. Tul jit yaʼn laʼ etaqʼonveʼ uvaʼ sebʼt etilix taʼn u bʼaal etaqʼon, tul laʼ oksal eqʼij taʼn. Pet aqʼonvoq kuxh ex, kʼuxh yeʼl ex nik etilix taʼn u bʼaal etaqʼon. Tan aʼ laʼ exoʼvavat epaʼvin vatz quBʼaal Tiuxh. 23Echetz kʼuxh kamxh aqʼonil laʼ motx ebʼana, tul bʼanvaq tuchʼxh etaanima vatz u quBʼaal Tiuxh. Pet jit kuxh vatz xaol laʼ ebʼanvat. 24Tan etootzaqle uvaʼ tetxhalxh laʼ ekʼul u bʼaʼnil uvaʼ alel taʼn u quBʼaal Tiuxh laʼ taqʼ te inqʼa ikʼaol imeʼal. Tul aʼ laʼ etitzʼa uvaʼ, aʼ u quBʼaal Jesuus nik enima tiʼ ibʼanaxeʼ. 25Pet jaʼletz ex uvaʼ laʼ bʼanon u yeʼbʼaʼn, tan tetxhal laʼ ekʼul u kʼaxkʼo, tiʼ uvaʼ nik ebʼaneʼ. Aʼ laʼ ekʼult u kʼaxkʼo uvaʼs laʼ taqʼt kuʼ quBʼaal Tiuxh inqʼa yol tinuqul. Tan yeʼl txhʼoj yeʼl nim vatz quBʼaal Tiuxh.

Currently Selected:

Koloseenses 3: ixlC

Highlight

Copy

Compare