Koloseenses 2

1Niketz insaʼeʼ laʼ etootzaqi uvaʼ il in tira nik vaqʼ yaʼl setiʼ, atz tiʼ jolt inqʼa niman tetz Jesuus, inqʼa tu tenam Laodiseea, atz tiʼ jankʼal inqʼa xaol, inqʼa yeʼxxh paqxoʼq tileʼt tibʼ invatz s-tuchʼ. 2Iletz in nik vaqʼ yaʼl, tiʼ uvaʼ laʼ txhej etial, atz, tiʼ uvaʼ vaʼlxh eyol laʼ ebʼana, tul at etaanima setiʼ sevatzaq. Tul ilat in nik vaqʼ yaʼl tiʼ vetootzaqit s-bʼaʼn jankʼal uvaʼ laʼ ekʼul tiʼ tootzaqil u quBʼaal Tiuxh, atz, tiʼ uvaʼ laʼ etootzaqi jankʼal inqʼa nik taqʼ ootzaqiloq tiʼ kam uvaʼ qat ibʼan u quBʼaal JesuKriisto setiʼ, inqʼa kam inqʼa yaʼn nik taqʼ vet quBʼaal Tiuxh ootzaqiloq s-txheel, aʼe inqʼa yol tiʼ u quBʼaal JesuKriisto. 3Tan aʼ u quBʼaal Tiuxh, atz u quBʼaal JesuKriisto aj etz inqʼa mam bʼaʼnil, atz aj etz inqʼa ootzaqibʼal, atz aj etz inqʼa txumbʼal.

4Echetz nik valt opoone u yol sete, tiʼ uvaʼ yeʼxhabʼil laʼ bʼokʼtziin ex tuchʼ invaʼtoʼq yol tiʼ eteesal t-bʼey. 5Kʼuxhetz yeʼl in een in sexoʼl nik etileʼ, poro eche een in sexoʼl. Tan eenxh vitzʼabʼal setiʼ. Tul nik inchiibʼ, tiʼ uvaʼ nik vabʼi uvaʼ jikxh etatin sevatzaq tiʼ tiqʼol viyolbʼal quBʼaal JesuKriisto. Tul nuq txaklelxh etatin tiʼ vekʼuqbʼat ekʼuul s-tiʼ.

6Poro kametzxh uvaʼ qat ebʼan tiʼ eqejt JesuKriisto seBʼaal s-bʼaxa, tul antetzxh uvaʼe ebʼan tiʼ inimaleʼ. 7Atz txhabʼamoq vet etatin s-kʼatza uvaʼs etok s-niman tetz. Tul aʼl tel echʼij kʼatz u quBʼaal Jesuus. Tul nuq txakloq ex tiʼ inimal inqʼa bʼaʼnla txhaq yol, atz aʼxh iqʼomoq vet etaʼn kam uvaʼ txhusel vet ex s-tiʼ. Tul aʼl etaqʼt vet mamala taʼntiuxh te quBʼaal Tiuxh.

Uvaʼs talt Paʼp uvaʼ yeʼxhkam vaʼtoʼq laʼ saʼon te inqʼa xaol, inqʼa ootzaqimal vet quBʼaal Jesuus taʼn

8Tul noqxh etil etibʼ, tul yeʼxhabʼil invaʼq laʼ eesan ex t-bʼey tuchʼ uqʼeʼybʼal uvaʼ yiqxh titzʼabʼal kuxh invaʼq xaol, atz tuchʼ uqʼeʼybʼal uvaʼ telabʼal kuxh ibʼokʼtziil xaol s-tuchʼ, tul yeʼxhkam laʼ taqʼa. Tan aʼaq kuxh iqʼomal taʼn inqʼa vatz txʼavaʼilla txumbʼal tetz inqʼa xaol, inqʼa yeʼ ootzaqimal quBʼaal Tiuxh taʼn. Tul aʼ yeʼ nik motx iqej inqʼa bʼaʼnla txhaq yol tiʼ u quBʼaal JesuKriisto.

9Tan aʼ u quBʼaal JesuKriisto, uvaʼ bʼen s-alam aanima, ul kʼutxhun vatz txʼavaʼ jankʼal u tatin u quBʼaal Tiuxh. 10Echetz yeʼxhkam vet vaʼtoʼq txhusbʼal nik isaʼon sete, oq aʼ vet u quBʼaal JesuKriisto nik bʼanon iqʼesalil tetaanima. Tul taʼn kuxh quBʼaal JesuKriisto iqʼesal tiibʼa jankʼalxh inqʼa iqʼesal, atz jankʼalxh inqʼa bʼekʼonal. 11Tul tiʼetz vet uvaʼ, ex vet niman tetz Jesuus, qat jalpik vetxumbʼal uvaʼ iqʼomichxh etaʼn setalaleʼ. Tan ech vete qolel qat teleʼl inqʼa yaabʼla txumbʼal sekʼatza. Aloq jit invaʼq vinaq qat bʼanon, pet quBʼaal Tiuxh qat jalpun ex. Echetz jit tiʼ inimal u bʼekʼbʼal tiʼ iqolpeʼl inbʼeeq te vetxhiʼoʼl qat jalpik vetxumbʼal, pet aʼ u quBʼaal JesuKriisto qat chiton ex t-inqʼa epaʼv. 12Tan aʼ u quBʼaal JesuKriisto qat jalpun venaʼyla txumbʼal uvaʼ iqʼomich etaʼn. Tan ech qat ikaj ka venaʼyla txumbʼal, eche imuqtxʼ invaʼq kamnaʼq jaqʼ txʼavaʼ. Tan ech u yol nik qale uvaʼs nik qukuʼ xeʼ aʼ uvaʼ qat kaay vet ka u naʼyla txumbʼal uvaʼ atich s-qukʼatza. Echetz uvaʼe qat ibʼan quBʼaal Tiuxh, tan nik ekʼuqbʼa ekʼuul tiʼ viyakʼil uvaʼ at sekʼatza. Echatetz kuxh qat ekʼulte vaʼt u akʼla txumbʼal tiʼ eqejt viyakʼil quBʼaal Tiuxh. Tan antxh viyakʼil quBʼaal Tiuxhe ibʼanbʼe tiʼ titzʼeʼvsal u quBʼaal JesuKriisto kʼuxh maʼtich ikam veteʼ. Tan echat u yole nik qaleʼ uvaʼs qat qujaʼ vet ul xeʼ aʼ uvaʼ qat qukʼull vet u akʼla txumbʼal.

13Tan tira kamnaʼqich ex vatz quBʼaal Tiuxh taʼn inqʼa epaʼv. Tan yeʼl vetxumbʼal jalpinaʼqiche. Tan yeʼ nikich ekʼutxheʼ oq uvaʼ qolelich el inbʼeeq te vetxhiʼoʼl. Pet tiʼetz vet eqejt u quBʼaal JesuKriisto, tul qat ikuy vet quBʼaal Tiuxh jankʼal inqʼa epaʼv. Tul qat taqʼ vet qʼij esaq yeʼl iyaʼebʼal imotxebʼal. 14Tan quBʼaal Tiuxh qat yaʼsan inqʼa kʼaxbʼichil uvaʼ atich vet tzaan s-qiʼ, eche teesal iqʼij invaʼq xotxhoʼm uvaʼ tzʼibʼamal vet taʼn u aqʼol kuʼ yol tinuqul. Tan aʼ u yol tetz kʼaxbʼichil yeʼ nikich aqʼon ikʼul tibʼ quyol tuchʼ quBʼaal Tiuxh. Pet aʼetz vet vikamebʼal u quBʼaal JesuKriisto qat txhoon vet u yol uvaʼ atich vet kuʼ tinuqul s-qiʼ, eche ilaavuxhil vet ka invaʼq uʼ vatz kurus uvaʼ tzʼibʼamal inqʼa paʼv s-tuul qat ibʼana. 15Echetz tiʼ u taqʼax jaʼ quBʼaal JesuKriisto vatz u kurus, tul qat teesavat quBʼaal Tiuxh iqʼij inqʼa yaabʼla txhaq iqʼesal, atz tuchʼ inqʼa yaabʼla txhaq bʼekʼonal. Tul qat ichʼixvisa vatz xaol s-kaqaayil. Tul qat ikʼutxha uvaʼ, aʼ qat oleʼv tiʼ tel iqʼij inqʼa iqʼesal, eche vaʼq qʼesal sol uvaʼ nik ikʼutxh vet inqʼa pereexho vatz tenam.

16Echetz yeʼxhabʼil vet invaʼq laʼ alon yol sete tiʼ kam laʼ etulbʼe inimal u quBʼaal Tiuxh, eche uvaʼ nik inima inqʼa tij imam Israeel, eche tiʼ kam uvaʼ laʼ etetxhbʼu, atz tiʼ kam uvaʼ laʼ etukʼa; atz tiʼ kam nimla qʼij laʼ enima, atz tiʼ ijaʼul ichʼ, atz tiʼ xeem qʼij saavado. 17Tan jankʼalxh inqʼa qejoʼm inqʼae, tan qat pay vet ka vinimaleʼ. Tan aʼ Kriisto qat ul tzoqpixsan. Tan aʼ nik ibʼan eela inqʼa qejoʼm inqʼae tuchʼ eche invaʼq cheonal. Tan aʼ kuxh nik ibʼaxabʼsa el u cheonal u tul Kriisto. Tan aʼetz Kriistoe u aj cheonal.#Tio 5.17 18Echetz yeʼxhabʼil invaʼq laʼ eesan ex t-bʼey tiʼ etel ka tiʼ vinuqul. Tan avoqe yeʼ laʼ ekʼul vetxʼaqaʼm tiʼ etel ka tiʼ vinuqul. Tan aʼ nik motx tal inqʼa xaol inqʼae, uvaʼ laʼ motx etiqʼo kuʼl etibʼ tiʼ enatxhkʼuulat inqʼa aanxel, eche uvaʼ nik motx ibʼaneʼ. Poro yiqxh aʼ nik motx txhulin inqʼa yol inqʼae t-titzʼabʼal. Tan tira mam oksa qʼijil nik motx ibʼan s-tuchʼ. 19Tul jit aʼ nik motx inima kam inqʼa iyol quBʼaal JesuKriisto. Tan aʼ u quBʼaal JesuKriisto nik chʼijsan inqʼa niman tetz, tiʼ uvaʼ laʼ elaʼp tibʼaʼnil, eche uvaʼ nik isaʼ quBʼaal Tiuxh. Tan echatxh, eche u qutxhiʼoʼl uvaʼ tibʼaʼnil nik chʼijk s-kaqaayil. Tul ikʼulelxhtuʼ tal uvaʼ txeyelaq tibʼ inqʼa kʼulbʼalaq tibʼ qubʼaqil s-bʼaʼn tuchʼ u quviʼ.

20Tiʼetz uvaʼ qat enima inqʼa bʼaʼnla txhaq yol tiʼ u quBʼaal JesuKriisto, tul yeʼ laʼ enima vet inqʼa txhusbʼal uvaʼ elnaʼq vet iqʼij. Tan tiʼ venimat quBʼaal JesuKriisto, tul eche kamchil qat ebʼan vatz inqʼa qejoʼm inqʼae. ¡Echetz kam s-tiʼil ant etok bʼen tiʼ inqʼa qejoʼm, inqʼa elnaʼq vet iqʼij! 21Jankʼal eche uvaʼ nik talax sete: —Yeʼ ekan uvaʼe. Atz yeʼ etetxhbʼu uvaʼe. Atz jitoq laʼ ebʼanbʼe uvaʼe, —chichaq eʼl ex. 22Jankʼaletzxh inqʼa ibʼekʼoʼm, atz inqʼa itxhusuʼm kuxh xaol, tan ayaʼletz inqʼae elnaʼq vet iqʼij, atz yeʼxhkam vet itxaʼk. 23Tan jankʼalxh inqʼae, tan eche inatxhkʼuulal Tiuxh tilixeʼ. Tan vaʼl nuqla txumbʼal s-vatz tiʼ inatxhkʼuulal Tiuxh. Tan nik motx tiqʼo kuʼl tibʼ inqʼa xaol taʼn u txumbʼal uvaʼe u tilixeʼ; tul nik motx ikʼaxbʼisa vitxhiʼoʼl. Poro yeʼl invaʼq inqʼa txumbʼal inqʼae nik toleʼv tiʼ imaqax vitxhiʼoʼl inqʼa xaol tiʼ tatxhval ibʼanax inqʼa paʼv.

Currently Selected:

Koloseenses 2: ixlC

Highlight

Copy

Compare