Koloseenses 1

KOLOSEENSES

Uvaʼs taqʼt bʼen Paʼp bʼaʼnil ikʼuul inqʼa niman tetz Jesuus tu tenam Koloosas

1In Paʼp, vaʼl te inqʼa iapoostol quBʼaal JesuKriisto, tan ech u titzʼabʼal quBʼaal Tiuxhe s-viʼ. Inmoletz vibʼ tuchʼ Timoteeo, u qumol s-niman tetz Jesuus.

2Niketz intzʼibʼa opoon val u uʼ sete, jankʼalxh ex inqʼa chʼexel ex taʼn quBʼaal Tiuxh, ex inqʼa kʼuqlebʼxh kʼuul etatin tiʼ inimal u quBʼaal JesuKriisto, ex inqʼa tu tenam Koloosas.

Tul aʼ vibʼaʼnil Tiuxh, u quBʼaal, [tuchʼ u quBʼaal JesuKriisto] laʼ atin sexoʼl. Tul aʼ vibʼaʼnil laʼ atin tetaanima.

Uvaʼs talt bʼen Paʼp te inqʼa niman tetz Jesuus uvaʼ bʼenamen inatxht Paʼp Tiuxh s-tiʼ

3Bʼenamenetz qunatxht Tiuxh setiʼ, tul nik qaqʼ taʼntiuxh te quBʼaal Tiuxh, viBʼaal u quBʼaal JesuKriisto. 4Tan nik qabʼi uvaʼ qat eqejl vet u quBʼaal JesuKriisto. Atz nikat qabʼi uvaʼ at etaanima sevatzaq, jankʼal ex inqʼa niman tetz Jesuus. 5Echetz uvaʼe nik motx ebʼane, tiʼ uvaʼ tan, il vet val u bʼaʼnil nik itxʼebʼon setiʼ tu amlikaʼ taʼn quBʼaal Tiuxh. Aʼetz u bʼaʼnile uvaʼ qat aqʼax etootzaqi uvaʼs qat talax inqʼa bʼaʼnla txhaq yol sete tiʼ quBʼaal JesuKriisto, inqʼa bʼaʼnla txhaq yol uvaʼ taʼnxhte vinuqul. 6Aʼetz inqʼa bʼaʼnla txhaq yole uvaʼ qat alaxiy sexoʼl, atz uvaʼ ile nik ipaxin vet tuulbʼal u vatz txʼavaʼ s-kaqaayil. Tan il inqʼa xaol nik ichʼij kʼatz quBʼaal Tiuxh taʼn inqʼa bʼaʼnla txhaq yol, eche taqʼt viʼoq tzeʼ ivatz. Tul il ex nik ichʼij etatin taʼn inpaqte. Tul ayaʼx tzaan exeʼt tiʼ inimal s-bʼaʼnxhtuʼ uvaʼs etabʼitaʼ, atz etootzaqit vibʼaʼnil quBʼaal Tiuxh tiʼ vinimal vinuqul. 7Aʼetz inqʼa bʼaʼnla txhaq yole tiʼ quBʼaal JesuKriisto uvaʼ etxhabʼa taʼn Epaafras, uvaʼ at qaanima s-tiʼ, atz uvaʼ kʼuqlebʼxh kʼuul tatin tiʼ ibʼanax u taqʼon quBʼaal JesuKriisto s-qukʼatza, Epaafras uvaʼ nik bʼanon evatzil tzitza. 8Antetzxh vet Epaafras ul alon s-qe uvaʼ at etaanima setiʼ sevatzaq taʼn viTiuxhil Tiuxh.

9Ayaʼx tzaanetz vet quxeʼt tiʼ inatxhax Tiuxh setiʼ s-bʼenamen uvaʼs qabʼitaʼ uvaʼ at etaanima setiʼ sevatzaq. Tul nik qujaq te quBʼaal Tiuxh uvaʼ sibʼ etootzaqibʼal laʼ taqʼ tiʼ ibʼen inuqul sete kam nik isaʼ quBʼaal Tiuxh setiʼ. Atz sibʼ etxumbʼal laʼ taqʼa, atz laʼ taqʼ etootzaqibʼal tiʼ etootzaqit kam laʼ ebʼan tiʼ tiqʼol viyolbʼal quBʼaal Tiuxh. 10Tul aalemal laʼ echʼij vet tiʼ ibʼanax kam uvaʼ nik isaʼ quBʼaal Tiuxh sete, uvaʼ ikʼulelxh laʼ etatin s-vatz. Tul jankʼal inqʼa bʼaʼnla bʼanoʼm laʼ motx ebʼana, laʼ chiibʼisan quBʼaal Tiuxh, eche taqʼt viʼoq tzeʼ ivatz. Echetz laʼ ichʼije vetxumbʼal tiʼ tootzaqil quBʼaal Tiuxh. 11Atz laʼ txhej etial s-bʼaʼn taʼn viyakʼil u quBʼaal Tiuxh. Tan sibʼ tiqleʼm u quBʼaal Tiuxh tuchʼ u nimla tatineʼ. Echetz laʼ itxhej etiale, atz laʼ kuxh ekotxʼ evatz kʼuxh kamxh itzaʼlal laʼ palk ex. Tul laʼ kuxh chiibʼ ex tuulbʼal uvaʼs laʼ epal s-tuul. 12Echetz laʼ echiibʼe tiʼ taqʼax taʼntiuxh te quBʼaal Tiuxh, tiʼ uvaʼ ant vet ex at etokebʼal tiʼ etatin tu amlikaʼ tal uvaʼ nik txiqunk tatin u quBʼaal Tiuxh tal uvaʼ toq atink inqʼa niman tetz Jesuus, inqʼa chʼexel veteʼ. 13Tan quBʼaal Tiuxh qat eesan el oʼ tiqʼabʼ Satanaas, viqʼesal u mam tokto. Tul aʼ qat iqʼexsavat vet oʼ tiqʼabʼ quBʼaal JesuKriisto, viKʼaol quBʼaal Tiuxh, tiʼ ibʼant iqʼesalil tu qaanima, u quBʼaal JesuKriisto uvaʼ at taanima quBʼaal Tiuxh s-tiʼ. 14Tan aʼ u quBʼaal JesuKriisto qat ul txhoon qeleʼl t-inqʼa paʼv [tuchʼ vikaqal.] Tul qat kuyp vet qupaʼv.

Uvaʼs talt Paʼp uvaʼ, aʼ vikam quBʼaal Jesuus vatz kurus qat aqʼon qokebʼal kʼatz quBʼaal Tiuxh

15Tul aʼetz u quBʼaal Jesuus nik kʼutxhun tatin u quBʼaal Tiuxh,

uvaʼ yeʼxhabʼil invaʼq nik ilon.

Tul aʼ u quBʼaal Jesuus iqʼesal tiibʼa

jankʼal inqʼa viinqixsamal taʼn quBʼaal Tiuxh.

16Tan tiʼ u quBʼaal Jesuus iviinqixsavat quBʼaal Tiuxh

inqʼa kam s-kaqaayil,

jankʼal inqʼa t-amlikaʼ,

tuchʼ inqʼa nik qil vatz u txʼavaʼ,

atz jankʼalxh inqʼa yeʼ nik qileʼ,

atz jankʼal inqʼa iqʼesal, inqʼa nik qileʼ,

atz jankʼal inqʼa at tu kaqiqʼ, atz inqʼa iqʼon iviʼ,

atz kʼuxh inqʼa aanxel.

Tan oksabʼ tetz iqʼij quBʼaal Tiuxh siviinqixsataʼ.

17Tan atxh u quBʼaal Jesuus

uvaʼs yeʼxnaqich viinqixsamal

inqʼa kam s-kaqaayil.

Tan tiʼ u quBʼaal Jesuus,

tul il inqʼa kam nik tatineʼ

18Tul antetzxh u quBʼaal Jesuus

nik ibʼekʼon s-quxoʼl,

oʼ inqʼa niman tetz.

Tan ech tatin u quBʼaal Jesuus

s-qiibʼa, eche ibʼekʼon u quviʼ tiibʼa u qutxhiʼoʼl.

Tul antxh u quBʼaal Jesuus iqʼon bʼey tiʼ u itzʼeʼvchil

kʼuxh maʼtich ikam veteʼ.

Echetz aʼ u quBʼaal Jesuus iqʼesal viʼ inqʼa kam s-kaqaayil.

19Tan quBʼaal Tiuxh saʼon

uvaʼ, aʼ u quBʼaal Jesuus ul kʼutxhun ka vatz u txʼavaʼ

jankʼal u tatin u quBʼaal Tiuxh.

20Echetz quBʼaal Tiuxh qat bʼanon

uvaʼ, aʼ vet u quBʼaal Jesuus qat aqʼon tokebʼal

inqʼa kam s-kaqaayil tiʼ tok vatz u quBʼaal Tiuxh,

kʼuxh inqʼa at vatz txʼavaʼ,

atz kʼuxh inqʼa at tu amlikaʼ.

Tan aʼ u quBʼaal Jesuus qat oksan bʼaʼnil

s-xoʼl tuchʼ quBʼaal Tiuxh,

tiʼ uvaʼ qat ul taqʼ tibʼ kamoq,

atz qat el vikaqal s-qiʼ vatz u kurus.

21Tan yeʼlich etokebʼale tiʼ etok vatz quBʼaal Tiuxh. Tan atich kuxh exoʼl tuchʼ quBʼaal Tiuxh. Atz txhiʼanyich kuxh ex tetitzʼabʼal tiʼ quBʼaal Tiuxh. Tan aʼ kuxh u yeʼbʼaʼn nikich motx ebʼaneʼ. Pet s-txheel, tan ant vet ex at etokebʼal tiʼ etok vatz quBʼaal Tiuxh, tan at vet bʼaʼnil sexoʼl tuchʼ quBʼaal Tiuxh. 22Qatetz kʼaxbʼ vitxhiʼoʼl u quBʼaal JesuKriisto setiʼ, atz qat ul taqʼ tibʼ kamoq, tiʼ uvaʼ yeʼl vet invaʼtoʼq yeʼbʼaʼn setiʼ vatz quBʼaal Tiuxh. Atz yeʼl vet invaʼtoʼq kantxhaqla yol laʼ txhej setiʼ s-vatz. Tan tetxhal laʼ bʼen toksat ok ex quBʼaal JesuKriisto vatz u quBʼaal Tiuxh uvaʼs laʼ taqʼt kuʼ u quBʼaal Tiuxh yol tinuqul. 23Poro aʼxh isaʼ uvaʼ nuq txakloqxh ex tiʼ inimal u quBʼaal JesuKriisto, atz txhabʼamoqxh ekʼuqbʼat ekʼuul s-tiʼ. Tul yeʼ laʼ el ka ex tiʼ itxʼebʼex inqʼa bʼaʼnil uvaʼ alel vet sete uvaʼs etabʼit inqʼa bʼaʼnla txhaq yol tiʼ quBʼaal JesuKriisto. Tul iletz inqʼa bʼaʼnla txhaq yol tiʼ quBʼaal JesuKriisto nik ipaxsal vatz u txʼavaʼ s-kaqaayil. Aʼe inqʼa bʼaʼnla txhaq yol uvaʼ qat toksa in quBʼaal JesuKriisto tiʼ ipaxsaleʼ.

Uvaʼs talt Paʼp uvaʼ, aʼich taqʼon Paʼp ipaxsal inqʼa bʼaʼnla txhaq yol xoʼl inqʼa jit tij imam Israeel

24Poro niketz inchiibʼeʼ kʼuxh il in nik inpal titzaʼlal, atz il in bʼeeno nik ikʼaxbʼ vintxhiʼoʼl tu tzeʼ tiʼ talax viyolbʼal quBʼaal Tiuxh sexoʼl. Tul iletz in nik intxʼol inpal t-inqʼa itzaʼlal, tan oq ech uvaʼe nik isaʼ u quBʼaal Tiuxh s-viʼ. Tul echatxh uvaʼe ipal u quBʼaal JesuKriisto t-inqʼa itzaʼlal tiʼ inqʼa niman tetz, inqʼa ech vet tok kʼatz quBʼaal JesuKriisto, eche tok qutxhiʼoʼl kʼatz quviʼ. Tul echatetzxh uvaʼe nik inpal t-inqʼa itzaʼlal. 25Echetz s-tiʼile qat toksa in quBʼaal Tiuxh tiʼ ipaxsal inqʼa bʼaʼnla txhaq yol sexoʼl, ex inqʼa niman tetz Jesuus t-junun tenam. Tan aʼ u quBʼaal Tiuxh qat saʼon s-viʼ uvaʼ, tetxhal laʼ val vinuqul jankʼal viyolbʼal quBʼaal Tiuxh sexoʼl, 26inqʼa yeʼ aqʼax ootzaqiloq s-naʼya, jatqʼix ixeʼt tzaan jattanx inqʼa yaʼbʼ uvaʼ pay ka. Pet ech koq vet s-txheel, tan ile qat qootzaqil vet taʼn quBʼaal Tiuxh, oʼ inqʼa niman tetz Jesuus. 27Tan quBʼaal Tiuxh qat saʼon uvaʼ laʼ tootzaqi inqʼa jit tij imam Israeel, inqʼa bʼaʼnla txhaq yol, inqʼa yeʼich ootzaqimal. Tul laʼ motx etil imam bʼaʼnil u tatin u quBʼaal JesuKriisto tetaanima. Aʼetz vibʼaʼnile uvaʼ ile txʼebʼoʼmy vet setiʼ uvaʼ toq taqʼ quBʼaal Tiuxh sete tu nimla tatin tu amlikaʼ.

28Tan aʼ nik qupaxsavat inqʼa bʼaʼnla txhaq yol sexoʼl, ex inqʼa jit tij imam Israeel. Tul aʼ inqʼa bʼaʼnla txhaq yol nik qutxakunsa tiʼ imaqax jankʼal inqʼa xaol tiʼ yeʼ ibʼanax u yeʼbʼaʼn. Atz nik qutxakunsa tiʼ itxhusux jankʼal inqʼa xaol tiʼ jankʼal inqʼa txumbʼal tiʼ quBʼaal JesuKriisto, tiʼ uvaʼ laʼ itxhabʼa inqʼa xaol s-kaqaayil tiqʼol viyolbʼal quBʼaal Tiuxh s-bʼaʼn, tetxhal laʼ opoon inqʼa xaol s-kaqaayil vatz quBʼaal JesuKriisto. 29Echetz tiʼ uvaʼ laʼ itxhabʼa inqʼa xaol tiqʼol viyolbʼal quBʼaal Tiuxh s-bʼaʼn, nik vaqʼvat yaʼl. Tan tira nik inkʼayi vibʼ taʼn viyakʼil quBʼaal JesuKriisto uvaʼ at sinkʼatza, atz aʼ vet uvaʼe, nik lotxhon in tuchʼ jankʼal viyakʼil.

Currently Selected:

Koloseenses 1: ixlC

Highlight

Copy

Compare