Koloseenses ALBʼAL INUQUL U YOL TIʼ U Uʼ
ALBʼAL INUQUL U YOL TIʼ U Uʼ
KOLOSEENSES
Uvaʼs toq qootzaqitaʼ jaʼl tzʼibʼan u uʼ Koloseenses
Antetzxh Paʼp tzʼibʼan u uʼ uvaʼ Koloseenses ibʼij. Tan antxh u uʼ nik alon uvaʼ Paʼp tzʼibʼan, eche uvaʼ nik tal tu Koloseenses 1.1.
Uvaʼs toq qootzaqitaʼ kam s-tuul tzʼibʼal u uʼ Koloseenses
Aʼetz itzʼibʼat Paʼp u uʼ Koloseenses tuulbʼal u yaʼbʼ vaʼl imutxʼ (61) m.t.J., atz maq tu yaʼbʼ kaʼvaʼl imutxʼ (62) m.t.J. Tul aʼ itzʼibʼavat Paʼp tu mam tenam Rooma uvaʼs atich jaʼ Paʼp t-tzeʼ tiʼ ipaxsal inqʼa bʼaʼnla txhaq yol tiʼ quBʼaal Jesuus tuulbʼal uvaʼs atich ok Neroon s-mam iqʼesal tu mam tenam Rooma. Aʼetz atich u tenam Koloosas tuulbʼal Aasia. Tul naqlich kuxh ixoʼl tuchʼ u tenam Eefeso. Atz naqlichat kuxh ixoʼl tuchʼ u tenam Laodiseea, atz tuchʼ u tenam Ieraapolis, atz tuchʼ u tenam Filadeelfia. Tul nimal yaʼbʼ ibʼan Paʼp tu tenam Eefeso tiʼ itxhusux viyolbʼal quBʼaal Tiuxh tzitzi. Tuulbʼaletz inqʼa yaʼbʼ inqʼae, tul ex ipaxsa Paʼp viyolbʼal quBʼaal Tiuxh tuulbʼal jolt inqʼa tenam uvaʼ naqlich kʼatz u tenam Eefeso. Tul antxh tuulbʼal inqʼa yaʼbʼ inqʼae, tul ok vet Epafrodiito s-niman tetz Jesuus.
Uvaʼs toq qootzaqitaʼ kame u taqʼil vitxhusun Paʼp tuul u tuʼ Koloseenses
Aʼetz taqʼil viyol Paʼp tal te inqʼa niman tetz Jesuus, tiʼ uvaʼ yeʼ laʼ taqʼaq tibʼ eesaloq t-bʼey taʼn vaʼtoʼq txhusbʼal, u gnostisiismo, uvaʼ nikich motx inima inqʼa xaol, eche uvaʼ nik tal tu Koloseenses 2.8. Tul aʼetz nikich isaʼ Paʼp, tiʼ uvaʼ laʼ bʼen te inqʼa niman tetz Jesuus tu Koloosas uvaʼ, aʼ quBʼaal Jesuus ul kʼutxhun u tatin quBʼaal Tiuxh tzitza vatz u txʼavaʼ, eche uvaʼ nik tal tu Koloseenses 1.15-16. Tul taʼn kuxh quBʼaal Jesuus qat ul bʼanon s-kaqaayil. Pet yeʼxhkam vet vaʼtoʼq yeʼ koq qat oleʼv quBʼaal Jesuus s-tiʼ. Echetz talt Paʼpe te inqʼa niman tetz Jesuus tu Koloosas uvaʼ yeʼxhkam vet vaʼtoʼq nik isaʼon s-te oq aʼ vet quBʼaal Jesuus nik bʼanon iqʼesalil t-taanima. Ech uvaʼe nik tal tu Koloseenses 2.10. Kʼuxhetz ech nikich talaxaq s-te taʼn inqʼa eesanal t-bʼey uvaʼ jit kuxh taʼne uvaʼ laʼich kʼuqeʼv ikʼuul tiʼ quBʼaal Jesuus, pet atel kuxh laʼich motx inimaaq, s-tiʼ uvaʼ nikich motx taleʼ. Pet aʼetz nikich isaʼ Paʼp yeʼ taqʼt tibʼ inqʼa niman tetz Jesuus eesaloq t-bʼey. Echetz itzʼibʼat bʼen Paʼpe u tuʼ te inqʼa niman tetz Jesuus tu Koloosas, eche uvaʼ nik tal tu Koloseenses 2.4.
Uvaʼs toq qootzaqitaʼ kam ulbʼemal ijatxp ixoʼl inqʼa yol tu uʼ Koloseenses
U uʼ Koloseenses, tan oʼvaʼlen tanul elnaʼq inqʼa yol uvaʼ nik tal s-tuul.
Koloseenses 1.1-2
Aʼetz ixeʼtebʼe Paʼp talax tiʼ jaʼl nik tzʼibʼan u uʼ, tul jaʼl nik kʼulun. Yaʼne taqʼ vet bʼen Paʼp bʼaʼnil ikʼuul inqʼa niman tetz Jesuus.
1. Koloseenses 1.3-14
U bʼaxa tanul yol, tan aʼ tal Paʼp, tiʼ uvaʼ inatxh Paʼp Tiuxh tiʼ inqʼa niman tetz Jesuus uvaʼ at taanima s-tiʼ s-vatzaq laʼ ibʼana. Tul quBʼaal Tiuxh laʼ aqʼon tootzaqi tiʼ ibʼen inuqul s-te kame inqʼa bʼaʼnla txhusbʼal uvaʼ tetz quBʼaal Tiuxh. Tul aalemal laʼ ichʼij vet tiʼ ibʼanax kam uvaʼ nik isaʼ quBʼaal Tiuxh s-te, uvaʼ ikʼulelxh laʼ tatin vatz quBʼaal Tiuxh. Tul jankʼal inqʼa laʼ motx ibʼana, tul laʼ chiibʼ quBʼaal Tiuxh s-tiʼ, eche taqʼt viʼoq tzeʼ ivatz. Echetz laʼ itxhej itiale s-bʼaʼn taʼn viyakʼil u quBʼaal Tiuxh. Tan sibʼ tiqleʼm u quBʼaal Tiuxh tuchʼ u nimla tatin tu amlikaʼ. Tul laʼ kuxh ikotxʼ ivatz kʼuxh kamxh itzaʼlal laʼ palka.
Tul tzitza nik yaʼk Paʼp tiʼ talax vinatxhkʼuulat Tiuxh tiʼ inqʼa niman tetz Jesuus.
2. Koloseenses 1.15-23
Vikaʼv tanul yol, tan aʼ tal Paʼp, tiʼ uvaʼ taʼn kuxh laʼ inima inqʼa niman tetz Jesuus uvaʼ, aʼ quBʼaal Jesuus nik bʼanon iqʼesalil tiibʼa jankʼal inqʼa kam s-kaqaayil, inqʼa viinqixsamal: Jankʼal inqʼa nik qil vatz u txʼavaʼ; atz jankʼalxh inqʼa yeʼ nik qileʼ; atz jankʼal inqʼa iqʼesal, inqʼa nik qileʼ; atz jankʼal inqʼa at tu kaqiqʼ, atz inqʼa iqʼon iviʼ; atz kʼuxh tiibʼa inqʼa aanxel, inqʼa motx palsan viyol quBʼaal Tiuxh, tul motx bʼen vet s-yaabʼla aanxel; atz kʼuxh inqʼa iaanxel quBʼaal Tiuxh. Tan oksabʼ tetz iqʼij quBʼaal Tiuxh siviinqixsataʼ. Tan atxh u quBʼaal Jesuus uvaʼs yeʼxnaqich viinqixsamal inqʼa kam s-kaqaayil. Tan tiʼ u quBʼaal Jesuus, tul il inqʼa kam ati. Tul antetzxh u quBʼaal Jesuus nik ibʼekʼon s-quxoʼl, oʼ inqʼa niman tetz. Tan ech tatin u quBʼaal Jesuus s-qiibʼa, eche ibʼekʼon u quviʼ tiibʼa u qutxhiʼoʼl. Tul antxh u quBʼaal Jesuus iqʼon bʼey tiʼ u itzʼeʼvchil xoʼl inqʼa kamnaʼq.
3. Koloseenses 1.24—2.7
Vitoxv tanul yol, tan aʼ tal Paʼp, tiʼ uvaʼ tal bʼen te inqʼa niman tetz Jesuus tiʼ tulsalaq s-kʼuul uvaʼ tiʼ kuxh ipaxsal viyolbʼal quBʼaal Tiuxh, tul at jaʼ Paʼp t-tzeʼ. Echetz s-tiʼile yeʼ laʼ motx taqʼ tibʼ eesaloq t-bʼey tiʼ tabʼit vaʼtoʼq uqʼeʼybʼal. Tan aʼ nik tal Paʼp uvaʼ kamxh qat motx ibʼan tiʼ iqejt inqʼa bʼaʼnla txhaq yol tiʼ u quBʼaal Jesuus s-bʼaxa, tul echatetzxh uvaʼe laʼ motx ibʼan tiʼ inimaleʼ. Tul txhabʼamoq vet tatin s-tuulbʼal. Tul aʼl tel laʼ motx ichʼij kʼatz u quBʼaal Jesuus. Tul nuq txakloq vet tiʼ inimal inqʼa bʼaʼnla txhaq yol, inqʼa iqʼomalaq vet taʼn kam uvaʼ txhusel vet s-te.
4. Koloseenses 2.8—3.4
Vikajv tanul yol, tan aʼ tal Paʼp, tiʼ taqʼt itxumbʼal inqʼa niman tetz Jesuus uvaʼ yeʼ laʼ motx taqʼ tibʼ bʼokʼtziiloq tiʼ inimal u tuqʼeʼybʼal inqʼa tij imam Israeel. Tan nik tal Paʼp jabʼistee inqʼa mam bʼaʼnil iqʼomal taʼn viqeex inqʼa bʼaʼnla txhaq yol tiʼ Jesuus, atz jabʼistee vikantxhaqul jolt inqʼa qejoʼm uvaʼ iqʼomal taʼn u tuqʼeʼybʼal inqʼa tij imam Israeel. Tan nik tal Paʼp uvaʼ qat motx taqʼl vet ka inimal inqʼa txhusbʼal uvaʼ pal vet ka vitxakunbʼal, aʼe u tuqʼeʼybʼal inqʼa tij imam Israeel. Pet s-txheel, tan ataq vet qʼij isaq kʼatz quBʼaal Jesuus.
5. Koloseenses 3.5—4.6
Vitoʼv tanul yol, tan aʼ tal Paʼp, tiʼ uvaʼ laʼ itanbʼa inqʼa niman tetz Jesuus ibʼanax jankʼal inqʼa kantxhaq uvaʼ nik tatxhva vitxhiʼoʼl ibʼanaxeʼ. Tul laʼ ibʼan u jik, tan chʼexichla xaol taʼn quBʼaal Tiuxh. Tul aʼetz laʼ motx ikʼutxh vet u bʼaʼnla txumbʼal, tan jetxhel vet ok kʼatz u quBʼaal Tiuxh, atz at taanima quBʼaal Tiuxh s-tiʼ. Tul jalpinaʼq vet vitxumbʼal laʼ ibʼana uvaʼs maʼt tok vet tiʼ inimal quBʼaal JesuKriisto, eche vaʼq xaol uvaʼ laʼ ichʼexpu el u toksaʼm. Tul aʼ vet u akʼ oksaʼm laʼ toksa. Echetz kamxh invaʼq uvaʼ laʼ motx tala, atz kamxh uvaʼ laʼ motx ibʼana, tul aʼ laʼ ikʼutxha uvaʼ nimanaq vet tetz Jesuus. Tul nima tel kuxh bʼaʼnla txhaq txumbʼal motx tal bʼen Paʼp te inqʼa niman tetz Jesuus.
Koloseenses 4.7-18
Tiyaʼtebʼaletz vet viyolon Paʼp, tul nik tal Paʼp yol tiʼ kam uvaʼ nikich ibʼan inqʼa lotxhol tetz. Aʼe Tiikiko tuchʼ Oneesimo tuchʼ Aristaarko tuchʼ Kuxh tuchʼ Juusto, atz tuchʼ Epaafras. Yaʼne nik taqʼ bʼen Paʼp bʼaʼnil ikʼuul inqʼa niman tetz Jesuus; tul nik iyaʼ vet iyoloneʼ.
Currently Selected:
Koloseenses ALBʼAL INUQUL U YOL TIʼ U Uʼ: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.