2 Timoteeo ALBʼAL INUQUL U YOL TIʼ U Uʼ
ALBʼAL INUQUL U YOL TIʼ U Uʼ
2 TIMOTEEO
Uvaʼs toq qootzaqitaʼ jaʼl tzʼibʼan u uʼ 2 Timoteeo
Aʼetz u uʼe uvaʼ 2 Timoteeo ibʼij, uvaʼ itzʼibʼa Paʼp. Tan antxh u uʼ nik alon uvaʼ Paʼp tzʼibʼan, eche uvaʼ nik tal tu 2 Timoteeo 1.1-2.
Uvaʼs toq qootzaqitaʼ kam s-tuul tzʼibʼal u uʼ 2 Timoteeo
Tan eenich Paʼp tu mam tenam Rooma s-pereexhoil uvaʼs itzʼibʼat Paʼp u uʼ 2 Timoteeo. Yeʼetz ootzaqimal kamxh yaʼbʼ itzʼibʼa Paʼp u uʼ 2 Timoteeo; maq aʼ itzʼibʼat Paʼp t-vixeʼtebʼal u yaʼbʼ kajvaʼl imutxʼ (64), atz maq tuulbʼal u yaʼbʼ juqvaʼl imutxʼ (67). Pet aloq antxh pereexhoich Paʼp tu tenam Rooma, tul eenich vet Timoteeo tu tenam Eefeso tiʼ tiqʼol iviʼ xoʼl inqʼa niman tetz Jesuus, tan maʼtich itxhaqt vet bʼen Paʼp Timoteeo.
Uvaʼs toq qootzaqitaʼ kame u taqʼil vitxhusun Paʼp tuul u tuʼ 2 Timoteeo
Aʼetz u uʼ 2 Timoteeo, vitoxlaav tuʼ Paʼp uvaʼ itzʼibʼa vet tiyaʼtebʼal. Tan mam yol nik tal Paʼp s-tuul tiʼ taqʼax itxumbʼal Timoteeo. Tan nikich inatxhp vet te Paʼp uvaʼ toqnaʼqich opoonoq vet iyatzʼax el Paʼp tiʼ ipaxsal viyolbʼal quBʼaal Tiuxh. Tan txhiʼanyichxh Neroon, u mam iqʼesal tu Rooma, tiʼ inqʼa niman tetz Jesuus. Atz nimal inqʼa niman tetz Jesuus nikich tal iyatzʼax el. Xaʼtetze mam txumbʼal nikich tal vet Paʼp te Timoteeo, tan tootzaqlich Paʼp uvaʼ tira txʼakich ok taʼn Timoteeo tiʼ viyolbʼal quBʼaal Tiuxh viʼ jolt inqʼa paxsan tetz viyolbʼal quBʼaal Tiuxh.
Poro nikat itxumun Paʼp inpaqte, tan el ka jolol inqʼa lotxhol tetz Paʼp tiʼ inimal viyolbʼal quBʼaal Tiuxh, jankʼal eche Fijeelo tuchʼ Ermoojenes, atz tuchʼ Deemas. Echetz nik iyaʼlul Timoteeoe taʼn Paʼp, tiʼ uvaʼ jit ant Timoteeo laʼ el ka.
Uvaʼs toq qootzaqitaʼ kam ulbʼemal ijatxp ixoʼl inqʼa yol tu uʼ 2 Timoteeo
U uʼ 2 Timoteeo uvaʼ itzʼibʼa ka Paʼp, tan oʼvaʼlen tanul elnaʼq inqʼa yol uvaʼ nik tal s-tuul.
2 Timoteeo 1.1-2
Aʼetz ixeʼtebʼe Paʼp talax tiʼ jaʼl nik tzʼibʼan u uʼ, tul jaʼl nik kʼulun. Yaʼne taqʼ vet bʼen Paʼp bʼaʼnil ikʼuul Timoteeo.
1. 2 Timoteeo 1.3-18
U bʼaxa tanul yol, tan aʼ tal Paʼp, tiʼ uvaʼ taqʼ bʼen Paʼp itial Timoteeo tiʼ taqʼt Timoteeo yaʼl tiʼ ibʼanax u taqʼon quBʼaal Tiuxh xoʼl inqʼa niman tetz Jesuus tu tenam Eefeso. Tul yeʼl Timoteeo laʼ xoʼv tiʼ talax inqʼa bʼaʼnla txhaq yol tiʼ Jesuus, tan qat taqʼl quBʼaal Tiuxh viTiuxhil s-te tiʼ taqʼax iyakʼil. Tul laʼ ikʼutxha uvaʼ atxh taanima tiʼ quBʼaal Tiuxh, atz tiʼ imol. Atz laʼ itxʼol imaqt tibʼ tiʼ ibʼanax inqʼa kantxhaq. Tan tira at titzʼabʼal quBʼaal Tiuxh tiʼ kam uvaʼ nik ibʼan Timoteeo xoʼl inqʼa niman tetz Jesuus.
Tul talat Paʼp te Timoteeo uvaʼ kamxh inqʼa jikla txhaq yol uvaʼ txhusel s-te taʼn Paʼp, tul antetzxh uvaʼe laʼ tala. Tul kʼuqloqxh ikʼuul, atz atoqxh taanima tiʼ u quBʼaal Jesuus. Tan aʼ u quBʼaal Jesuus laʼ lotxhon tiʼ kam uvaʼ laʼ motx ibʼana. Tul yeʼ laʼ ikuy ijalp talax inqʼa bʼaʼnla txhaq yol tiʼ Jesuus uvaʼ qat tiqatzij taʼn viTiuxhil Tiuxh.
2. 2 Timoteeo 2.1-13
Vikaʼv tanul yol, tan aʼ tal Paʼp, tiʼ uvaʼ iyaʼlu Paʼp Timoteeo tiʼ ibʼanax u taqʼon quBʼaal Tiuxh kʼuxh kamxh itzaʼlal laʼ palka. Tan xamtel bʼen til ibʼaʼnil. Tul aʼ nik tal Paʼp uvaʼ, aʼ laʼ til Timoteeo kame vibʼanoʼm Paʼp. Tul laʼ ibʼan Timoteeo tetz. Tan ech nik tal Paʼp s-eche: —Iletz in nik inkotxʼ invatz tiʼ inpal t-inqʼa itzaʼlal, tiʼ uvaʼ nik insaʼ ikolt tibʼ inqʼa niman tetz Jesuus vatz u kʼaxkʼo, jankʼalxh inqʼa chʼexel vet taʼn quBʼaal Tiuxh tiʼ inimal u quBʼaal JesuKriisto. Tul yeʼl iyaʼebʼal imotxebʼal laʼ bʼen tilt u nimla tatin kʼatz quBʼaal JesuKriisto. Poro nuqxh inqʼa yol inqʼaa, inqʼa ech nik tal s-eche: «Tan oq laʼ qutanbʼa ibʼanax u paʼv tiʼ quqejt u quBʼaal Jesuus, tul yeʼletz iyaʼebʼal imotxebʼal laʼ qubʼant iqʼesalil kʼatz quBʼaal Tiuxh. Oq ech laʼ qubʼan, eche invaʼq kamnaʼq uvaʼ yeʼl vet tokebʼal tiʼ ibʼanax invaʼq paʼv, tul yeʼletz iyaʼebʼal imotxebʼal laʼ qatin kʼatz u quBʼaal JesuKriisto. Pet oqetz: –Yeʼ vootzaql Jesuus, –chaq oʼ, tul: –Yeʼ vootzaqle, –chaqatetz Jesuus s-qiʼ. Atzoqetz jit kʼuqlebʼ kʼuul oʼ tiʼ inimal quBʼaal JesuKriisto, tul oʼetz kuxhte s-qujunal. Pet u quBʼaal JesuKriisto, tan kʼuqlebʼ kʼuul tiʼ inimal kam inqʼa iyol uvaʼ alel taʼn. Tul yeʼl paqul laʼ ijalpu u quBʼaal JesuKriisto viyol,» chiche, —xeʼt Paʼp te Timoteeo.
3. 2 Timoteeo 2.14-26
Vitoxv tanul yol, tan aʼ tal Paʼp, tiʼ uvaʼ taqʼ bʼen Paʼp itxumbʼal Timoteeo tiʼ jatvatzul inqʼa laʼ ibʼana, atz jabʼiste uvaʼ yeʼ laʼ ibʼana. Tan aʼxh ibʼoʼqʼol viyol Paʼp te Timoteeo uvaʼ aʼxh laʼ itxhus Timoteeo viyolbʼal quBʼaal Tiuxh s-bʼaʼn, tan aʼe vinuqul. Tul aʼ u bʼaʼn laʼ ibʼan te inqʼa xaol s-kaqaayil. Tul laʼ itxhus viyolbʼal quBʼaal Tiuxh. Atz laʼ ikotxʼ Timoteeo ivatz te vitxumbʼal inqʼa niman tetz Jesuus. Tul laʼ toksa Timoteeo inqʼa xaol s-jik. Poro jit tuchʼ yaj, pet tuchʼxh bʼaʼnil.
4. 2 Timoteeo 3.1-17
Vikajv nimla tanul yol, tan aʼ tal Paʼp, tiʼ uvaʼ tulsa Paʼp s-kʼuul Timoteeo uvaʼ laʼ txhej xaol uvaʼ laʼ kuxh motx itxhok toksal ok invaʼt txhusbʼal xoʼl inqʼa bʼaʼnla txhaq yol uvaʼ tal Jesuus. Poro at xaol uvaʼ antxh laʼ txhejk xoʼl inqʼa niman tetz Jesuus, tul at inqʼa naatxhen laʼ tzajka. Aʼetz uvaʼe, yeʼ laʼ ikʼulvii Timoteeo tokoʼk xoʼl inqʼa niman tetz Jesuus. Tan ech nik tal Paʼp te Timoteeo s-eche: —Aʼxh txhʼuyoq axh tiʼ inqʼa intxhus see. Atz aʼ atxhabʼa vintxumbʼal tiʼ kam uvaʼ nik inbʼaneʼ. Atz il axh txhʼuyel axh tiʼ kam uvaʼ nik inkʼaq bʼen. Atz qat akʼuqbʼa akʼuul tiʼ quBʼaal Tiuxh, eche vinkʼuqbʼat inkʼuul. Tul echat kuxh nik atxʼaqmiit, eche uvaʼ intxʼaqmiitaʼ. Atz aʼ qat atxhabʼa sinkʼatza kam u vaanima tiʼ inqʼa xaol, tul ech uvaʼe nik abʼane. Atz echat kuxh nik akotxʼt avatz, eche uvaʼ nik inkotxʼt invatz tuulbʼal inqʼa itzaʼlal nik palk in, —xeʼt Paʼp.
Tul itzoqpebʼal vet tanul viyol Paʼp, tan aʼ nik tal Paʼp uvaʼ: —Jankʼalxh inqʼa iyolbʼal quBʼaal Tiuxh, inqʼa tzʼibʼamal ka, tan quBʼaal Tiuxh alon te inqʼa tzʼibʼan tetz. Tul aʼ itxaʼk inqʼa iyolbʼal quBʼaal Tiuxh uvaʼ laʼ itxhus oʼ. Atz laʼ tal inuqul s-qe tiʼ yeʼ qupaʼvineʼ. Atz laʼ toksa oʼ t-bʼey. Atz laʼ itxhus oʼ tiʼ ibʼanax u jik vatz quBʼaal Tiuxh. Echetz laʼ qutxhabʼat tiqʼole viyolbʼal quBʼaal Tiuxh s-bʼaʼn, jatvaʼl oʼ inqʼa niman tetz. Tul txʼakel vet qukʼuul tiʼ quBʼaal Tiuxh laʼ ibʼana tiʼ ibʼanax jankʼal inqʼa bʼaʼnla txhaq aqʼon, —xeʼt Paʼp te Timoteeo.
5. 2 Timoteeo 4.1-18
Vitoʼv nimla tanul yol, tan aʼ tal Paʼp, tiʼ uvaʼ ikaʼpaqu Paʼp talax te Timoteeo uvaʼ aʼxh laʼ tal inuqul inqʼa bʼaʼnla txhaq yol tiʼ u quBʼaal Jesuus. Tan laʼ opoon vaʼl qʼij uvaʼ yeʼ laʼ isaʼ vet inqʼa xaol tabʼil inqʼa bʼaʼnla txhaq txhusbʼal. Pet aʼ kuxh laʼ isaʼ vet tabʼil kam uvaʼ laʼ motx isaʼ s-te. Tan laʼ motx itxhok txhusulaq tetz. Tul aʼ kuxh laʼ txhusux vet s-te ibʼanax kam tatxhaʼv vitxhiʼoʼl. Echetz laʼ motx tel vet kae tiʼ vinuqul viyolbʼal quBʼaal Tiuxh. Tul aʼ kuxh laʼ bʼenk vet ikʼuul tiʼ tabʼil inqʼa txhulim yol.
Yaʼne tzaqʼt vet ka Paʼp te Timoteeo tiʼ taltaʼ uvaʼ nik ichiibʼ Paʼp tiʼ toleʼv tiʼ ipaxsal inqʼa bʼaʼnla txhaq yol tiʼ quBʼaal Jesuus tuulbʼal mamala tenam. Tul nikat ichiibʼ Paʼp inpaqte tiʼ taqʼt ichʼexel iyol inqʼa nik eesan iqʼij inqʼa bʼaʼnla txhaq yol. Tul nikat ichiibʼ Paʼp, tiʼ uvaʼ at vet invaʼl txʼaqaʼm nik itxʼebʼon s-tiʼ, uvaʼ quBʼaal Jesuus toq aqʼon s-te. Tul nik tal Paʼp uvaʼ jit kuxh taʼn Paʼp laʼ aqʼax itxʼaqaʼm, pet laʼat aqʼax itxʼaqaʼm jankʼal inqʼa xaol, inqʼa ayaʼlxh ikʼuul txʼebʼoʼmy tiʼ u tulebʼal quBʼaal Jesuus.
Yaʼne yaʼ vet Paʼp tiʼ talax tanul yol tiʼ taqʼax taʼntiuxh te quBʼaal Tiuxh. Tul ech nik tal Paʼp s-eche: —Taʼnxh quBʼaal Tiuxh qat lotxhon in. Tul qat taqʼ intial tiʼ talax inqʼa bʼaʼnla txhaq yol xoʼl inqʼa jit tij imam Israeel. Echetz aʼ u quBʼaal Tiuxh toq kolon in tiʼ yeʼ inbʼant inqʼa yeʼbʼaʼn, tetxhal vopoon vet tu amlikaʼ tal uvaʼ nik ibʼanvat quBʼaal Tiuxh iqʼesalil, —xeʼt Paʼp.
2 Timoteeo 4.19-22
Tiyaʼtebʼaletz vet iyolon Paʼp, tul taqʼ bʼen Paʼp bʼaʼnil ikʼuul Timoteeo, atz bʼaʼnil ikʼuul jolt inqʼa niman tetz Jesuus, inqʼa atich kʼatz Timoteeo. Yaʼne nik tal bʼen Paʼp bʼaʼnla yol s-tiʼ.
Currently Selected:
2 Timoteeo ALBʼAL INUQUL U YOL TIʼ U Uʼ: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.