2 Timoteeo 1

2 TIMOTEEO

Uvaʼs taqʼt bʼen Paʼp bʼaʼnil ikʼuul Timoteeo

1In Paʼp, vaʼl te inqʼa apoostol, vitxhaq quBʼaal JesuKriisto. Tan ech u titzʼabʼal quBʼaal Tiuxhe s-viʼ. Tan aʼ titzʼabʼal s-viʼ ipaxsal u yol uvaʼ alel vet ka taʼn quBʼaal Tiuxh tiʼ jaʼl uvaʼ laʼ qeon quBʼaal JesuKriisto, tul yeʼl iyaʼebʼal u qʼij isaq.

2Nik intzʼibʼa bʼen val u uʼ see, Timoteeo, axh, uvaʼ at vaanima seʼe, tan eche invaʼq inkʼaol avatin sinvatz.

Aʼ vibʼaʼnil u Tiuxh, u quBʼaal, tuchʼ u quBʼaal JesuKriisto laʼ atin sakʼatza. Tul laʼ itxum avatz, atz laʼ atin vibʼaʼnil tavaanima.

Uvaʼs talt bʼen Paʼp uvaʼ nik inatxh Paʼp Tiuxh tiʼ Timoteeo

3Niketz vaqʼ taʼntiuxh te quBʼaal Tiuxh seʼe, u quBʼaal Tiuxh uvaʼ nikich inatxh inqʼa kʼuy inmam. Tul antxh nik innatxh inpaqte. Tul jikxh u vitzʼabʼal nik inbʼan s-vatz. Tul qʼiil aqʼbʼal nik innatxht Tiuxh, tul nik viqʼo tzaan axh s-tuul. 4Tul nik insaʼeʼ laʼ vil axh, atz tira laʼ chiibʼ in seʼe. Txhaqpaqetza tul nik avul sinkʼuul. Tan nik tul sinkʼuul uvaʼ nikich avoqʼeʼ uvaʼs qujatxt qibʼ.#Vibʼanoʼm inqʼa Apoostol 20.36-38 5Tul nik tul sinkʼuul uvaʼ nuqxhtuʼ kʼuqlelxh akʼuul tiʼ u quBʼaal JesuKriisto. Tan echat kuxh nikich ikʼuqbʼat qʼes akʼuy, Looida, ikʼuule tuchʼ atxutx, Euniise, tiʼ u quBʼaal Jesuus. Echetz nik inqejte uvaʼ echatxh nik akʼuqbʼat akʼuule.#Vibʼanoʼm inqʼa Apoostol 16.1

Uvaʼs tulsat bʼen Paʼp s-kʼuul Timoteeo, tiʼ uvaʼ laʼxh ibʼan yaʼl tiʼ ibʼanax u taqʼon quBʼaal Tiuxh

6Echetz nik vulsate sakʼuul uvaʼ aʼl laʼ eeqʼot tel ayakʼil tiʼ ibʼanbʼel u txumbʼal uvaʼ taqʼ quBʼaal Tiuxh tavaanima uvaʼs vaqʼt jaʼ inqʼabʼ taviʼ. 7Tan qat taqʼ quBʼaal Tiuxh viTiuxhil tavaanima. Tul jit aʼ itxaʼk s-xoʼvisabʼ koq eetz. Pet aʼ itxaʼk uvaʼ at atial tuchʼ ayakʼil tiʼ ibʼanax u aqʼon. Tul atxh avaanima tiʼ quBʼaal Tiuxh laʼ abʼana, atz kʼuxh tiʼ amol. Atz laʼ atxʼol amaqt eebʼ tiʼ ibʼanax inqʼa kantxhaq.

Uvaʼs talt Paʼp uvaʼ yeʼ laʼ chʼixv Timoteeo tiʼ talax inqʼa bʼaʼnla txhaq yol tiʼ quBʼaal Jesuus, kʼuxh laʼ pal titzaʼlal s-tiʼ, atz kʼuxh at jaʼ Paʼp t-tzeʼ

8Echetz yeʼl axh laʼ chʼixv axh tiʼ talax inqʼa bʼaʼnla txhaq yol tiʼ Jesuus. Tul jitoq laʼ chʼixv axh, tiʼ uvaʼ il in at jaʼ in t-tzeʼ tiʼ ipaxsal inqʼa bʼaʼnla txhaq yol tiʼ Jesuus. Pet aʼl kuxh akotxʼ avatz oq nik isaʼ inqʼa xaol akʼaxbʼisaleʼ, eche uvaʼ nik palk in tiʼ ipaxsal inqʼa bʼaʼnla txhaq yol tiʼ Jesuus. Tul quBʼaal Tiuxh laʼ aqʼon atial. 9Tan aʼ u quBʼaal Tiuxh qat chiton oʼ t-inqʼa kʼaxkʼo tiʼ inqʼa qupaʼv. Tul qat isaʼ tzaan oʼ, tiʼ uvaʼ laʼ jetxhon ok oʼ s-kʼatza. Poro jit tiʼ qubʼant u bʼaʼn, pet tiʼ uvaʼ laʼ elaʼp u titzʼabʼal quBʼaal Tiuxh s-qiʼ. Aʼe, uvaʼ ibʼaʼnilich u quBʼaal JesuKriisto, tul laʼich chitp oʼ tiʼ yeʼ qubʼen t-inqʼa kʼaxkʼo tiʼ inqʼa qupaʼv. Tan yekichxh titzʼa tzaan quBʼaal Tiuxh uvaʼs yeʼnaqich xeʼtoq tzaan txhaq tanul inqʼa yaʼbʼ uvaʼ pay ka. 10Aʼetz vet vibʼaʼnil quBʼaal Tiuxhe qat ikʼutxhlaʼ, tan qat uy vet u Chitol qetz s-quxoʼl. Tan aʼ u quBʼaal JesuKriisto qat oleʼv tiʼ yeʼ qubʼen tu kamchil uvaʼ yeʼl iyaʼebʼal imotxebʼal. Tan kʼuxh laʼxh kam oʼ vatz u xaol, poro yeʼl paqul laʼ kam oʼ vatz u quBʼaal Tiuxh. Tan qat taqʼl vet quBʼaal JesuKriisto qʼij qusaq uvaʼ yeʼl iyaʼebʼal imotxebʼal. Tul tuchʼetz vet qabʼit inqʼa bʼaʼnla txhaq yol tiʼ Jesuus, qat qootzaqivat uvaʼ at vet qʼij qusaq. Tul laʼ taqʼ qutxhiʼoʼl uvaʼ yeʼl vet iqʼajebʼal laʼ ibʼana.

11Echetz s-tiʼile qat toksa in quBʼaal Tiuxh s-paxsan tetz viyolbʼal xoʼl inqʼa jit tij imam Israeel. Atz qat toksa in sitxhaq, atz qat toksa in s-txhusul tetz inqʼa jit tij imam Israeel. 12Tul tiʼetz ipaxsal viyolbʼal quBʼaal Tiuxh nik palk in titzaʼlal. Poro yeʼletz in nik inchʼixv tiʼ vatin t-tzeʼ. Tan vootzaqle uvaʼ taʼn kuxh kʼuqlel inkʼuul tiʼ u quBʼaal JesuKriisto. Tul vootzaqle uvaʼ antxh quBʼaal JesuKriisto at tiqleʼm tiʼ ikolox inqʼa bʼaʼnla txhaq yol uvaʼ qat taqʼ viqatzi talaxeʼ. Tul laʼ ikol inuqul viyolbʼal, tetxhal toopon u qʼij uvaʼ laʼ tul inpaqte. 13Tul echat kuxh axhe, tan aʼ txhʼuyoq axh tiʼ kam inqʼa qat atxhabʼa sinkʼatza. Tan qat intxhabʼa tiqʼol inqʼa bʼaʼnla txhaq yol uvaʼ yeʼ yuel ok joltoʼq yol s-xoʼl. Tul kʼuqloqxh akʼuul tiʼ u quBʼaal JesuKriisto. Tul atoqxh avaanima tiʼ u quBʼaal JesuKriisto. 14Tul yeʼ laʼ akuy ijalpul talax inqʼa bʼaʼnla txhaq yol tiʼ Jesuus uvaʼ qat eeqa tzij talax taʼn viTiuxhil Tiuxh. Tul aʼ viTiuxhil Tiuxh uvaʼ at s-qukʼatza jununil oʼ, laʼ lotxhon axh tiʼ talaxeʼ.

Uvaʼs talt Paʼt uvaʼ taʼn kuxh Onesiiforo yeʼ chʼixv te Paʼp

15Tul ootzaqle uvaʼ motx taqʼ ka in inqʼa niman tetz Jesuus, inqʼa at tuulbʼal Aasia. Tul ant Fijeelo tuchʼ Ermoojenes aqʼon ka in. 16Pet quBʼaal Tiuxh laʼ aqʼon vibʼaʼnil tiibʼa Onesiiforo tuchʼ jankʼal tatin t-totzotz. Tan nima paqul kuxh ex taqʼ intial tuchʼ yol. Tul yeʼl Onesiiforo nikich ichʼixv s-ve, kʼuxh qitzelich in s-kadeena, atz atich jaʼ in t-tzeʼ. 17Tan yeʼl Onesiiforo pal ikʼuul tiʼ intukileʼ uvaʼs tul tzitza tu mam tenam Rooma. Pet tetxhal kuxh ex ileq in. 18Tul ootzaql s-bʼaʼn uvaʼ mam bʼaʼnil nikich ibʼan Onesiiforo s-ve uvaʼs atich in tu tenam Eefeso. Pet aʼetz u quBʼaal Tiuxh laʼ bʼanon bʼaʼnil te Onesiiforo. Tul laʼ itxum quBʼaal JesuKriisto ivatz Onesiiforo, uvaʼs laʼ taqʼt kuʼ u quBʼaal Jesuus inqʼa yol tinuqul.

Currently Selected:

2 Timoteeo 1: ixlC

Highlight

Copy

Compare