1 Timoteeo 6

1Tul kʼuxh jatvaʼl inqʼa aqʼonvil, inqʼa loqʼel tok tiʼ aqʼon, inqʼa ech vete jaqʼ yuuka atil ok tiʼ aqʼon xeʼ vaʼq bʼaal aqʼon, tul tira atoqxh tatin u bʼaal taqʼon s-vatz. Echetz yeʼ laʼ teesal iqʼije u quBʼaal Tiuxh; atz yeʼ laʼ eesal iqʼij u txhusbʼal nik qaleʼ. 2Atz jaʼletz inqʼa aqʼonvil uvaʼ niman tetz Jesuus u bʼaal taqʼon, tul yeʼletz laʼ titzʼa uvaʼ, tiʼ uvaʼ niman vet tetz Jesuus u bʼaal taqʼon, tul jit kuxh vet niim tiqleʼm u bʼaal taqʼon s-vatz laʼ ibʼana. Yeʼletza. Pet aʼ laʼ ibʼana uvaʼ aʼl tel laʼ ibʼant u aqʼon s-bʼaʼn, tan tootzaq uvaʼ imol s-niman tetz Jesuus vet u bʼaal taqʼon, uvaʼ nik ilon vibʼaʼnil u taqʼonvil. Tul laʼ chiibʼ inqʼa aqʼonvil tiʼ u bʼaal taqʼon.

Aʼetz inqʼae, laʼ atxhus te inqʼa aqʼonvil; atz laʼ motx abʼan yaʼl tiʼ ibʼanaxeʼ.

Uvaʼs talt Paʼp te Timoteeo uvaʼ laʼ til Timoteeo itxumbʼal jaʼle inqʼa laʼ txhusuni

3Yeʼxhal laʼ akuy tok xoʼl inqʼa niman tetz Jesuus tiʼ itxhust inqʼa yaabʼla txhusbʼal, atz inqʼa txhusbʼal uvaʼ yeʼ nik ibʼan eela tuchʼ inqʼa jikla txhaq txhusbʼal uvaʼ tal quBʼaal JesuKriisto, inqʼa yeʼ yuele. Atz yeʼ laʼ akuy itxhusux inqʼa txhusbʼal uvaʼ yeʼ nik ijetxhex ok inqʼa xaol kʼatz quBʼaal Tiuxh taʼn. 4Jaʼletz u xaol uvaʼ nik txhusun inqʼa txhusbʼal inqʼae, tul aʼetz kuxh isaʼe toksal iqʼij s-tiʼ. Tul yeʼxhkam tootzaq tiʼ viyolbʼal quBʼaal Tiuxh. Tan aʼ kuxh nik itxhok ixeʼtisal yol xoʼl imol uvaʼ jitoq at itxaʼk, atz yeʼxhkam nik taqʼeʼ. Pet aʼl txhʼaʼo kuxh nik motx itxhokeʼ tuchʼ txhiʼal kʼuul, tuchʼ yao ibʼ, tuchʼ yoqʼoʼm, tuchʼ yaabʼla txhaq txumbʼal, 5tuchʼ vavu ibʼ tiʼ yol xoʼl inqʼa xaol, inqʼa yannaʼq viʼ, tuchʼ inqʼa tira yeʼl bʼeeq iyolbʼal quBʼaal Tiuxh ootzaqimal taʼn. Tan aʼaq titzʼabʼal uvaʼ, aʼ laʼ motx ibʼanbʼevat inqʼa tuqʼeʼybʼal tiʼ itxʼakax ipuaq xoʼl inqʼa niman tetz Jesuus nik motx taleʼ.

6Pet ech koq u qujetxhtoʼk qibʼ kʼatz quBʼaal Tiuxh, tan sibʼ laʼ taqʼa. Tul chiibʼebʼal inpaqte viʼ uvaʼ, aʼ u puaq laʼ qitzʼa itxhej s-tiʼ. 7Tan yeʼxhkam invaʼq iqʼomich qaʼn uvaʼs qul vatz qʼij saq. Tul yeʼxhkam invaʼq laʼ utxhi laʼ qiqʼo uvaʼs laʼ qukameʼ. 8Oqetz at qetxhbʼubʼal tuchʼ qoksaʼm, tul qukʼuqbʼavaqetz qukʼuul s-tiʼ. 9Pet at xaol aʼ kuxh een taanima tiʼ ibʼen s-txʼiol iqʼij. Xaʼtetze kam kuxh kantxhaq nik ibʼan vet tiʼ ileqt u txʼijbʼal qʼij. Echetz nik ikuʼ vet t-paʼv, eche nik tok vaʼq txoo t-kʼaa. Atz kamaq kuxh vet laʼ motx tatxhva uvaʼ jit ikʼulel. Atz kamaq kuxh vet yeʼbʼaʼnil laʼ motx tatxhva uvaʼ laʼ yansan. Tan junt kuxh vet laʼ taqʼ bʼen tibʼ s-kantxhaq, atz s-tzʼeqxinaʼq vatz quBʼaal Tiuxh. 10Tan u atxhaʼv tiʼ puaq, tan kam kuxh vet paʼvil nik ex bʼanaxoq taʼn. Tan aʼ u tatxhval u puaq, aʼe vixeʼal inqʼa paʼv; eche taqʼil inviʼoq tzeʼ uvaʼ nik taqʼ ivatz. Tan ech ibʼane kaʼl inqʼa xaol, inqʼa aʼ kuxh u puaq nikich motx tatxhva, tul motx el vet ka tiʼ iqeex Jesuus. Aʼetz inqʼa xaole uvaʼ mam kuxh vet kʼaxkʼo ex taqʼ s-te.

Uvaʼs talt Paʼp te Timoteeo uvaʼ yeʼ laʼ itzʼeq Timoteeo u kʼuqlebʼal ikʼuul tiʼ quBʼaal Tiuxh

11Pet axh, Timoteeo, axh vaʼl chelem vinaq uvaʼ tira txʼakel avaanima tiʼ quBʼaal Tiuxh, jetxheʼl eebʼ kʼatz inqʼa txumbʼal, inqʼa atxhaʼv tiʼ puaq. Pet aʼ okk bʼen axh tiʼ ibʼanax u jik. Atz aʼ atxhok ajetxhon ok kʼatz quBʼaal Tiuxh. Atz aʼ akʼuqbʼavat akʼuul tiʼ quBʼaal Tiuxh. Tul at avaanima tiʼ inqʼa niman tetz Jesuus. Tul laʼ akotxʼ avatz tiʼ inqʼa itzaʼlal nik apal s-tuul. Tul tzʼuʼkinla vinaq axh laʼ abʼana. 12Tul bʼan yaʼl tiʼ tiqʼol viyolbʼal quBʼaal Tiuxh, atz tuchʼ jankʼal inqʼa nik aaleʼ, atz tuchʼ jankʼal inqʼa nik abʼaneʼ. Echetz laʼ abʼant yaʼl, eche nik ibʼan vaʼq xaol uvaʼ nik itxhʼaʼoin tiʼ vaʼq yaabʼla kam. Tul tij axh abʼan tiʼ itxeyex u qʼij asaq uvaʼ toq atxʼakeʼ, uvaʼ yeʼl iyaʼebʼal kʼatz quBʼaal Tiuxh. Tan aʼ qat isaʼvat tzaan axh quBʼaal Tiuxh tiʼ ajeqbʼat vayol tiʼ inimal u quBʼaal JesuKriisto uvaʼs aalt vayol ech ivatz inqʼa iqʼon iviʼ.

13Niketz inbʼan yaʼl see uvaʼ aqʼ yaʼl tiʼ inimal viyolbʼal quBʼaal JesuKriisto tuchʼ vavatineʼ, viyolbʼal quBʼaal JesuKriisto uvaʼ qat aal vatz mamala xaol, inqʼa nikich ilon, atz nikich abʼin inqʼa yol. Nik inbʼan yaʼl see ech ivatz u quBʼaal Tiuxh, u Aqʼol tetz u qʼij isaq inqʼa kam s-kaqaayil. Tul nikat inbʼan yaʼl see ech ivatz u quBʼaal JesuKriisto, uvaʼ alon ka viyol quBʼaal Tiuxh te Poonsio Pilaato. 14Atz nikat inbʼan yaʼl see uvaʼ laʼ anima viyol quBʼaal JesuKriisto. Yeʼl inbʼeeq laʼ el ka axh tiʼ ibʼanaxeʼ, echetz yeʼl invaʼq yole laʼ alax seʼe tiʼ kam inqʼa laʼ abʼana. Tul echxh laʼ abʼane, tetxhal topoon u qʼij uvaʼs laʼ tul u quBʼaal JesuKriisto inpaqte. 15Aʼ u qʼije uvaʼ, aʼ u quBʼaal Tiuxh laʼ alon jatu laʼ opooni:

Aʼ u quBʼaal Tiuxh

laʼ oksal iqʼij

uvaʼ taʼnxhte

u Aj Yol uvaʼ tira at tiqleʼm.

Tan aʼe, uvaʼ at

s-tiibʼa s-kaqaayil;

atz aʼe viQʼesal

viʼ inqʼa mam iqʼesal;

atz Ilol tetz inqʼa kam

tiibʼa inqʼa nik ilon

inqʼa kam;

16atz uvaʼ taʼnxhte

yeʼl ikamebʼal.

Aʼe, uvaʼ een atil tal

uvaʼ nik txiqunk

u qʼij saq;

tul yeʼxhabʼil laʼ oleʼv

tiʼ topoon s-kʼatza

taʼn u qʼij saq;

atz yeʼxhabʼil invaʼq

ilonaʼq tetz;

atz yeʼxhabʼil invaʼq

laʼ oleʼv tiʼ tilixeʼ.

Aʼetz uvaʼe, laʼ aqʼax bʼen

s-nim;

atz aʼ laʼ bʼanon iqʼesalil

uvaʼ yeʼl iyaʼebʼal

imotxebʼal.

Tul echxh laʼ ibʼane.

17Pet laʼ aal te inqʼa niman tetz Jesuus, inqʼa txʼiol iqʼij, uvaʼ yeʼ laʼ motx taqʼ bʼen tibʼ s-nim. Tul jit aʼ laʼ motx ikʼuqbʼavat ikʼuul tiʼ u txʼijbʼal iqʼij. Tan jit kʼuqlebʼ kʼuul u txʼijbʼal qʼij. Pet taʼn laʼ ikʼuqbʼavat ikʼuul tiʼ u quBʼaal Tiuxh [uvaʼ itzʼlele]. Tan aʼ u quBʼaal Tiuxh nik aqʼon jankʼal uvaʼ nik isaʼon s-qe. Tul tira nik ipal iviʼ taqʼt s-qe, tul laʼ chiibʼ oʼ tiʼ ibʼanbʼeleʼ. 18Tul bʼekʼ te inqʼa txʼiol iqʼij, uvaʼ, aʼ laʼ ibʼan inqʼa bʼaʼnla txhaq bʼanoʼm. Tul bʼekʼ s-te uvaʼ sibʼ laʼ motx lotxhoni, atz ayaʼl ikʼuul laʼ motx taqʼa. 19Oqetz ech laʼ ibʼane, tul txʼijbʼal iqʼijetz vete nik imol kʼatz quBʼaal Tiuxh. Aʼetz uvaʼe, toq bʼenoq sixeʼal u tatin kʼatz quBʼaal Tiuxh. Echetz laʼ bʼen inatxhte vibʼaʼnil u qʼij saq uvaʼ tira bʼaʼnla atinchil tetz txʼijbʼal qʼij laʼ tatin veteʼ.

Uvaʼs iyaʼ vet Paʼp tiʼ itzʼibʼal bʼen inqʼa iyol te Timoteeo

20Axh, Timoteeo, sebʼtoq axh tiʼ ibʼanax inqʼa aqʼon, inqʼa iqatzimal vet aaʼn taʼn u quBʼaal Jesuus. Tul yeʼl axh laʼ ok bʼen axh tiʼ iyolox inqʼa yol inqʼa kantxhaq, inqʼa yeʼxhkam laʼ taqʼa. Tul yeʼ laʼ ok bʼen axh tiʼ iyolox inqʼa yol uvaʼ ‹mam txumbʼal,› chich inqʼa xaol s-tiʼ. Tul yeʼ nik ilotxhon tiʼ tootzaqil u quBʼaal Tiuxh. 21Tan at qumol s-niman tetz Jesuus qat motx el ka tiʼ inimal inqʼa bʼaʼnla txhaq yol. Tan aʼ motx taqʼvat iviʼ tiʼ inimal inqʼa yol uvaʼ ‹mam txumbʼal,› chich inqʼa xaol s-tiʼ.

Pet aʼ vibʼaʼnil quBʼaal Tiuxh laʼ atin sakʼatza.

[Tul echxh laʼ ibʼane.]

Currently Selected:

1 Timoteeo 6: ixlC

Highlight

Copy

Compare