2 Tesaloniseenses 3
3
Uvaʼs ijaqt Paʼp uvaʼ laʼ inatxh, inqʼa niman tetz Jesuus Tiuxh, tiʼ uvaʼ laʼ paxin viyolbʼal quBʼaal Tiuxh
1Tikʼetz vet tant yol, toq val sete, ex qumol s-niman tetz Jesuus: Natxhvaq Tiuxh s-qiʼ, tul nal kuxh laʼ ipaxin inqʼa bʼaʼnla txhaq yol tiʼ quBʼaal Jesuus. Tul natxhvaq Tiuxh tul laʼ ikʼul jolt inqʼa xaol inqʼa bʼaʼnla txhaq yol tuchʼ bʼaʼnil, eche uvaʼ qat ebʼan tiʼ inimaleʼ, atz qat etoksa iqʼij. 2Atz natxhvaq Tiuxh s-qiʼ, tiʼ uvaʼ laʼ ikol oʼ quBʼaal Tiuxh tiqʼabʼ inqʼa aj tial kʼuul, inqʼa bʼanol tetz yeʼbʼaʼn, inqʼa nik kʼaxbʼisan oʼ. Tan ateleen xaol yeʼx motx iqejeʼt inqʼa bʼaʼnla txhaq yol tiʼ Jesuus. 3Poro kʼuqlebʼalxh kʼuul u quBʼaal Jesuus. Tan toq taqʼ eyakʼil. Atz toq ikol ex vatz u bʼanol tetz yeʼbʼaʼn; aʼe Satanaas. 4Tul nik qukʼuqbʼa qukʼuul tiʼ u quBʼaal Jesuus uvaʼ, aʼ nik ebʼane kam inqʼa qutxhus sete. Tul nik qukʼuqbʼa qukʼuul uvaʼ ant kuxh uvaʼe toq ebʼane. 5Tul quBʼaal Tiuxh laʼ lotxhon ex, tiʼ uvaʼ laʼ motx esaʼ etibʼ sevatzaq, eche uvaʼ nik isaʼt ex u quBʼaal Tiuxh. Tul quBʼaal Tiuxh laʼ lotxhon ex tiʼ epal t-inqʼa itzaʼlal, eche uvaʼ ikotxʼt quBʼaal JesuKriisto ivatz tiʼ ipal t-inqʼa itzaʼlal.
Uvaʼs talt Paʼp uvaʼ aʼxh u aqʼon laʼ bʼanaxi
6Toqetz inbʼekʼ val u yol sete, ex qumol s-niman tetz Jesuus, tiʼ uvaʼ tan, aqʼel vet viqleʼm taʼn u quBʼaal JesuKriisto. Yeʼ laʼ emolo etibʼ tuchʼ inqʼa qumol s-niman tetz Jesuus, inqʼa yeʼ isaʼ aqʼon, atz inqʼa yeʼ nik niman u txhusbʼal uvaʼ qat ekʼul s-qe. 7Tan etootzaqle kam inqʼa ex qukʼutxh ka sevatz, tan oʼxh aqʼonv oʼ uvaʼs atich oʼ sexoʼl. Tul antetzxh uvaʼe laʼ ebʼana. Pet jit qʼeʼyil qat qukʼutxh sexoʼl. 8Tul jit nikich koq kuxh qutxʼaʼon sexeʼ s-oy, uvaʼs nikich etaqʼt qupaan, pet nikich qutxhojeʼ. Tan aʼl mam aqʼon qubʼana. Tan nikich qaqʼonv s-qʼiil s-aqʼbʼal tiʼ ibʼanax yaʼl tiʼ itxhej qusen. Tul yeʼl ilaʼm nikich qubʼaneʼ. Echetz yeʼxhabʼil ex qaqʼ etiqatz, tiʼ uvaʼ, aʼ, ex laʼ aqʼonv ex tiʼ qukʼuulaleʼ. 9Poro bʼane oʼ koq yeʼlich qokebʼal, tiʼ uvaʼ, aʼ, ex laʼich kʼuulan oʼ. Pet aʼ qukʼutxh u aqʼon sevatz. Tan aʼich qusaʼ laʼ ebʼant etetz. 10Tan tuulbʼal uvaʼs atich oʼ sexoʼl, tan ech val u yol qal sete s-eche: —Jaʼl uvaʼ yeʼ laʼ aqʼonvi, tul yeʼ laʼ txʼaʼoni, —yetz xeʼt oʼ sete.
11Poro nik qabʼi uvaʼ at jolol sexoʼl uvaʼ kam kuxh nik motx itxhuli. Tan tira yeʼl invaʼq aqʼon nik motx ibʼaneʼ. Pet aʼ kuxh een taanima tiʼ toksat tibʼ xoʼl iyol jolt xaol tiʼ kam nik ibʼaneʼ. 12Tul tiʼetz uvaʼ aqʼel vet qiqleʼm taʼn u quBʼaal JesuKriisto, tul nik qubʼekʼ kaʼl yol te inqʼa yeʼ isaʼ aqʼon, tiʼ uvaʼ tetxhal laʼ motx aqʼonvi. Tul juntxh aʼ laʼ motx aqʼonv s-junal tiʼ itxhej kam tetz. 13Pet ex, qumol s-niman tetz Jesuus, yeʼl ex laʼ pal ekʼuul tiʼ ibʼanax u bʼaʼnla txumbʼal.
14Jaʼletz invaʼq niman tetz Jesuus yeʼ laʼ niman inqʼa yol uvaʼ nik qutzʼibʼa opoon sexoʼl tu uʼ uvaʼe tiʼ u aqʼon, tul tira laʼ ekʼutxh xoʼl inqʼa qumol s-niman tetz Jesuus jaʼl uvaʼ yeʼ isaʼ aqʼon. Tul yeʼletz ex laʼ emolo etibʼ s-tuchʼ. Echetz laʼ ichʼixve te inqʼa kantxhaq uvaʼ nik ibʼaneʼ. 15Poro jit tira laʼ etxhiʼkʼuula. Pet aʼl laʼ etalt inuqul s-te uvaʼ yeʼbʼaʼn nik ibʼaneʼ, tan antxh emol s-niman tetz Jesuus.
Uvaʼs taqʼt bʼen Paʼp bʼaʼnil ikʼuul inqʼa niman tetz Jesuus, tul yaʼ vet tiʼ itzʼibʼal bʼen viyol
16Pet antxh u quBʼaal Jesuus, u aqʼol tetz bʼaʼnil, laʼ aqʼon vibʼaʼnil tetaanima s-bʼenamen, kʼuxh laʼ pal ex t-jatvatzul kam. Tul aʼ u quBʼaal Tiuxh laʼ atin sekʼatza sekaqaayil.
17 In vete nik tzʼibʼan bʼen inqʼa yol sete tuchʼ inqʼabʼ tiʼ taqʼax bʼen bʼaʼnil ekʼuul. In Paʼp. Tan echxh nik inbʼane tiyaʼebʼal junun inqʼa vuʼ kʼutxhbʼal tetz uvaʼ, in nik tzʼibʼan. Aʼ inqʼa intzʼibʼe uvaʼa.
18 Tul aʼ vibʼaʼnil u quBʼaal JesuKriisto laʼ atin sexoʼl sekaqaayil.
[Tul echxh laʼ ibʼane.]
Currently Selected:
2 Tesaloniseenses 3: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
