1 Timoteeo ALBʼAL INUQUL U YOL TIʼ U Uʼ
ALBʼAL INUQUL U YOL TIʼ U Uʼ
1 TIMOTEEO
Uvaʼs toq qootzaqitaʼ jaʼl tzʼibʼan u uʼ 1 Timoteeo
Aʼetz u uʼe uvaʼ 1 Timoteeo ibʼij, uvaʼ itzʼibʼa Paʼp. Tan antxh u uʼ nik alon uvaʼ Paʼp tzʼibʼan, eche uvaʼ nik tal tu 1 Timoteeo 1.1. Tul aʼ itzʼibʼavat bʼen Paʼp te Timoteeo, val u lotxhol tetz tiʼ ipaxsal inqʼa bʼaʼnla txhaq yol tiʼ Jesuus. Tan eenich Timoteeo bʼan ivatzil Paʼp tu tenam Eefeso xoʼl inqʼa niman tetz Jesuus.
Uvaʼs toq qootzaqitaʼ kam s-tuul tzʼibʼal u uʼ 1 Timoteeo
Aʼetz itzʼibʼal u uʼ 1 Timoteeo tu yaʼbʼ kaʼvaʼl imutxʼ (62), atz maq tuulbʼal u yaʼbʼ kajvaʼl imutxʼ (64) tuulbʼal uvaʼs nikich ipaxsat Paʼp viyolbʼal quBʼaal Tiuxh tuulbʼal Masedoonia.
Uvaʼs toq qootzaqitaʼ kame inqʼa yol nik tal Paʼp tiʼ inqʼa lotxhol tetz
Tuulbʼaletz uvaʼs ipaxsat Paʼp viyolbʼal quBʼaal Tiuxh tuchʼ Vernavee, atz tuchʼ Siilas xoʼl inqʼa xaol, inqʼa jit tij imam Israeel, tul kamal kabʼlaval tenam kʼulun inqʼa bʼaʼnla txhaq yol tiʼ Jesuus. Tul aʼ nikich itzʼibʼavat bʼen Paʼp inqʼa uʼ te inqʼa nikich iqʼon iviʼ xoʼl inqʼa niman tetz Jesuus, aʼetz inqʼa uʼ uvaʼ motx itzʼibʼa bʼen Paʼp te inqʼa niman tetz Jesuus, inqʼa nikich motx ikʼul tibʼ tu mam tenam Rooma, atz te inqʼa nikich motx ikʼul tibʼ tu tenam Koriinto.
Tuulbʼaletz uvaʼs nikich ipaxsat Paʼp inqʼa bʼaʼnla txhaq yol tiʼ Jesuus, tul ichʼexeʼl Paʼp kaʼl inqʼa chelem xaak tiʼ itxhust tibʼ kʼatz Paʼp. Tan aʼich isaʼ Paʼp uvaʼ laʼich motx itxhabʼa tiqʼol iviʼ viyolbʼal quBʼaal Tiuxh. Tul tira tootzaqich inqʼa xaak iyolbʼel u yolbʼal grieego. Tul tootzaqichxh inqʼa tenam, eche inqʼa tuulbʼal Greesia, atz tuulbʼal Aasia. Tul laʼich motx itxhabʼa taqʼax itxumbʼal inqʼa niman tetz Jesuus, atz laʼich motx itxhusa. Tul ant Timoteeo val u chelem xaak, ichʼex Paʼp tiʼ itxhust tibʼ s-kʼatza, atz tiʼ ibʼen s-tiʼ, tiʼ talax viyolbʼal quBʼaal Tiuxh. Tan ech uvaʼe nik tal t-Vibʼanoʼm inqʼa Apoostol 16 1-5. Tul ikʼul vet Timoteeo u tiqleʼm te inqʼa iqʼon iviʼ, atz te Paʼp. Tul oksal vet Timoteeo tiʼ ibʼanax u aqʼon kʼatz Paʼp. Tul antetz Tiito tuchʼ Epaafras tuchʼ Troofimo tuchʼ Eraasto inqʼa chelem vinaq ichʼex Paʼp tiʼ ipaxsal inqʼa bʼaʼnla txhaq yol tiʼ Jesuus, atz tiʼ itxhusux inqʼa niman tetz Jesuus, atz tiʼ tilix inpaqte.
Tuulbʼaletz uvaʼ eenich Paʼp tiʼ tilix jolol inqʼa niman tetz Jesuus tinjolt tenam, tul nikich itxhaq bʼen Paʼp inqʼa lotxhol tetz tiʼ tilix inqʼa niman tetz Jesuus tinjolt tenam. Tul aʼ nikich bʼenk Paʼp tiʼ kam nikich isaʼ inqʼa niman tetz Jesuus t-junun inqʼa tenam. Kʼuxhetz eenich Paʼp t-tzeʼ, tan tira nikich ikʼuqeʼv ikʼuul Paʼp tiʼ inqʼa lotxhol tetz. Eche u uʼ uvaʼ nik qil s-txheel, uvaʼ itzʼibʼa bʼen Paʼp, tan eenich Timoteeo tiʼ tilix inqʼa niman tetz Jesuus tu tenam Eefeso. Echetz s-tiʼile itzʼibʼa bʼen Paʼp inqʼa yol te inqʼa lotxhol tetz tiʼ taqʼt bʼen itxumbʼal tiʼ kam laʼ motx ibʼana. Echetz s-tiʼile ‹carta pastoral,› chich vet eʼl inqʼa tuʼ Paʼp tu kastiiya, tan aʼ inqʼa itzʼibʼa bʼen Paʼp te inqʼa chelem xaak.
Uvaʼs toq qootzaqitaʼ kame u taqʼil vitxhusun Paʼp tuul u tuʼ 1 Timoteeo
Aʼetz taqʼil viyol Paʼp uvaʼ itzʼibʼa te Timoteeo, tiʼ uvaʼ tira laʼ ibʼan inqʼa niman tetz Jesuus yaʼl tiʼ inatxhax Tiuxh.
Atz nikat tal Paʼp, tiʼ uvaʼ kam itxumbʼal inqʼa iqʼon iviʼ uvaʼ laʼ toksa Timoteeo xoʼl inqʼa niman tetz Jesuus.
Tul mamala tel bʼaʼnla txumbʼal tal Paʼp te Timoteeo, tiʼ uvaʼ kam laʼ ibʼan tiʼ tiqʼol iviʼ xoʼl inqʼa niman tetz Jesuus.
Uvaʼs toq qootzaqitaʼ kam ulbʼemal ijatxp ixoʼl inqʼa yol tu uʼ 1 Timoteeo
U uʼ 1 Timoteeo uvaʼ itzʼibʼa ka Paʼp, tan vajqilen nimla txhaq tanul elnaʼq inqʼa yol uvaʼ nik tal s-tuul.
1 Timoteeo 1.1-2
Aʼetz ixeʼtebʼe Paʼp talax tiʼ jaʼl nik tzʼibʼan, tul jaʼl nik kʼulun. Yaʼne nik taqʼ bʼen Paʼp bʼaʼnil ikʼuul Timoteeo.
1. 1 Timoteeo 1.3-20
U bʼaxa nimla tanul yol, tan aʼ tal Paʼp, tiʼ uvaʼ kam laʼ ibʼan Timoteeo tiʼ yeʼ laʼ ikuyt iyujt tibʼ inqʼa bʼaʼnla txhaq yol tuchʼ jolt inqʼa yol uvaʼ nik tal u tuqʼeʼybʼal inqʼa tij imam Israeel. Tul laʼ imaq Timoteeo iyakʼin inqʼa qejoʼm nikich ixeʼtisal itxhusux xoʼl inqʼa niman tetz Jesuus tu tenam Eefeso. Aʼe jolol inqʼa txhusbʼal, inqʼa aʼ kuxh yajo ibʼ nik ibʼan inqʼa xaol s-tiʼ. Niketz tal Paʼp inqʼa yol inqʼaa, tan palnaʼq vet Paʼp s-tuul, tul antxh quBʼaal Jesuus alon te Paʼp uvaʼ jit inuqul inqʼa yol inqʼae.
Niketz tal Paʼp te Timoteeo uvaʼ aʼxh laʼ itxhus Timoteeo vinuqul inqʼa bʼaʼnla txhaq yol tiʼ Jesuus. Tan aʼ Jesuuse u chitol tetz inqʼa xaol t-inqʼa kʼaxkʼo tiʼ inqʼa ipaʼv, atz u aqʼol tetz qʼij saq uvaʼ yeʼl iyaʼebʼal imotxebʼal. Tul aʼetzxh uvaʼe laʼ itxakbʼa tibʼ Timoteeo tiʼ talaxeʼ.
2. 1 Timoteeo 2.1-15
Vikaʼv nimla tanul yol, tan aʼ tal Paʼp, tiʼ uvaʼ aʼxh laʼ itxhus Timoteeo te inqʼa niman tetz Jesuus uvaʼ jikxh laʼ motx ibʼen tiʼ inatxhax Tiuxh. Pet jit kam kuxh sebʼt ibʼant joloq niman tetz Jesuus, tul natxhkʼuula Tiuxh sebʼte. Tul aʼxh laʼ itxhus Timoteeo paqte uvaʼ yeʼxhkam invaʼq kantxhaq atoʼk taanima inqʼa xaol, inqʼa laʼ natxhon Tiuxh.
3. 1 Timoteeo 3.1-16
Vitoxv nimla tanul yol, tan aʼ tal Paʼp, tiʼ uvaʼ kam inqʼa bʼaʼnla txumbʼal laʼ ilix tiʼ vaʼl uvaʼ laʼ toksa Timoteeo s-iqʼon iviʼ. Aʼe inqʼaa: Taʼn kuxh vaʼl ixoq tixqel. Tul itzʼamalxh ibʼen tiʼ tatineʼ. Atz bʼaxal titzʼabʼal s-vatz. Atz nik itxʼol imaqt tibʼ tiʼ kam inqʼa kantxhaqla txumbʼal. Tul nik taqʼ ivatbʼal xaol. Tul nik itxʼol itxhusux viyolbʼal quBʼaal Tiuxh. Atz jit kuxh chianaʼq tukʼal taʼl qʼuʼich uuva s-te. Tul jit kuxh txhokol txhʼaʼo. Atz jit kuxh een taanima tiʼ txʼako puaq. Pet ayaʼlxh bʼaʼn s-te. Tul aʼ kuxh tetz oksa bʼaʼnil xoʼl imol. Atz jit tira kuxh laʼ itxey tibʼ taanima tuchʼ puaq. Tul nik itxhabʼa tiqʼol iviʼ t-totzotz. Tul nik itxhabʼa toksal inqʼa initxaʼa t-bʼey. Tul nik iqeex taʼn inqʼa kʼaol imeʼal.
Eche u yol u ‹oviispo› tuchʼ u yol ‹ansiaano,› tan aʼe inqʼa iqʼon iviʼ nik qal t-quyolbʼal.
Nikat tal Paʼp, tiʼ uvaʼ kam inqʼa bʼaʼnla txumbʼal laʼ ilix tiʼ vaʼl uvaʼ laʼ toksa Timoteeo s-kʼuulanal. Aʼe inqʼa ‹diácono› tu kastiiya. Tul ayaʼl laʼ ilix s-tiʼ, eche uvaʼ qat tal Paʼp s-bʼaxa. Tul laʼ ibʼan Timoteeo yaʼl tiʼ itxʼolt isutxhqʼ tiʼ tiqʼol iviʼ xoʼl inqʼa niman tetz Jesuus. Tan mam yol talax inqʼa bʼaʼnla txhaq yol, uvaʼ nik jetxhon ok inqʼa niman tetz Jesuus kʼatz quBʼaal Tiuxh, inqʼa yol, inqʼa qat aqʼaxiy vet qootzaqi tiʼ quBʼaal Jesuus.
Nikat tal Paʼp, tiʼ uvaʼ laʼ imaq Timoteeo itxhusux inqʼa kam kuxh txhusbʼalil uvaʼ yeʼ nik ikʼul tibʼ tuchʼ inqʼa bʼaʼnla txhaq yol, eche inqʼa qejoʼm tiʼ inqʼa etxhbʼubʼal uvaʼ qeel kuxh tzaan taʼn inqʼa tij imam Israeel.
4. 1 Timoteeo 4.1-16
Vikajv nimla tanul yol, tan aʼ tal Paʼp, tiʼ uvaʼ jatvatzul kuxh bʼaʼnla txumbʼal, atz ootzaqibʼal laʼ ibʼan Timoteeo vatz inqʼa niman tetz Jesuus, atz kamtel kuxh bʼaʼnla txumbʼal laʼ tal s-xoʼl. Echetz tal Paʼp te Timoteeo s-eche, —Ant axh laʼ axee eebʼ tiʼ yeʼ abʼant u paʼv. Tul aʼxh noq atxhus inqʼa bʼaʼnla txhaq yol. Tul yeʼ laʼ atanbʼa inimaleʼ. Oqetz aʼxh laʼ abʼan inqʼa nik val see, tul axhetze nik akol eebʼ vatz inqʼa paʼv. Tul antetz vet inqʼa nik abʼin inqʼa yol laʼ ikol tibʼ vatz inqʼa paʼv, —xeʼt Paʼp te Timoteeo.
Tul tal Paʼp paqte te Timoteeo uvaʼ yeʼ laʼ ikuy Timoteeo iyolox inqʼa txhulim yol tetz inqʼa kʼuy mam uvaʼ nik tal inqʼa qʼesla txhaq xaol. Tul nik tal Paʼp te Timoteeo uvaʼ aʼl laʼ ijetxhtoʼk tibʼ kʼatz quBʼaal Tiuxh, kʼuxh laʼ pal Timoteeo titzaʼlal s-tiʼ. Tul echat kuxh uvaʼe laʼ itxhus Timoteeo te inqʼa niman tetz Jesuus uvaʼ laʼ motx ijetxhoʼk tibʼ kʼatz quBʼaal Tiuxh. Tul nikat tal Paʼp te Timoteeo uvaʼ aʼxh laʼ tiqʼovat Timoteeo bʼey tiʼ ibʼanax u bʼaʼn vatz inqʼa niman tetz Jesuus tuchʼ iyoloneʼ, atz tuchʼ itxumbʼal. Tul aʼxh laʼ tiqʼovat bʼey, tiʼ uvaʼ at taanima tiʼ inqʼa niman tetz Jesuus. Tul nik tal Paʼp te Timoteeo paqte uvaʼ aʼxh laʼ ikʼutxh uvaʼ atxh itial tiʼ tiqʼol viyolbʼal quBʼaal Tiuxh. Tul aʼ laʼ ikʼutxh uvaʼ kʼuqlel ikʼuul tiʼ quBʼaal Jesuus. Tul aʼ laʼ ikʼutxh uvaʼ atxh vet tel vatz quBʼaal Tiuxh kʼuxh chelem xaak kuxhtuʼ.
Tul ech tal Paʼp paqte te Timoteeo s-eche: —Aʼxh noq asikʼle viyolbʼal quBʼaal Tiuxh xoʼl inqʼa niman tetz Jesuus. Tul aʼxh noq abʼan yaʼl s-te vinimaleʼ. Atz laʼxh abʼan yaʼl tiʼ vitxhusuxeʼ, —xeʼt Paʼp.
Tul talat Paʼp te Timoteeo uvaʼ yeʼl paqul laʼ itanbʼa Timoteeo ibʼanbʼel inqʼa txumbʼal uvaʼ aqʼel s-te taʼn viTiuxhil Tiuxh uvaʼs taqʼt jaʼ inqʼa iqʼon iviʼ iqʼabʼ tiviʼ Timoteeo, atz tiʼ itxhaqax bʼen tiʼ ibʼanax u taqʼon quBʼaal Jesuus.
5. 1 Timoteeo 5.1—6.2
Vitoʼv nimla tanul yol, tan aʼ tal Paʼp tiʼ uvaʼ jabʼiste txakay ixoq s-te laʼ lotxhox taʼn inqʼa niman tetz Jesuus, atz jabʼiste txakay ixoq s-te yeʼl tokebʼal tiʼ ikʼulux u lotxhbʼal.
6. 1 Timoteeo 6.3-19
Vivaqaq nimla tanul yol, tan aʼ tal Paʼp, tiʼ uvaʼ nik tulsa Paʼp s-kʼuul Timoteeo uvaʼ yeʼ laʼ el ka tiʼ inimal vinuqul inqʼa bʼaʼnla txhaq yol. Tul yeʼ laʼ ikuy tok inqʼa yaabʼla txhusbʼal xoʼl inqʼa niman tetz Jesuus uvaʼ laʼ kuxh motx taqʼ bʼen tibʼ s-nim tiʼ tatxhval puaq. Tan at xaol aʼ kuxh een taanima tiʼ ibʼen s-txʼiol iqʼij. Xaʼtetze kam kuxh kantxhaq nik ibʼan vet tiʼ ileqt u txʼijbʼal qʼij. Echetz nik ikuʼ vete t-paʼv. Atz kamaq kuxh vet laʼ motx tatxhva uvaʼ jit ikʼulel. Atz kamaq kuxh vet yeʼbʼaʼnil laʼ motx tatxhva uvaʼ laʼ yansan. Tan junt kuxh vet laʼ taqʼ bʼen tibʼ s-kantxhaq, atz s-tzʼeqxinaʼq vatz quBʼaal Tiuxh. Tan u atxhaʼv tiʼ puaq, tan kam kuxh vet paʼv nik ex bʼanaxoq taʼn. Tan u tatxhval u puaq, aʼe vixeʼal inqʼa paʼv. Tan ech ibʼane kaʼl inqʼa xaol, inqʼa aʼ kuxh u puaq nikich motx tatxhva, tul motx el vet ka tiʼ iqeex Jesuus. Aʼetz inqʼa xaole uvaʼ mam kuxh vet kʼaxkʼo ex taqʼ s-te. Echetz talt Paʼpe te Timoteeo uvaʼ jankʼalxh inqʼa niman tetz Jesuus aʼ laʼ ibʼan inqʼa bʼaʼnla bʼanoʼm. Tul aʼ vet u bʼaʼnla bʼanoʼm txʼijbʼal iqʼij laʼ ibʼana. Tul nal kuxh laʼ taqʼ kam invaʼq lotxhbʼal uvaʼ laʼ saʼoni. Oqetz ech laʼ ibʼane, tul txʼijbʼal iqʼijetz vete nik imol kʼatz quBʼaal Tiuxh uvaʼ laʼ bʼen til s-jatu, eche uvaʼ nik tal tu Luk 16.9-13. Tul aʼetz vet u qʼij isaqe toq itxʼakeʼ uvaʼ yeʼl iyaʼebʼal imotxebʼal.
1 Timoteeo 6.20-21
Tiyaʼtebʼaletz vet iyolon Paʼp, tul nik tel itiila bʼekʼu ka Paʼp kaʼt inqʼa bʼekʼbʼal te Timoteeo uvaʼ aʼxh laʼ inima inqʼa bʼaʼnla txhaq yol, tul yeʼ laʼ el ka s-tiʼ. Tul nik tal bʼen bʼaʼnla yol s-tiʼ.
Currently Selected:
1 Timoteeo ALBʼAL INUQUL U YOL TIʼ U Uʼ: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.