2 Tesaloniseenses 2
2
Uvaʼs itxhusun Paʼp tiʼ u vinaq, u palsan yol tiʼ inqʼa ibʼekʼoʼm quBʼaal Tiuxh
1Toqetz val kaʼt u yol sete, ex qumol s-niman tetz Jesuus, tiʼ uvaʼ kam laʼ utxhi uvaʼs laʼ topoon vet u tulebʼal quBʼaal JesuKriisto inpaqte, atz, tiʼ uvaʼ laʼ bʼen qukʼult vet qibʼ s-tuchʼ. Niketz qujaq bʼaʼnil sete, 2tiʼ uvaʼ yeʼ laʼ sotz ekʼuul tiʼ inqʼa nimamal vet etaʼn tiʼ u tulebʼal quBʼaal JesuKriisto. Tul yeʼ laʼ xoʼv ex te vaʼq txhulim yol uvaʼ laʼ etabʼi. Atz yeʼ laʼ eqeja, oq laʼ etabʼi talaxeʼ uvaʼ: —Qat vabʼilaʼ, qat tal quBʼaal Tiuxh s-ve uvaʼ uy vet viqʼiil u tul quBʼaal Tiuxh, —chaq eʼl ex. Kʼuxh jaʼl laʼ alon sete uvaʼ: —Iyol quBʼaal Tiuxhe, —chaq sete. Atz kʼuxh: —Paʼpe qat alon, —chaq eʼl ex. Atz kʼuxh: —Tuul val u tuʼ Paʼpe qat qilvat, —chaq eʼl ex. Poro ex yeʼ laʼ qeon.
3Echetz yeʼ laʼ ekuyt eteesale t-bʼey kʼuxh kam kuxh txumbʼalil laʼ txhokox setiʼ.
Tan jit nal koq kuxh saʼ tul u qʼij uvaʼe. Pet bʼaxa laʼ opoon val u qʼij uvaʼ mamala xaol laʼ el ka tiʼ inimal u quBʼaal Tiuxh. Tan laʼ txhej val u vinaq, val u palsan yol tiʼ inqʼa ibʼekʼoʼm quBʼaal Tiuxh, val u vinaq uvaʼ toq sotzoq. 4Tan yeʼ laʼ isaʼ u vinaq uvaʼe, jankʼal inqʼa kam uvaʼ nik talax s-Tiuxh. Pet junt laʼ toksa iqʼij. Tul laʼ taqʼ bʼen tibʼ s-nim viʼ jankʼal inqʼa nik talax s-Tiuxh. Atz laʼ taqʼ bʼen tibʼ s-nim viʼ jankʼal inqʼa kam nik inatxhkʼuulaleʼ. Tul aʼ vet u vinaq laʼ toksa tibʼ tu tostiuxh, tal uvaʼ nik natxhkʼuulalik quBʼaal Tiuxh. Tul laʼ tal tibʼ s-Tiuxh.#Danieel 11.36; Tio 24.15
5Ulsavaq tza sekʼuul tiʼ inqʼa kam inqʼae. Tan nikich val yol sete tiʼ inqʼa kam inqʼae uvaʼs atich in sexoʼl. 6Tul etootzaql vet s-txheel jaʼl nik maqon u vinaq uvaʼe. Tan ile maqele, pet laʼ nal tal quBʼaal Tiuxh jatu laʼ ikʼutxh tibʼ u vinaq uvaʼe. 7Tan at vet vaʼl yaabʼla txumbʼal vatz txʼavaʼ s-txheel. Tul nik ipalsa inqʼa xaol viyol quBʼaal Tiuxh, inqʼa bʼekʼel ka taʼn. Tul aʼ vet viyakʼil u yaabʼla txumbʼal nik ikʼutxh tibʼ xoʼl inqʼa xaol. Kʼuxh xeʼtiy vet bʼanaxoq u yaabʼla txumbʼal txheel vatz txʼavaʼ, pet at vaʼl u xaol nik maqon u yaabʼla txumbʼal. Ant kuxh sebʼt tiʼ imaqax u yaabʼla txumbʼal, yaʼnetze laʼ eesal u maqonal. 8Yaʼne laʼ txhej vet u vinaq uvaʼ palsan yol tiʼ inqʼa bʼekʼbʼal. Tul laʼ eesal vet tu tiqleʼm tuchʼ kuxh viyolon u quBʼaal Jesuus. Tul laʼ sotzsal u vinaq uvaʼe, tuchʼ kuxh vilitzʼkabʼin u tulebʼal quBʼaal Jesuus.
9Laʼetz ikʼutxh vet tibʼ u vinaq uvaʼe, u palsan yol tiʼ inqʼa bʼekʼbʼal, tul laʼetz atin vet Satanaas s-kʼatza laʼ ibʼana. Laʼ ikʼul u vinaq nimla tiqleʼm taʼn Satanaas tiʼ ikʼutxht etxhlal, atz uvaʼ mam yol tilixeʼ. Pet jankʼal inqʼa laʼ ikʼutxh vatz inqʼa xaol, tul jit tiqleʼm quBʼaal Tiuxh laʼ ibʼanbʼe s-tiʼ. 10Tul mamalaat yaabʼla txhaq txumbʼal laʼ ibʼan u vinaq vatz inqʼa xaol tiʼ teesal t-bʼey, inqʼa xaol, inqʼa aʼ kʼaqel vet u tzʼeqxichil vatz quBʼaal Tiuxh taʼn. Tul laʼ tzʼeqx inqʼa xaol vatz quBʼaal Tiuxh, tan tiʼ uvaʼ yeʼ motx isaʼ inimal vinuqul. Echetz yeʼ motx ichitp vete. 11Tul tiʼetz vet uvaʼ yeʼ laʼ qeex quBʼaal Jesuus taʼn inqʼa xaol, tul antetzxh vet quBʼaal Tiuxh laʼ kuyun isotzsal ikʼuul. Atz aʼ laʼ iqej vet u tzʼeqol tzij. 12Echetz jankʼalxh inqʼa yeʼ laʼ qeon inqʼa bʼaʼnla txhaq yol tiʼ Jesuus uvaʼ, aʼe, vinuqul, tul aʼetz inqʼae laʼ taqʼ vet jaʼp quBʼaal Tiuxh inqʼa yol s-tiibʼa tiʼ ibʼen tu kʼaxkʼo. Tan aʼ inqʼae, ayaʼl ikʼuul motx ibʼan inqʼa yeʼbʼaʼn.
Uvaʼs talt Paʼp tiʼ jatvaʼl inqʼa chʼexel vet taʼn quBʼaal Tiuxh, tul aʼ inqʼae, laʼ ikol tibʼ tiʼ yeʼ ibʼen tu kʼaxkʼo tiʼ inqʼa ipaʼv
13Poro ikʼulelxhtuʼ uvaʼ bʼenamen laʼ qaqʼt taʼntiuxh te quBʼaal Tiuxh setiʼ, ex qumol s-niman tetz Jesuus, ex inqʼa atxh taanima quBʼaal Jesuus setiʼ. Tan chʼexelxh vet el ex taʼn quBʼaal Tiuxh uvaʼs yeʼxnaqich u xeʼal qʼij saq, tiʼ ekolt etibʼ vatz inqʼa kʼaxkʼo tiʼ inqʼa paʼv. Tul ibʼaʼniletz vet taqʼonv viTiuxhil Tiuxh, tul ijetxhoʼk ex kʼatz quBʼaal Tiuxh, atz tiʼ eqejt vet vinuqul. 14Tan aʼetz qat isaʼvat tzaan ex quBʼaal Tiuxh, tiʼ uvaʼ ant ex laʼ atin ex tu nimla atinchil kʼatz quBʼaal JesuKriisto. Aʼetz vibʼaʼnil inqʼa bʼaʼnla txhaq yole uvaʼ qal sete.
15Echetze, qumol s-niman tetz Jesuus, txhabʼamoq etatin tiʼ inimal kam uvaʼ qal sete. Tul yeʼ laʼ etanbʼa inimal inqʼa txhusbʼal uvaʼ qal bʼen sete, kʼuxh aʼl ex qal sete, atz kʼuxh aʼl qutzʼibʼa opoon sete.
16Tul quBʼaal JesuKriisto tuchʼ quBʼaal Tiuxh laʼ aqʼon etial, u quBʼaal Tiuxh uvaʼ at taanima s-qiʼ, atz u quBʼaal Tiuxh uvaʼ nik aqʼon vibʼaʼnil s-qe. Tul tiʼetz vibʼaʼnil, tul qat taqʼvat qutial, atz qat taqʼ vaʼl qutxʼaqaʼm uvaʼ nik qutxʼebʼeʼ uvaʼ yeʼl iyaʼebʼal imotxebʼal. 17Tul u quBʼaal JesuKriisto tuchʼ u quBʼaal Tiuxh laʼ aqʼon etial tiʼ ibʼanax jankʼal inqʼa bʼaʼnla txhaq bʼanoʼm nik ebʼaneʼ, atz tiʼ inqʼa yol nik etaleʼ.
Currently Selected:
2 Tesaloniseenses 2: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
