2 Koriintios 3

Uvaʼs talt Paʼp yol tiʼ vijeqbʼat quBʼaal Tiuxh vaʼt u akʼla yol tiʼ u quBʼaal Jesuus

1Kʼuxh nik qutzʼibʼa bʼen sete kam inqʼa nik qubʼan tiʼ ipaxsal inqʼa bʼaʼnla txhaq yol, pet aloq jit quqʼije nik qoksa s-tuchʼ tiʼ qalt bʼen sete. Tan at jolol sexoʼl uvaʼ nik ijaq vaʼl uʼ s-qe tiʼ u qiqleʼm. Pet s-quvatz, tan yeʼxhkam nik qitzʼa, tiʼ uvaʼ tetxhalen koq laʼ aqʼax bʼen vaʼq quʼ tiʼ talax inuqul u qiqleʼm sete tiʼ kam inqʼa nik qubʼaneʼ. Atz yeʼxhkamat nik qitzʼa, tiʼ uvaʼ tetxhalen koq laʼ etzʼibʼa invaʼq quʼ tiʼ etaqʼt ootzaqiloq u qiqleʼm, atz kam uvaʼ nik qubʼan sexoʼl, eche nik ibʼan jolt inqʼa iqʼon iviʼ. Yeʼletza. 2Tan aʼ, ex ivatzil invaʼq quʼ. Tan aʼ vetatin vatz quBʼaal Tiuxh nik kʼutxhun te inqʼa xaol uvaʼ bʼaʼn u aqʼon ex qubʼan sexoʼl tiʼ ipaxsal inqʼa bʼaʼnla txhaq yol. Tan talaq kuxh nik abʼilika uvaʼ oknaʼq vet ex s-niman tetz Jesuus, eche vaʼq uʼ uvaʼ nik alon kam bʼanel taʼn invaʼq u xaol. 3Tul veqlelxhtuʼ uvaʼ, ex vaʼl uʼ uvaʼ antxh quBʼaal JesuKriisto tzʼibʼan. Tan nik ekʼutxh tuchʼ venimat viyolbʼal quBʼaal JesuKriisto uvaʼ qal sete uvaʼ bʼaʼn u aqʼon nik qubʼan vatz quBʼaal Tiuxh. Poro yeʼxhkam nik tabʼi inqʼa xaol kam nik ibʼan quBʼaal Tiuxh tetaanima tiʼ invaʼq quʼ tuchʼ tzʼibʼabʼal. Pet aʼ nik til inqʼa xaol kam nik taqʼonv quBʼaal Tiuxh tetaanima tuchʼ viTiuxhil, u quBʼaal Tiuxh uvaʼ yeʼxhkam invaʼq kam tzaʼl s-vatz. Tan yeʼxhkam nik tabʼi inqʼa xaol kam nik ibʼan quBʼaal Tiuxh tetaanima tiʼ isikʼlel invaʼq yol, eche tok invaʼq yol vatz sivan, eche uvaʼs taqʼt quBʼaal Tiuxh inqʼa bʼekʼbʼal te Moisees. Pet aʼ nik til inqʼa xaol kam qat ibʼan quBʼaal Tiuxh tiʼ ijalp vetaanima.#Eeksodo 24.12

4Tul tira kʼuqlebʼal kʼuul qutzʼibʼat bʼen u qaqʼon uvaʼ nik qubʼaneʼ. Tan tootzaql quBʼaal Tiuxh kame uvaʼ nik qubʼaneʼ. Tul tiʼ u quBʼaal JesuKriisto nik qubʼanvat. 5Poro jit aʼ nik qal uvaʼ laʼ oleʼv oʼ s-qujunal tiʼ ijalp inqʼa etxumbʼal. Pet aʼ quBʼaal Tiuxh nik aqʼon qutxumbʼal tiʼ ibʼanax kam uvaʼ nik qubʼan sexoʼl. 6Antetzxh quBʼaal Tiuxh qat aqʼon qutxumbʼal tiʼ qoleʼv tiʼ talax el inuqul u akʼla yol uvaʼ ijeqbʼa xoʼl inqʼa xaol. Poro jit eela tuchʼ u oʼtla yol uvaʼ itzʼibʼa ka Moisees. Pet u akʼla yol, tan aʼ nik tal u tok viTiuxhil Tiuxh tu qaanima. Tan aʼ nik tal u oʼtla yol uvaʼ jabʼil yeʼ laʼ niman inqʼa bʼekʼbʼal, tul laʼ kameʼl. Pet u akʼla yol tetz viTiuxhil Tiuxh, tan aʼ uvaʼe, nik aqʼon vet qʼij qusaq uvaʼ yeʼl iyaʼebʼal imotxebʼal.#Jeremiias 31.31-34; Tio 26.28

Uvaʼs talt Paʼp uvaʼ sibʼ vet palnaʼq ibʼaʼnil u kaʼv iyol quBʼaal Tiuxh uvaʼ ijeqbʼa tiʼ u quBʼaal Jesuus viʼ u bʼaxa iyol quBʼaal Tiuxh

7Tan inqʼa bʼekʼbʼal inqʼa itxhus Moisees xoʼl inqʼa xaol uvaʼ itzʼibʼa quBʼaal Tiuxh vatz sivan, tan aʼ uvaʼe, tal quBʼaal Tiuxh uvaʼ, tetxhal laʼich nimali. Pet oqetz yeʼ laʼich motx inima, tul yeʼl iyaʼebʼal imotxebʼal laʼich ikam inqʼa xaol taʼn inqʼa paʼv. Kʼuxhetz nik tal inqʼa bʼekʼbʼal vikam inqʼa xaol, tiʼ uvaʼ oq yeʼ laʼich inima, poro mam yol ibʼan vatz quBʼaal Tiuxh. Tan tira litzʼkabʼinyichxh vet ivatz Moisees uvaʼs ikʼult Moisees inqʼa bʼekʼbʼal viʼ u vitz Sinaii. Aʼichetz vilitzʼkabʼin ikaʼy Moisees nikich kʼutxhun uvaʼ tetz quBʼaal Tiuxh inqʼa bʼekʼbʼal uvaʼ taqʼ s-te. Tul oqxhich vet ilitzʼkabʼin ikaʼy Moisees. Echetz yeʼxhabʼil vet invaʼq inqʼa tij imam Israeel nikich txʼolon isaqil ivatz Moisees s-bʼaʼn. Kʼuxhetz oqxhich vet ilitzʼkabʼin ikaʼy Moisees, poro qʼoon kuʼ vet ul iyakʼil vilitzʼkabʼineʼ. 8Tiʼetz uvaʼ mam yol taqʼax inqʼa bʼekʼbʼal vatz quBʼaal Tiuxh, aʼetz kol jit mam yol laʼ ikʼutxht quBʼaal Tiuxh tiqleʼm u akʼ yol tetz viTiuxhil uvaʼ nik jalpun vitxumbʼal inqʼa xaol. Tan aʼetz uvaʼe, nik qutxhuse. 9Tan mam yolich u bʼekʼbʼal uvaʼ itxhus Moisees xoʼl inqʼa xaol, kʼuxh nikich ibʼen te inqʼa xaol uvaʼ, aʼ vet u kamchil kʼaqelaqich taʼn oq uvaʼ yeʼich laʼ motx inima; aʼetz kol vet jit mam yol inqʼa bʼaʼnla txhaq yol uvaʼ nik qutxhus sexoʼl, tan aʼ uvaʼe, nik aqʼon bʼen inqʼa xaol s-jit vet aj paʼvom vatz quBʼaal Tiuxh. 10Kʼuxhetz mam yolich itxhusux inqʼa bʼekʼbʼal s-naʼya, poro jit mam yol tel koq s-txheel. Tan yeʼ nik ibʼan vet eela tuchʼ u mam bʼaʼnil uvaʼ qat taqʼ quBʼaal Tiuxh s-qe. Tiʼ uvaʼ jit vet aj paʼvom inqʼa xaol laʼ ibʼan vatz quBʼaal Tiuxh. Tan tira sibʼ vet tiqleʼm viʼ u bʼaxa bʼekʼbʼal uvaʼ taqʼ quBʼaal Tiuxh. 11Tan mam yolich inqʼa bʼekʼbʼal inqʼae, kʼuxh nikich ikuʼl vet viyakʼil, eche uvaʼ ikuʼl viyakʼil vilitzʼkabʼin ikaʼy Moisees. Aʼetz kol vet jit mam yol u kaʼv iyol quBʼaal Tiuxh uvaʼ ijeqbʼa, uvaʼ yeʼl iyaʼebʼal imotxebʼal laʼ tatineʼ.

12Tiʼetz uvaʼ kʼuqlel qukʼuul, tiʼ uvaʼ sibʼ palnaʼq tiqleʼm inqʼa bʼaʼnla txhaq yol, tul tira at qutial tiʼ ipaxsal el. 13Tul jit ech nik qubʼan, eche uvaʼ ibʼan Moisees. Tan toksa Moisees val u bʼuʼq tivatz, tiʼ uvaʼ yeʼ laʼich til inqʼa tij imam Israeel isotz vilitzʼkabʼin ikaʼy Moisees. Tan atich ipalebʼal vilitzʼkabʼin vikaʼy Moisees.

14Tul echatetz kuxh bʼanel taʼne u titzʼabʼal inqʼa tij imam Israeel s-txheel. Tan ant kuxh yeʼaq nik motx ibʼen s-te. Kʼuxh nik motx isikʼle inqʼa naʼyla yol uvaʼ jeqbʼamal ka, poro yeʼaq nik motx ibʼen s-te uvaʼ pay vet ka. Tan ech nik ibʼan inqʼa xaol, eche uvaʼ ibʼan Moisees uvaʼs toksat u bʼuʼq tivatz. Tan nik motx imaq tibʼ tiʼ tootzaqil inuqul viyolbʼal quBʼaal Tiuxh. Tul ech vete toksat invaʼq xaol bʼuʼq tivatz tiʼ yeʼ tiloneʼ nik motx ibʼaneʼ. Pet aʼetz vet uvaʼs laʼ motx tok s-niman tetz Jesuus, tul tzitzi laʼ motx bʼenk vet vinuqul s-te, eche laʼ ibʼan vet invaʼq xaol uvaʼ laʼ teesa vet u bʼuʼq tivatz, tul laʼ ilon veteʼ. 15Atz echat kuxhte s-txheel kam uvaʼ s-naʼya. Tan tuulbʼal uvaʼs nik motx isikʼlet inqʼa yol uvaʼ itzʼibʼa ka Moisees, tul tira yeʼ nik motx ibʼen vinuqul s-te. Tul ech vete toksat invaʼq xaol bʼuʼq tivatz tiʼ yeʼ tiloneʼ nikich motx ibʼaneʼ. Tan tira yeʼ nik motx taqʼ koʼp viyolbʼal quBʼaal Tiuxh tu taanima.

16Pet jaʼletz uvaʼ nik tok vet s-niman tetz Jesuus, tul nik ijalpu vet vitxumbʼal. Tul aʼetz vet quBʼaal Tiuxh nik aqʼon tootzaqi viyolbʼal, ech nik ibʼan vet, eche teleʼl invaʼq bʼuʼq tivatz invaʼq xaol. 17Tan aʼ u tiqleʼm viTiuxhil Tiuxh nik jalpun vitxumbʼal inqʼa xaol. Tiʼetz uvaʼ jalpinaʼq vet vitxumbʼal inqʼa xaol taʼn viTiuxhil Tiuxh, tul chiteletz veteʼ. 18Yeʼl vet u bʼuʼq atoʼk t-quvatz. Tiʼetz uvaʼ yeʼl vet u bʼuʼq atoʼk t-quvatz, tul jikxh nik qukʼutxht vitxiqun u nimla tatin u quBʼaal Tiuxh s-qukʼatza, eche vaʼq espeejo uvaʼ nik itxiqun bʼen u qʼij s-vatz tiʼ itxiqul vaʼq kam. Tul aalemal telxh nik ijalput viTiuxhil Tiuxh u qutxumbʼal tiʼ qubʼen s-eche u quBʼaal JesuKriisto. Tan aʼ u quBʼaal Tiuxh nik bʼanon tuchʼ u taqʼonv viTiuxhil s-qukʼatza.

Currently Selected:

2 Koriintios 3: ixlC

Highlight

Copy

Compare