2 Koriintios 4

Uvaʼs talt Paʼp uvaʼ ayaʼlxh ikʼuul nikich ipaxsa viyolbʼal quBʼaal Tiuxh

1Tan tiʼ vitxumt quBʼaal Tiuxh quvatz, tul qat qukʼul u aqʼon tiʼ ipaxsal inqʼa bʼaʼnla txhaq yol tiʼ Jesuus. Tul yeʼl oʼ nik ipal qukʼuul s-te. 2Pet tira kʼaqel qaʼn uvaʼ, oʼ yeʼ laʼ bʼanon invaʼq kam uvaʼ kantxhaq kuxhtuʼ, kʼuxh yeʼxhabʼil laʼ ilon oʼ. Tan yeʼl invaʼq kantxhaq nik qubʼaneʼ uvaʼ chʼixvebʼal kuxhtuʼ. Atz jit qelabʼal koq kuxh isotzsal ekʼul. Atz jit nik koq kuxh qujalpu talax viyolbʼal quBʼaal Tiuxh sete. Pet jikxh nik qalt inuqul inqʼa bʼaʼnla txhaq yol tiʼ Jesuus sexoʼl. Tul bʼaʼnla txumbʼal uvaʼ nik qukʼutxh sevatz. Echetz jankʼal xaol nik ibʼen s-te uvaʼ jit bʼan vatz koq kuxh nik qubʼan sexoʼl. Tul tootzaql quBʼaal Tiuxh kam inqʼa jikla txumbʼal nik qubʼaneʼ. 3Tan tira nik qutzanbʼa talax inqʼa bʼaʼnla txhaq yol sexoʼl. Echetz oq at joloq xaol sexoʼl uvaʼ ant kuxh yeʼ nik ibʼen s-te, tul aʼetz inqʼae, yeʼ nik saʼon tabʼil inqʼa bʼaʼnla txhaq yol. Pet jit oʼe yeʼ nik alon inuqul sexoʼl. Tul aʼ vet inqʼae, uvaʼ, aʼ vet u tzʼeqxichil kʼaqel taʼn uvaʼ yeʼl iyaʼebʼal imotxebʼal. 4Tan junal yeʼ nik motx ibʼen s-te, tan aʼ Satanaas nik ibʼekʼon tu titzʼabʼal, Satanaas uvaʼ nik bʼanon iqʼesalil tiibʼa inqʼa xaol, inqʼa jit niman tetz Jesuus, inqʼa itzʼlel vatz txʼavaʼ tintanul inqʼa yaʼbʼ s-txheel. Tan aʼ Satanaas nik maqon tootzaqit inqʼa xaol inqʼa bʼaʼnla txhaq yol tiʼ u nimla tatin u quBʼaal JesuKriisto. Tan aʼ u nimla tatin u quBʼaal JesuKriisto nik kʼutxhun jankʼal tatin u quBʼaal Tiuxh, eche invaʼq u txiqubʼal uvaʼ nik txiqun ibʼey xaol s-aqʼbʼal.{*}#4.4 Aʼ nik tal tu yolbʼal grieego uvaʼ, aʼ Satanaas nik ibʼekʼon ‹tintanul inqʼa yaʼbʼ s-txheel.› Aʼe u yol ‹este siglo,› chich tu kastiiya. Aʼ nik elkaʼpun uvaʼ, aʼ Satanaas laʼ bʼekʼoni, tetxhal topoon u qʼij uvaʼs laʼ teesal iqʼij taʼn quBʼaal Tiuxh, eche uvaʼ nik tal t-Apokaliipsis 20.2. Pet aʼ inqʼa jit niman tetz Jesuus laʼ ibʼekʼ Satanaas. 5Aʼetz uvaʼe, nik qupaxsa sexoʼl. Pet jit junt koq kuxh nik qutxhok tok quqʼij, eche uvaʼ nik tal jolol inqʼa xaol s-qiʼ. Pet aʼ nik qutxhus sete uvaʼ, aʼ JesuKriistoe, u quBʼaal. Pet oʼ, tan oʼ kuxh lotxhol etetz tiʼ etoksat iqʼij, atz tiʼ enimat u quBʼaal JesuKriisto. 6Tan aʼ u quBʼaal Tiuxh qat aqʼon ootzaqiloq u nimla tatin te jankʼal inqʼa xaol, tiʼ uvaʼ qat iviinqixsa u qʼij saq tiʼ itxiqun tu tokto. Tul echat kuxh qat taqʼt ootzaqiloqe u nimla tatin t-qaanima, oʼ inqʼa niman tetz, tiʼ qootzaqit inqʼa bʼaʼnla txhaq yol tiʼ Jesuus. Echetz vet nik qunatxht u nimla tatine s-qukʼatza, eche itxiqun invaʼq mam txiqubʼal t-tokto.

Uvaʼs talt Paʼp uvaʼ ech inqʼa paxsan tetz viyolbʼal quBʼaal Tiuxh, eche inqʼa txʼavaʼ vaaso uvaʼ mam txʼijbʼal qʼij at s-tuul

7Echetz mam yol tiqatzil talax inqʼa bʼaʼnla txhaq yol tiʼ Jesuus. Tan ech tiqatzil, eche invaʼq txʼijbʼal qʼij. Poro aʼetz, oʼ iqatzin talax inqʼa bʼaʼnla txhaq yol, kʼuxh yeʼxh tij qatineʼ, eche inqʼa txʼavaʼ vaaso uvaʼ yeʼxh tij ipaxeʼ. Echetz uvaʼe qat ibʼan quBʼaal Tiuxh tiʼ tootzaqit inqʼa xaol u mam tiqleʼm quBʼaal Tiuxh tiʼ ijalput vitxumbʼal inqʼa xaol. Tul yeʼ laʼ motx titzʼa uvaʼ, oʼ nik bʼanon.

8Kʼuxhetz kam kuxh itzaʼlal nik palk oʼ tiʼ talax inqʼa bʼaʼnla txhaq yol tiʼ Jesuus,

poro yeʼ nik qukuyeʼ uvaʼ laʼ kuxh ikʼayunsa oʼ.

Atz kʼuxh nik tel qaanima tiʼ kam invaʼq,

poro yeʼl oʼ nik qukaj t-itzʼaʼm s-tiʼ.

9Atz kʼuxh yeʼ kuxh nik ikaj utxhchil s-qiʼ tiʼ qukʼaxbʼisaleʼ,

poro yeʼl oʼ nik qukaj s-qujunal taʼn quBʼaal Tiuxh.

Atz kʼuxh bʼeeno kuxh nik qulbʼeleʼ, eche ipaxil el invaʼq otzotz,

poro yeʼl oʼ tira koq nik qusotzeʼl, eche taqʼax koʼp invaʼq otzotz tziʼ txʼavaʼ.

10Echetz talxh laʼ bʼenk oʼ, tan atxh vet ka oʼ vatz u kamchil, eche uvaʼ palk u quBʼaal Jesuus. Echetz uvaʼe nik qubʼane tiʼ qukʼutxht vatz inqʼa xaol uvaʼ itzʼlel u quBʼaal Jesuus uvaʼ nik aqʼon qʼij qusaq. Tul aʼe, uvaʼ nik bʼanon iqʼesalil u qatineʼ. 11Echetz kʼuxh il oʼ itzʼlel oʼ, poro qootzaqle uvaʼ il oʼ at oʼ vatz u kamchil tiʼ talax inqʼa bʼaʼnla txhaq yol tiʼ Jesuus. Echetz laʼ tilte inqʼa xaol uvaʼ itzʼlel u quBʼaal Jesuus uvaʼ nik aqʼon qʼij qusaq. Atz aʼ uvaʼe, nik aqʼon itijtxhaqil u qutxhiʼoʼl kʼuxh at ikamebʼal u qutxhiʼoʼl. 12Echetz il oʼ, inqʼa paxsan tetz inqʼa bʼaʼnla txhaq yol, nik qupal t-inqʼa itzaʼlal, tetxhal qaqʼbʼ vatz u kamchil. Petetz ex, tan aalemal nik echʼij tiʼ etatin kʼatz quBʼaal Tiuxh.

13Kʼuxhetz bʼeeno kuxh nik qukʼaxbʼeʼ, poro echat kuxh u kʼuqlebʼ qukʼuul, eche val u yol uvaʼ tzʼibʼamal ka t-viyolbʼal quBʼaal Tiuxh uvaʼ ech nik tal s-eche: —InBʼaal Tiuxh, tira kʼuqlel inkʼuul seʼe, echetz s-tiʼile nik val vayolbʼal, —chich u yol.#Saalmo 116.10 Echatetz kuxh oʼe inpaqte, tan kʼuqlel qukʼuul tiʼ u quBʼaal Tiuxh. Echetz s-tiʼile nik qal inqʼa bʼaʼnla txhaq yol s-tiʼ. 14Yeʼetz nik qutanbʼa talax inqʼa bʼaʼnla txhaq yol, tan qootzaqle uvaʼ, aʼ u quBʼaal Tiuxh toq itzʼeʼvsan oʼ uvaʼs laʼ qukameʼ, tiʼ uvaʼ tan, vaʼl vet qatin tuchʼ u quBʼaal JesuKriisto. Tul echatxh laʼ titzʼeʼvsat oʼ u quBʼaal Tiuxh, eche titzʼeʼvsat u quBʼaal JesuKriisto. Tul quBʼaal Tiuxh laʼ bʼanon uvaʼ tzum laʼ qatin s-kʼatza setuchʼ. 15Jankʼaletzxh inqʼa itzaʼlal uvaʼ nik motx palk oʼ, tan aʼ itxaʼk uvaʼ laʼ etil vibʼaʼnil. Tan at qaanima setiʼ. Echetz txhaqpaq laʼ tootzaqit inqʼa xaol u kuybʼal kʼatz quBʼaal Tiuxh. Tan oq laʼ tootzaqi inqʼa xaol u kuybʼal kʼatz quBʼaal Tiuxh, tul mamala vet xaol laʼ aqʼon taʼntiuxh te quBʼaal Tiuxh, atz laʼaq motx toksa vet iqʼij quBʼaal Tiuxh.

16Echetz tiʼ uvaʼ nik qil ibʼaʼnil vipaxsal inqʼa bʼaʼnla txhaq yol, tul yeʼl oʼ nik quql tiʼ talaxeʼ. Tan kʼuxh aalemal nik iqʼesbʼ u qutxhiʼoʼl s-qiʼeʼl, pet aʼl jun qʼij nik itxhej itial u qaanxelal s-tuul oʼkaʼp u qutxhiʼoʼl taʼn quBʼaal Tiuxh. 17Echetz yeʼxhkam nik qoksa s-tuul tzaqatz itzaʼlal uvaʼ nik motx palk oʼ tiʼ talax inqʼa bʼaʼnla txhaq yol tiʼ Jesuus, tan nal kuxh toq ipaleʼe. Tan tiʼ qitzʼat inqʼa mam bʼaʼnil uvaʼ yeʼl iyaʼebʼal imotxebʼal uvaʼ nik txʼebʼon vet oʼ tu nimla tatin quBʼaal Tiuxh tu amlikaʼ, tul aʼetz nik qunatxh veteʼ uvaʼ yeʼl vet tokebʼal inqʼa itzaʼlal s-qiʼ, inqʼa nik qupal s-tuul txheel. 18Echetz nik qalte uvaʼ yeʼxhkam nik qitzʼa tiʼ kam inqʼa itzaʼlal uvaʼ nik palk oʼ tzitza vatz txʼavaʼ. Pet aʼ nik qitzʼa bʼen inqʼa kam uvaʼ tu amlikaʼ, inqʼa yeʼxhkam nik qileʼ. Tan jankʼalxh inqʼa kam uvaʼ nik qil vatz txʼavaʼ, tan nal kuxh toq ipaleʼ. Pet ech koq inqʼa kam uvaʼ tu amlikaʼ, inqʼa yeʼxhkam nik qileʼ, tan yeʼl iyaʼebʼal imotxebʼal bʼen qiltaʼ.

Currently Selected:

2 Koriintios 4: ixlC

Highlight

Copy

Compare