2 Koriintios 2

1Echetz qat vitzʼat vete uvaʼ yeʼl in laʼ bʼen in sexoʼl tuulbʼal inqʼa qʼij s-txheel. Tan oq laʼ aqʼbʼ in sexoʼl, tul nuqlaxh yol uvaʼ toq inyaj ex tiʼ inqʼa yeʼbʼaʼn uvaʼ nik ebʼaneʼ. Tul toqetz intxumunsa ex, eche uvaʼ inbʼan sete s-inpaqxi. 2Tan oq laʼ kuxh bʼen intxumunsa ex, ex inqʼa nik saʼon in tu tenam Koriinto, tul yeʼxhabʼiletz vet invaʼqe sexoʼl laʼ chiibʼisan in. Tan atz aʼ exe, nik chiibʼisan in, ex inqʼa laʼ kuxh bʼen intxumunsa ex. 3Echetz aʼ vet ivatzil u vaqʼbʼ sexoʼl vintzʼibʼat bʼen u uʼ sete. Tul antetzxh ex etoksa etibʼ t-bʼey. Tul yeʼletz in laʼ txumun in uvaʼs laʼ vaqʼbʼ sexoʼl. Tan aʼ, ex laʼ chiibʼisan in nik valeʼ. Atz kʼuqlel inkʼuul setiʼ uvaʼ qat ebʼanl kam uvaʼ intzʼibʼa bʼen sete. Echetz laʼ inchiibʼe setiʼ sekaqaayil, tul laʼ chiibʼ ex s-viʼ sekaqaayil inpaqte. 4Tuulbʼaletz uvaʼ nikich intzʼibʼat inqʼa yol sete, tul mam txhoʼm atich t-vaanima tiʼ etxumuxeʼ; atz mam kʼayunchil nikich bʼanon vaanima. Tul oqxhich voqʼe uvaʼs nikich intzʼibʼat inqʼa yol. Poro jit aʼ insaʼ laʼ etxumuneʼ, tul nik intzʼibʼa bʼen inqʼa yol sete. Pet aʼ insaʼ ibʼen sete, tul laʼ ebʼan u bʼaʼn vatz quBʼaal Tiuxh, atz laʼ bʼen sete uvaʼ tira at vaanima setiʼ.

Uvaʼs talt Paʼp ikuyux ipaʼv val u vinaq

5Pet toq intzʼibʼa bʼen val u yol sete tiʼ kame uvaʼ qat ibʼan val u vinaq sexoʼl, uvaʼ tira ok vaʼl txumuʼm t-vaanima taʼn. Tul jitetz kuxh taʼn in itxumunsa in, pet ant ex itxumunsa ex sekaqaayil. Kʼuxhetz nik valeʼ uvaʼ sekaqaayil, pet aloq yeʼ insaʼ laʼ pal paʼl in tiʼ talax sete jankʼoq qat ikʼaxbʼisa ex. 6Jankʼaletz uvaʼ qat ebʼana jolol ex tiʼ toksal u vinaq t-bʼey, tul qat ekʼaxbʼisa, tul bʼaʼnixyetz veteʼe. Tan qat oky vet t-bʼey. 7Pet yaʼoqetz vet ex tiʼ toksal u vinaq t-bʼey tuchʼ uvaʼ nik ebʼaneʼ. Pet aʼetz ebʼan veteʼ uvaʼ kuyvaq ipaʼv, tul txhokvaq vet iyaʼ s-vatz. Atz kʼuqbʼavaq ikʼuul. Tan oq yeʼ laʼ ekuy vipaʼv, tul aʼletz toq ipal vet iviʼ itxumuneʼ. Tan aʼ toq titzʼa veteʼ uvaʼ mij bʼeeq kuybʼal sevatz. 8Echetz s-tiʼile nik injaq bʼaʼnil sete, tiʼ uvaʼ aʼl laʼ ekʼutxht te u vinaq uvaʼ nuqxh nik etaleʼ uvaʼ at etaanima s-tiʼ.

9Poro aʼ nik vitzʼa uvaʼ aʼxh laʼ ebʼan kam uvaʼ nik val bʼen sete. Tan ech s-tiʼile qat intzʼibʼa bʼen inqʼa tijla txhaq yol s-bʼaxa tiʼ viltaʼ oq laʼ enima jankʼal inqʼa yol uvaʼ qat intzʼibʼa bʼen. 10Tiʼetz uvaʼ qat enima inqʼa yol uvaʼ intzʼibʼa bʼen sete, tul jaʼletz uvaʼ qat ekuyl vipaʼv, tul antetz in nik kuyun vipaʼv. Eche u vinaq uvaʼ qat inkuyl vipaʼv. Oqetz kam vaʼtoʼq paʼv uvaʼ yeʼx inkuyeʼtaʼ, tul qatetz inkuyl veteʼ. Tul jitetz txhan kuxh taʼn qat inbʼan ikuyux vipaʼv u vinaq uvaʼe, pet aʼat insaʼ uvaʼ laʼ ok bʼaʼnil s-quxoʼl setuchʼ. Tul tootzaql u quBʼaal JesuKriisto u vaanima uvaʼ nuqxh nik valeʼ. 11Kuyunoqetzvaq oʼ. Echetz yeʼ laʼ qukuyt tukuʼl Satanaase s-quxoʼl. Tan qootzaqle uvaʼ kam kuxh yaabʼla txumbʼal nik itxhok Satanaas s-qiʼ.

Uvaʼs talt Paʼp uvaʼ yeʼich isaʼ taanima Paʼp ikaj tu tenam Trooas

12Tuulbʼaletz uvaʼs maʼtich intzʼibʼat bʼen u uʼ sete s-bʼaxa uvaʼs atich in tu tenam Eefeso, yaʼne bʼen in tu tenam Trooas. Tan vila uvaʼ atichaq xaol nikich saʼon tabʼil inqʼa bʼaʼnla txhaq yol tiʼ quBʼaal JesuKriisto tzitzi. Echetz vitzʼate uvaʼ laʼich inpaxsa inuqul inqʼa bʼaʼnla txhaq yol tiʼ quBʼaal JesuKriisto. 13Poro yeʼxh inpaxsa inqʼa bʼaʼnla txhaq yol, tan tira nikich tel vaanima tiʼ tabʼileʼ kam yaʼelich ex. Tan yeʼnaqich qʼaʼvoq Tiito sinkʼatza inpaqte, u qumol s-niman tetz Jesuus, tiʼ talax inqʼa yol s-ve kam yaʼelich etatineʼ. Echetz s-tiʼile yeʼxh jankʼal qʼij inbʼan tzitzi tu tenam Trooas, tul nal kuxh val vet inbʼen te inqʼa qumol s-niman tetz Jesuus. Tul bʼen vet in tuulbʼal Masedoonia tiʼ itxhokox Tiito.#Vibʼanoʼm inqʼa Apoostol 20.1

Uvaʼs talt Paʼp uvaʼ mam yol tiqatzil talax viyolbʼal quBʼaal Tiuxh xoʼl inqʼa xaol, inqʼa iyol uvaʼ, eche itxʼumal vaʼq kam tabʼileʼ

14Pet toq val sete, nik vaqʼ taʼntiuxh te quBʼaal Tiuxh. Tan tal kuxh nik ibʼanbʼevat oʼ quBʼaal Tiuxh tiʼ tel iqʼij Satanaas, tiʼ uvaʼ tan, vaʼl vet qatin tuchʼ u quBʼaal JesuKriisto. Tan tiʼ vibʼanbʼet oʼ quBʼaal Tiuxh tiʼ qupaxsat inqʼa bʼaʼnla txhaq yol, tul tal kuxh tenam nik tootzaqivat vet inqʼa xaol u quBʼaal JesuKriisto. Tan ech nik ipaxin inqʼa bʼaʼnla txhaq yol s-tiʼ, eche nik ipaxin itxʼumal invaʼq kam. 15Tan tiʼ u qupaxsat paʼl inqʼa bʼaʼnla txhaq yol tiʼ Jesuus, tul josqʼilxh nik motx ibʼen te inqʼa xaol, eche vaʼq txʼumla kam. Tan nik motx ichit tibʼ tiʼ yeʼ ibʼen tu kʼaxkʼo. Pet ech koq inqʼa yeʼ nik niman, tan aʼl xev tabʼil inqʼa bʼaʼnla txhaq yol s-vatz, tan yek tu tzʼeqxichil vatz quBʼaal Tiuxh. 16Aʼetz inqʼa xaol, inqʼa yeʼ nik niman inqʼa bʼaʼnla txhaq yol, tan tiraxh nik tal inqʼa bʼaʼnla txhaq yol s-te uvaʼ, aʼ vet u kamchil kʼaqel taʼn uvaʼ yeʼl iyaʼebʼal imotxebʼal vatz quBʼaal Tiuxh. Echetz nik inatxh vet inqʼa xaole uvaʼ naql vet u kamchil s-kʼatza, eche laʼ inatxht vaʼq xaol vixeval invaʼq kamnaʼq. Pet echetz koq inqʼa xaol, inqʼa nik niman inqʼa bʼaʼnla txhaq yol, tan aʼ vet u qʼij saq kʼaqel taʼn uvaʼ yeʼl iyaʼebʼal imotxebʼal kʼatz quBʼaal Tiuxh. Echetz nik inatxh vet inqʼa xaol uvaʼ naql vet topoon tu qʼij saq, eche laʼ inatxht vaʼq xaol itxʼumal invaʼq kam. Tan mam yol te inqʼa taqʼonvil quBʼaal Tiuxh tiqatzil u taqʼon quBʼaal Tiuxh. Tan yeʼxhabʼil laʼ oleʼvi uvaʼ tiraxh laʼ ibʼan u taqʼon quBʼaal Tiuxh s-kaqaayil.

17Tul jit ech nik qubʼan tiʼ ipaxsal inqʼa bʼaʼnla txhaq yol tiʼ Jesuus, eche nik ibʼan inqʼa xaol, inqʼa aʼ viyolbʼal quBʼaal Tiuxh nik motx ibʼanbʼe tiʼ itxhej ipuaq. Jitetz ech nik qubʼane. Tan jikxh oʼ nik qubʼan sexoʼl, pet jit kam koq vaʼq nik qiloʼk setiʼ. Tan quBʼaal Tiuxh nik txhaqon oʼ tiʼ ipaxsal viyolbʼal. Tul nik til oʼ quBʼaal Tiuxh inpaqte. Tan nik qupaxsa viyolbʼal quBʼaal Tiuxh, tiʼ uvaʼ vaʼl quyol tuchʼ u quBʼaal JesuKriisto.

Currently Selected:

2 Koriintios 2: ixlC

Highlight

Copy

Compare