2 Koriintios 1

2 KORIINTIOS

Uvaʼs taqʼt bʼen Paʼp bʼaʼnil ikʼuul inqʼa niman tetz Jesuus tu tenam Koriinto

1In Paʼp, vaʼl te inqʼa iapoostol quBʼaal JesuKriisto. Tan ech u titzʼabʼal quBʼaal Tiuxhe s-viʼ. Inmoletz vibʼ tuchʼ Timoteeo, u qumol s-niman tetz Jesuus.

Toqetz qutzʼibʼa bʼen val u uʼ sete, ex inqʼa niman tetz Jesuus, inqʼa tu tenam Koriinto, uvaʼ at tuulbʼal Akaaya, ex inqʼa chʼexel ex taʼn quBʼaal Tiuxh. Atz nikat qutzʼibʼa bʼen u uʼ te jankʼat inqʼa niman tetz Jesuus, inqʼa at tinjolt inqʼa tenam tuulbʼal Akaaya, inqʼa chʼexelich taʼn quBʼaal Tiuxh.

2Aʼetz vibʼaʼnil u Tiuxh, u quBʼaal, tuchʼ u quBʼaal JesuKriisto, laʼ atin sexoʼl; tul aʼ vibʼaʼnil laʼ atin tetaanima.

Uvaʼs talt Paʼp uvaʼ quBʼaal Tiuxh laʼ kʼuqbʼan ikʼuul inqʼa xaol tuulbʼal uvaʼs nik ipal t-inqʼa itzaʼlal

3Qoksavaqetz iqʼij u quBʼaal Tiuxh, viBʼaal u quBʼaal JesuKriisto, u quBʼaal Tiuxh, u txumul tetz quvatz, atz uvaʼ nik kʼuqbʼan qukʼuul. 4Tan aʼ u quBʼaal Tiuxh nik aqʼon qutial tuulbʼal jankʼal inqʼa itzaʼlal uvaʼ nik qupal s-tuul. Tul kametzxh uvaʼ nik taqʼt quBʼaal Tiuxh qutial, tul echatetzxh toq qaqʼt itiale inqʼa nik ipal t-kalabʼaq itzaʼlal. 5Tan kamxh inqʼa mamala itzaʼlal uvaʼ palk u quBʼaal JesuKriisto, tul echatetzxh inqʼae nik palk oʼ, tiʼ uvaʼ, oʼ niman tetz. Echetz antxh u quBʼaal JesuKriisto toq aqʼon qutial tuulbʼal qupal t-inqʼa itzaʼlal. 6Tiʼetz uvaʼ nik qupal t-inqʼa itzaʼlal, oʼ inqʼa iqʼon iviʼ, tul aʼetz itxaʼke laʼ qutxʼol taqʼax etial tuulbʼal vepal t-inqʼa itzaʼlal. Tul laʼ qutxʼol elotxhox tiʼ eteleʼl s-tuul. Tiʼetz uvaʼ nik taqʼ quBʼaal Tiuxh qutial tiʼ qupal t-inqʼa itzaʼlal, tul aʼetz itxaʼke uvaʼ laʼ txhej quyakʼil tiʼ elotxhox tiʼ epal t-inqʼa itzaʼlal. Echetz laʼ ikʼuqeʼv qukʼuule tiʼ u quBʼaal JesuKriisto tiʼ ilotxht oʼ tiʼ qupal s-tuulbʼal. 7Tul tira nik qutxʼebʼeʼ uvaʼ toq taqʼ quBʼaal Tiuxh etial tiʼ epal t-inqʼa itzaʼlal. Tan tiʼetz uvaʼ nik epal t-inqʼa itzaʼlal, eche uvaʼ nik palk oʼ, tul echatetzxh laʼ ekʼult etial, eche uvaʼ qat qukʼultaʼ.

8Jankʼaletz ex qumol s-niman tetz Jesuus, niketz qusaʼeʼ uvaʼ laʼ qulsa sekʼuul uvaʼ mamala tiila txhaq itzaʼlal palk oʼ tuulbʼal Aasia. Tan tira yeʼich laʼ qutxʼol vet qupal s-tuul qunatxha. Tul aʼ qitzʼa veteʼ uvaʼ tira yeʼl vet oʼ laʼich itzʼeʼv oʼ taʼn.#Vibʼanoʼm inqʼa Apoostol 19.23-41; 1 Koriintios 15.32 9Atz ech qunatxh vet, eche uvaʼ nik inatxh vet invaʼq xaol uvaʼ maʼt taqʼax vet kuʼ yol tinuqul s-tiʼ, tiʼ ikameʼl. Poro quBʼaal Tiuxhetz eesan oʼ s-tuul, tiʼ uvaʼ, aʼ laʼich qukʼuqbʼavat qukʼuul tiʼ quBʼaal Tiuxh uvaʼ at tiqleʼm tiʼ titzʼeʼvsal inqʼa kamnaʼq inpaqte. Pet jit aʼ qukʼuqbʼavat qukʼuul s-qiʼ s-qujunal. 10Tan aʼ u quBʼaal Tiuxhe eesan el oʼ t-vitzaʼlal uvaʼ motx palk oʼ. Tul nik teesa el oʼ titzaʼlal s-txheel. Tul nik qutxʼebʼeʼ uvaʼ antxh quBʼaal Tiuxh toq eesan el oʼ tiqʼabʼ u mam itzaʼlal uvaʼ, aʼ vet u kamchil kʼaqel taʼn. 11Pet niketz ikʼuqeʼv qukʼuul setiʼ uvaʼ toq elotxh oʼ tiʼ enatxht Tiuxh s-qiʼ. Tan oq mamala xaol laʼ natxhon Tiuxh s-qiʼ, tul laʼ ilotxh oʼ quBʼaal Tiuxh tiʼ qel t-inqʼa itzaʼlal. Atz mamalaatetz xaol laʼ aqʼon taʼntiuxh te quBʼaal Tiuxh tiʼ u bʼaʼnil uvaʼ qat ibʼan s-qe.

Uvaʼs talt Paʼp kam s-tiʼil yeʼ bʼen Paʼp tu tenam Koriinto

12Pet aʼetz nik chiibʼisan oʼ, uvaʼ jikxh qutxumbʼal qat qubʼan vatz jankʼal inqʼa xaol. Aʼetz u qutxumbʼal qat qubʼan sexoʼl jabʼiste uvaʼ qat isaʼ quBʼaal Tiuxh s-qiʼ. Tan yeʼl oʼ uvaʼ qat koq qaqʼ bʼen qibʼ s-nim. Tul jit kam koq invaʼq txʼak nik qil setiʼ. Tan aʼ qat qubʼan xoʼl inqʼa xaol jabʼiste uvaʼ quBʼaal Tiuxh qat saʼon qubʼantaʼ. Tul jit tuchʼ nimla txhaq ootzaqibʼal tetz inqʼa xaol vatz txʼavaʼ, inqʼa jit niman tetz Jesuus, qat qalvat inqʼa yol sexoʼl. Pet aʼ qat qukʼutxh u jikla txumbʼal uvaʼ quBʼaal Tiuxh qat lotxhon oʼ tiʼ ikʼutxhux xoʼl inqʼa kam kuxh xaolil. Tul aʼl niimxh u jikla txumbʼal qat qukʼutxh sexoʼl, taʼn vibʼaʼnil quBʼaal Tiuxh.

13Tul yeʼletz yol nik qutzʼibʼa bʼen sete uvaʼ yeʼ laʼ etxʼol isikʼleleʼ, atz yeʼ laʼ bʼen sete. Pet aʼ nik intxʼebʼeʼ uvaʼ kaqaayil laʼ bʼen sete. 14Tul at jolol ex, uvaʼ jikatxh nik ibʼen inqʼa yol sete uvaʼ qutzʼibʼa bʼen s-bʼaxa, tiʼ uvaʼ jikxh qutxumbʼal sete. Tul aʼetz nik qutxʼeʼbʼeʼ uvaʼ laʼ bʼen sete sekaqaayil, tul laʼ etoksa quqʼij; atz laʼat qoksa eqʼij uvaʼs laʼ tul u quBʼaal Jesuus inpaqte.

15-16Nikichetz vitzʼa uvaʼ laʼich pal vil ex uvaʼs aʼlich vul tuulbʼal Masedoonia. Tan vitzʼa uvaʼ nik echiibʼ s-viʼ. Atz vitzʼa inpaqte uvaʼ laʼich pal vil ex uvaʼs aʼlich inbʼen tuulbʼal Judeea. Tan kaʼpaqlen laʼich pal vil ex tiʼ elotxhoxeʼ, atz laʼich elotxh in tuchʼ tetz tiʼ inbʼey uvaʼ vala.{*}#1.15-16 At nik tal Paʼp uvaʼ: ‹oʼ,› chiche. Atz at nik tal Paʼp uvaʼ: ‹in,› chiche. Tan aʼ Siilas tuchʼ Timoteeo tuchʼ Tiito tiqʼo Paʼp, s-tiʼ uvaʼs ex talt Paʼp viyolbʼal quBʼaal Tiuxh tu tenam Koriinto s-bʼaxa. Ile nik tal t-Vibʼanoʼm inqʼa Apoostol 18.1-21. 17Pet xamtel injalpu vet vinyol uvaʼ maʼtich valtaʼ. Poro jit loqʼs koq kuxh injalpu vinyol. Aloq etitzʼachi uvaʼ ech intxumbʼal, eche inqʼa xaol, inqʼa yeʼ tootzaql quBʼaal Tiuxh. Tan nik motx taleʼ uvaʼ: —Laʼi, —chiche, tul xamtel yeʼ nik inima vet viyol. Atz nik taleʼ uvaʼ: —Yeʼle, —chiche, tul xamtel nik ibʼan veteʼ. Yeʼletza.

18Tan kʼuqlebʼalxh kʼuul vinyol, eche viyol u quBʼaal Tiuxh uvaʼ kʼuqlebʼalxh kʼuul. Tan yeʼ chianaʼq s-ve valtaʼ uvaʼ: —Laʼi, —chaq in, tul xamtel: —Yeʼle, —chaq koq txhan vet in. 19Pet aʼ nik inbʼan, eche uvaʼ ibʼan u quBʼaal JesuKriisto, viKʼaol u quBʼaal Tiuxh. Tan ech uvaʼe val sete tuchʼ Silvaano, atz tuchʼ Timoteeo uvaʼs qupal sexoʼl. Tan yeʼl paoq tal u quBʼaal JesuKriisto uvaʼ: —Laʼi, —xeʼt koq, tul yeʼ koq ibʼana. Pet tala uvaʼ: —Laʼi, —xeʼte, tul ibʼana.

20Antxhtuʼ. Tan jankʼalxh inqʼa iyol quBʼaal Tiuxh uvaʼ tal ka, tul echxh ibʼane; atz ex elaʼpoq. Echetz nik qalte uvaʼ: —Echxhte, —chich oʼ, tan nik ibʼen s-qe uvaʼ, tetxhal nik telaʼpun kam uvaʼ alel ka taʼn. Echetz s-tiʼile nik qoksa iqʼij u quBʼaal Tiuxh. 21Tan antxh u quBʼaal Tiuxh nik nuqtxakbʼan qatin setuchʼ kʼatz u quBʼaal JesuKriisto. Atz aʼ u quBʼaal Tiuxh qat chʼexon oʼ setuchʼ, tiʼ uvaʼ vaʼl vet quyol s-tuchʼ. 22Tul qat taqʼ viTiuxhil tu qaanxelal, eche tok ikaaxhtail vaʼq txoo. Aʼetz vet viTiuxhil kʼutxhbʼal tetz uvaʼ, oʼ vet tetz quBʼaal Tiuxh. Atz aʼ viTiuxhil Tiuxh kʼutxhbʼal tetz vijeqbʼat quBʼaal Tiuxh viyol s-qe uvaʼ atel bʼaʼnil laʼ qukʼul s-te, inqʼa bʼaʼnil uvaʼ alel vet taʼn.

23Pet toq val sete kam s-tiʼil yeʼ pal vil ex tu tenam Koriinto. Tan quBʼaal Tiuxh ootzaqin tetz uvaʼ inuqulxh inqʼa yol uvaʼ nik valeʼ. Tan in txumun evatz, tul yeʼl in pal in sexoʼl. Tan oq laʼich pal in sexoʼl, tul laʼich inyaj ex tiʼ inqʼa kantxhaq uvaʼ nikich motx ebʼaneʼ. 24Tul jit aʼ nik qutxhokeʼ uvaʼ taʼnxh oʼ at qokebʼal tiʼ ebʼekʼex tiʼ jankʼal uvaʼ nik enima. Pet oʼ kuxh lotxhol etetz tiʼ echiibʼ tiʼ inimal u quBʼaal Jesuus. Tan qootzaqle uvaʼ nuq txaklel vet ex tiʼ inimal u quBʼaal Jesuus.

Currently Selected:

2 Koriintios 1: ixlC

Highlight

Copy

Compare