1 Timoteeo 1

1 TIMOTEEO

Uvaʼs taqʼt bʼen Paʼp bʼaʼnil ikʼuul Timoteeo

1In Paʼp, vaʼl te inqʼa iapoostol quBʼaal JesuKriisto. Tan aʼ u quBʼaal Tiuxh, u Chitol qetz, tuchʼ u quBʼaal JesuKriisto, qat bʼekʼon in tiʼ inbʼen sitxhaq, quBʼaal JesuKriisto uvaʼ nik qutxʼebʼ tul inpaqte.

2Nik vaqʼ bʼen val u uʼ see, Timoteeo, axh, uvaʼ eche invaʼq inkʼaol avatin sinvatz, tiʼ uvaʼ qat ok axh s-niman tetz Jesuus tiʼ valt viyolbʼal quBʼaal Tiuxh see.

Tul Tiuxh, u quBʼaal, tuchʼ u quBʼaal JesuKriisto laʼ aqʼon vibʼaʼnil see; tul laʼ itxum avatz; atz laʼ toksa bʼaʼnil tavaanima.{*}#1.2 Aʼ nik elkaʼp u yol ‹txumu vatz,› ibʼan quBʼaal Tiuxh, tan yeʼ taqʼ vet jaʼp u yol tiibʼa inqʼa aj paʼvom tiʼ ibʼen tu kʼaxbʼichil tiʼ inqʼa ipaʼv, inqʼa xaol inqʼa nik niman Jesuus. Aʼe u kuybʼal tiʼ vipaʼv tiʼ iqeex u quBʼaal Jesuus.

Uvaʼs talt Paʼp te Timoteeo, tiʼ uvaʼ aʼxh laʼ ibʼan Timoteeo yaʼl ipaxsal inqʼa bʼaʼnla txhaq yol tiʼ Jesuus, tul aʼxh uvaʼe laʼ itxhusa

3Tul val see, Timoteeo, uvaʼs valt akaj tu tenam Eefeso. Tan aʼ valte see uvaʼs vex tuulbʼal Masedoonia. Tul aʼ val see uvaʼ laʼich amaq jolol inqʼa niman tetz Jesuus sexoʼl, inqʼa nik txhusun u txhusbʼal uvaʼ yeʼ nik ibʼan eela tuchʼ uvaʼ alel vet sete vaʼn. 4Tul laʼich aal te inqʼa niman tetz Jesuus uvaʼ yeʼ laʼ ok bʼen tiʼ iyolox inqʼa txhulim yol. Atz jit kuxh aʼ laʼ itxhʼoti tiʼ jaʼlaq kʼuy imam junun. Tan yeʼl kuxh iyaʼebʼal inqʼa yol inqʼae. Tan yojo ibʼ vet nik ex taqʼ inqʼa yol, inqʼa bʼenaʼl kuxh ibʼenaʼ. Tan jitoq laʼ ichʼijsa oʼ inqʼa yol inqʼae kʼatz quBʼaal Tiuxh. Tan aʼ nik chʼijsan oʼ u qukʼuqbʼat qukʼuul tiʼ quBʼaal Tiuxh. Echetz aʼ inqʼae, nik inyaʼlu axh s-tiʼ uvaʼ laʼ abʼana.#Tiito 3.9 5Aʼetz titzʼabʼalil inqʼa yol nik inbʼekʼ see uvaʼ laʼ atxhus te inqʼa niman tetz Jesuus uvaʼ t-taanimaxh laʼ tzajk visaʼax quBʼaal Tiuxh. Tul jikxh taanima vatz quBʼaal Tiuxh laʼ ibʼan tiʼ ibʼant u bʼaʼn. Tul aʼxh laʼ ibʼan kam inqʼa bʼaʼnla txumbʼal uvaʼ laʼ tal u taanima. Tul taʼn kuxh laʼ iqej inqʼa bʼaʼnla txhaq yol tiʼ Jesuus tuchʼ taanima. 6Tan at vet qumol s-niman tetz Jesuus qat ey vet ka tiʼ inqʼa bʼaʼnla txhaq yol tiʼ Jesuus. Tul aʼ qat okk vet bʼen tiʼ inqʼa yol, inqʼa yeʼl ibʼaʼnil laʼ taqʼ vatz quBʼaal Tiuxh. 7Tan aʼaq isaʼ ibʼen s-nimla txhaq txhusul tetz inqʼa bʼekʼbʼal uvaʼ itzʼibʼa ka Moisees. Tul jitoq nik motx tel s-tuul kam nik motx taleʼ, atz kam nik elkaʼp inqʼa yol uvaʼ nik motx ikʼuqbʼa xoʼl inqʼa niman tetz Jesuus.

8Tul qootzaqletza uvaʼ bʼaʼn inqʼa bʼekʼbʼal, oq laʼxh qutzoqpisa inimal s-kaqaayil. 9Tul qootzaqle uvaʼ jit aʼ aqʼaxik ka inqʼa bʼekʼbʼal tiʼ taqʼax jaʼp u yol tiibʼa inqʼa xaol, inqʼa nik bʼanon u jik, atz inqʼa nik iqeoneʼ. Pet aʼ aqʼaxik ka inqʼa bʼekʼbʼal tiʼ taqʼax jaʼp u yol tiibʼa inqʼa xaol, inqʼa bʼanol tetz u yeʼbʼaʼn, atz inqʼa palsanaq yol. Atz aʼ laʼ aqʼaxik jaʼp u bʼekʼbʼal tiibʼa inqʼa xaol inqʼaa: Inqʼa yeʼ nik oksan quBʼaal Tiuxh s-tuul, inqʼa bʼanolaq paʼv; inqʼa txoqebʼal kʼuul inqʼa txumbʼal uvaʼ nik ibʼaneʼ; inqʼa nik eesan iqʼij inqʼa kam tetz quBʼaal Tiuxh; atz inqʼa nik yatzʼon itxutx ibʼaal; atz inqʼa nik yatzʼon imol; 10atz inqʼa nik bʼanon u yansa ibʼ tuchʼ uvaʼ jit ikʼulel tibʼ s-tuchʼ; atz inqʼa vinaq inqʼa nik til tibʼ tuchʼ imol s-vinaqil, inqʼa, aʼ vitxumbʼal inqʼa aj Sodooma iqʼomal tzaan taʼn; atz inqʼa nik elqʼan el xaol; atz inqʼa tzʼeqolaq tzij; atz inqʼa yeʼ nik niman viyol; atz inqʼa nik eesan iqʼij inqʼa bʼaʼnla txhaq yol tiʼ Jesuus uvaʼ jit yuel tuchʼ vaʼtoʼq txhusbʼal. 11Aʼetz uvaʼe nik qutxhuse, oʼ inqʼa nik niman inqʼa bʼaʼnla txhaq yol tiʼ Jesuus, uvaʼ mam bʼaʼnil nik taqʼeʼ uvaʼ, aʼ tzajnaʼql kʼatz quBʼaal Tiuxh, uvaʼ loqʼolaxh Tiuxh tatineʼ. Aʼetz inqʼa bʼaʼnla txhaq yole uvaʼ qat taqʼ quBʼaal Tiuxh s-ve uvaʼ laʼ vala.

Uvaʼs taqʼt Paʼp taʼntiuxh te quBʼaal Tiuxh tiʼ u taqʼon

12Pet nik vaqʼ taʼntiuxh te JesuKriisto, aʼe u quBʼaal, uvaʼ qat lotxhon in tiʼ ibʼanax u taqʼon. Atz qat ikʼuqbʼa ikʼuul s-viʼ, tul qat toksa in tiʼ ibʼanax u taqʼon. 13Tan nikich veesa iqʼij u quBʼaal JesuKriisto uvaʼs jatxhaq tzaan. Atz nikich vojqeʼla inqʼa niman tetz Jesuus. Tul nikich val yol s-tiʼ. Tan in yeʼ nikich inqeoneʼ. Pet itxumetz vet quBʼaal JesuKriisto invatz, tan jit ayaʼl koqxh inkʼuul nikich inbʼan inqʼae. 14Pet aʼl sibʼxh vibʼaʼnil quBʼaal JesuKriisto qat taqʼ s-ve tiʼ vinsaʼaxeʼ, kʼuxh jit inkʼulel. Tul tira aʼl sibʼxh u bʼaʼnil qat taqʼ quBʼaal JesuKriisto s-ve, tan tetxhal tiqʼot opoon in tiʼ vinqejtaʼ. Tul nik innatxheʼ uvaʼ tira at taanima quBʼaal Tiuxh s-viʼ tiʼ vinnimat u quBʼaal JesuKriisto.

15Poro at vaʼl yol uvaʼ kʼuqlebʼal kʼuul u txumbʼal nik taleʼ. Tul ikʼulelxhtuʼ uvaʼ jankʼalxh inqʼa xaol laʼ qeon u yol uvaʼ ech nik tal s-eche: —Ul u quBʼaal JesuKriisto vatz u txʼavaʼ tiʼ quchitix t-inqʼa kʼaxkʼo, oʼ inqʼa aj paʼvom, —chiche. Echetze in, tan aʼ in palnaʼqich vinpaʼvin viʼ inqʼa xaol s-kaqaayil. 16Echetze u vatineʼ, tan kʼuxh aʼ in palnaʼqich vinpaʼvineʼ, poro aʼetz vet u quBʼaal JesuKriisto qat oybʼan invatz. Aʼetz u mam kuybʼale uvaʼ qat taqʼ u quBʼaal Tiuxh s-ve, s-kʼutxhbʼal tetz vatz inqʼa xaol, inqʼa laʼ qeon u quBʼaal JesuKriisto. Tan tira ikotxʼ quBʼaal JesuKriisto ivatz iqʼaqʼal vinpaʼvineʼ. Tul qat taqʼ bʼen in s-eche vaʼl kʼutxhbʼal tetz vatz jolt inqʼa xaol, inqʼa laʼ ikʼul qʼij isaq uvaʼ yeʼl iyaʼebʼal imotxebʼal.

17Echetz nik voksat iqʼije u quBʼaal Tiuxh, uvaʼ yeʼl ikamebʼal, uvaʼ mam iQʼesal tatin tuulbʼal jattanulxh yaʼbʼ, atz uvaʼ yeʼ naʼl tatineʼ; atz u quBʼaal Tiuxh uvaʼ taʼnxhte; atz laʼ oksal iqʼij; [atz u aj txumbʼal tiibʼa s-kaqaayil.] Tul laʼ alax s-nim tinjattant inqʼa yaʼbʼ uvaʼ bʼenaʼl kuxh ibʼen toq tuleʼ. Tul echxh laʼ ibʼane.

18Pet niketz inbʼekʼ see, Timoteeo, axh, uvaʼ eche invaʼq inkʼaol avatin sinvatz. Tul nik insaʼeʼ uvaʼ aʼxh laʼ abʼan kam inqʼa yol alel seʼe taʼn viTiuxhil Tiuxh uvaʼs jatxhaq tzaan uvaʼs axeʼt tiʼ u taqʼon quBʼaal Tiuxh. Tul nik insaʼeʼ uvaʼ laʼ atxakbʼa eebʼ tiʼ imaqax inqʼa xaol, inqʼa nik motx txhusun inqʼa yol uvaʼ jitxh tetz quBʼaal Tiuxh. Aqʼ yaʼl tiʼ ibʼanaxeʼ. 19Poro txhabʼamoq kuxh ikʼuqeʼv akʼuul tiʼ inqʼa bʼaʼnla txhaq yol tiʼ Jesuus uvaʼ nimamal vet qaʼn. Tul aʼxh laʼ abʼan kam inqʼa bʼaʼnla txumbʼal uvaʼ laʼ tal t-vavitzʼabʼal. Oqetz yeʼ laʼ atxhabʼa akʼuqbʼat akʼuul tiʼ inqʼa bʼaʼnla txhaq yol, tul toqetz abʼan tetzan inqʼa qat motx taqʼ tibʼ eesaloq t-bʼey. Tan qat motx el ka tiʼ u bʼey, eche vaʼq vaarko uvaʼ qat el ka tiʼ vibʼey, tul jitoq qat opoon vet tal uvaʼ kʼaqel taʼn. 20Tan echetz uvaʼe ibʼan Imeneeo tuchʼ Alejaandro. Tan motx taqʼ tibʼ eesaloq t-bʼey. Xaʼtetze voksa tiqʼabʼ Satanaas tiʼ ikʼaxbʼisaleʼ, tiʼ uvaʼ laʼ motx bʼen s-te uvaʼ yeʼ laʼ motx teesa iqʼij u quBʼaal Jesuus.

Currently Selected:

1 Timoteeo 1: ixlC

Highlight

Copy

Compare