1 Timoteeo 5

Uvaʼs talt Paʼp inqʼa txhusbʼal te Timoteeo

1Poro yeʼ laʼ utxhi uvaʼ yajelxh invaʼq qʼesla vinaq laʼ abʼan tiʼ toksal t-bʼey. Pet txumbʼalimal laʼ aalt inuqul s-te, eche laʼ ayolon te abʼaal. Atz kʼuxh inqʼa chelem xaak, tan txumbʼalimal laʼ ooksat t-bʼey, eche laʼ ayolon te eetzʼin. 2Atz kʼuxh inqʼa qʼesla ixoq, tan txumbʼalimal laʼ aalt inuqul s-te, eche laʼ ayolon te atxutx. Atz kʼuxh inqʼa chelem ixvaak, tan txumbʼalimal laʼ ooksat t-bʼey, eche laʼ ayolon te avanabʼ. Tul tira jikxh axh laʼ abʼan s-xoʼl.

3Tul laʼ alotxh inqʼa txakay ixoq, jaʼl uvaʼ aʼxh yeʼl lotxhol tetz. 4Pet oqetz at invaʼq txakay ixoq uvaʼ at tal, atzoq ataq tij, aʼetz vet inqʼa tal, atz inqʼa tij laʼ iqatzin ikʼuulaleʼ. Echetz laʼ inimate kam uvaʼ nik tal viyolbʼal quBʼaal Tiuxh. Atz echetz laʼ taqʼt inqʼa ala, atz inqʼa ija, ichʼexel u bʼaʼnile te viqʼesal. Aʼetz uvaʼe, bʼaʼn, atz aʼetz uvaʼe, nik ichiibʼ quBʼaal Tiuxh s-tiʼ laʼ bʼanaxi.

5Pet taʼn laʼ lotxhox u txakay ixoq, uvaʼ yeʼxhabʼil invaʼq lotxhol tetz ati, atz ijunal kuxh veteʼ; uvaʼ, aʼ kʼuqlel ikʼuul tiʼ quBʼaal Tiuxh tiʼ vilotxhoxeʼ; tul qʼiil aqʼbʼal nik tabʼi te quBʼaal Tiuxh, atz nik inatxh quBʼaal Tiuxh.

6Pet yeʼ laʼ elotxh u txakay ixoq, uvaʼ een kuxh taanima tiʼ inqʼa atxhaʼv vatz txʼavaʼ, tan kamnaʼqletzeʼe vatz quBʼaal Tiuxh, kʼuxh itzʼlel vatz u txʼavaʼ.

7Pet aʼl abʼekʼ te inqʼa niman tetz Jesuus uvaʼ, aʼ laʼ ibʼan kam inqʼa nik val see. Echetz yeʼ laʼ talax yole s-tiʼ. 8Tan jaʼl uvaʼ yeʼ laʼ tzuqbʼen inqʼa titzʼin tatzik, inqʼa vaʼl kuxh tatin t-otzotz s-tuchʼ, inqʼa kʼuqlel ikuul s-tiʼ, tul aʼetz uvaʼe, yeʼ nik niman vet viyolbʼal quBʼaal Tiuxh. Atz palnaʼqetz vete vipalsan yolil viʼ inqʼa xaol, inqʼa jit niman tetz Jesuus.

9Pet taʼnxh laʼ ok s-atxh u txakay ixoq, atz laʼ tzʼibʼal ibʼij, uvaʼ palnaʼq vet iyaʼbʼ s-oxkʼalal (60); atz taʼn kuxh vaʼl vinaq iqʼomich taʼn; 10atz bʼaʼn iyol inqʼa xaol tiʼ vibʼaʼnla bʼanoʼm; atz, tiʼ uvaʼ jikxh qat ichʼijsat tal; atz tiʼ taqʼt ivatbʼal niman tetz Jesuus t-totzotz; atz tiʼ itxʼaax toq inqʼa niman tetz Jesuus; atz tiʼ ilotxht inqʼa nikich ipal titzaʼlal; tul nima vatzul kuxh bʼaʼnla bʼanoʼm bʼanel taʼn.

11Pet yeʼl ibʼij inqʼa txakay ixoq laʼ ok s-atxh tiʼ lotxhbʼal, inqʼa txulul tele. Tan xamtel nik ikʼoʼpil vet taʼn u tatxhaʼv vitxhiʼoʼl, tul aʼ vet u tetz nik toksa tiʼ itxhejaʼ. Pet aʼe tan, aʼ nik taqʼ vet ka u taqʼon quBʼaal Tiuxh uvaʼ alel vet taʼn vatz quBʼaal JesuKriisto uvaʼ laʼ ibʼana. 12Oqetz ech laʼ ibʼane, tul juntetz kuxh nik ibʼan s-te tiʼ yeʼ inimal viyol uvaʼ nik taleʼ. Tan yeʼ qat inima viyol uvaʼ alel vet taʼn s-bʼaxa vatz inqʼa niman tetz Jesuus. 13Tul jitetz kuxh taʼn nik ibʼane, pet junt kuxh nik ichiansa qʼeʼyil s-te. Atz aʼaq kuxh nik ibʼan vet soliʼm t-junun otzotz tiʼ ixeʼtisal chijla txhaq yol. Atz jit kuxh taʼn qʼeʼyil nik ibʼaneʼ, pet aʼaq kuxh nik motx ibʼan vet toksataq tibʼ xoʼl yol uvaʼ yeʼl tokebʼal s-tiʼ. Tul aʼ kuxh vet alo yol nik motx ibʼaneʼ uvaʼ jit ikʼulel laʼ tala. 14Pet inqʼa txakay ixoq, inqʼa txulul tele, aʼ nik val uvaʼ aʼl bʼaʼn laʼ tzʼaloni; atz laʼ txhej tal. Tul laʼ tilbʼe tatin t-totzotz tuchʼ tal. Echetz yeʼ laʼ tel quqʼije, oʼ inqʼa niman tetz Jesuus, taʼn inqʼa xaol, inqʼa nitxhaqtziil taʼn Satanaas, uvaʼ nik itxhiʼan s-qiʼ.

15Tan at jolol txakay ixoq uvaʼ qat ey vet ka tiʼ inimal Jesuus. Tul aʼ qat motx inima vet u tetz Satanaas.

16Pet oqetz at vaʼq ixoq niman tetz Jesuus, laʼ oleʼv tiʼ ilotxht vaʼq txakay ixoq tu totzotz, tul aʼl bʼaʼn ikʼuula, atz ilotxheʼ. Echetz yeʼ laʼ taqʼt tel tiqatze inqʼa niman tetz Jesuus. Atz echetz laʼ itzʼeqe u lotxhbʼal xoʼl inqʼa txakay ixoq, inqʼa aʼxh yeʼl lotxhol tetz.

17Echatetz kuxh inqʼa iqʼon iviʼe, inqʼa nikxh txhabʼan tiqʼol iviʼ xoʼl inqʼa niman tetz Jesuus, tan ikʼulel uvaʼ laʼ oksal iqʼij s-bʼaʼn tiʼ u aqʼon uvaʼ nik motx ibʼaneʼ, atz jankʼal eche inqʼa nik motx taqʼonv tiʼ talax viyolbʼal quBʼaal Tiuxh, atz inqʼa nik motx itxhusuneʼ. 18Tan ech tzʼibʼamal ka t-viyolbʼal quBʼaal Tiuxh s-eche: —Yeʼ laʼ utxhi uvaʼ laʼ emaq tetxhbʼun u yakʼa vaʼk uvaʼ sebʼt taqʼonv tiʼ ipatxhʼax el tiʼ triigo, —chich u yol.#Deuteronoomio 25.4; Tio 10.10; Luk 10.7 Atz ech nik tal vaʼt u yol s-eche: —Jabʼil uvaʼ nik taqʼonveʼ, tul ikʼulel laʼ txhojpi, —chich u yol. Echetz ikʼulel laʼ aqʼax txhojbʼal tetz inqʼa iqʼon iviʼ xoʼl inqʼa niman tetz Jesuus.

19Tul oq laʼ ul alaxoq ipaʼv invaʼq u iqʼon iviʼ see taʼn invaʼq xaol, tul yeʼ laʼ aqea. Pet oq kaʼvaʼl atzoq oxvaʼl vet xaol laʼ ilon kam vipaʼv, tul laʼ ul taleʼ, echetz laʼ aqejt vete. 20Pet jaʼl inqʼa iqʼon iviʼ uvaʼ yaʼtel kuxh ibʼant u paʼv, tul ech ivatz inqʼa niman tetz Jesuus laʼ ayaj, tiʼ uvaʼ nik ibʼaneʼ. Echetz laʼ motx ixoʼv vet jolte inqʼa iqʼon iviʼ tiʼ ipaʼvineʼ. 21Toqetz intiila bʼekʼu see vatz quBʼaal Tiuxh, atz vatz quBʼaal JesuKriisto, atz vatz inqʼa ichʼexichla aanxel quBʼaal Tiuxh uvaʼ aʼxh laʼ anima jankʼal inqʼa yol uvaʼ nik val see. Poro jikxh laʼ abʼant tutxh invaʼq yol xoʼl inqʼa iqʼon iviʼ. Tul yeʼl invaʼq avajbʼaʼn laʼ ibʼana. 22Tul jit nal kuxh laʼ aaqʼ jaʼ aqʼabʼ tiviʼ invaʼq niman tetz Jesuus. Echetz jit ant axh laʼ bʼoqol axh tiʼ invaʼq paʼv uvaʼ jit apaʼv. Pet xee eebʼ, tul yeʼxhkam invaʼq yeʼbʼaʼn laʼ abʼana.

23Poro eche u txhoʼnichil uul, atz tuchʼ jolt inqʼa yaabʼil nik bʼanon axh bʼiitxhaqul tuul, tul jitetz kuxh taʼn u aʼ laʼ uukʼa, pet ukʼaetz inbʼeeq qʼuʼich taʼl uuva tiʼ abʼant bʼaʼn.

24Kam s-tiʼil nik val see s-eche, tan avoqe nal kuxh laʼ ooksa vaʼq iqʼon iviʼ, tul avoqe at vaʼq paʼv nik ibʼaneʼ uvaʼ yeʼ naʼl tilixeʼ. Tul xamtel laʼ el vet ul uvaʼ at bʼak vaʼl paʼv nik ibʼaneʼ. Tan at xaol uvaʼ veqlelxh vipaʼvineʼ, kʼuxh yeʼnaq opoonoq vatz vaʼq aqʼol kuʼ yol tinuqul. 25Echatetz kuxh inqʼa bʼaʼnla txhaq bʼanoʼme. Tan yek nik ibʼen te inqʼa xaol kam uvaʼ nik ibʼanax s-vatz. Pet at jolt bʼaʼnla txhaq bʼanoʼm, uvaʼ yeʼx ikʼutxheʼt tibʼ txheel. Pet tetxhal kuxh laʼ ootzaqili s-jatu.

Currently Selected:

1 Timoteeo 5: ixlC

Highlight

Copy

Compare