1 Xhun 3

Uvaʼs talt Xhun uvaʼ yeʼ laʼ motx taqʼ tibʼ inqʼa niman tetz Jesuus eesaloq t-bʼey, tan kʼaol imeʼal quBʼaal Tiuxh

1Poro bʼenoqetz s-qe uvaʼ sibʼxh taanima quBʼaal Tiuxh s-qiʼ, tan qat taqʼ bʼen oʼ s-kʼaol imeʼal. Tul nuqxhtuʼ uvaʼ tira oʼ vet kʼaol imeʼal. Tul yeʼetz nik ibʼen te inqʼa xaol vatz txʼavaʼ, inqʼa yeʼ ootzaqin tetz quBʼaal Tiuxh, kam tatin u quBʼaal Tiuxh. Echetz s-tiʼile yeʼat tootzaq kam qatineʼ, oʼ inqʼa kʼaol imeʼal quBʼaal Tiuxh.#Xhun 1.12 2Ex, uvaʼ at vaanima setiʼ, oʼetz vet kʼaol imeʼal quBʼaal Tiuxh s-txheel, kʼuxh yeʼx qileʼtaʼ kam vet qiqleʼm laʼ ibʼana uvaʼs xamtel. Pet aloq qootzaqle uvaʼ echatxh vet oʼ, eche u quBʼaal JesuKriisto laʼ ibʼana uvaʼs laʼ tuleʼ, tan tiraxh laʼ qil veteʼ kam ikaʼy quBʼaal JesuKriisto. 3Jaʼletz uvaʼ kʼuqlel vet ikʼuul tiʼ quBʼaal JesuKriisto, tul aʼetze nik ijikbʼixsa u tatin s-junal, tiʼ yeʼ ibʼanax vet u paʼv, eche nik itxʼaax invaʼq kam. Atz echetz nik ibʼane, eche Jesuus uvaʼ mij invaʼq ipaʼv.

4Pet jaʼletzxh uvaʼ nik bʼanon u paʼv, tul aʼetz inqʼa bʼekʼbʼale nik teesa iqʼij. Tan aʼ inqʼa paʼv nik eesan iqʼij inqʼa bʼekʼbʼal. 5Tul etootzaqle uvaʼ, aʼ ulk quBʼaal JesuKriisto tiʼ yeʼ ijaʼp u kʼaxkʼo s-qiibʼa tiʼ inqʼa qupaʼv. Tul yeʼl invaʼq paʼv at s-kʼatza. 6Jaʼletz uvaʼ txhabʼamal tatin tiʼ ibʼanax kam uvaʼ nik isaʼ quBʼaal JesuKriisto, yeʼletz laʼ ibʼan vet u paʼv. Pet jaʼletz uvaʼ nik bʼanon u paʼv, aʼetze yeʼ ootzaqin tetz kam tatin quBʼaal JesuKriisto, aʼetz uvaʼe, jit vaʼl iyol s-tuchʼ.

7Ex inqʼa, eche kʼaol inmeʼal etatin sinvatz, yeʼxhabʼil kuxh ex laʼ etaqʼ etibʼ eesaloq t-bʼey. Tan jaʼl uvaʼ, aʼ u jik nik ibʼaneʼ, tul aʼetze jik, eche vijiken Jesuus. 8Tan jabʼil uvaʼ yaʼtel kuxh ibʼant u paʼv, tul tetzetz diaavloe. Tan yekichxh xeʼt tzaan diaavlo tiʼ ibʼanax u paʼv uvaʼs ixeʼt tzaan u qʼij saq. Echetz vet s-tiʼile ulk viKʼaol quBʼaal Tiuxh tiʼ isotzsal el inqʼa yeʼbʼaʼn uvaʼ ibʼan diaavlo.

9Jaʼletz uvaʼ alamal vet kʼatz quBʼaal Tiuxh, jit teletz kuxh aʼ u paʼve laʼ ibʼana. Tan txhabʼamal vet tiqʼol vitxumbʼal quBʼaal Tiuxh taʼn tiʼ ibʼanax u jik. Tul yeʼ vet nik ibʼan u paʼv, tan alamal vet kʼatz quBʼaal Tiuxh.

10¿Kametz tilix jalbʼal tibʼ inqʼa kʼaol imeʼal quBʼaal Tiuxh tuchʼ inqʼa kʼaol imeʼal u diaavlo? Jaʼletz uvaʼ yeʼ nik bʼanon u jik, atz uvaʼ yeʼl taanima tiʼ vimol, tul jitetz tetz quBʼaal Tiuxhe.

11Tan ech u yol etabʼi s-bʼaxala yol s-eche, uvaʼ atoqxh qaanima s-quvatzaq.#Xhun 13.34 12Pet jit ech laʼ qubʼan, eche uvaʼ ibʼan Kaiin. Tan txhiʼanyich kuxh taanima Kaiin tiʼ u titzʼin, tul iyatzʼeʼl. Tzitzietz ikʼutxhvat Kaiin uvaʼ, aʼ iqʼomich vitxumbʼal u bʼanol yeʼbʼaʼn taʼn, aʼe u diaavlo. Pet aloq ¿kametz s-tiʼil iyatzʼ Kaiin u titzʼin? Tiʼ uvaʼ txhoʼn te Kaiin, tiʼ uvaʼ, aʼ u bʼaʼn nikich ibʼan u titzʼin. Pet Kaiin, tan aʼ u yeʼbʼaʼn nikich ibʼaneʼ.#Jeenesis 4.8

13Ex inmol s-niman tetz Jesuus, yeʼ kuxh sotz ekʼuul s-te, oq laʼ yan ivatz inqʼa xaol sete, inqʼa at vatz txʼavaʼ, inqʼa yeʼ ootzaqin tetz quBʼaal Tiuxh. 14Qootzaql setuchʼ uvaʼ qat ey vet el oʼ tu kamchil vatz quBʼaal Tiuxh. Tul qat qʼexy oʼ tu qʼij saq vatz quBʼaal Tiuxh. Aloq ¿kam laʼ qule qootzaqitaʼ uvaʼ at vet qʼij qusaq kʼatz quBʼaal Tiuxh? Aʼe, uvaʼ at vet qaanima s-qiʼ s-quvatzaq. Pet jaʼl uvaʼ yeʼl taanima tiʼ vimol, tul antetz kuxh kamnaʼqleʼe vatz quBʼaal Tiuxh.#Xhun 5.24 15Tan jaʼletzxh uvaʼ nik iyan ivatz te vimol, tul eelaetz tuchʼ yatzʼoʼm uvaʼ nik ibʼaneʼ. Tul jitetz txhabʼamal tatine kʼatz quBʼaal Tiuxh. Tul etootzaqle uvaʼ yeʼl invaʼq yatzʼonal at qʼij isaq kʼatz quBʼaal Tiuxh, u qʼij saq uvaʼ yeʼl iyaʼebʼal imotxebʼal.

16Kametz laʼ qulbʼe tootzaqileʼ uvaʼ oq sibʼ qaanima tiʼ u qumol. Pet aʼ laʼ bʼensan s-qe tiʼ kame uvaʼ ibʼan quBʼaal JesuKriisto tiʼ taqʼt u qʼij isaq s-qiʼ. Echatetz uvaʼe laʼ qaqʼt qibʼ kamoq tiʼ inqʼa qumol. 17Pet at xaol uvaʼ atxh kam tetz s-bʼaʼn vatz txʼavaʼ. Tul nik til vaʼl imol uvaʼ nik isaʼon vaʼq kam s-te. Tul jitoq nik itxum bʼeeq ivatz vimol. Aʼetz u xaole uvaʼ yeʼl taanima tiʼ vimol, eche u taanima quBʼaal Tiuxh s-tiʼ.

18Ex inqʼa, eche kʼaol inmeʼal etatin sinvatz, jit kuxh tetziʼ, atz jit kuxh tuchʼ eyolon laʼ etalvat uvaʼ at etaanima tiʼ vemol. Pet aʼ laʼ ekʼutxhvat uvaʼ nuqxh nik etal, tiʼ uvaʼ at etaanima tiʼ vemol tuchʼ velotxhtaʼ tiʼ kam nik isaʼon s-te.

19Oqetz ech uvaʼe nik qubʼane, tul oʼetz vete at oʼ t-vinuqul viyolbʼal quBʼaal Tiuxh. Tul niketz qunatxh veteʼe uvaʼ kʼuqlel vet qukʼuul tiʼ quBʼaal Tiuxh. 20Pet atetz uvaʼ sebʼt qunatxht Tiuxh, tul nik tal u qaanima s-qe uvaʼ at qupaʼv vatz quBʼaal Tiuxh. Pet qootzaqle uvaʼ sibʼxh vibʼaʼnil quBʼaal Tiuxh tiʼ ikuyux inqʼa qupaʼv, kʼuxh kam kuxh laʼ tal u qaanima s-qe. Tan tootzaq quBʼaal Tiuxh jankʼal inqʼa nik tal u qaanima s-qe.

21Ex, uvaʼ at vaanima setiʼ, pet oqetz yeʼxhkam nik tal u qaanima s-qe tiʼ kam inqʼa paʼv bʼanel qaʼn, tul aʼletz nik itxhej tel kʼuqlebʼ qukʼuul kʼatz quBʼaal Tiuxh. 22Echetz kʼuxh kamxh invaʼq laʼ qujaq te quBʼaal Tiuxh, tul laʼetz qukʼul s-te. Echetzxh laʼ ibʼane, tiʼ uvaʼ, aʼ nik qunima inqʼa ibʼekʼbʼal, atz, tiʼ uvaʼ, aʼ nik qubʼan kam inqʼa nik ichiibʼ s-tiʼ.

23Tul aʼetz ibʼekʼbʼal quBʼaal Tiuxh s-qe uvaʼ laʼ quqeja uvaʼ iKʼaol quBʼaal Tiuxh u quBʼaal JesuKriisto. Tul aʼ vibʼekʼbʼal paqte uvaʼ atoqxh qaanima s-quvatzaq. 24Tan jaʼl uvaʼ nik niman inqʼa ibʼekʼbʼal quBʼaal Tiuxh, tul vaʼletz vet iyole tuchʼ quBʼaal Tiuxh. Atz vaʼl kuxh vet iyol quBʼaal Tiuxh s-tuchʼ. Aʼetz nik qootzaqivat veteʼ uvaʼ txhabʼamal vet qatin s-kʼatza, tan at vet viTiuxhil s-qukʼatza uvaʼ aqʼel vet s-qe taʼn.

Currently Selected:

1 Xhun 3: ixlC

Highlight

Copy

Compare