1 Xhun 4

Uvaʼs talt Xhun inqʼa yol tiʼ kam tilix inqʼa xaol uvaʼ nik itxhiʼan tiʼ u Kriisto, atz kam tilix inqʼa xaol uvaʼ, aʼ viTiuxhil Tiuxh at s-kʼatza

1Ex inqʼa at vaanima setiʼ, toq val sete uvaʼ jit kuxh kaqaayil yol laʼ eqea uvaʼ laʼ tal vaʼq xaol, uvaʼ iyolbʼal quBʼaal Tiuxh laʼ tal u xaol s-vatz. Pet bʼaxa laʼ etabʼi inuqul inqʼa yol uvaʼ laʼ tal inqʼa xaol, maq quBʼaal Tiuxh nik bʼanbʼen, atz maq yeʼle. Tan mamala kuxh xaol nik tal tibʼ s-qʼexsan tetz viyolbʼal quBʼaal Tiuxh, tul tzʼeqo tzij kuxh inqʼa yol nik ipaxsa. Tul tira kuxh nik ipaxi el tibʼ vatz txʼavaʼ tiʼ ipaxsaleʼ.

2Echetz laʼ ebʼan tiʼ tootzaqil s-eche oq uvaʼ kʼatz viTiuxhil Tiuxh tzajnaʼql u ootzaqibʼal, tan jatvaʼl inqʼa xaol laʼ alon uvaʼ, aʼ tzajnaʼq JesuKriisto kʼatz quBʼaal Tiuxh, tul bʼen s-alam aanima tuchʼ itxhiʼoʼl, aʼetz inqʼa xaole uvaʼ at tootzaqibʼal taʼn viTiuxhil Tiuxh. 3Pet jatvaʼl inqʼa xaol uvaʼ yeʼ laʼ alon uvaʼ, aʼ tzajnaʼq JesuKriisto kʼatz quBʼaal Tiuxh, atz jitoq laʼ tala uvaʼ bʼen s-alam aanima tuchʼ vitxhiʼoʼl ikaqal, aʼetz inqʼa xaole uvaʼ yeʼl tootzaqibʼal taʼn quBʼaal Tiuxh. Pet aʼ u tootzaqibʼal inqʼa xaol iqʼomal taʼn, inqʼa nik itxhiʼan tiʼ u quBʼaal JesuKriisto. Aʼetz uvaʼe, abʼimal etaʼn uvaʼ laʼxh uli. Tul ile at vet vatz txʼavaʼ s-txheel.

4Ex inqʼa eche kʼaol inmeʼal etatin sinvatz; ex tetz quBʼaal Tiuxh. Xaʼtetze aʼ, ex qat oleʼv ex tiʼ imaqax inqʼa xaol tiʼ vitzʼeqo tzijla txhusuʼm. Tan aʼ viyakʼil viTiuxhil Tiuxh at sekʼatza nik lotxhon ex tiʼ ibʼanax kam uvaʼ nik isaʼ quBʼaal Tiuxh. Tul tira palnaʼq iyakʼil viTiuxhil Tiuxh viʼ Satanaas uvaʼ nik lotxhon inqʼa xaol, inqʼa yeʼ ootzaqin tetz quBʼaal Tiuxh, inqʼa at vatz txʼavaʼ, atz inqʼa nik bʼanon inqʼa kantxhaq uvaʼ nik isaʼ u Satanaas laʼ ibʼana.

5Echetze inqʼa tzʼeqol tzijla txhusul, tan aʼ kuxh vitxumbʼal inqʼa yeʼ ootzaqin tetz quBʼaal Tiuxh iqʼomal taʼn. Echetz s-tiʼile aʼ kuxh nik tal inqʼa kantxhaqla yol uvaʼ iqʼomal taʼn inqʼa xaol, inqʼa yeʼ ootzaqimal quBʼaal Tiuxh taʼn. Tul nik inimal taʼn inqʼa xaol, inqʼa yeʼ ootzaqin tetz quBʼaal Tiuxh.

6Pet oʼ vet niman tetz inqʼa yol uvaʼ tzajnaʼq kʼatz quBʼaal Tiuxh. Jatvaʼl inqʼa ootzaqin tetz quBʼaal Tiuxh, aʼetz uvaʼe, nik abʼin inqʼa yol nik qaleʼ. Pet jabʼil uvaʼ jit niman tetz inqʼa yol uvaʼ tzajnaʼq kʼatz quBʼaal Tiuxh, aʼetz uvaʼe, yeʼ nik abʼin inqʼa yol nik qaleʼ. Echetz nik ibʼene s-qe tiʼ jabʼil uvaʼ iqʼomal vinuqul viyol viTiuxhil Tiuxh taʼn, atz jabʼil uvaʼ, aʼ iqʼomal u kantxhaqla yol taʼn uvaʼ at vet vatz txʼavaʼ s-txheel.

Uvaʼs talt Xhun, tiʼ uvaʼ echatxh qaanima tiʼ qumol laʼ qubʼana, eche uvaʼ ikʼutxh quBʼaal Tiuxh s-qe uvaʼ atxh taanima s-qiʼ

7Ex, uvaʼ atxh vaanima setiʼ, atoqxh qaanima s-quvatzaq qubʼana. Tan jatvaʼlxh inqʼa atxh taanima tiʼ imol, aʼetz uvaʼe, nik kʼutxhun uvaʼ, aʼ vitxumbʼal quBʼaal Tiuxh iqʼomal taʼn. Jaʼl uvaʼ at taanima tiʼ vimol, aʼetz uvaʼe, alamal vet kʼatz quBʼaal Tiuxh, atz ootzaqimal quBʼaal Tiuxh taʼn. 8Jabʼiletz uvaʼ yeʼl taanima tiʼ imol, yeʼxetz ootzaqimal quBʼaal Tiuxhe taʼn. Tan quBʼaal Tiuxh jeqon tzaan uvaʼ atoqxh qaanima tiʼ qumol s-quvatzaq. 9Tan aʼetz qat ikʼutxhvat quBʼaal Tiuxh s-qe uvaʼ tira at taanima s-qiʼ, tiʼ uvaʼ qat taqʼ tzaan viKʼaol vatz u txʼavaʼ. Aʼe vaʼl viKʼaol quBʼaal Tiuxh, viTxajoʼm uvaʼ taʼnxhte.{*}#4.9 U yol ‹unigénito› uvaʼ nik tal tu kastiiya, tan aʼ nik elkaʼp, tiʼ uvaʼ iKʼaolxh quBʼaal Tiuxh u quBʼaal Jesuus, eche uvaʼ nik tal t-Saalmo 2.7; Tio 1.20 tuchʼ Evreeos 1.5-7. Nik at tal u yol ‹unigénito› t-Xhun 1.14 tuchʼ 3.16. Tul tiʼetz kam uvaʼ qat ibʼan viKʼaol quBʼaal Tiuxh, tul yeʼl iyaʼebʼal imotxebʼal qʼij qusaq. 10Kametz koq qat ikʼutxhbʼevat quBʼaal Tiuxh s-qe uvaʼ at taanima s-qiʼ, pet, tiʼ uvaʼ qat taqʼ tzaan viKʼaol tiʼ itxhojox inqʼa qupaʼv tiʼ u taqʼt tibʼ kamoq vatz kurus. Pet jit oʼe qat kʼutxhun s-bʼaxa uvaʼ at qaanima s-tiʼ.

11Ex, uvaʼ at vaanima setiʼ, ape, tiʼetz uvaʼ qat ikʼutxh quBʼaal Tiuxh s-qe uvaʼ atxh taanima s-qiʼ, tul echatetz uvaʼe qubʼane, tiʼ uvaʼ at qaanima tiʼ qumol qubʼaneʼ. 12Tul yeʼxhabʼil invaʼxoʼq ilonaʼq tetz quBʼaal Tiuxh. Pet oqetz at qaanima s-quvatzaq, tul aʼetz vet uvaʼe, nik kʼutxhun vatz inqʼa xaol uvaʼ at quBʼaal Tiuxh s-qukʼatza, kʼuxh yeʼ nik til inqʼa xaol quBʼaal Tiuxh. Echetz nik ibʼene s-qe uvaʼ atxh qaanima tiʼ qumol, eche uvaʼ nik isaʼ quBʼaal Tiuxh.

13Aʼetz vet nik bʼensan s-qe uvaʼ txhabʼamal vet qatin kʼatz quBʼaal Tiuxh, tul txhabʼamal tatin s-qukʼatza, tiʼ uvaʼ qat taqʼl viTiuxhil s-qe. 14Tul qatetz bʼen s-qe, oʼ inqʼa apoostol uvaʼ quBʼaal Tiuxh txhaqon tzaan viKʼaol s-quxoʼl; aʼe u Chitol tetz inqʼa xaol vatz txʼavaʼ, vatz u kʼaxkʼo tiʼ inqʼa ipaʼv. Aʼetz uvaʼe, nik qal inuqul. 15Jaʼletz uvaʼ laʼ alon u quBʼaal Jesuus sikʼaol Tiuxh, tul txhabʼamaletz tatin quBʼaal Tiuxhe s-kʼatza. Atz txhabʼamaletz tatine kʼatz quBʼaal Tiuxh. 16Tul qatetz qootzaqilaʼ, atz qat quqejlaʼ uvaʼ, aʼ u quBʼaal Tiuxh qat kʼutxhun s-qe uvaʼ atxh taanima s-qiʼ. Tan aʼ quBʼaal Tiuxh xeʼsanaʼq tetz uvaʼ at taanima s-qiʼ. Tul jaʼl uvaʼ txhabʼamal tok kʼatz quBʼaal Tiuxh, aʼetz uvaʼe, ootzaqin tetz uvaʼ at taanima quBʼaal Tiuxh s-tiʼ. Tul txhabʼamal tatin quBʼaal Tiuxh s-kʼatza.

17Atoqetz qaanima tiʼ qumol, eche uvaʼ nik isaʼ quBʼaal Tiuxh. Echetz laʼ ikʼuqeʼv vet qukʼuule uvaʼ yeʼl yol laʼ taqʼ vet jaʼp quBʼaal Tiuxh s-qiibʼa uvaʼs laʼ taqʼt kuʼ inqʼa yol tinuqul. Kametzxh uvaʼ nik isaʼ quBʼaal Tiuxh, echatetzxh u qaanimae laʼ ibʼan tiʼ inqʼa xaol s-kaqaayil.

18Echetz yeʼl oʼ laʼ xoʼv oʼ tiʼ tul kʼaxkʼo s-qiibʼa, oq at qaanima tiʼ qumol s-kaqaayil. Tan jaʼl uvaʼ at taanima tiʼ vimol, eche uvaʼ nik isaʼ quBʼaal Tiuxh, tul yeʼxhkametz laʼ xoʼve te quBʼaal Tiuxh. Pet taʼnxh laʼ xoʼv te quBʼaal Tiuxh, inqʼa nik natxhon uvaʼ ikʼulel laʼ ikʼul kʼaxbʼichil. Jabʼiletz uvaʼ nik ixoʼveʼ, aʼetze nik natxhbʼen uvaʼ yeʼl tu taanima visaʼax vimol s-bʼaʼn.

19Pet at qaanima tiʼ qumol, tan quBʼaal Tiuxh qat kʼutxhun s-qe s-bʼaxa uvaʼ at taanima s-qiʼ. 20Jaʼletz invaʼq uvaʼ ech laʼ tal s-eche: —At vaanima tiʼ quBʼaal Tiuxh, —chaqe, tul nik iyan ivatz te vimol. Tzʼeqol tzietz kuxhte. Tan jaʼl uvaʼ yeʼl taanima tiʼ vimol uvaʼ nik til tibʼ ivatz s-tuchʼ, ¿Aʼetz kol txhan at taanima tiʼ quBʼaal Tiuxh laʼ ibʼana?, atz yeʼxhkam nik til ivatz u quBʼaal Tiuxh. 21Tul atz ech nik tal vibʼekʼbʼal quBʼaal Jesuus s-eche: —Jaʼl uvaʼ at taanima tiʼ quBʼaal Tiuxh, tul atoqetz taanima tiʼ vimol, —chiche.#Xhun 13.34

Currently Selected:

1 Xhun 4: ixlC

Highlight

Copy

Compare