1 Koriintios 7

Uvaʼs itxhusun Paʼp tiʼ kam laʼ ibʼan inqʼa niman tetz Jesuus inqʼa tzʼalonaʼql veteʼ

1Toqetz intzaqʼbʼe bʼen inqʼa yol sete, inqʼa etzʼibʼa tzaan s-ve, tiʼ uvaʼ maq bʼaʼn te u vinaq uvaʼ laʼ kuxh atin s-junal, tul yeʼ laʼ tiqʼo invaʼq ixoq. Sinvatz, tan bʼaʼn kuxhtuʼ uvaʼ yeʼ laʼ txhej tixqel u vinaq. 2Pet, tiʼ uvaʼ mam kuxh yansa ibʼ nik tutxheʼ, echetz aʼl bʼaʼn uvaʼ jununil vinaq laʼ atin tuchʼ vaʼl tixqel. Tul jununil ixoq, tan laʼ atin tuchʼ vaʼl itzumel. 3Tul tetxhal laʼ inima u vinaq viyol tiʼ tatin tuchʼ u tixqel. Atz tetxhal laʼ inima u ixoq viyol tiʼ tatin tuchʼ vitzumel. 4Tan jit taʼn kuxh u ixoq at tokebʼal tiʼ kam laʼ ibʼan tuchʼ vitxhiʼoʼl, pet ant vitzumel at tokebʼal s-tiʼ. Atz echat kuxh u vinaqe, tan jit taʼn kuxh u vinaq at tokebʼal tiʼ kam laʼ ibʼan tuchʼ vitxhiʼoʼl, pet ant u tixqel at tokebʼal s-tiʼ. 5Echetz yeʼ laʼ isaʼa laʼ imaq tibʼ u vinaq, vitzumel u ixoq, atz yeʼ laʼ isaʼa laʼ imaq tibʼ u ixoq, u tixqel u vinaq tiʼ tiltaq tibʼ s-vatzaq. Pet oq laʼ isaʼa laʼ motx imaq tibʼ, poro aʼ laʼ motx yolon s-vatzaq tiʼ u tatineʼ. Atz ech kuxhte oq laʼ motx ikʼaq tibʼ tiʼ inatxhax Tiuxh tuulbʼal kaʼoxvoʼq qʼij. Xamteletz veteʼ, tul laʼ motx til tibʼ inpaqte. Echetz yeʼ laʼ motx itxhokt Satanaas ikuʼe t-paʼv, tiʼ uvaʼ yeʼ laʼ motx til vet tibʼ tinjoloq qʼij.

6Jankʼaletz inqʼa yol uvaʼ nik val tiʼ inqʼa xaol, inqʼa tzumlel vet tatineʼ, aʼ nik valeʼ uvaʼ quBʼaal Tiuxh nik kuyun laʼ tzʼaloni. Aloq jit aʼ nik tal quBʼaal Tiuxh uvaʼ, tetxhalen koqxh laʼ txhej ikʼulel inqʼa xaol. 7Poro aʼ vitzʼabʼal uvaʼ ech koq laʼ kajk inqʼa xaol s-junal eche u vatineʼ. Pet junun xaol tootzaq veteʼ kam uvaʼ laʼ itxʼol ibʼant taʼn quBʼaal Tiuxh. Tan at inqʼa nik isaʼ itxhej ikʼulel, atz at inqʼa yeʼ nik isaʼ itxhej ikʼulel. 8Pet toq val bʼen te inqʼa vinaq, inqʼa yeʼl tixqel, atz te inqʼa txakay ixoq. Tan aʼl bʼaʼn uvaʼ yeʼ laʼ itxhok vet u vinaq tixqel, eche bʼanel vaʼn. Atz aʼl bʼaʼn te inqʼa txakay ixoq, uvaʼ yeʼ laʼ txhej vet itzumel uvaʼ ech koqe s-te. 9Pet oqetz yeʼ laʼ motx itxʼol imaqt tibʼ tiʼ tatxhaʼv vitxhiʼoʼl, tul aʼl bʼaʼn laʼ tzʼaloni. Tan aʼl bʼaʼn uvaʼ tira laʼ tzʼaloni viʼ uvaʼ laʼ kuxh ikʼaxbʼisa vitxhiʼoʼl t-atxhaʼv.

10Atz toqat inbʼekʼ te inqʼa tzʼalonaʼql veteʼ. Aloq jit in kuxh nik alon sinjunal, pet aʼ u quBʼaal JesuKriisto nik alon. Tan ech nik tal s-eche: —Yeʼ laʼ utxhi laʼ taqʼka u ixoq vitzumel. 11Pet oqetz tira laʼ taqʼka u ixoq vitzumel, tul yeʼ laʼ utxhi laʼ tiqʼo vet u ixoq invaʼtoʼq vinaq. Pet oq laʼ ijaq tibʼ ikuya u ixoq tuchʼ vitzumel, tul laʼ tiqʼo tibʼ inpaqte; tul bʼaʼnetz kuxhtuʼ. Tul echat kuxh u vinaqe, tan yeʼ laʼ utxhi laʼ ituki el u tixqel, —chich u yol.#Tio 5.32; 19.9; Kuxh 10.11-12; Luk 16.18

12Pet tikʼetz toq val bʼen kaʼt u yol te inqʼa qumol s-niman tetz Jesuus, inqʼa yeʼlaq ikʼulel atoʼk s-niman tetz Jesuus. In nik alon u yol, pet jit ibʼekʼoʼm quBʼaal JesuKriisto. Echetz s-eche: Oqetz at invaʼq vinaq niman tetz Jesuus uvaʼ jit niman tetz Jesuus u tixqel, tul oq ayaʼlxh ikʼuul u ixoq tiʼ tatin xeʼ vitzumel, tul yeʼ laʼ isaʼa laʼ ituki el u vinaq u tixqel. 13Atzoq at invaʼq ixoq niman tetz Jesuus uvaʼ jit niman tetz Jesuus vitzumel, tul oq ayaʼlxh ikʼuul u vinaq tiʼ tatin tuchʼ u tixqel, tul yeʼ laʼ isaʼa laʼ ituki el u ixoq vitzumel. 14Tan kʼuxh jit niman tetz Jesuus u tzumela, poro aʼ vet u ixoq nik lotxhon vitzumel tiʼ ijetxhon ok kʼatz quBʼaal Tiuxh. Tan kʼulel vet tibʼ u vinaq tuchʼ u tixqel uvaʼ niman vet tetz Jesuus. Atz echat kuxh u ixoqe uvaʼ jit niman tetz Jesuus, tan aʼ vet u vinaq nik lotxhon u tixqel tiʼ ijetxhon ok kʼatz quBʼaal Tiuxh. Tan kʼulel vet tibʼ ixoq tuchʼ vitzumel uvaʼ niman vet tetz Jesuus. Pet inqʼa nitxaʼ, tan chʼexel vet taʼn quBʼaal Tiuxh oq uvaʼ atoʼk vitxutx, atz maq taʼn kuxh vibʼaal, niman tetz Jesuus veteʼ.

15Pet oqetz aʼ u vinaq, atzoq u ixoq, uvaʼ jit niman tetz Jesuus, laʼ saʼon ijatxt tibʼ tuchʼ vikʼulel, tul bʼenoqnetza. Tan yeʼ laʼ utxhi uvaʼ, tetxhal kuxh laʼ iyaʼlu u niman tetz Jesuus tatin tuchʼ vikʼulel, oq yeʼ laʼ isaʼ vet tokeʼ. Tan aʼ qat isaʼvat oʼ quBʼaal Tiuxh tiʼ qatin tibʼaʼnil s-quvatzaq. 16Tan yeʼ ootzaqle, axh u ixoq, oq uvaʼ seʼe laʼ okk vatzumel s-niman tetz Jesuus. Atz echat kuxh axhe, u vinaq, tan bʼane ootzaql koq oq seʼe laʼ okk u eexqel s-niman tetz Jesuus.{*}#7.16 Ech vaʼt nik elkaʼpun u versiikulo s-eche: —Kʼuxhetz jinkiʼptxh vetatineʼ, poro aʼl bʼaʼn uvaʼ laʼ etxhok txumbʼal tiʼ etatin tibʼaʼnil. Tan yeʼ ootzaqle, axh u ixoq, oq uvaʼ laʼ ok vatzumel s-niman tetz Jesuus. Atz kʼuxh axh u vinaq, yeʼ ootzaqle oq uvaʼ laʼ ok u eexqel s-niman tetz Jesuus, —chiche.

17Tul ant kuxh atoq vet ex s-eche, kame vetatin sevatzaq uvaʼs ikuyt quBʼaal Tiuxh etatineʼ uvaʼs isaʼt tzaan ex quBʼaal Tiuxh tiʼ ebʼen s-niman tetz Jesuus. Echetz uvaʼe nik inbʼekʼ te inqʼa niman tetz Jesuus, inqʼa nik ikʼul tibʼ t-junun tenam.

18Jaʼletz u vinaq uvaʼ qolichxh vet el inbʼiil te vitxhiʼoʼl uvaʼs tok s-niman tetz Jesuus, tul bʼaʼnetz kuxh vet tatin s-eche. Atz jaʼletz u vinaq uvaʼ yeʼich qolel el inbʼiil te vitxhiʼoʼl, uvaʼs tok s-niman tetz Jesuus, tul yeʼ laʼ qolp vet el inbʼeeq te vitxhiʼoʼl. 19Tan jit aʼ nik toksa quBʼaal Tiuxh s-tuul uvaʼ qolel vet el inbʼiil te vitxhiʼoʼl, atzoq yeʼ qolel el inbʼeeq te vitxhiʼoʼl. Pet aʼ nik toksa s-tuul uvaʼ laʼ inima inqʼa ibʼekʼbʼal quBʼaal Tiuxh tuchʼ taanima. 20Echetz kamxh u tatiniche uvaʼs isaʼt tzaan quBʼaal Tiuxh tiʼ tok s-niman tetz Jesuus, tul atoq kuxh vet s-eche.

21Tul echat kuxh toq vale sete, ex inqʼa loqʼel etok tiʼ aqʼon. Tan kʼuxh loqʼelich vet ex tiʼ aqʼon uvaʼs isaʼt tzaan ex u quBʼaal Tiuxh tiʼ etok s-niman tetz Jesuus, tul yeʼ kuxh el etaanima s-tiʼ. Pet oq laʼ utxh echitp tiqʼabʼ u loqʼol etetz, tul aʼl bʼaʼn laʼ eleʼl ex tiqʼabʼ.{*}#7.21 ¿Kam nik elkaʼp u yol uvaʼ?: —...aʼl bʼaʼn laʼ eleʼl ex tiqʼabʼ, —chiche. Aʼ nik tal Paʼp uvaʼ jit muqel laʼ teleʼl tiqʼabʼ u bʼaal taqʼon laʼ ibʼana, eche uvaʼ ibʼan Oneesimo. Tan muqel tel Oneesimoe ibʼan vatz Filemoon. Pet aʼ nik tal Paʼp uvaʼ jikxh laʼ motx teleʼl tiqʼabʼ u bʼaal aqʼon. Tan laʼ nal utxh vaʼl yol tiʼ teleʼl xeʼ viqʼesal taqʼon. Atz laʼ utxh itxhojt teleʼl. Atz maq laʼ ok tiviʼ u bʼaal aqʼon, tul laʼ toybʼa ivatz u taqʼonvil, atz laʼ itxhaqpu el tibʼaʼnil. Tul aʼ la itxakunsa tiʼ itxhaqpul el kam uvaʼ nik tal vibʼekʼbʼal inqʼa aj Rooma. 22Tan jatvaʼl uvaʼ qat isaʼ tzaan quBʼaal Tiuxh tiʼ tok s-niman tetz Jesuus, kʼuxh loqʼel tok tiʼ aqʼon, tan chiteletz vete tiqʼabʼ Satanaas taʼn quBʼaal Jesuus, eche laʼ ichitpeʼl u aqʼonvil tiqʼabʼ u bʼaal aqʼon.

Atz jaʼl uvaʼ qat isaʼ tzaan quBʼaal Tiuxh tiʼ tok s-niman tetz Jesuus, uvaʼ yeʼxhkam loqʼel tok tiʼ aqʼon, tul aʼetz vet quBʼaal JesuKriisto aj etz qat ibʼana. Tan ech vet qat tok tiqʼabʼ Jesuus, eche iloqʼox u aqʼonvil taʼn u bʼaal aqʼon. 23Tan sibʼ qat ibʼan u quBʼaal JesuKriisto tiʼ eloqʼoxeʼ. Echetz s-tiʼile yeʼ laʼ ekuy vet eqʼaʼv tiʼ ibʼanax inqʼa kantxhaq nik tal inqʼa xaol sete, inqʼa jit niman tetz Jesuus. Tan oqetz laʼ qʼaʼv ex tiʼ ibʼanax u kantxhaq, tul maʼtetz vet exe inpaqte s-eche xaol, inqʼa loqʼel tok tiʼ aqʼon.

24Echetz nik valte sete, ex inmol s-niman tetz Jesuus, kamxh vetatiniche uvaʼs isaʼt tzaan ex u quBʼaal Tiuxh tiʼ etok s-niman tetz Jesuus, tul atoq kuxh vet ex s-eche tiʼ inimal quBʼaal Tiuxh.

25Atz toqat val sete tiʼ inqʼa qʼopo ixvaak. Tan yeʼl invaʼq ibʼekʼoʼm quBʼaal Jesuus laʼ intzʼibʼa bʼen s-te. Pet toq val kaʼl u txumbʼal s-te uvaʼ, in nik alon. Tan nik innatxheʼ uvaʼ tira kʼuqlebʼal kʼuul vintxumbʼal taʼn vibʼaʼnil u quBʼaal Tiuxh uvaʼ qat kuyun vootzaqit viyolbʼal. 26Pet tiʼetz vitzaʼlal inqʼa yol uvaʼ atil oʼ s-txheel, tul nik vitzʼa uvaʼ laʼ kuxh atin inqʼa chelem xaak s-eche, atz kʼuxh inqʼa chelem ixvaak.

27Pet oqetz at vet etixqel, tul etitzʼach kuxh ejatxt etibʼ tuchʼ vetixqel. Atz oq yeʼx etixqel, tul aʼl bʼaʼn yeʼ etitzʼa etxhejaʼ. 28Pet oqetz laʼ esaʼ itxhej etixqel, tul jitetz paʼve. Atzoqetz laʼ txhej u qʼopo ixvaak, tul jitatetz paʼve. Pet aʼe tan, jatvaʼl inqʼa nik motx itxhej tixqel, atzoq itzumel, tul kam kuxh itzaʼlal nik motx palka. Aʼetz kuxh insaʼe uvaʼ yeʼl ex laʼ pal ex titzaʼlal.

29Pet toq val sete, ex inmol s-niman tetz Jesuus, tan yeʼxh jankʼal vatz qʼij qusaq vatz u txʼavaʼ. Pet bʼiil kuxh toq qubʼaneʼ. Echetz s-tiʼil nik valeʼ uvaʼ jatvaʼl inqʼa at vet tixqel, tul jit taʼnxh bʼenk ikʼuul tiʼ u tixqel, pet ibʼan yaʼl tiʼ u taqʼon quBʼaal Tiuxh. 30Atz jatvaʼl inqʼa nik itxumuneʼ. Tul aʼ ibʼan yaʼl tiʼ u taqʼon quBʼaal Tiuxh. Echetz aʼ laʼ ikʼutxh veteʼ uvaʼ, eche yeʼ nik itxumuneʼ. Atz jatvaʼl inqʼa chiibʼiy kuxhtuʼ, tul aʼ ibʼan yaʼl tiʼ u taqʼon quBʼaal Tiuxh. Echetz laʼ ikʼutxhte uvaʼ, eche yeʼ nik ichiibʼeʼ. Atz jatvaʼl inqʼa nik iloqʼ tetz, tul aʼ ibʼan yaʼl tiʼ u taqʼon quBʼaal Tiuxh. Echetz laʼ ikʼutxhte uvaʼ jit eche tetz laʼ ibʼana. 31Atz jatvaʼl inqʼa chiibʼiyaq kuxh tiʼ ipal tibʼaʼnil vatz u txʼavaʼ, tul ikʼutxha uvaʼ jit ayaʼl koq kam nik til ibʼaʼnil vatz u txʼavaʼ tiʼ ibʼant yaʼl tiʼ u taqʼon quBʼaal Tiuxh. Tan jankʼalxh u vatz txʼavaʼ uvaʼ nik qileʼ, tan toq paloq.

32Niketz val invaʼt u yol sete tiʼ kam s-tiʼil yeʼ laʼ txhej ex. Tan aʼl bʼaʼn uvaʼ yeʼ laʼ el etaanima tiʼ inqʼa kam tzitza vatz txʼavaʼ. Tan jatvaʼl inqʼa yeʼl ikʼulel, tan een taanima tiʼ kam uvaʼ nik isaʼ quBʼaal Tiuxh, atz tiʼ kam uvaʼ laʼ ibʼan tiʼ ichiibʼisal quBʼaal Jesuus.

33Pet jaʼl u vinaq uvaʼ at tixqel, tan een taanima tiʼ titzʼal kam laʼ tulbʼe itxhej imeebʼaʼil tzitza vatz txʼavaʼ. Atz eenat kuxh taanima tiʼ inqʼa kam uvaʼ laʼ chiibʼisan u tixqel.

34Echetz jalbʼal tibʼ inqʼa ixoq, inqʼa at vet itzumel, tuchʼ inqʼa qʼopo ixvaak s-eche. Tan jatvaʼl inqʼa qʼopo ixvaak, tan een taanima tiʼ kam uvaʼ nik isaʼ quBʼaal Tiuxh, atz tiʼ ixeet vitxhiʼoʼl, atz, tiʼ uvaʼ jetxhel vet ok tibʼ kʼatz quBʼaal Tiuxh laʼ ibʼana.

Echetz koq inqʼa ixoq uvaʼ at vet itzumel, tan een taanima tiʼ inqʼa aqʼon t-totzotz uvaʼ tetz kuxh vatz txʼavaʼ. Atz eenat kuxh taanima tiʼ inqʼa kam uvaʼ laʼ chiibʼisan vitzumel.

35Niketz val inqʼa yol sete inqʼaa, tiʼ uvaʼ bʼaʼn laʼ elkaʼp ex. Pet jit loqʼs koq kuxh nik inbʼekʼ sete. Tan aʼ insaʼ uvaʼ jikxh laʼ ebʼant u taqʼon quBʼaal Tiuxh. Echetz tira yeʼxhkam invaʼq laʼ maqon ex tiʼ ibʼanaxeʼ.

36Pet toq val kaʼt yol sete. At ex inqʼa bʼaala uvaʼ nik maqon emeʼal tiʼ itxhejaʼ. Pet niketz etil veteʼ uvaʼ aalemal ipal vet iyaʼbʼ tiʼ itzʼaloneʼ, yaʼne nik esaʼ txha vet itzʼaloneʼ. Pet taʼnxh inuqul laʼ ebʼana kam uvaʼ nik esaʼ tiʼ itxhej vemeʼal. Echetz jit paʼv laʼ ibʼana oq laʼ tzʼaloni.

37Pet at ex bʼaala, tira atoʼk teviʼ uvaʼ yeʼ laʼ txhej vemeʼal, tul bʼaʼn kuxhtuʼ. Oqetz yeʼxhkam nik ibʼan yaʼl sete, atz bʼaʼnetz kuxhte vetitzʼabʼal s-tiʼ, tul taʼn kuxh laʼ ibʼane uvaʼ atoq vemeʼal sekʼatza, tul bʼaʼnetz kuxhte uvaʼ nik ebʼaneʼ. Echetz nik valte uvaʼ bʼaʼn laʼ ibʼan u bʼaala oq yeʼ laʼ ikuy itxhej vimeʼal.

38Echetz nik valte te u bʼaala, uvaʼ bʼaʼnat kuxhtuʼ oq laʼ ikuy itxhej ikʼulel vimeʼal. Pet aʼlat bʼaʼn inpaqte oq yeʼ laʼ ikuy itxhej vimeʼal.

39Tan txeyel u ixoq tuchʼ vitzumel taʼn viyol uvaʼ alel taʼn s-vatzaq oq uvaʼ itzʼlel vitzumel. Tan ech uvaʼe, nik tal u bʼekʼbʼal. Pet oqetz laʼ kam vet vitzumel u ixoq, tul txhaqpiyetz vete u ixoq tuchʼ vitzumel. Tul bʼaʼn kuxhtuʼ laʼ tiqʼo vet u ixoq invaʼt vinaq, jaʼl uvaʼ laʼ isaʼ s-te; poro uvaʼ yeʼ tzʼalonaʼqle. Pet taʼn kuxhte uvaʼ niman tetz Jesuus uvaʼ laʼ tiqʼo. 40Pet aʼ nik vitzʼa uvaʼ aʼl chiibʼebʼal laʼ tatin u ixoq oq yeʼ laʼ tiqʼo vet vaʼtoʼq vinaq. Poro jitetz loqʼs koq kuxh nik val inqʼa yol inqʼaa, pet nik innatxheʼ uvaʼ, aʼ viTiuxhil Tiuxh nik alon s-ve.

Currently Selected:

1 Koriintios 7: ixlC

Highlight

Copy

Compare