1 Koriintios 8

Uvaʼs talt Paʼp uvaʼ yeʼl invaʼq etxhbʼubʼal txaj laʼ etxhbʼuli

1Aʼetz toq yolonk vet in tiʼ inqʼa etxhbʼubʼal, inqʼa nik toksal ok vatz inqʼa bʼitichla tiuxh. Tul jununil oʼ nik natxhon uvaʼ at qutxumbʼal taʼn quBʼaal Tiuxh tiʼ kam laʼ qubʼana. Pet aʼe tan, at xaol uvaʼ aʼl nik toksat vet iqʼij tuchʼ uvaʼ at vet itxumbʼal nik inatxheʼ. Jitetz eche. Pet aʼl bʼaʼn uvaʼ at taanima tiʼ inqʼa imol, tul laʼ ilotxh tiʼ ichʼij kʼatz quBʼaal Tiuxh. 2Oqetz at invaʼq ex nik itzʼan uvaʼ atxh vet etxumbʼal s-tiʼ nik etaleʼ, tul bʼenoq sete uvaʼ yeʼxh jankʼal vatziʼ etootzaqle. Pet aʼl bʼaʼn uvaʼ aʼl tel laʼ etxhabʼataʼ.

3Jaʼletz uvaʼ atxh taanima tiʼ quBʼaal Tiuxh, tul aʼetz uvaʼe, kʼuqlebʼal vet kʼuul s-tetz quBʼaal Tiuxh.

4Pet toqetz val kaʼt inqʼa yol tiʼ inqʼa etxhbʼubʼal, inqʼa nik toksal vatz inqʼa bʼitichla tiuxh. Tan qootzaqle uvaʼ yeʼxhkam vaʼq tiqleʼm inqʼa bʼitichla tiuxh at vatz txʼavaʼ. Pet taʼn kuxh vaʼl quBʼaal Tiuxh ati.#Tio 15.11, 20 5Tul atetz jolol kam, inqʼa at vatz amlikaʼ, atz inqʼa at vatz txʼavaʼ nik tal inqʼa xaol sitiuxh. Tan kamaq kuxh nik tal inqʼa xaol sitiuxh, atz mamala kuxh nik talaq sibʼaal. 6Pet s-quvatz, oʼ inqʼa niman tetz Jesuus, tan yeʼl invaʼtoʼq kam laʼ qal s-qutiuxh. Pet vaʼl kuxh quTiuxh; aʼe viBʼaal quBʼaal JesuKriisto, u viinqixsan tetz inqʼa kam s-kaqaayil. Atz aʼ vet qutxaʼk s-oksabʼ tetz iqʼij u quBʼaal Tiuxh. Tul vaʼlat kuxh u quBʼaal, aʼe u quBʼaal JesuKriisto. Tan tiʼ u quBʼaal JesuKriisto viinqixsalik jankʼal inqʼa kam. Atz tiʼ u quBʼaal JesuKriisto, tul at qʼij qusaq uvaʼ yeʼl iyaʼebʼal.

7Poro jit kaqaayil xaol nik ibʼen s-te, tiʼ uvaʼ yeʼl u bʼitichla tiuxh itzʼlele. Tan at inqʼa niman tetz Jesuus, inqʼa yeʼx kuxh eloq inqʼa bʼitichla tiuxh tiviʼ. Tan aʼ nik motx titzʼa uvaʼ itzʼlel inqʼa bʼitichla tiuxh uvaʼ nik motx toksa inqʼa etxhbʼubʼal s-vatz. Tan aʼ nik motx tal uvaʼ kantxhaq etxhbʼul, inqʼa etxhbʼubʼal inqʼa nik toksal vatz inqʼa bʼitichla tiuxh. Tan nik kuxh motx ibʼan kaʼl ikʼuul tiʼ tetxhbʼul inqʼa etxhbʼubʼal. Tan aʼ nik motx titzʼa uvaʼ maq at ipaʼv tiʼ tetxhbʼuleʼ, atz maq yeʼle.

8Tan yeʼl tokebʼal inqʼa etxhbʼubʼal tiʼ qujetxhon ok kʼatz quBʼaal Tiuxh. Tan jit aʼ inqʼa etxhbʼubʼal nik toleʼv tiʼ qujetxhon ok kʼatz quBʼaal Tiuxh. Atz jit tiʼ qetxhbʼut inqʼa etxhbʼubʼal, tul aʼl tel koq laʼ ichiibʼ quBʼaal Tiuxh s-qiʼ. Atz jit tiʼ yeʼ qetxhbʼut u etxhbʼubʼal, tul aʼl koq vet yeʼ laʼ toksat oʼ quBʼaal Tiuxh s-tuul.

9Pet nik val sete, ex, uvaʼ yeʼxhkam nik etitzʼa uvaʼ paʼv tetxhbʼul vaʼq etxhbʼubʼal. Pet aloq aʼletz noq etil etibʼ, tul yeʼ laʼ motx ekʼaxbʼisa inqʼa nik ikaʼkabʼin taanima, tiʼ uvaʼ maq at ipaʼv tiʼ tetxhbʼul inqʼa etxhbʼubʼal.

10Tan kamal at vaʼq ex ootzaqin tetz uvaʼ jit paʼv etxhbʼul inqʼa etxhbʼubʼal inqʼae. Tul kamal laʼ bʼen ex kʼuqloq tiʼ etxʼaʼon tal uvaʼ atil inqʼa bʼitichla tiuxh. Tul oqetz tuul laʼ til ex vaʼq vemol s-niman tetz Jesuus uvaʼ nik ikaʼkabʼin taanima tiʼ inqʼa etxhbʼubʼal. Tul kamal laʼ ebʼoqo vet vemol tiʼ tetxhbʼul u etxhbʼubʼal, kʼuxh nik ibʼan kaʼl ikʼuul. 11Tul laʼ itanbʼa vet vemol s-niman tetz Jesuus inimal u quBʼaal JesuKriisto, vemol uvaʼ nik ikaʼkabʼin taanima, tiʼ tetxhbʼul inqʼa etxhbʼubʼal, inqʼa nik toksal ok vatz inqʼa bʼitichla tiuxh. Iqʼaqʼaletz kuxh vetxumbʼal uvaʼ jit paʼv etxhbʼul inqʼa etxhbʼubʼal sevatz laʼ qʼaʼvik vemol. Tan tiʼ inqʼa xaol, eche inqʼae kamk u quBʼaal JesuKriisto. 12Echetz tiʼ ekʼaxbʼisat vemol s-niman tetz Jesuus, tul nik epaʼvin vatz u quBʼaal JesuKriisto. Tan eqʼaqʼal, tul nik ibʼan vet vemol u paʼv uvaʼ nik tal u titzʼabʼal s-yeʼ laʼ ibʼana.

13Echetz nik valte sete, oq aʼ u etxhbʼubʼal uvaʼ laʼ etetxhbʼu laʼ aqʼon kuʼ vemol tu paʼv, tul bʼaʼn uvaʼ tira yeʼl inpaqt laʼ etetxhbʼu inqʼa txhibʼ, inqʼa nik toksal ok vatz inqʼa bʼitichla tiuxh. Echetz yeʼ laʼ ekʼaxbʼisate vemol tiʼ yeʼ ikuʼ t-paʼv.

Currently Selected:

1 Koriintios 8: ixlC

Highlight

Copy

Compare