1 Koriintios 15
15
Uvaʼs itxhusun Paʼp tiʼ titzʼeʼv quBʼaal Jesuus inpaqte kʼuxh maʼtich ikam veteʼ
1Atz nikatetz insaʼeʼ, jankʼal ex inmol s-niman tetz Jesuus, uvaʼ laʼ etulsa sekʼuul tiʼ inqʼa bʼaʼnla txhaq yol tiʼ Jesuus uvaʼ inpaxsa sexoʼl. Tul motx ekʼul inqʼa bʼaʼnla txhaq yol s-tiʼ, atz il ex nuq txaklel ex s-tuul s-txheel tiʼ inimaleʼ. 2Tiʼetz uvaʼ nuqtxaklelxh ex tuulbʼal inqʼa yol, inqʼa motx inpaxsa sexoʼl, tul koleletz vet exe tiʼ yeʼ ebʼen tu kʼaxkʼo tiʼ inqʼa epaʼv. Pet oq jit nuqtxaklel ex tuulbʼal inqʼa yol, tul niketz kuxh ebʼutxh etibʼe tiʼ vaʼtoʼq txhusbʼal.
3Jankʼal inqʼa txhusbʼal uvaʼ inkʼul kʼatz quBʼaal JesuKriisto tiʼ u itzʼeʼvchil inpaqte, tul antetzxh uvaʼe intxhus sete. Tan sibʼxh tokebʼal uvaʼ intxhus sexoʼl. Tan kam u quBʼaal JesuKriisto tiʼ itxhoox inqʼa qupaʼv. Tan ech uvaʼe tzʼibʼamal ka s-tiʼ t-viyolbʼal quBʼaal Tiuxh uvaʼ ech laʼ palke.#Isaiias 53.5-12 4Tul muquxetz vitxhiʼoʼl quBʼaal JesuKriisto. Poro titoxv qʼij itzʼeʼvk inpaqte. Tan ech uvaʼe tzʼibʼamich ka s-tiʼ t-viyolbʼal quBʼaal Tiuxh. 5Tul antxh Jesuuse uvaʼ ikʼutxh tibʼ te Seefas, atz uvaʼ xamtel ikʼutxh tibʼ te kabʼlaval inqʼa txhusich taʼn. 6Yaʼne ikʼutxh tibʼ te jolt niman tetz, inqʼa molelich tibʼ uvaʼ palnaʼqich tatxhul s-oʼvaʼl sieen (500). Atetz inqʼa xaol at s-txheel, atz at inqʼa kamnaʼql veteʼ, inqʼa motx ilon quBʼaal JesuKriisto uvaʼs maʼtich titzʼeʼv inpaqte. 7Yaʼne ikʼutxh tibʼ quBʼaal JesuKriisto te Jakoovo. Atz ikʼutxhat tibʼ te inqʼa apoostol s-kaqaayil.{*}#15.7 Jakoovo uvaʼ nik tal tzitza, tan aʼ Jakoovoe, u titzʼin u quBʼaal Jesuus, uvaʼ vaʼl itxutx quBʼaal Jesuus s-tuchʼ. Xamtichetz veteʼ, tul aʼ vet Jakoovo bʼen s-iqʼon iviʼ xoʼl inqʼa niman tetz Jesuus. Tan ech uvaʼe nik tal t-Vibʼanoʼm inqʼa Apoostol 15.13. 8Tiyaʼtebʼaletz veteʼ, tul ikʼutxh tibʼ u quBʼaal JesuKriisto s-ve. Tan ech kuxh inbʼan vet tiʼ tilix quBʼaal JesuKriisto, eche ipal iqʼiil talal vaʼq neʼ.
9Echetz nik innatxheʼ uvaʼ tira txhʼoj kuxh vatz viqleʼm xoʼl inqʼa apoostol. Tul jitoq inkʼulel uvaʼ laʼ alax in s-apoostol, tan tira motx inkʼaxbʼisa inqʼa niman tetz Jesuus, inqʼa chʼexel vet taʼn quBʼaal Tiuxh. 10Pet taʼntiuxh te vibʼaʼnil quBʼaal Tiuxh uvaʼ qat taqʼ viqleʼm. Tul jitetz loqʼs koq kuxh qat taqʼ vibʼaʼnil s-ve, pet il vet ivatz qat taqʼlaʼ. Tan qat pay vet u vaqʼon viʼ kaqaayil inqʼa apoostol. Poro jit in qat bʼanon sinjunal, pet quBʼaal Tiuxh qat lotxhon in tuchʼ vibʼaʼnil uvaʼ jit inkʼulel laʼ inkʼula. 11Kʼuxhetz in qat paxsan viyolbʼal quBʼaal Tiuxh sexoʼl, atz kʼuxh jolt inqʼa apoostol, poro ant kuxh inqʼa bʼaʼnla txhaq yol tiʼ quBʼaal JesuKriisto qat qal sexoʼl. Tul aʼ uvaʼe, qat motx eqeja.
Uvaʼs itxhusun Paʼp tiʼ titzʼeʼv inqʼa niman tetz Jesuus inpaqte
12Tul aʼetz nik qupaxsa uvaʼ kʼuxh kam u quBʼaal JesuKriisto, poro itzʼeʼv inpaqte. Tul ¡keʼchetz nik etaltaʼ jolol ex, uvaʼ yeʼl inqʼa kamnaʼq laʼ itzʼeʼv inpaqte! 13Tan oqetz yeʼl inqʼa kamnaʼq laʼ itzʼeʼv inpaqte, tul yeʼletz Kriistoe itzʼeʼv inpaqte. 14Oqetz yeʼl quBʼaal JesuKriisto itzʼeʼv inpaqte, tul niketz kuxh qubʼutxh qibʼe tiʼ ipaxsal inqʼa bʼaʼnla txhaq yol tiʼ Jesuus. Tul nikatetz kuxh ebʼutxh etibʼe tiʼ iqeex quBʼaal JesuKriisto. 15Tul jit taʼne. Atz echetze uvaʼ yeʼl koq quBʼaal JesuKriisto itzʼeʼvsal taʼn quBʼaal Tiuxh, tul tzʼeqol tzietz kuxh oʼe tuchʼ inqʼa yol uvaʼ nik qal sete tiʼ quBʼaal Tiuxh. Tan aʼ nik qal sete uvaʼ quBʼaal Tiuxh itzʼeʼvsan u quBʼaal JesuKriisto inpaqte. Echetze uvaʼ yeʼl koq inqʼa kamnaʼq laʼ itzʼeʼvi, tul yeʼlatetz quBʼaal JesuKriistoe itzʼeʼv inpaqte. 16Tan eche uvaʼ yeʼletz koqxh inqʼa kamnaʼq laʼ itzʼeʼv inpaqte taʼn quBʼaal Tiuxh, tul yeʼlatetz JesuKriistoe itzʼeʼv inpaqte taʼn quBʼaal Tiuxh. 17Atz yeʼletz koqxh JesuKriisto itzʼeʼv inpaqte, tul niketz kuxh ebʼutxh etibʼe tiʼ iqeex quBʼaal JesuKriisto. Tul tetxhaletz kuxh toq kʼaxbʼoq exe t-inqʼa epaʼv.
18Atz echatetzebʼ qat ibʼane inqʼa motx niman Jesuus uvaʼs yeʼnaqich motx kamoq, tan qatetzebʼ motx kʼaxbʼisal tiʼ inqʼa ipaʼv. 19Oqetz taʼn kuxh tiʼ u qatin tzitza vatz txʼavaʼ qat quqejvat inqʼa bʼaʼnla txhaq yol tiʼ Jesuus, tul yeʼxhkametzebʼ vaʼq kam nik qutxʼebʼeʼ uvaʼ laʼ taqʼ quBʼaal Tiuxh s-qe. Tul txumlebʼaletzebʼ kuxh vet qatineʼ. Tan tira ikʼuleletzxh veteʼ uvaʼ oybʼebʼal kuxh vet quvatz vatz inqʼa xaol, inqʼa jit niman tetz Jesuus.
20Pet atz itzʼeʼv u quBʼaal JesuKriisto inpaqte, kʼuxh maʼtich ikam veteʼ. Tan aʼ uvaʼe, iqʼon bʼey tiʼ u itzʼeʼvchil, eche imolox u bʼaxa ivatz sevaada. Echetz s-tiʼile tetxhal laʼ itzʼeʼv vet jankʼal inqʼa niman tetz, inqʼa kamnaʼq veteʼ, tan aʼ quBʼaal JesuKriisto bʼaxabʼ s-vatz. 21Tan aʼ xeʼtik tzaan u kamchil tiʼ vipaʼvin Adaan, u bʼaxa vinaq. Pet tiʼ invaʼt u Vinaq, aʼe u quBʼaal JesuKriisto, tan aʼ xeʼtik tzaan u titzʼeʼv inqʼa kamnaʼq inpaqte s-kʼatza. 22Echetz jankʼalxh inqʼa xaol, inqʼa ant kuxh iqʼomal vitxumbʼal Adaan taʼn, tul kamchil vatz txʼavaʼ kʼaqel taʼn. Pet jankʼal inqʼa xaol, inqʼa laʼ qeon quBʼaal JesuKriisto, tan laʼ itzʼeʼv inpaqte taʼn quBʼaal Tiuxh. 23Poro jikxh nik motx ibʼen junun s-tiʼ. Tan bʼaxa qat titzʼeʼv quBʼaal JesuKriisto, eche imolox u bʼaxa ivatz sevaada. Tul xamtel laʼ motx itzʼeʼv inqʼa niman tetz Jesuus inpaqte, uvaʼs laʼ tul quBʼaal JesuKriisto inpaqte; tan aj etz veteʼ.
24Pet maʼtetz toleʼv vet quBʼaal JesuKriisto tiʼ teesal iqʼij jankʼal inqʼa at tiqleʼm, atz jankʼal inqʼa nik ibʼekʼoneʼ, atz jankʼal inqʼa sibʼ tokebʼal, inqʼa palsan iyol quBʼaal Tiuxh. Tul laʼ opoon vet viyaʼtebʼal u qʼij saq vatz txʼavaʼ. Yaʼne laʼ taqʼ vet ok quBʼaal JesuKriisto jankʼal inqʼa kam tiqʼabʼ quBʼaal Tiuxh. Tul aʼ vet quBʼaal Tiuxh laʼ bʼanon iqʼesalil s-tiibʼa. 25Tan tetxhal kuxh laʼ ibʼan quBʼaal JesuKriisto iqʼesalil tiibʼa s-kaqaayil, tetxhal topoon u qʼij tiʼ teesal iqʼij jankʼal inqʼa nik itxhiʼan s-tiʼ. 26Tul tetxhaletz vet laʼ oleʼv u quBʼaal JesuKriisto tiʼ iyaʼsal u kamchil, uvaʼ ech tatin, eche vaʼq uvaʼ nik txhʼaʼoin oʼ. Tul aʼetz vet iyaʼtebʼal laʼ ibʼan u quBʼaal JesuKriisto, aʼe, uvaʼ laʼ iyaʼsa vet tutxh kamchil. 27Tan ech nik tal viyolbʼal quBʼaal Tiuxh uvaʼ tzʼibʼamal ka s-eche:
—Toq ooksa jankʼal
inqʼa kam tiqʼabʼ,
—chich u yol.#Saalmo 8.6
Aʼetz nik tal u yol uvaʼ quBʼaal Tiuxh qat oksan kaqaayil inqʼa kam tiqʼabʼ u Kriisto. Atz kʼuxhetz nik taleʼ uvaʼ: —Jankʼal inqʼa kam qat toksa tiqʼabʼ, —chiche, tzanlelxhtuʼ uvaʼ jit ant koqxh quBʼaal Tiuxh nik tal tibʼ. Tan aʼ u quBʼaal Tiuxh qat oksan inqʼa kam tiqʼabʼ u Kriisto.
28Atetz vet ok jankʼal inqʼa kam s-kaqaayil tiqʼabʼ quBʼaal JesuKriisto, viKʼaol quBʼaal Tiuxh, yaʼne laʼ toksa vet tibʼ quBʼaal JesuKriisto tiqʼabʼ quBʼaal Tiuxh, uvaʼ aqʼon u tiqleʼm s-bʼaxa. Tul taʼn kuxh vet quBʼaal Tiuxh iqʼesal tiibʼa jankʼal s-kaqaayil laʼ ibʼana.
29Pet at jolol ex inqʼa nik etaqʼax kuʼ xeʼ aʼ sivatzil inqʼa emol s-niman tetz Jesuus, inqʼa yeʼ motx aqʼax kuʼ xeʼ aʼ tuulbʼal uvaʼs itzʼlichaqe. Oqetz ech nik ebʼane, tul ¡kametz s-tiʼil nik etaleʼ uvaʼ yeʼ laʼ itzʼeʼv inqʼa kamnaʼq inpaqte! Echetz yeʼl itxakunbʼal uvaʼ nik ebʼaneʼ, ex inqʼa nik motx ekuʼ xeʼ aʼ sivatzil inqʼa kamnaʼq veteʼ. 30Oqetz yeʼ laʼ itzʼeʼv inqʼa kamnaʼq inpaqte, eche uvaʼ nik etaleʼ jolol ex, tul yeʼletz itxakunbʼale uvaʼ bʼiitxhaqul kuxh tuul qupal t-inqʼa itzaʼlal tiʼ qalt inqʼa bʼaʼnla txhaq yol xoʼl inqʼa xaol.
31Niketz val sete, jankʼal ex inmol s-niman tetz Jesuus, kʼuxh jun qʼij nik talax inyatzʼax el tiʼ talax inqʼa bʼaʼnla txhaq yol sexoʼl. Poro yeʼxhkam nik voksa s-tuul, tan aʼ nik chiibʼisan in veqejtaʼ uvaʼ vaʼl vet eyol tuchʼ JesuKriisto, aʼe u quBʼaal. 32Jankʼale uvaʼs motx inyojt vibʼ tuchʼ inqʼa xaol tzitza tu tenam Eefeso tiʼ inpaxsat viyolbʼal quBʼaal Tiuxh, tan ech inbʼan, eche itxhʼaʼoit tibʼ vaʼq xaol tuchʼ joloq jaqʼ tzeʼil txoo. Tul kam koqetzebʼ itxaʼk vinyojt vibʼ s-tuchʼ oq uvaʼ yeʼl inqʼa kamnaʼq laʼ itzʼeʼv inpaqte. Oqetz aʼ nik quqej uvaʼ yeʼl inqʼa kamnaʼq laʼ itzʼeʼv inpaqte, tul echetz kuxh qitzʼabʼale, eche jolol inqʼa xaol, inqʼa ech tal s-eche:
—Yeʼ kuxh qitzʼa,
pet txʼaʼonoq oʼ,
atz ukʼoq kuxh oʼ aʼ,
tan oʼxh toq kamoq vet oʼ,
—chichichaqe.#Isaiias 22.13
33Echetz yeʼ etaqʼ etibʼ eesaloq t-bʼey te inqʼa xaol, inqʼa nik alon uvaʼ yeʼ laʼ itzʼeʼv inqʼa kamnaʼq inpaqte. Jankʼal eche val u yol uvaʼ ech nik tal s-eche: —Kʼuxh bʼaʼnxh vatxumbʼal, poro oq laʼ amolo eebʼ tuchʼ inqʼa tira yeʼ itxaʼk vitxumbʼal, tul laʼ iyansa vet vabʼaʼnla txumbʼal uvaʼ nik abʼaneʼ, —chich u yol.
34Echetz nuq txakbʼavaq etibʼ tuchʼ bʼaʼnla txumbʼal. Tul yaʼsavaq inqʼa paʼv nik ebʼaneʼ. Tan at jolol ex, uvaʼ yeʼx etootzaqit quBʼaal Tiuxh s-bʼaʼn. Echetz sete nik valvat inqʼa yol, tiʼ uvaʼ laʼ motx chʼixv ex te inqʼa etxumbʼal uvaʼ kantxhaq.
Uvaʼs itxhusun Paʼp tiʼ kam tatin inqʼa txhiʼoʼl
35Poro kamal at joloq ex, uvaʼ ech nik alon s-eche: —¿Kam laʼ tulbʼe quBʼaal Tiuxh titzʼeʼvsal inqʼa kamnaʼq inpaqte? Atz ¿kam vet txhiʼoʼlil iqʼomal taʼn oq uvaʼ laʼ itzʼeʼv inpaqte? —kamal chich ex.
36Jaʼletz uvaʼ ech nik tale, tul aʼetze tira yeʼ nik txhabʼan titzʼaleʼ. Pet ech val u txumbʼal nik ibʼan eela tuchʼ u titzʼeʼv inqʼa kamnaʼq s-eche. Tan oq qat etava vaʼq iiya, tul bʼaxa nik iqʼajeʼl u tiʼ, yaʼne qat itzʼ vet u talabʼal. 37Kʼuxhetz nik etava invaʼq iiya, jankʼal eche iiya triigo, atz kʼuxh kamxh invaʼtoʼq iiyail, poro bʼane ech koq vet ikaʼy u iiya eche vixaq u tzeʼ uvaʼ laʼ itzʼ veteʼ. Pet aʼ vet u talabʼal u iiya laʼ chʼiji. 38Echetz aʼ quBʼaal Tiuxh saʼon taqʼax ka ikaʼy vixaq junun inqʼa tzeʼ. Tul taqʼ ka tiiyail junun.
39Tul echat kuxh vitxhiʼoʼl inqʼa xaole tuchʼ vitxhiʼoʼl inqʼa txoo, tan bʼane eela koq. Tan atxh ibʼen itxhiʼoʼl inqʼa xaol. Tul atxh ibʼen itxhiʼoʼl inqʼa txoo. Tul atxh ibʼen itxhiʼoʼl inqʼa xichʼomla txoo. Atz atxh ibʼen itxhiʼoʼl inqʼa txay. 40Atz atxh ibʼen vitxhiʼoʼl inqʼa aanxel uvaʼ at viʼ kaqiqʼ. Tan atxh ibʼen tatxhval tilixeʼ. Tul atxh ibʼen vitxhiʼoʼl inqʼa xaol vatz txʼavaʼ. Tan atxh ibʼen tatxhval tilix inpaqte. 41Atz kʼuxh u qʼij, tan atxh ibʼen u tatxhvabʼal tilixeʼ. Atz kʼuxh u ichʼ, tan vaʼten txhan vet tatxhvabʼal tilixeʼ. Atz kʼuxhat inqʼa txʼumil, tan vaʼten txhan vet tatxhvabʼal tilix itxiqun txhaq junun. Tan jatvatzul inqʼa txʼumil, inqʼa voqinxhtuʼ, tan atxh ibʼen itxiqun junun.
42Echatetzxh laʼ ibʼane uvaʼs laʼ titzʼeʼv inqʼa kamnaʼq inpaqte. Tan jit vet eela u txhiʼoʼl laʼ ibʼan veteʼ uvaʼs laʼ titzʼeʼv inqʼa kamnaʼq inpaqte. Tan laʼ qʼaj vet u txhiʼoʼl uvaʼs laʼ imuquxeʼ, uvaʼ iqʼomal taʼn inqʼa xaol s-txheel, eche nik iqʼaj u iiya uvaʼ nik tavaleʼ. Pet ech koq vet vaʼt u txhiʼoʼl uvaʼ laʼ itzʼeʼv inpaqte, tan yeʼl vet iqʼaebʼal. 43Tan kantxhaq kuxh vet laʼ tilix u txhiʼoʼl uvaʼs laʼ ikameʼ. Pet ech koq vet vaʼt uvaʼe laʼ kʼuluxi, uvaʼs laʼ titzʼeʼv inqʼa kamnaʼq inpaqte, tan atxhvabʼalxh vet tilix laʼ ibʼana. Tan kʼuxh uqlinaʼql vet u qutxhiʼoʼl uvaʼs laʼ ikameʼ; poro ech koq vet vaʼt u qutxhiʼoʼle uvaʼ laʼ qukʼula uvaʼs laʼ qitzʼeʼv inpaqte, tan at vet iyakʼil laʼ ibʼana. 44Tan u txhiʼoʼl uvaʼ, aʼ kuxh nik isaʼ u atxhaʼv, uvaʼ yeʼ nik isaʼ kam uvaʼ nik tal quBʼaal Tiuxh, tan aʼ uvaʼe, laʼ kami. Pet ech koq vet vaʼt u txhiʼoʼl uvaʼ laʼ qukʼula uvaʼs laʼ qitzʼeʼv inpaqte, tan aʼxh laʼ ibʼan vet kam uvaʼ laʼ isaʼ viTiuxhil Tiuxh. Tan at txhiʼoʼl uvaʼ yeʼ nik isaʼ kam uvaʼ nik tal quBʼaal Tiuxh, tul at txhiʼoʼl uvaʼ aʼxh laʼ ibʼan vet kam uvaʼ laʼ isaʼ viTiuxhil Tiuxh.
45Tan ech nik tal val u yol uvaʼ tzʼibʼamal ka t-viyolbʼal quBʼaal Tiuxh s-eche:
—Adaan, u bʼaxa vinaq,
tan txhej qʼij isaq
tetz vatz txʼavaʼ
taʼn quBʼaal Tiuxh,
—chich u yol.#Jeenesis 2.7
Pet u Vinaq, aʼe u quBʼaal JesuKriisto, uvaʼ xamtel tul vet tiʼ Adaan, tan aʼetz uvaʼe, ul aqʼon qʼij isaq taanxelal inqʼa xaol uvaʼ yeʼl iyaʼebʼal imotxebʼal. Aʼe, uvaʼ nik talax ‹siyaʼtebʼal Adaan,› chich eʼli. 46Echatetz kuxh bʼanel taʼne u qutxhiʼoʼl. Tan jit aʼ koqxh nik isaʼ u qutxhiʼoʼl kam uvaʼ nik tal viTiuxhil Tiuxh uvaʼs nik itxhej u qutxhiʼoʼl s-bʼaxa. Pet aʼ u qutxhiʼoʼl nik itxhej s-bʼaxa uvaʼ yeʼ nik isaʼ kam uvaʼ nik tal viTiuxhil Tiuxh. Tan xamtel nik itxhej u qutxhiʼoʼl uvaʼ aʼxh laʼ ibʼan vet kam uvaʼ laʼ isaʼ viTiuxhil Tiuxh.
47Tan u bʼaxa vinaq uvaʼ viinqixsali, tan tuchʼ txʼavaʼ viinqixsalika. Pet u Vinaq uvaʼ xamtel tul tiʼ Adaan, aʼe u quBʼaal JesuKriisto, tan een tzajk kʼatz quBʼaal Tiuxh tu amlikaʼ. Aʼe u ‹kaʼv Vinaq› laʼ qal s-tiʼ. 48Jankʼaletze tatin u bʼaxa vinaq tetz vatz txʼavaʼ, tan echatxh tatin, eche inqʼa xaol, inqʼa aʼ iqʼomal vet tzaan taʼn u tatin u vinaq, u tetz vatz txʼavaʼ. Pet jankʼaletze tatin u kaʼv Vinaq uvaʼ tzajnaʼq t-amlikaʼ, tan echatxh tatin, eche inqʼa xaol, inqʼa toq bʼenoq tu amlikaʼ. 49Tan kamxh qiqʼot tzaan vibʼanax u quvatz txʼavaʼilla txhiʼoʼl kʼatz Adaan, tul echatxh qiqʼot tzaane vibʼanax u quamlikaʼil txhiʼoʼl, eche vitxhiʼoʼl u quBʼaal Jesuus uvaʼ een tzajnaʼq t-amlikaʼ.
50Niketz val inqʼa yol sete, inmol s-niman tetz Jesuus, tan yeʼl u qutxhibʼil, atz yeʼl u qukaqal tetz u qutxhiʼoʼl tetz vatz txʼavaʼ laʼ bʼen tal uvaʼ nik ibʼanvat quBʼaal Tiuxh iqʼesalil. Atz jitoq u qutxhiʼoʼl uvaʼ laʼ qʼaji laʼ etzan tiʼ inqʼa kam uvaʼ yeʼl iqʼajebʼal.
51Toqetz val jolt inqʼa yol sete uvaʼ yaʼn nik taqʼ quBʼaal Tiuxh ootzaqiloq s-txheel: Tan jit ayaʼl oʼ toq motx kamoq oʼ. Poro ayaʼl oʼ toq jalpoq el u qutxhiʼoʼl taʼn quBʼaal Tiuxh kʼuxh ant itzʼlel oʼ uvaʼs laʼ tul u quBʼaal JesuKriisto. 52Poro yeʼ kuxh taqla laʼ ijalpu quBʼaal Tiuxh u qutxhiʼoʼl kʼuxh ant itzʼlel oʼ. Tan ech kuxh laʼ ibʼan, eche iyupt tibʼ bʼaqʼ quvatz. Aʼetz laʼ ibʼant uvaʼs laʼ toqʼsal vet u trompeeta tiyaʼtebʼal qʼij saq. Iletz kuxh u trompeeta nik toqʼe, tul laʼ motx itzʼeʼv vet inqʼa kamnaʼq inpaqte. Tan maʼt ijalp vet inqʼa itxhiʼoʼl. Tul aʼ iqʼomalaq vet taʼn vitxhiʼoʼl uvaʼ yeʼl paqul laʼ qʼaji. 53-54Tan tetxhal kuxh laʼ el ka u qutxhiʼoʼl uvaʼ laʼ qʼaji. Tul aʼ laʼ aqʼax vet invaʼt u qutxhiʼoʼl uvaʼ yeʼl paqul laʼ qʼaji. Atz laʼ el vet ka u qutxhiʼoʼl uvaʼ at ikamebʼal, tul laʼ aqʼax vet invaʼt u qutxhiʼoʼl uvaʼ yeʼl paqul laʼ kami, eche ichʼexput tibʼ invaʼq u xaol uvaʼ laʼ teesa el u qʼaʼl toksaʼm, tul aʼ laʼ toksa vet u akʼla oksaʼm. Echetz laʼ telaʼpe u yol uvaʼ tzʼibʼamal ka t-viyolbʼal quBʼaal Tiuxh uvaʼ ech nik tal s-eche:
—Toq oleʼvoq vet
quBʼaal Tiuxh
tiʼ iyaʼsal u kamchil,
eche laʼ toleʼv tiʼ tel iqʼij
vaʼq uvaʼ laʼ txhiʼan s-tiʼ,
—chich u yol.#Isaiias 25.8
55Tul ech nik tal vaʼt u yol uvaʼ tzʼibʼamal ka t-viyolbʼal quBʼaal Tiuxh s-eche:
—¡Yeʼletz vet axh kamchil
laʼ oleʼv axh,
axh, uvaʼ nik kʼaxbʼisan oʼ!
Atz ¡yeʼl vet axh, kamchil,
laʼ oleʼv axh
tiʼ qutzʼopoxeʼ,
axh, uvaʼ laʼ aqʼon bʼen oʼ
tu jul!
—chich u yol.#Oseeas 13.14
56Tan aʼ u paʼv nik bʼanon, tul nik qukameʼ. Pet eyetz vet iqʼij u paʼv uvaʼ nik kʼaxbʼisan oʼ tuchʼ u kamchil, uvaʼ eche vaʼq tzʼopbʼal. Tul aʼ inqʼa bʼekʼbʼal nik kʼutxhun s-qe tal uvaʼ nik paʼvink oʼ. Aʼe viyakʼil inqʼa bʼekʼbʼal tiʼ teesal quqʼij. 57Pet taʼntiuxh te quBʼaal Tiuxh uvaʼ chitel vet oʼ tiqʼabʼ jankʼal inqʼa bʼekʼbʼal, atz tiqʼabʼ inqʼa paʼv, uvaʼ nik aqʼon bʼen oʼ tu kamchil uvaʼ yeʼl iyaʼebʼal. Tan nik ilotxh oʼ quBʼaal Tiuxh tiʼ qoleʼv vet tiʼ teesal iqʼij inqʼae, tiʼ jankʼal uvaʼ qat ibʼan u quBʼaal JesuKriisto s-qiʼ. Echetz ¡taʼntiuxh te quBʼaal Tiuxh!
58Echetz nik valte sete, ex inmol s-niman tetz Jesuus, ex, uvaʼ at vaanima setiʼ, txhabʼamoqxh vet eqejt inqʼa txhusbʼal uvaʼ alel vet sete qaʼn tiʼ u titzʼeʼv inqʼa kamnaʼq inpaqte. Tul sebʼtoq kuxh ex tiʼ ibʼanax u taqʼon quBʼaal JesuKriisto. Tan etootzaqle uvaʼ yeʼl ex nik koq kuxh ebʼutxh etibʼ tiʼ ibʼanax u taqʼon. Pet at vaʼl etxʼaqaʼm laʼ ekʼul s-tiʼ.
Currently Selected:
1 Koriintios 15: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
