1 Koriintios 14

Uvaʼs itxhusun Paʼp tiʼ kaʼvaʼl inqʼa txumbʼal taʼn viTiuxhil Tiuxh, aʼe u tabʼit viyol quBʼaal Tiuxh, tuchʼ viyolon t-jolt yolbʼal

1Aʼetz ebʼan uvaʼ atoqxh etaanima tiʼ vemol. Tul bʼanvaq yaʼl tiʼ ejaqt te quBʼaal Tiuxh tiʼ kam inqʼa txumbʼal nik taqʼ viTiuxhil Tiuxh te inqʼa niman tetz Jesuus. Poro aʼxh ebʼan yaʼl tiʼ u txumbʼal tiʼ etabʼit inqʼa iyol quBʼaal Tiuxh, tul laʼ etaleʼl.

2-3Niketz val ebʼant yaʼl tiʼ etabʼit viyol quBʼaal Tiuxh, tul laʼ etaleʼl. Tan aʼ uvaʼe, jikxh nik motx ibʼen te inqʼa niman tetz Jesuus. Tul nik ichʼij tatin kʼatz quBʼaal Tiuxh taʼn. Atz aʼ uvaʼe, nik aqʼon itial; atz nik kʼuqbʼan ikʼuul.

Pet jaʼl inqʼa nik iyolon t-jolt yolbʼal uvaʼ jit jaʼl nik txhusun s-tiʼ, tan jit te inqʼa xaole nik yolonka. Pet aʼ u taanxelale nik iyolon te quBʼaal Tiuxh. Tul yeʼxhabʼil invaʼq nik ibʼen s-te kam uvaʼ nik tal u xaol. Tan aʼ nik tal u xaol, inqʼa yol uvaʼ yeʼxhabʼil ootzaqin tetz, inqʼa yol uvaʼ, aʼ viTiuxhil Tiuxh nik alon eluʼl. 4Atz jaʼl uvaʼ nik iyolon tinjolt yolbʼal uvaʼ jit jaʼl nik txhusun s-tiʼ, tul ijunaletz kuxhte nik ichʼijsa tibʼ kʼatz quBʼaal Tiuxh s-tuchʼ.

Petetz u xaol uvaʼ nik abʼin inqʼa iyol quBʼaal Tiuxh, tul nik taleʼl, tan aʼ nik ilotxh inqʼa niman tetz Jesuus tiʼ ichʼij kʼatz quBʼaal Tiuxh. 5Echetz josqʼilxhtuʼ uvaʼ jankʼal koqxh ex, laʼ yolon ex tinjolt yolbʼal uvaʼ jit jaʼl laʼ txhusun ex s-tiʼ. Pet aloq aʼ sibʼxh nik insaʼeʼ uvaʼ, aʼ koqxh laʼ etabʼi inqʼa iyol quBʼaal Tiuxh, tul laʼ etaleʼl. Tan sibʼ itxakunbʼal u talax eluʼl viyol quBʼaal Tiuxh viʼ viyolbʼel in jolt yolbʼal uvaʼ yeʼxhabʼil nik txhusun utxhchil s-tiʼ. Pet bʼaʼnatetz kuxh u yol uvaʼ laʼ iyolbʼe u xaol inqʼa yolbʼal uvaʼ yeʼxhabʼil nik txhusun s-tiʼ, oq uvaʼ aʼe, laʼ alon eluʼl kam nik tal inqʼa yol. Echetz laʼ ichʼije inqʼa niman tetz Jesuus kʼatz quBʼaal Tiuxh taʼn.

6Pet toq val sete, ex inmol s-niman tetz Jesuus, qal kuxhte, s-tiʼ uvaʼ laʼ aqʼbʼ in sexoʼl. Tul laʼ xeʼt in yolon tinjolt yolbʼal uvaʼ yeʼ etootzaqle. Tul oq jitoq laʼ val inuqul sete kam nik elkaʼpun, tul kametz koq laʼ taqʼ sete. Pet tetxhal laʼ val eluʼl u tokebʼal, kʼuxhetz aʼ laʼ val sexoʼl kam uvaʼ nik ikʼutxh quBʼaal Tiuxh s-ve, atz kʼuxh aʼ laʼ val invaʼq yol uvaʼ nik isaʼ quBʼaal Tiuxh tootzaqileʼ, atz kʼuxh aʼ laʼ val sexoʼl kam uvaʼ toq utxhoq, atz kʼuxh aʼ laʼ val sexoʼl vaʼtoʼq txhusbʼal. Poro aʼxh laʼ valvat inuqul sete t-veyolbʼal.

7Jankʼaletze inqʼa kam inqʼa nik iqʼooxeʼ, atz inqʼa nik toqʼsaleʼ, tan nik kuxh ikʼul tetz, eche u aj, atz eche u aarpa. Tan oq yeʼ laʼ aqʼax eluʼl u jalbʼal tibʼ iqul, tul keʼchetz koq laʼ qabʼitaʼ kam nik tal tuchʼ u toqʼsaleʼ.

8Qal kuxh s-tiʼ, jankʼal eche toqʼsal u trompeeta tiʼ isikʼlel sol tiʼ txhʼaʼo. Tan oq vaʼten viqultzil u trompeeta laʼ aqʼax eluʼl, tul keʼchetz laʼ ibʼant inqʼa sol tutxh tiʼ ibʼen bʼan txhʼaʼo.

9Echetze ex. Oq yeʼ laʼ etzanbʼa eluʼl inqʼa yol uvaʼ laʼ tabʼi inqʼa xaol, tul ¡keʼchetz laʼ ibʼen te inqʼa xaol kam uvaʼ nik etaleʼ! Pet tiʼ kaqiqʼ kuxh vete laʼ bʼenk inqʼa yol, inqʼa laʼ etala, oq yeʼ nik etal vinuqul.

10Tan jatvatzul kuxh yolbʼal at vatz u txʼavaʼ. Tul at koq invaʼq uvaʼ yeʼl itxumbʼalil. Pet at itxumbʼalil junun inqʼa yolbʼal. 11Oqetz yeʼ nik ibʼen s-ve kam nik tal u yol uvaʼ nik talaxeʼ, tul eelaetz kuxh vet vatine tuchʼ invaʼq u xaol uvaʼ vaʼten tenam tzajnaʼqle. Tul echatetz kuxh vet uvaʼe nik alon inqʼa yol, tan eelaetz kuxh vete s-tuchʼ uvaʼ vaʼten vet tenam tzajnaʼql sinvatz.

12Echetze ex, ex inqʼa tzʼeʼyxh ex tiʼ ikʼulux inqʼa txumbʼal uvaʼ nik taqʼ viTiuxhil Tiuxh, aʼetz nik val sete uvaʼ aʼxh eyaʼluvat etibʼ tiʼ ijaqax te quBʼaal Tiuxh tiʼ jabʼiste inqʼa txumbʼal laʼ chʼij inqʼa niman tetz Jesuus kʼatz quBʼaal Tiuxh taʼn.

13Echetz nik valte, jaʼl inqʼa nik iyolon tinjolt yolbʼal uvaʼ jit txhusel s-tiʼ, tul ijaq te quBʼaal Tiuxh uvaʼ laʼ tal eluʼl inuqul kam tokebʼal u yol uvaʼ nik taleʼ. 14Tan oq laʼ innatxh Tiuxh tinjolt yolbʼal uvaʼ yeʼxhabʼil ootzaqin tetz, tul aʼetz kuxh u vaanxelale nik natxhon Tiuxh. Pet yeʼ nik ibʼen s-ve kam uvaʼ nik valeʼ.

15Pet aʼ nik val uvaʼ aʼlat bʼaʼn laʼ qunatxh Tiuxh tuchʼ yolbʼal uvaʼ taʼnxh u qaanxelal ootzaqin tetz. Atz aʼlat bʼaʼn laʼ qunatxh Tiuxh tuchʼ u qitzʼabʼal, tul tuchʼ yol uvaʼ laʼ bʼen s-qe. Atz aʼlat bʼaʼn laʼ qubʼitzle quBʼaal Tiuxh tuchʼ u yolbʼal uvaʼ taʼnxh u qaanxelal ootzaqin tetz. Atz aʼlat bʼaʼn laʼ qubʼitzle quBʼaal Tiuxh tuchʼ u yolbʼal uvaʼ taʼnxh u qitzʼabʼal ootzaqin tetz.

16Pet qal kuxhte s-tiʼ uvaʼ at vaʼq xaol uvaʼ taʼnxh nik inatxhkʼuulavat Tiuxh tuchʼ taanxelal. Tul laʼ okaʼp vaʼt xaol uvaʼ yiqxh bʼen kuxh tabʼi u yol uvaʼ nik talaxeʼ. Tul saʼ koq bʼen s-te kame u txumbʼal uvaʼ nik taqʼ viTiuxhil Tiuxh. Tul laʼ tabʼi vinatxhkʼuulan u xaol tiʼ taqʼt taʼntiuxh te quBʼaal Tiuxh. Tul: —Echxhte qʼaoq, —chaq koq. Tan laʼ koq bʼen s-te. 17Bʼantan natxho Tiuxhe qʼaoq uvaʼ nik ebʼaneʼ. Poro yeʼl vemol nik ichʼij kʼatz quBʼaal Tiuxh taʼn venatxht Tiuxh.

18Niketz vaqʼ taʼntiuxh te quBʼaal Tiuxh, tiʼ uvaʼ nik inyolon tinjolt yolbʼal uvaʼ jit txhusel in s-tiʼ. Tul kamal aʼ, in palnaʼq inyolon tinjolt yolbʼal seviʼ sekaqaayil. 19Pet aloq aʼl bʼaʼn sinvatz uvaʼ laʼ val oʼvoʼq yol sexoʼl uvaʼ laʼ bʼen inuqul sete tiʼ etxhusuxeʼ, viʼ uvaʼ laʼ val lavoq mil (10,000) yol tinjolt yolbʼal uvaʼ yeʼ laʼ bʼen sete.

20Toqetz val sete, ex inmol s-niman tetz Jesuus, jit ech etitzʼabʼal ebʼan, eche titzʼabʼal nitxaʼ tiʼ eyojt etibʼ tiʼ inqʼa txumbʼal uvaʼ nik taqʼ viTiuxhil Tiuxh. Pet aʼl bʼaʼn ech etitzʼabʼal ebʼan, eche inqʼa neʼ uvaʼ yeʼl bʼeeq paʼv nik titzʼa ibʼanaxeʼ. Tul txhabʼavaqxh ebʼen tiʼ vetxumbʼal, atz ech ex ebʼan tiʼ vetatin tuchʼ vetxumbʼal, eche vaʼq qʼesla aanima. 21Tan ech tzʼibʼamal ka t-inqʼa bʼekʼbʼal s-eche:

—«Laʼ intxakunsa jolt xaol

uvaʼ laʼ yolon te vintenam

tinjolt yolbʼal

tiʼ toksal t-bʼey.

Laʼ inkʼam itziʼ inqʼa xaol

uvaʼ jit intenam.

Tul jitoq tuchʼ

inqʼa yolbʼal inqʼae

toq motx tabʼivat in,»

chich quBʼaal Tiuxh,

—chich u yol.#Isaiias 28.11-12

22Echetz nik valte sete oq laʼ yolbʼel jolt yolbʼal sexoʼl uvaʼ jit jaʼl nik txhusun, tul kʼutxhbʼaletz tetze vatz inqʼa jit niman tetz Jesuus uvaʼ at viTiuxhil Tiuxh sexoʼl. Echetz laʼ motx titzʼataq tibʼe t-inqʼa ipaʼv. Pet jitxh aʼ laʼ txakunk s-bʼaʼn te inqʼa niman tetz Jesuus.

Pet oq laʼ alax el viyol quBʼaal Tiuxh sexoʼl tu yolbʼal uvaʼ laʼ bʼen sete, tul seteetze, ex inqʼa niman tetz Jesuus, nik altxhika. Pet jitetz te inqʼa xaole, inqʼa jit niman tetz Jesuus.

23Pet qaletz kuxh s-tiʼ, eche uvaʼ vaʼlxh molel etibʼ t-invaʼq atibʼal. Tul jankʼal ex la xeʼt ex yolon tinjolt yolbʼal uvaʼ yeʼ ootzaqimal. Tul oq laʼ okaʼp xaol sexoʼl uvaʼ yeʼx okoq s-niman tetz Jesuus, tul oq yeʼ tootzaq kam talax inqʼa txumbʼal uvaʼ nik taqʼ viTiuxhil Tiuxh, tul tiraetz yeʼ laʼ motx tabʼi kam inqʼa nik eyolbʼe. Tul: —Aʼebʼ kʼulelaq iviʼ, —chaq vet setiʼ.

24Pet oqetz aalatxh ex sebʼt ex tiʼ talax el viyol quBʼaal Tiuxh teyolbʼal, tul laʼ okaʼp vaʼq u xaol sexoʼl uvaʼ yeʼx okoq s-niman tetz Jesuus, atz yeʼx tootzaqibʼal, tul aalatetzxh laʼ etok vete tiʼ ibʼokʼtziileʼ tiʼ titzʼat tibʼ t-inqʼa ipaʼv. Atz aalatetzxh laʼ etok vete tiʼ talax s-te uvaʼ laʼxh aqʼax kuʼ yol tinuqul s-tiʼ, tiʼ inqʼa ipaʼv. 25Echetz laʼ ibʼene s-te uvaʼ tootzaq quBʼaal Tiuxh kam inqʼa paʼv kolel tu taanima. Tul laʼ ijoqbʼa tibʼ tiʼ inatxhkʼuulal Tiuxh. Tul laʼ tal vet inuqul uvaʼ nuqlaxh yol uvaʼ at quBʼaal Tiuxh sexoʼl.

Uvaʼs itxhusun Paʼp tiʼ vitxhabʼat inqʼa niman tetz Jesuus inatxhkʼuulal Tiuxh

26Pet aʼetz toq val sete, ex inmol s-niman tetz Jesuus, uvaʼs laʼ ekʼult etibʼ tiʼ inatxhax Tiuxh, tul aʼl bʼaʼn uvaʼ laʼ elotxh etibʼ tiʼ echʼij kʼatz quBʼaal Tiuxh. Tul at ex laʼ bʼitz ex; atz at ex laʼ txhusun ex; atz at ex laʼ yolon ex tinjolt yolbʼal; atz at ex laʼ alon el inuqul kam uvaʼ laʼ alax tinjolt yolbʼal; atz at ex laʼ alon el kam uvaʼ laʼ ikʼutxh quBʼaal Tiuxh sete. Echetz aʼ ebʼan jankʼal uvaʼ laʼ txakun tiʼ ilotxhox inqʼa niman tetz Jesuus tiʼ ichʼij kʼatz quBʼaal Tiuxh. 27Oqetz nimalen ex laʼ yolon ex tinjolt yolbʼal, pet aloq taʼn kuxh kaʼvaʼl ex laʼ yolon ex, tul junun laʼ eyoloneʼ. Atzoqetz oxvoʼq ex qʼaoq laʼ yolon ex, tul taʼne. Tul tetxhalxh at invaʼl sexoʼl uvaʼ laʼ alon eluʼl inuqul. 28Pet oqetz yeʼl invaʼq sexoʼl uvaʼ laʼ alon el inuqul kam uvaʼ laʼ alax sexoʼl tinjolt yolbʼal, tul aʼletz kuxh laʼ yaʼ uvaʼ nik iyolon tinjolt yolbʼal sexoʼl, ex inqʼa niman tetz Jesuus. Tul aʼ kuxh laʼ yolonk vet te quBʼaal Tiuxh. Tul ant kuxh vet tetz sijunal laʼ ibʼana.

29Echatetz kuxh exe, uvaʼ laʼ alon el viyol quBʼaal Tiuxh. Tan laʼ utxhi uvaʼ at kaʼoxvoʼq ex laʼ alon. Pet joltetz vet ex laʼ abʼin inuqul u yol oq uvaʼ antxhte, oq aʼxh u quBʼaal Tiuxh nik aqʼon ootzaqiloq. 30Qaletz kuxh, s-tiʼ uvaʼ, at vaʼq xaol txaklele, tul sebʼt talt vaʼq yol tinjolt yolbʼal uvaʼ jit txhusel s-tiʼ. Yaʼne laʼ ikʼutxh vet quBʼaal Tiuxh vaʼt yol tu yolbʼal uvaʼ ootzaqimal etaʼn te invaʼt u xaol uvaʼ kʼuqlele. Laʼetz yaʼ vet uvaʼ sebʼt tiʼ talax u yol s-bʼaxa, tul aʼ vet vikaʼv laʼ xeʼt tiʼ talax jolt u yol tu yolbʼal uvaʼ ootzaqimal etaʼn. 31Tan laʼ utxhi laʼ etaleʼl viyol quBʼaal Tiuxh sekaqaayil, poro junun laʼ motx eyoloneʼ, jit vaʼl kuxh laʼ exeʼt yolon. Echetz kaqaayil exe laʼ txhabʼan, atz kaqaayil ex laʼ txhej etial taʼn. 32Tan jaʼl uvaʼ aqʼel txumbʼal s-te tiʼ talteʼl viyol quBʼaal Tiuxh, tan at tiqʼabʼ uvaʼ laʼ tala, atzoq laʼ imaq tibʼ tiʼ talaxeʼ. 33Tan jit aʼ isaʼ quBʼaal Tiuxh uvaʼ tal txhaq kuxh laʼ motx etal s-te, atz kamaq kuxh laʼ motx ebʼana. Pet aʼ isaʼ quBʼaal Tiuxh uvaʼ jikxh laʼ motx ebʼen tiʼ ibʼanaxeʼ.

Tan ech bʼanel taʼne xoʼl jankʼal inqʼa niman tetz Jesuus, inqʼa nik motx ikʼul tibʼ tuulbʼal inqʼa tenam. 34Tan yeʼl inqʼa ixoq nik motx itzaqʼbʼ tiʼ yol tuulbʼal uvaʼ nik talax el vaʼl viyol quBʼaal Tiuxh. Tan yeʼ laʼ utxh iyoloneʼ. Pet laʼ motx inima inqʼa ixoq inqʼa iqʼon iviʼ, tan ech uvaʼe tzʼibʼamal ka t-inqʼa bʼekʼbʼal. 35Pet oqetz at vaʼq yol uvaʼ nikaq isaʼ tabʼil te vitzumel, tul een laʼ bʼen tabʼivat t-totzotz. Tan kantxhaq kuxh tilixeʼ uvaʼ laʼ yolon inqʼa ixoq tiʼ tabʼil vaʼq yol tuulbʼal uvaʼs molel tibʼ inqʼa niman tetz Jesuus.

36Tan aʼ ikʼulel uvaʼ, aʼ laʼ ebʼan tiʼ vetatin xoʼl inqʼa emol s-niman tetz Jesuus kame uvaʼ xeʼtisamal vet tzaan taʼn inqʼa niman tetz Jesuus tiʼ kam laʼ utxh ibʼanaxeʼ. Tan jit kuxh taʼn sexoʼl nik utxhk u natxho Tiuxh, eche uvaʼe. Echetz nik valte sete uvaʼ, aʼ laʼ ebʼan kam uvaʼ nik ibʼan jolt inqʼa emol s-niman tetz Jesuus tiʼ inatxhax Tiuxh.

37Jaʼletz ex, uvaʼ at vet etxumbʼal tiʼ talax el viyol quBʼaal Tiuxh, atz jaʼl ex, uvaʼ kam tel kuxh invaʼtoʼq txumbʼal aqʼel sete taʼn viTiuxhil Tiuxh, tul toqetz bʼenoqe sete uvaʼ ibʼekʼoʼm quBʼaal JesuKriisto uvaʼ nik intzʼibʼa opoon sexoʼl. 38Pet oqetz jaʼl uvaʼ yeʼ laʼ niman inqʼa yol, inqʼa nik intzʼibʼa opoon sete, tul yeʼlatetz laʼ kʼuluxi.{*}#14.38 ¿Jabʼiletze uvaʼ yeʼ laʼ kʼuluxi nik tal u versiikulo uvaʼa? Kamaletz aʼ nik tal Paʼp tiʼ jabʼil uvaʼ yeʼ laʼ kʼulun Paʼp tuchʼ u tiqleʼm, tul yeʼlatetz laʼ kʼulux taʼn quBʼaal Tiuxh; atz maq yeʼ laʼ kʼulux taʼn inqʼa niman tetz Jesuus.

39Echetz nik valte sete, ex inmol s-niman tetz Jesuus, uvaʼ bʼantaq yaʼl tiʼ talax el viyol quBʼaal Tiuxh. Tul yeʼ laʼ emaq inqʼa emol tiʼ iyolon tinjolt yolbʼal uvaʼ jit jaʼl nik txhusun s-tiʼ. 40Pet jankʼalxh uvaʼ nik ebʼaneʼ, tul bʼanvaq, poro txhabʼavaqxh ebʼen s-tiʼ, atz jikxh ebʼantaʼ.

Currently Selected:

1 Koriintios 14: ixlC

Highlight

Copy

Compare