1 Koriintios 13
13
1Kʼuxhetz nik inyolon tiyolbʼal jolt tenam, atz kʼuxh tinjolt yolbʼal uvaʼ jit txhusel koq in s-tiʼ, kʼuxh vaʼq yolbʼal nik iyolbʼe inqʼa aanxel, poro oq yeʼl vaanima tiʼ vinmol, tul yeʼxhkametz intxaʼke.
Echetz kuxh ine, eche invaʼq kam uvaʼ vekʼeʼkʼany kuxhtuʼ, atz eche invaʼq txhʼitxhʼ uvaʼ aʼl kuxh nik itxhʼenexeʼ.
2Atz kʼuxhetz nik taqʼ viTiuxhil Tiuxh intxumbʼal, tiʼ uvaʼ nik inkʼul viyol quBʼaal Tiuxh, tul nik val eluʼl, poro oq yeʼl vaanima tiʼ vinmol, tul yeʼxhkametz intxaʼke.
Atz kʼuxh laʼ el in tuul jankʼal inqʼa txumbʼal uvaʼ yaʼn nik taqʼ quBʼaal Tiuxh ootzaqiloq s-txheel; atz kʼuxh atxh vootzaqibʼal s-tiʼ s-kaqaayil; atz kʼuxh kʼuqlelxh inkʼuul tiʼ quBʼaal Tiuxh, tul laʼ oleʼv vet in tiʼ ijalpul el inqʼa vitz t-tatibʼal, poro oq yeʼl vaanima tiʼ vinmol, tul yeʼxhkametz intxaʼke.
3Atz kʼuxh laʼ injatxeʼl jankʼal inqʼa kamaq vetz te inqʼa meebʼaʼ; atz kʼuxh laʼ vaqʼ vibʼ tzʼeʼsaloq el tiʼ inimal viyolbʼal quBʼaal Tiuxh, poro oq yeʼl vaanima tiʼ vinmol, tul yeʼxhkametz invaʼq intxʼaqaʼme s-tiʼ.
4Pet oq atxh vaanima tiʼ vinmol, toqetz intxʼol inkotxʼt invatze, kʼuxh kamxh laʼ ulbʼel in.
Oqetz atxh vaanima tiʼ vinmol, toqetz inkʼutxh bʼaʼnile s-te.
Oqetz atxh vaanima tiʼ vinmol, tul yeʼletz txhiʼtxhoile sinkʼatza s-tiʼ.
Oqetz atxh vaanima tiʼ vinmol, tul yeʼletz oksa qʼijile sinkʼatza; atz yeʼlatetz ine laʼ vaqʼ bʼen vibʼ s-nim viʼ inqʼa inmol.
5Oqetz atxh vaanima tiʼ vinmol, tul jitetz kuxh in aj tial kʼuule laʼ ibʼana.
Oqetz atxh vaanima tiʼ vinmol, tul jit kuxh taʼn in laʼ vitzʼa vibʼ tiʼ kam uvaʼ nik insaʼ sinjunal.
Oqetz atxh vaanima tiʼ vinmol, tul jitetz nal kuxh laʼ tul inviʼe s-te.
Oqetz atxh vaanima tiʼ vinmol,
tul yeʼletz kʼaʼnale laʼ inkol t-vaanima s-tiʼ.
6Oqetz atxh vaanima tiʼ vinmol, tul yeʼletz ine laʼ chiibʼ in, tiʼ uvaʼ jitxh inuqul laʼ bʼanax te vinmol, pet aʼ laʼ chiibʼ in, tiʼ uvaʼ aʼxh vinuqul laʼ bʼanax s-te.
7Oqetz atxh vaanima tiʼ vinmol, tul toq inkotxʼ invatze te vitxumbʼal.
Oqetz atxh vaanima tiʼ vinmol, tul ayaʼletz kuxh inqʼa bʼaʼne laʼ inqej s-tiʼ; pet jit nal kuxh laʼ inqej invaʼq kantxhaqe s-tiʼ.
Oqetz atxh vaanima tiʼ vinmol, tul aʼetz laʼ intxʼebʼe vibʼant u bʼaʼn.
Oqetz atxh vaanima tiʼ vinmol, tul tetxhaletz kuxh toq intxʼoleʼe kʼuxh kamxh laʼ ulbʼel in taʼn.
8Tan yeʼl paqule laʼ tanatxhi uvaʼ atxh qaanima tiʼ qumol kʼuxh kamxh laʼ palk oʼ.
Pet vikʼulux viyol quBʼaal Tiuxh, atz u talax el, tan laʼ yaʼi.
Atz laʼat yaʼ iyolbʼel inqʼa yolbʼal uvaʼ jit txhusel koq oʼ s-tiʼ.
Atz kʼuxh inqʼa txumbʼal, inqʼa yaʼn nik taqʼ quBʼaal Tiuxh ootzaqiloq s-txheel, tan laʼat sotzi.
9Tan kʼuxh oʼ inqʼa s-txheel, tan yeʼxh jankʼal qootzaqle.
Atz kʼuxh viyol quBʼaal Tiuxh uvaʼ nik qukʼuleʼ, tan yeʼxh jankʼal nik taqʼ qootzaqi, tul nik quqʼexsa.
10Pet laʼ nal opoon vaʼl qʼij uvaʼs laʼ qujalp vet s-bʼaʼn taʼn quBʼaal Tiuxh.
Yaʼne laʼ tzoqp vet qootzaqit tiʼ jankʼal bʼiil vatziʼ qootzaqle.
11Tuulbʼaletz uvaʼs xaakich kuxh in, tul iyolonich neʼ xaak inyoloneʼ.
Atz titzʼabʼalich neʼ xaak vitzʼabʼal.
Tul aʼ kuxh saatxh nikich vitzʼa.
Pet bʼenetz vet in s-vinaq, tul vaqʼ vet ka vinnitxaʼitbʼal.
12Pet s-txheel, tan bʼiil kuxh inqʼa yol nik qileʼ.
Tan ech kuxh nik qilt, eche qilt quvatz t-invaʼq espeejo uvaʼ poel kuxhtuʼ.
Pet laʼ opoon invaʼl qʼij uvaʼs laʼ qootzaqi vet s-kaqaayil.
Tan ech laʼ qilt vet, eche laʼ tilt tibʼ quvatz s-quvatzaq.
Pet eche in s-txheel, tan bʼiil kuxh vootzaqle.
Pet opoon nal vaʼl qʼij uvaʼ laʼ vootzaqi vet s-kaqaayil taʼn quBʼaal Tiuxh, yaʼne laʼ vootzaqi vet s-bʼaʼn, eche uvaʼ tootzaqit in quBʼaal Tiuxh.
13Atetz oxvaʼl inqʼa bʼaʼnil uvaʼ bʼenamen laʼ qubʼantaʼ.
Vaʼletze uvaʼ: Kʼuqloq qukʼuul tiʼ quBʼaal Tiuxh tiʼ kaqaayil inqʼa laʼ qubʼan s-vatz.
Vaʼtetze uvaʼ: Qutxʼebʼon tiʼ tul u quBʼaal Jesuus.
Atz vaʼtetze uvaʼ: At qaanima tiʼ qumol laʼ ibʼana.
Aloq aʼxh palnaʼq tiqleʼm uvaʼ atxh qaanima tiʼ u qumol laʼ ibʼana viʼ kaʼt inqʼae.
Currently Selected:
1 Koriintios 13: ixlC
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
