Títò 2

Kpɔ́lù wà ɖíre ɛ̀kɔ́-ire fú Títò, tsí kó tseé fú ɔ̀nyà-ìrɔ́ǹrɔ́ yèé ŋa wà nɛ́gbɛ́-Kírísítò ŋa#á

1Ó ɖi ìwɔ òŋu, nà tsɛ̀kɔ́-òtítɔ́#ɛ́ fú ŋa. 2Nà fɔ̀ fú arúkà ŋa ní ká wà mú ara-ŋa, tsí ká wà bu ìɖì si fú ara-ŋa, tsí ká wà tse iŋɛ́-ɔ̀nyà gbo. Tsí àkaralé-ŋa gbo, àmúɖɔ̃̀-ŋa gbo, odzú gbígbó-ŋa gbo kó wà wɔlɛ̀ rere.

3Ńǹrɔ́-bɛ́ɛ̀ ké ní nàa fɔ̀ fú arígbó ŋa gbo ní ká gbé kíbí ɛnɛ yèé ŋa dzɛ́ ti Ɔ̀ɖáyé akpá akpá, ɛsɛ̀ ɛsɛ̀#ɛ́. Ká máa dzɛ́ abàdzɛ́nɛ ŋa. Ká máa dzɛ́ àmɔ̀tíŋɔ́ ŋa gbo. Ká wà dzokó bá èkíɖã ŋa, tsí ká wà fú ŋa ńǹsérè rere. 4Bɛ́ɛ̀ ní à nákó wà kɔ́ ŋa ńǹrɔ́-kíbí à nákó nyáa gbé gbà, tsí ká nɛ́ àmúɖɔ̃̀ fú ɔkɔ-ŋà ŋa òŋu ɔma-ŋà ŋa#á. 5Bɛ́ɛ̀ ké ní à nákó wà tse iŋɛ́-ɔ̀nyà gbo, tsí à kàkó wà sũ̀ wérí#ɛ́. Tsí à nákó wà banɛ́ kpáfɛ rere, tsí wà wo ire fúnɛ gbo. À nákó wà bu ìɖì si fú ɔkɔ-ŋà ŋa gbo. Bí à gbé bɛ́ɛ̀, ɔ̀nyà-kã̀ kpókpó kàkó nyáa wí afɔ̀-íbàɖí nára-afɔ̀-Ɔ̀ɖáyé.

6Nà ɖáàmí le ɔmɔ̀tsɔ́ ŋa gbo bɛ́ɛ̀ ké ní ńŋɛ́ ɔ̀kã̀lɔ́ɔ̀kã̀ kpó#ɛ́, ká wà tse iŋɛ́-ɔ̀nyà. 7Ó ɖi, ìwɔ òŋu, nà tse ore fúnɛ, tsí o ń ɖíre fú ŋa ní bɛ́ɛ̀ ní à náa tse#ɛ́. Bí ò wà tsɛ̀kɔ́ fú ŋa#á, nà nyà ɖíre ní ɔ̀nyà-atsòtítɔ́ ní ò dzɛ́#ɛ́, tsí ìgbèngbé-ɛ̀ɛ gbo kó tse tsí ká wà nɛ́ àrísá fɛ́ɛ. 8Afɔ̀ gbo kó wà gãgã nárũ-ɛ̀ɛ, tsí ɔ̀nyà-kã̀ kpókpó kó máa nyáa dzìnyàɛ́. Kó lɔ bɛ́ɛ̀, àtsùgbée ɔ̀tɛ̀-ɛ̀ɛ ŋa ká dzanɔ́, tsí ká máa nyáa rí afɔ̀-íbàɖí-kã̀ kpókpó fɔ̀ nára-wa.

9Nà wí fú arú ŋa gbo ní ká wà gbɔ̃́ɔ̃̀rã̀ fú olówó-ŋà ŋa ńŋɛ́ kpó, tsí ńǹtsèntse-ŋa gbo, ká wà dzɔdzú-olówó-ŋa gbo. Bí olówó-ŋa fɔ afɔ̀-kã̀ fú ŋa, ká máa kɔ̀ɔ́. 10Tsí ká máa kɛ́ iŋɛ́-kã̀ kpókpó, tsí ń tsolè tse. Ó ɖi, àkaralé kó wà ńǹtá-ŋa, tsí ká dzɛ́ ɔ̀nyà-ire. Ńbɛ̀ɛ́, ńŋɛ́ ɔ̀kã̀lɔ́ɔ̀kã̀ kpó yèé à nákó wà tse#ɛ́, à nákó wà bu ìɖì si fú ɛ̀kɔ́-Ɔ̀ɖáyé Agbanɛlà.

11Bɛ́ɛ̀ ní ó wà ní o fɔ̀ fú olí-Yèésù ŋa kpó#ɛ́. Ó ɖi, Ɔ̀ɖáyé bɛ Yèésù olóore-ɔ̀fɛ́ wá ńǹtalɛ̀ bí, tsí kó wáa gba ɔ̀nyà kpó là gbà ńǹtá‐ɛ̀ ni. 12Tsí olóore-ɔ̀fɛ́#ɛ́ náa wà tsɛ̀kɔ́ fú wa ní àa kó máa kɔ Ɔ̀ɖáyé sísɛ̃̀, tsí ká máa mú odzú ta iŋɛ́-ìtalɛ̀ bí ŋa gbo ró. Ó ɖi, àa kó wà tse iŋɛ́-ɔ̀nyà, tsí wà tse òtítɔ́-Ɔ̀ɖáyé, tsí àa kó wà nɛ́ àrísá fú Ɔ̀ɖáyé gbo. Bɛ́ɛ̀ ní ó wà ní ká gbé gbà ńnɔ́-ayé#ɛ́.

13Ńǹgbèngbé-ìrɔ́ nyɛ̀ŋɛ̀ ní àa nákó wà si, tsí módzú si nɔ́ɔ̀nà si fú ɔdzɔ́-ayè títɛ́#ɛ́. Nɔ́dzɔ́ nyɛ̀ŋɛ̀ ní Yèésù nákó wá nódzú-ɔ̀nyà kpó òŋu iyì‐ɛ̀#ɛ́. Yèésù Kírísítò#ɛ́, ó lákṹ, tsí dzɛ́ Ɔ̀ɖáyé Agbanɛlà. 14Òŋu ní mú ara‐ɛ̀ kparɔ arũ-wa, àtóoríi kó gbà wá dzɔ̀ɔ́ nárũ-àbi dzídzɛ ɔ̀kã̀lɔ́ɔ̀kã̀, tsí kó wɛ inɔ́ fú wa gbo, tsí ká má kpó#ɛ́. Ó tse bɛ́ɛ̀, àtsùgbée ká ɖi ìlú ɔ̀kã̀ntso, tsí ìlú#ɛ́ kó dzɛ́ tɛ̀ɛ̀ òŋu níìkã̀ntso, tsí kó tã́ ńnɔ́-wa kpó ní ká wà tse iŋɛ́-ire ɔ̀kã̀lɔ́ɔ̀kã̀.

15Bɛ́ɛ̀ ní nàa wíìnyɛ̀ fú ɔma-ɛgbɛ́-Kírísítò ŋa òŋu ikpá yèé wà fɛ́ɛ#ɛ́. Nàa wà ɖáàmí le ŋá, tsí nàa wà bá ŋa fɔ̀ gbo. Ó ɖi, ɔ̀nyà-kã̀ kpókpó kó máa múɛ kpe kí ŋa ńnɛ̀ɛ́.

Currently Selected:

Títò 2: ngl

Highlight

Copy

Compare