Títò 1

1Èmi Kpɔ́lù, ǹ dzɛ́ àtsìtsɛ́-Ɔ̀ɖáyé, tsí dzɛ́ adzítsɛ́-Yèésù† Kírísítò† gbo, èmi ní wà tse ìwé yèé bɛ́ fú ìwɔ Títò#ɛ́. Ɔ̀ɖáyé tsã̀ mí ní n dzíkɔ̀ fú ɛnɛ yèé ó tsã̀ si ŋa#á, tsí ká gba Yèésù† gbɔ́, tsí ká ma òtítɔ́ gbo kpó yèé wà ńnɛ̀#ɛ́. Òtítɔ́#ɛ́ ní náa ɖíre kíbí ká gbé gbà, tsí ká dzɔdzú-Ɔ̀ɖáyé#ɛ́ fú wa#á. 2Ǹ wà dzíkɔ̀ fú ŋa bɛ́ɛ̀, àtsùgbée ká módzú si nɔ́ɔ̀nà si ní à nákó rí àyɛ̀-àrìtã́. Ɔ̀ɖáyé, òŋu ní gbà wá là#á, tsí kà tsòɖòbò láyé. Ó ti tàlé-àyɛ̀-àrìtã́ si tã́ná kó ɖá ayé#ɛ́. 3Tsí náàsòkò yèé dzì ńǹɖì‐ɛ̀ tútútú#ɛ́, ó nya ikɔ̀-àyɛ̀-àrìtã́#á ɖíre fúnɛ, tsí ó múu bɔwɔ́-mi, tsí ɖá itsɛ́‐ɛ̀ bɔwɔ́-mi ní èmi kó wà dzɛ́ɛ fúnɛ.

4Báàyí#ɛ́, Títò, ǹ wà kíɛ. Ò wà fú mi kíbí ɔma-mi bíbí bɛ́. Iŋɛ́ yèé tse#ɛ́, ǹ wíìnyɛ̀ fɛ́ɛ, tsí ò gba Yèésù gbɔ́ kíbí èmi gbo ǹ gbàá gbɔ́ gbà#á. Ɔ̀ɖáyé Boba-wa òŋu Yèésù Kírísítò Agbanɛlà-wa méèdzì ká tse ore-ɔ̀fɛ́ fɛ́ɛ, tsí ká fɛ́ɛ ńtútùúrɔ̀ gbo.

Kpɔ́lù wà ɖá itsɛ́ fú Títò, tsí wà fɔ kíbí onùgbó-ɛgbɛ́-Kírísítò nákó gbé gbà#á fúu

5Iŋɛ́ yèé tse tsí ǹ kɔ̀ɛ́ dzɔ̀ɔ́ ńlɛ̀-Kɛ̀rɛ́tì#ɛ́ ní dzɛ́ ní o mú ètò yèé bɔ̀ ŋa#á si nɛ́kpa nɛ́kpa. Kíbí ǹ kɔ́ɛ#ɛ́, nà lɔ ńǹlú kã̀kã̀ bɛ̀, tsí nà tsã ɔ̀nyà ŋa, tsí ká dzɛ́ onùgbó-ɛgbɛ́-Kírísítò. 6Onùgbó-ɛgbɛ́-Kírísítò#ɛ́, kò wà ní ɔ̀nyà-kã̀ kpókpó kó rí íbàɖí-kã̀ fɔ̀ nára‐ɛ̀. Kó náya ɔ̀kã̀ntso, tsí aya#á kó tóo. Tsí ɔma‐ɛ̀ ŋa gbo ká dzɛ́ olí-Yèésù ŋa, tsí ká máa rí ìlò-tsítsìíra nára-ŋa nàmí ká wà fɔ̀ nára-ŋa ní à dzɛ́ ɔma kò gbɔ́ ìlú fú boba òŋu ínà.

7Ńbɛ̀ɛ́, onùgbó-ɛgbɛ́-Kírísítò#ɛ́, ɔ̀nyà-kã̀ yèé wà rí ìtá-itsɛ́-Ɔ̀ɖáyé#ɛ́ ní ó dzɛ́#ɛ́. Kò wà ní ká rí íbàɖí-kã̀ fɔ̀ nára‐ɛ̀. Kó máa wà rí ara‐ɛ̀ gbo. Kó máa yáa wà bínɔ́ gbo. Kó máa dzɛ́ àmɔ̀tíŋɔ́ gbo. Kó máa dzɛ́ olí-àhã́rã́máɖí gbo. Owó rírí gbo kó máa kpã́dzú fúu lárè, tsí kó wà ɖí ɔ̀nyà ŋa si.

8Kà kàa bɛ́ɛ̀, ó wà ní kó wà gba àledzò rere, tsí kó wà dzáfɔ̀-iŋɛ́-ire tsítse gbo gé. Ó wà gbo ní kó wà tse iŋɛ́-ɔ̀nyà, tsí kó dzɛ́ atsòtítɔ́, tsí kó dzɛ́ ti Ɔ̀ɖáyé akpá akpá, ɛsɛ̀ ɛsɛ̀, tsí kó nyáa wà mú ara‐ɛ̀ gbo. 9Tsí ó wà gbo ní kó tsáki afɔ̀-Ɔ̀ɖáyé banɛ́ si kũkũ kíbí à tsɛ̀kɔ́‐ɛ̀ fúu gbà#á. Afɔ̀-Ɔ̀ɖáyé#ɛ́, àkaralé wà ńnɛ̀. Bí ó tse bɛ́ɛ̀, nákó nyáa múu, tsí ń ɖáàmí le ɛnɛ-àtíbɔ̀ ŋa. Tsí ɛnɛ yèé ŋa gbo wà dzìnyà#á, nákó nyáa ɖíre iŋɛ́ yèé à wà fɔ̀ sé#ɛ́ gbo fú ŋa.

10Ó ɖi, ɔ̀nyà kpíkpɔ̀ wà náàŋírĩ-ɔma-ɛgbɛ́-Kírísítò ŋa, tsí à kà rɛ̃tígbè-afɔ̀-onùgbó-ɛgbɛ́#ɛ́ ŋa, tsí à náa wà tse òmírɛ̃̀. À náa wà rúnɛ, tsí wà fɔ afɔ̀-ògbóòró gbo fúnɛ. Tsí náàŋírĩ-ŋa#á, ɔma-Ìyúɖà† yèé gba Yèésù gbɔ́ ŋa#á ní kpɔ̀ lárè#ɛ́. 11Ɛnɛ nyɛ̀ŋɛ̀ ŋa#á, ó wà ní o kũ afɔ̀#ɛ́ nárũ-ŋa. Ó ɖi, à náa mú ɔ̀nyà ŋa ńkpàtá gbuɖu-kã̀, tsí nyí ìsérè-ŋa kpaɖà kpó, tsí wà tsɛ̀kɔ́ yèé ŋa kò dzɔ ní ká tse#ɛ́ fú ŋa, àtsùgbée ká wà ń gbowó nɔ́wɔ́-ŋa gé.

12Ká fɔ̀ gìɖì#ɛ́, ɔ̀nyà-kã̀ wà, tsí ti ńlɛ̀-Kɛ̀rɛ́tì#ɛ́ òŋu ká‐ɛ̀, tsí ó ti fɔ̀ si nára tɛ̀ɛ̀ ŋa si ní: “Ɛnɛ-Kɛ̀rɛ́tì ŋa#á, olóòɖòbò, ɛrã-kóko, ɔ̀gɛ̃, adzèsè ŋa gé ní à dzɛ́#ɛ́.” 13Ìɖéǹɖè#ɛ́, òtítɔ́ ní ó fɔ̀#ɛ́. Ó wà ní o dzára fú ŋa, tsí bá ŋa fɔ̀, àtsùgbée àkaralé-ŋa kó wɔlɛ̀. 14Ńbɛ̀ɛ́, bí ɔma-Ìyúɖà ŋa#á wà kpɛ̀rɔ́-òɖòbò-ŋa fú ŋa, à kàkó mú ɔ̀kã̀ ńnɛ̀ fú ŋa ró. Tsí bí ɛnɛ yèé ŋa gbo kɔ òtítɔ́#ɛ́ ɖá ɛ̀wɔ̀ fú ŋa, à kàkó rɛ̃tígbè-ŋa.

15Ɛnɛ yèé ŋa inɔ́-ŋa má si#ɛ́, iŋɛ́ kpó náa má fú ŋa. Tsí ɛnɛ yèé ŋa kò gba Yèésù gbɔ́, tsí à gbɛ̃ɛ̃́rĩ́ si#ɛ́, iŋɛ́-kã̀ kpókpó kà má fú àŋa òŋu. Íbàɖí tsítse ti gbɛ̃ɛ̃́rĩ́ ìsérè-ŋa gbo òŋu ɛ̀ɖɔ̃̀-ŋa gbo, tsí à kà ma íbàɖí níìkã̀ fú ire gbo ró. 16À náa fɔ̀ ní àŋa wà sɛ̃ Ɔ̀ɖáyé, tsí ìtsèntse-ŋa náa wà nyà ɖíre ní à kò tì màá. À kɔ Ɔ̀ɖáyé, tsí à kà nyáa tse ire-kã̀ kpókpó gìɖì gbo. Ɔ̀ɖáyé gbo nákó nyà ŋá kãdzú.

Currently Selected:

Títò 1: ngl

Highlight

Copy

Compare