Fìlíkpò ŋa 2

1Ńbɛ̀ɛ́, ɛ̀ŋɛ Kírísítò méèdzì, è ɖi ɔ̀kã̀ntso si, tsí ó wà ɖáàmí le ŋɛ́ nɔ̀! Tsí àmúɖɔ̃̀‐ɛ̀ gbo náa wà ɖáàmí le ŋɛ́ nɔ̀! Mímí-Ɔ̀ɖáyé† gbo tse tsí è náa wà tsobí bá ara-ŋɛ́ ŋa nɔ̀! È náa wà rí ànyínɔ́ fú ara-ŋɛ́ ŋa, tsí wà gbɔ́ ɖíɖɔ̃̀ gbo fú ara-ŋɛ́ ŋa nɔ̀! 2Kíbí ó dzɛ́ bɛ́ɛ̀#ɛ́, ìgbèngbé-ŋɛ́ kó tse tsí ayè kó wà tɛ́ mi dzálɛ̀. Ìsérè-ŋɛ́ ŋa kó tse ɔ̀kã̀ntso si, tsí e nɛ́ àmúɖɔ̃̀ ìrɔ́ ɔ̀kã̀ntso gbo fú ara-ŋɛ́ ŋa, tsí e máa kpɛ̃́ ɛgbɛ́#ɛ́ gbo. 3È máa tse iŋɛ́-kã̀ kpókpó òŋu ìsérè-e ń ɖugbã̀-nɛ nàmí òŋu ìsérè-ká rí ní ɛ̀ŋɛ ní dzɛ́ bɛ́ɛ̀#ɛ́ nákpotu gé. Kà kàa bɛ́ɛ̀, è náa wà tɛ ara-ŋɛ́ bɔlɛ̀, tsí e wà rí ɛnɛ-àtíbɔ̀ ŋa ní à lárè ŋɛ́. 4Tsí e máa wà wo ti ara-ŋɛ́ gé. Ó ɖi, e wà wo ti ɛnɛ-àtíbɔ̀ ŋa gbo.

5È lìlò ńǹrɔ́-kíbí Yèésù Kírísítò lò gbà wáa lɔ ɛ́.

6Kírísítò òŋu#ɛ́, ìlò‐ɛ̀ òŋu ìlò-Ɔ̀ɖáyé méèdzì dzɛ́ ɔ̀kã̀ntso si,

tsí òŋu Ɔ̀ɖáyé méèdzì ɖé bá ara-ŋa ńŋɛ́ ɔ̀kã̀lɔ́ɔ̀kã̀ kpó.

Ó ɖi, kò sì le oŋù ní òŋu Ɔ̀ɖáyé méèdzì àŋa ɖé.

7Kà kàa bɛ́ɛ̀, ó kɔ ìɖì‐ɛ̀ dzɔ̀ɔ́ nákpálà-kã̀.

À bíi nɔ́ɔ̀nyà, tsí ó dzɛ́ ní òŋu kó gba ìɖì-arú.

Ńǹwèrè yèé ó wáa ɖi ɔ̀nyà#á,

8ó tɛ ara‐ɛ̀ bɔlɛ̀.

Ó gbɔ̃́ɔ̃̀rã̀ fú Ɔ̀ɖáyé títí dzɛ́ ní òŋu kó kú.

Ikú‐ɛ̀#ɛ́, à kã̀ã́ si ńǹtá-egi-ìɖáàgàlàdzà† ni.#2:8 Ká kú si ńǹtá-egi-ìɖáàgàlàdzà#á, ikú-anɔ́ ní ó dzɛ́#ɛ́. Iŋɛ́ yèé tse#ɛ́, fɔ́ɔ̀lúfɔ́ɔ̀lú ŋa ní à náa kpa bɛ́ɛ̀#ɛ́.

9Àtsùgbée bɛ́ɛ̀#ɛ́, Ɔ̀ɖáyé mú ìɖì yèé kpeéwo#ɛ́ bɔwɔ́‐ɛ̀,

tsí fúu nɛ́kɔ yèé kpeéwo fú ɛ́kɔ ɔ̀kã̀lɔ́ɔ̀kã̀ kpó#ɛ́.

10Ó tse bɛ́ɛ̀, àtsùgbée iŋɛ́-àyɛ̀ ŋa kpó,

yèé ŋa wà nɔ́ɔ̀rɔ̃ gbo, yèé ŋa wà ńǹtalɛ̀ gbo òŋu ńnɔ́-ilɛ̀ gbo,

bí à wà gbɔ́ ɛ́kɔ-Yèésù ná, ni ká wà kálɛ̀, tsí wà sɛ̃̀ɛ̃́,

11tsí àŋa kpó ká wà fɔ̀ ní Yèésù Kírísítò dzɛ́ Ɔlɔ́dzɔ́,

tsí wà ń nya iyì-Ɔ̀ɖáyé Boba ɖíre.

12Ńbɛ̀ɛ́, àrínódzú-mi ŋa, ó wà ní e wà gbɔ̃́ɔ̃̀rã̀ fú Ɔ̀ɖáyé làkóò kíbí è ti wà tseé dzɔ̀ɔ́ dzɔ̀ɔ́ ńǹwèrè yèé ǹ wà ńɖi-ŋɛ́ si#ɛ́, tsí ó wà ní e wà gbɔ̃́ɔ̃̀rã̀ fúu lárè bɛ́ɛ̀ ró náànyì-mi ńǹkɛ̀ɛ́. È nɛ́ àrísá fú Ɔ̀ɖáyé, tsí e wà ŋá kpó kpàkpàkpà, tsí iŋɛ́ yèé ŋa nákó nyà ɖíre ní Ɔ̀ɖáyé wà gbà ŋɛ́ là#á, è wà tse ŋá dzálɛ̀. 13Ó ɖi, òŋu ní wà tsitsɛ́ náàŋírĩ-ŋɛ́#ɛ́. Ó wà tse tsí è náa wà wò ní àŋa kó wà tse iŋɛ́ yèé náa dzɔdzú‐ɛ̀ ŋa#á, tsí náa wà tse gbo, tsí è náa wà tse ŋá.

14È tse iŋɛ́ kpó náàrì kpɔ̀kɔ̃̀ɔ̃́rɔ̃̀, náàrì dzìnyà, 15tsí ìlò-ŋɛ́ gbo kó má, tsí ɔ̀nyà ŋa gbo kó máa bá ŋɛ́ fɔ̀. Ɔma-ìsɛ̃̀ɛ̃́ ŋa náa wà tse íbàɖí-ìrɔ́-ɔ̀kã̀lɔ́ɔ̀kã̀ kpó. Ó ɖi, è nákó dzɛ́ Ɔma-Ɔ̀ɖáyé ŋa, tsí íbàɖí-kã̀ kpókpó kó máa gbɛ̃ɛ̃́rĩ́ ìlò-ŋɛ́. Tsí è nákó dzɛ́ kãnɖé fú ɔma-ìsɛ̃̀ɛ̃́ ŋa si. 16Ìɖéǹɖè#ɛ́, è banɛ́ ikɔ̀ yèé náa fúnɛ náàyɛ̀#ɛ́ si, tsí wà dzɛ́ɛ fú ɛnɛ-àtíbɔ̀ ŋa. Bí è wà tse bɛ́ɛ̀, nɔ́dzɔ́ yèé Yèésù Kírísítò nákó wá#á, màa nyáa nyɛ ara-mi ní itsɛ́ yèé ǹ ɖìgírí tó bɛ́ɛ̀, tsí tse kpó#ɛ́, kò dzɛ́ iŋɛ́ rírá.

17Kíbí è gba Kírísítò gbɔ́, tsí àyɛ̀-ŋɛ́ ŋa kpó dzɛ́ ti Ɔ̀ɖáyé si#ɛ́, è wà kíbí ɛbɔ yèé à náa tse fú Ɔ̀ɖáyé#ɛ́ bɛ́. Tsí bí à kpa mí nóòkú, àmbara-mi nákó ɖà má ɛbɔ tiŋɛ́ kíbí ɔtí yèé à náa ń ɖà má ɛbɔ#ɛ́. Bí ó dzɛ́ gìɖì ní à kpa mí nóòkú bɛ́ɛ̀, ayè nákó tɛ́ mi, tsí màa táyè bá ɛ̀ŋɛ gbo kpó. 18Ɛ̀ŋɛ gbo, ayè kó tɛ́ ŋɛ́ ńǹrɔ́-bɛ́ɛ̀ ké, tsí e táyè bá èmi gbo.

Kpɔ́lù tse ètò ti nára-Tìmɔ̀té òŋu Èkpàfòɖítì

19Ǹ karalé ní Yèésù Ɔlá-wa nákó mɔ́wɔ́ gbè fú mi, tsí màa yára bɛ Tìmɔ̀té wá fú ŋɛ́. Tsí bí ó bɔ̀ ti ńɖɔ-ŋɛ́ wá ná, ni n gbɔ́ ikɔ̀-ŋɛ́ ŋa, tsí kó ɖáàmí le èmi gbo. 20Ɔ̀nyà-kã̀ kpókpó kò wà ńɖɔ̀-mi bí náànyì‐ɛ̀, tsí wà tsèsérè-ŋɛ́ bá mi, tsí wà mú afɔ̀-ŋɛ́ tsitsɛ́ tse nóòtítɔ́. 21Ɛnɛ-àtíbɔ̀ ŋa kpó wà wo ti ara-ŋa gé ni, à kò wà wo ti Yèésù Kírísítò. 22Ó ɖi, Tìmɔ̀té òŋu, ó ti nyàá ɖíre ní òŋu dzɛ́ ɔ̀nyà òtítɔ́. Tsí è mà gbo ní omi kà la àŋírĩ-èmi‐ɛ̀ méèdzì kíbí boba òŋu ɔma bɛ́, tsí àa náa dzɔ́ tsitsɛ́, tsí ń dzíkɔ̀ ɖíɖɔ̃̀ fúnɛ.

23Ńbɛ̀ɛ́, bí ǹ ma kíbí iŋɛ́ ŋa#á nákó wáa lɔ fú mi gbà#á, ǹ wà tsèsérè ní màa bɛ̀ɛ́ wá fú ŋɛ́. 24Tsí ǹ karalé ní Ɔlá-wa nákó tse, tsí èmi gbo màa wá ńɖɔ-ŋɛ́ nára-ɔdzɔ́.

25Ń tèmi òŋu, ó kpã́dzú ní n sɛ̃̀ bɛ Èkpàfòɖítì wá fú ŋɛ́. Ó dzɛ́ ìnàbí-mi, tsí àa dzɔ́ wà tsitsɛ́, tsí dzɔ́ wà ɖù fú ikɔ̀ ɖíɖɔ̃̀#ɛ́ gbo. È bɛ̀ɛ́ wá fú mi ní kó wáa mɔ́wɔ́ gbè fú mi ńnɔ́-iŋɛ́ yèé wà hã́ mi ŋa#á. 26Ǹ rí ní ó kpã́dzú ní n sɛ̃̀ bɛ̀ɛ́ wá fú ŋɛ́, iŋɛ́ yèé tse#ɛ́, àmì-ŋɛ́ wà kpaá tó bɛ́ɛ̀. Tsí ó wà ɖíìhã̀ŋù gbo, iŋɛ́ yèé tse#ɛ́, è gbɔ́ ní ó tsàkɔ̃̀rɔ̃̀. 27Ìɖéǹɖè#ɛ́, ó rɔ̃̀, tsí ó bɔ oɖé ó má kú. Ó ɖi, Ɔ̀ɖáyé rí ànyínɔ́ fúu, tsí kò rí ànyínɔ́ fú òŋu níìkã̀ntso gé, ó rí ànyínɔ́ fú èmi gbo. Ó tse bɛ́ɛ̀, àtsùgbée ara kó máa kú mi máa ró.

28Ńbɛ̀ɛ́, ǹ yára bɛ̀ɛ́ bàa fú ŋɛ́, àtsùgbée bí è ríi ró, ni ayè kó tɛ́ ŋɛ́, tsí ìhã̀ŋù yèé wà nɛ́ɛ̀ɖɔ̃̀-mi si#ɛ́ kó nyà bɔ̀. 29È gbàá òŋu ayè títɛ́ lákṹ-kã̀ ńǹrɔ́-kíbí olí-Yèésù ŋa náa gba ìnàbí ŋa#á. È mú ìɖì-onùgbó fúu òŋu ɔ̀nyà kpó yèé wà tsitsɛ́ kíbí òŋu#ɛ́. 30Ó ɖi, ó tsitsɛ́-Kírísítò títí ó bɔ oɖé tsɛ̃́ ó má kú. Ó mú ikú‐ɛ̀ tà, tsí wáa kparɔ arũ-ŋɛ́ ńɖɔ̀-mi, tsí wà mɔ́wɔ́ gbè fú mi.

Currently Selected:

Fìlíkpò ŋa 2: ngl

Highlight

Copy

Compare