Fìlíkpò ŋa 3

Kpɔ́lù wà fɔ̀ fú ɔma-ɛgbɛ́-Kírísítò ŋa ńFìlíkpò ní ká máa rɛ̃tígbè-ɛ̀kɔ́-òɖòbò ŋa, ó ɖi, ká rí òŋu tse

1Ìnàbí-mi ŋa, báàyí#ɛ́, ayè kó wà tɛ́ ŋɛ́ ní ɛ̀ŋɛ Ɔlá-wa méèdzì, è ɖi ɔ̀kã̀ntso si! Afɔ̀ yèé ǹ ti fɔ̀ fú ŋɛ́ wáa lɔ#ɛ́, kò sú mi ní ǹ tɔ́ wà fɔ afɔ̀ ɔ̀kã̀ntso#ɛ́ fú ŋɛ́ ró, tsí afɔ̀#ɛ́ nákó tsɛ́wé bò ŋɛ́. 2È tsɔ́ éwo-ara-ŋɛ́ ŋa rere nára-ɔ̀nyà-íbàɖí ŋa. È tsɔ́ éwo-ara-ŋɛ́ nára-adzá nyɛ̀ŋɛ̀ ŋa. À náa wà bàdzɛ́ ara fúnɛ. À wà le oŋù si ńǹtá‐ɛ̀ fú ŋɛ́ ní e ɖákó, àtsùgbée Ɔ̀ɖáyé kó gbà ŋɛ́ là. 3À ní àŋa ní dzɛ́ olí-okó ɖíɖá†#á. Ó ɖi, nóòtítɔ́#ɛ́, àwa ní dzɛ́ ɔlá‐ɛ̀#ɛ́. Mímí-Ɔ̀ɖáyé† wà mɔ́wɔ́ gbè fú àwa-òŋu, tsí àa wà sɛ̃ Ɔ̀ɖáyé, tsí àa wà mú iŋɛ́ yèé Yèésù Kírísítò tse fú wa#á, tsí wà ń nya akpá. Àa kò karalé si ńǹtá-iŋɛ́ yèé ŋa àa tse náàmí-ara-wa#á. 4Àa kò karalé si ńǹtá-iŋɛ́ nyɛ̀ŋɛ̀ ŋa. Ó ɖi fee, iŋɛ́ nyɛ̀ŋɛ̀ ŋa má bàkó nyáa tse tsí ɔ̀nyà kó rí ɔlà#á, ǹ má nyáa karalé si ńǹtá-ŋa gbo. Tsí bí ɔ̀nyà-kã̀ wà fɔ̀ ní ɔ̀nà wà fú òŋu ní òŋu kó karalé si ńǹtá-iŋɛ́ yèé ŋa òŋu tse náàmí-ara-òŋu#ɛ́, ǹ mà ní ɔ̀nà wà fú mi lárèé. 5Kíbí à bí mi#ɛ́, à ɖákó fú mi nɔ́dzɔ́-ɛ̀kɛ́ɛdzɔ‐ɛ̀. Ǹ dzɛ́ ɔma-Ìsàràyɛ́lì†, tsí náàŋírĩ-ɔma-Ìsàràyɛ́lì ŋa#á, ǹ dzɛ́ ɔmalɔ́ma-Bɛ̃̀dzàmɛ́nì†. Ɔma-Hèbérù bíbí gbo ní ǹ dzɛ́#ɛ́. Tsí ǹ dzɛ́ ɔma-ɛgbɛ́-Fàrísì† ŋa gbo dzɔ̀ɔ́ dzɔ̀ɔ́, tsí mà wà rɛ̃̀ si nɛ́kpa-Mɔ̀ɔ́sè† nɛ́kpa nɛ́kpa. 6Mà banɛ́ orò-ɔma-Ìyúɖà† ŋa nɔ́wɔ́ méèdzì, tsí ó tse tsí mà wà tsoró bá ɔma-ɛgbɛ́-Kírísítò ŋa. Tsí ti nára-ɛkpa-Mɔ̀ɔ́sè#ɛ́, ɔ̀nyà-kã̀ kpókpó kàkó nyáa bá mi fɔ̀ ní ǹ dzɛ̀wɔ̀-kã̀ wòrí. 7Ɖzɔ̀ɔ́ dzɔ̀ɔ́#ɛ́, ǹ ɖédzú ní ǹ wà dzɛ èrè-kã̀ ńnɔ́-iŋɛ́ nyɛ̀ŋɛ̀ ŋa ni. Ó ɖi báàyí#ɛ́, náàtsùgbé-Kírísítò#ɛ́, ǹ rí ní ɛŋɛ̀ ní ǹ dzɛ wáa lɔ#ɛ́. 8Nóòtítɔ́#ɛ́, ǹ rí ní iŋɛ́ nyɛ̀ŋɛ̀ ŋa kpó dzɛ́ ɛŋɛ̀ fú mi. Iŋɛ́ yèé tse#ɛ́, ǹ dzá ńǹtá-iŋɛ́-kã̀ yèé sã̀ lárè#ɛ́. Iŋɛ́#ɛ́ ní dzɛ́ ní ǹ ma Yèésù Kírísítò Ɔlá-mi#ɛ́. Tsí àtsùgbée n màá#á, ǹ kɔ iŋɛ́-mi ŋa dzɔ̀ɔ́ kpó, tsí iŋɛ́ ŋa#á wà fú mi kíbí gugurɛ̃́ bɛ́, iŋɛ́ yèé tse#ɛ́, à kò wà mɔ́wɔ́ gbè fú mi ní n tamá-Kírísítò, 9tsí ɖi ɔ̀kã̀ntso báa dzálɛ̀. Ɔ̀ɖáyé kò tse àtsùgbée kíbí ǹ wà rɛ̃̀ si nɛ́kpa‐ɛ̀ ŋa#á, tsí gbà mí nɔ́ɔ̀nyà-atsòtítɔ́ nódzú-ara‐ɛ̀. Ó ɖi, ó tse àtsùgbée kíbí ǹ gba Kírísítò gbɔ́#ɛ́ ni. Òtítɔ́-ìrɔ́ nyɛ̀ŋɛ̀#ɛ́, náa ti ńɖi-Ɔ̀ɖáyé ni. Ɔ̀ɖáyé náa tseé, tsí ɔ̀nyà ɔ̀kã̀lɔ́ɔ̀kã̀ yèé karalé si ńǹtá-Kírísítò#ɛ́ ní náa gbà bɛ́ɛ̀#ɛ́. 10Ǹ kò wà wo iŋɛ́-kã̀ kpókpó náànyì-n ma Kírísítò máa rere, tsí n rí iŋɛ́ tsítse-ikpá yèé dzíi ti náàŋírĩ-òkú ŋa wá náyé#ɛ́ náyé-èmi gbo. Tsí ǹ wà wò gbo ní n dzɛ́ ní n réré kíbí ó réré gbà#á. Tsí ńǹrɔ́-kíbí Kírísítò kú#ɛ́, bɛ́ɛ̀ ní ǹ wò ní n wà kú nɔ́dzɔ́ kɔ́dzɔ́#ɛ́. 11Tsí bɛ́ɛ̀ ní ǹ módzú si nɔ́ɔ̀nà si fú Ɔ̀ɖáyé ní nákó wáa dzí èmi gbo ti náàŋírĩ-òkú ŋa wá náyé#ɛ́ ńnɛ̀ɛ́.

12Ǹ kò wà fɔ̀ ní ǹ ti tsá ɛkpa#á dzá ná, tsí ǹ kò wà fɔ̀ gbo ní ǹ ti sã̀ dzálɛ̀ ná. Ó ɖi, ǹ wà ɖìgírí, tsí wà lɔ ńwádzú ńkpá ńkpá, tsí n gba ɔ̀yà-kã̀ ńǹrɔ́-kíbí Yèésù Kírísítò ti gbà mí, àtsùgbée n dzɛ́ tɛ̀ɛ̀#ɛ́. 13Kpɛ́rɛ́ fòò ìnàbí-mi ŋa, ǹ kò wà tse ìsérè ní ɔ̀yà#á ti tɔwɔ́-mi ná. Ó ɖi, iŋɛ́ ɔ̀kã̀ntso yèé mà tse#ɛ́ ní dzɛ́ ní mà gbàgbé iŋɛ́ yèé ti wáa lɔ ŋa#á, tsí mà wà lé iŋɛ́ yèé bàa náànyìwà-ɔ̀la ŋa#á bá. 14Mà tsikpá ní n tsá ɛkpa#á dzá, àtsùgbée ɔ̀yà yèé wà nárũ-ɛkpa#á kó tɔwɔ́-mi. Ɔ̀yà#á, Ɔ̀ɖáyé nɔ́ɔ̀rɔ̃ wà kpè mí ní èmi kó gbà ńǹtá-Yèésù Kírísítò, tsí gbàá. 15Ńbɛ̀ɛ́, àwa kpó yèé ɖonùgbó nɔ́Ɔ̀ɖáyé sísɛ̃̀#ɛ́, ó wà ní àa kó dzɔ́ wà tse ìsérè bɛ́ɛ̀. Tsí bí ɔ̀nyà-kã̀ náàŋírĩ-ŋɛ́ sì wà tse ìsérè-òmírɛ̃̀-kã̀ ná, Ɔ̀ɖáyé nákó nya òkpì‐ɛ̀, tsí inɔ́‐ɛ̀ nákó má fú ŋɛ́. 16Iŋɛ́ yèé kpã́dzú#ɛ́ ní dzɛ́ ní ɔ̀nà yèé Ɔ̀ɖáyé tɔ́ si fú wa ní àa kó fà#á, ká fàá làkóò.

17Ìnàbí-mi ŋa, ɛ̀ŋɛ kpó, è kɛ́ ɔwɔ́-mi. Àa ɖíre kíbí à náa rɛ̃̀ gbà#á fú ŋɛ́. Ó ɖi, è módzú ta ɛnɛ yèé wà rɛ̃̀ bɛ́ɛ̀ ŋa#á, tsí ɛ̀ŋɛ gbo e rɛ̃̀ bɛ́ɛ̀ ké. 18Ó ɖi, mà ti fɔ̀ɔ́ fú ŋɛ́ kpeékpeé, tsí ǹ tɔ́ wà fɔ̀ɔ́ fú ŋɛ́ báàyí ró òŋu inyɔ́kṹ nódzú ní fee, ɔ̀nyà kpíkpɔ̀ wà, tsí ìgbèngbé-ŋa wà bàdzɛ́ ɛ̀kɔ́ ti nára-kíbí Yèésù Kírísítò kú si ńǹtá-egi-ìɖáàgàlàdzà†#á. 19Ìtã̀ntã́‐ɛ̀ ní dzɛ́ ká tsɛ̀rá#á. Iŋɛ́ yèé tse#ɛ́, inɔ́-ŋa ní dzɛ́ Ɔ̀ɖáyé-ŋa#á, tsí iŋɛ́ yèé má tsanɔ́ fú ŋa#á ní à wà mú nya akpá#á, tsí ìsérè-ŋa náa wà ńǹtá-iŋɛ́-ìtalɛ̀ bí ŋa gé ni. 20Ó ɖi, àwa òŋu, àa dzɛ́ ti Ɔ̀ɖáyé nɔ́ɔ̀rɔ̃, tsí náa wà dzoyè si ńǹtá-wa. Tsí Yèésù Kírísítò Ɔlá-wa kó ti bɛ̀ wáa gbà wá là, kò tì wà yá fú wa gìɖì. 21Òŋu ní nɛ́kpá si ńǹtá-ayé#ɛ́ kpó#ɛ́, tsí gbà ńǹtá-ikpá nyɛ̀ŋɛ̀#ɛ́ nákó sɔ ara-wa yèé kò nɛ́kpá-kã̀ kpókpó, tsí nákó nyáa kú gbo#ɛ́ ɖi ara-òmírɛ̃̀-kã̀ kíbí tòŋu ká‐ɛ̀. Ara#á nákó ɖíirí, tsí kàkó kú gbo ró.

Currently Selected:

Fìlíkpò ŋa 3: ngl

Highlight

Copy

Compare