Lúkà 6:27-49

Tsí Yèésù ní: Ɛ̀ŋɛ yèé wà rɛ̃tígbè-mi ŋa#á, ǹ wà wí fú ŋɛ́ ní fee, è nɛ́ àmúɖɔ̃̀ fú ɔ̀tɛ̀-ŋɛ́ ŋa. È tse ore fú ɛnɛ yèé ŋa wà nyà ŋɛ́ nɔ́ɔ̀tɛ̀#ɛ́. Bí ɔ̀nyà-kã̀ wà ré fɛ́ɛ, ìwɔ òŋu, nà tu kùsɛ̀ɛ̀ fúu, tsí bí ɔ̀nyà-kã̀ gbo wà wo íbàɖí fɛ́ɛ, nà wúùre fú Ɔ̀ɖáyé fú ɛnɛ nyɛ̀ŋɛ̀. Bí ɔ̀nyà-kã̀ kpa ìgbètí-kã̀ fɛ́ɛ, nà nyí èkéèdzì‐ɛ̀ gbo fúu. Tsí bí ɔ̀nyà-kã̀ wà gba ìwɔ̀ra-ɛ̀ɛ, nà dzɛ́, tsí kó kɛ́ atsɔ-ɛ̀ɛ gìɖì gbo máa. Bí ɔ̀nyà ɔ̀kã̀lɔ́ɔ̀kã̀ bèrèɛ́ ńŋɛ́-kã̀, nà fúu ńnɛ̀. Tsí bí ɔ̀nyà-kã̀ kɛ́ iŋɛ́-ɛ̀ɛ-kã̀, máa bèrèé ní kó sãã́ fú òŋu. Tsí iŋɛ́ yèé ò wà wò ní enìkéèdzì-ɛ̀ɛ kó tse fɛ́ɛ#ɛ́, ìwɔ gbo nà tseé bɛ́ɛ̀ fúu. Ó ɖi, bí ò wà dzáfɔ̀-ɛnɛ yèé wà dzáfɔ̀-ɛ̀ɛ#ɛ́ sɔ̃́ŋú gé, kí ò tse lárè, tsí ká nyɛ̀ɛ́? Fee, ɔ̀nyà-íbàɖí ŋa gbo náa tse iŋɛ́-ìrɔ́ nyɛ̀ŋɛ̀. Tsí bí nà wà tse ore fú ɛnɛ yèé ŋa náa tse ore fɛ́ɛ gé#ɛ́, kí ò tse lárè, tsí ká nyɛ̀ɛ́? Ɔ̀nyà-íbàɖí ŋa gbo náa tse iŋɛ́-ìrɔ́ nyɛ̀ŋɛ̀. Tsí bí ò wà ŋɛ́ owó fú ɛnɛ yèé ò mà ní nákó nyáa sãã́ fú òŋu gé#ɛ́, kí ò tse lárè, tsí ká nyɛ̀ɛ́? Ɔ̀nyà-íbàɖí ŋa gbo náa ŋɛ́ fú enìkéèdzì-ŋà ŋa, àtsùgbée ká nyáa sãã́ kpó fú ŋa. Ó ɖi, ɛ̀ŋɛ òŋu, è náa wà nɛ́ àmúɖɔ̃̀ fú ɔ̀tɛ̀-ŋɛ́ ŋa, tsí wà tse ore fú ŋa, tsí è náa ŋɛ́ iŋɛ́ ŋa fú ŋa náàrì tsèsérè ní à nákó wáa sãã́ fú ŋɛ́. Bí è wà tse bɛ́ɛ̀#ɛ́, Ɔ̀ɖáyé nákó fú ŋɛ́ nɔ́ɔ̀yà lákṹ-kã̀, tsí è nákó wáa ɖi Ɔma-Ɔ̀ɖáyé Oléwo, iŋɛ́ yèé tse#ɛ́, Ɔ̀ɖáyé náa tse ore fú ɔ̀nyà kpó. Ɔ̀nyà-íbàɖí ŋa gbo, ɛnɛ yèé ŋa kà máa ɖɔ́kpɛ́ fúnɛ#ɛ́ gbo, Ɔ̀ɖáyé náa tse ore fú àŋa kpó. Nà rí ànyínɔ́ fú enìkéèdzì-ɛ̀ɛ kíbí Ɔ̀ɖáyé Boba-ɛ̀ɛ nɔ́ɔ̀rɔ̃ gbo náa rí ànyínɔ́ fɛ́ɛ#ɛ́. Máa kpɛdzɔ́ bá enìkéèdzì-ɛ̀ɛ, tsí Ɔ̀ɖáyé kàkó kpɛdzɔ́ bá ìwɔ gbo. Máa ɖáàbi fú enìkéèdzì-ɛ̀ɛ, tsí Ɔ̀ɖáyé kàkó ɖáàbi fú ìwɔ gbo. Mú tɔrɛ fú enìkéèdzì-ɛ̀ɛ, tsí Ɔ̀ɖáyé kó mú tɛ̀ɛ gbo tɔrɛ fɛ́ɛ. Fú enìkéèdzì-ɛ̀ɛ ńŋɛ́, tsí Ɔ̀ɖáyé kó fú ìwɔ gbo. Nákó kɛ́ àwò, tsí kpurã iŋɛ́ ɖà ńnɛ̀, tsí mìí, tsí nákó kɔ̃́ɔ̃ tɛ́tɛ́tɛ́ títí wà ɖànu, tsí nákó ń ɖà náàkpò-ɛ̀ɛ. Ó ɖi, àwò-ìrɔ́ yèé nàa ń kpũ̀rã̀ã́ fúnɛ#ɛ́, nyɛ̀ŋɛ̀ ké ní nàa ń gbàá#á. Tsí Yèésù wà kpòwe fú ŋa ní: Afɔ́dzú náa fa ɔ̀kpá fú afɔ́dzúù? Àŋa méèdzì méèdzì#ɛ́ kpó nákó káà dzì ńfò ni. Ɔmatsɛ́ gbo kà láre ɔ̀gá‐ɛ̀. Ó ɖi, bí ɔmatsɛ́-kã̀ gba ɛ̀kɔ́ rere, nákó wáa wà kíbí ɔ̀gá‐ɛ̀ gé ni. Kí tse tsí ò wà rí kóko tsígíɖí-kã̀ yèé wà nódzú-enìkéèdzì-ɛ̀ɛ#ɛ́, tsí ò kò nyáa rí òkúùkù lákṹ rìgìɖìì yèé wà nódzú tìwɔ ká-ɛ̀ɛ#ɛ́? Ò kàkó nyáa wí fú enìkéèdzì-ɛ̀ɛ ní: Ídzà-mi, dzɔ̀ɔ́, tsí n nya kóko tsígíɖí-kã̀ yèé wà nódzú-ɛ̀ɛ#ɛ́. Ìwɔ ká-ɛ̀ɛ ńnɛ̀ɛ́, ò kò wà rí òkúùkù lákṹ rìgìɖìì yèé ɖí odzú-ɛ̀ɛ si#ɛ́. Rí ɔ̀nyà-atsendzɔdzú yèé gé! Nà tsɛ̃̀tsɛ̃̀ nya òkúùkù lákṹ rìgìɖìì yèé wà nódzú-ɛ̀ɛ#ɛ́ ǹɖe tã́ná, tsí o nyáa rírã tsí nya kóko tsígíɖí yèé wà nódzú-enìkéèdzì-ɛ̀ɛ#ɛ́ gbo ńǹkɛ̀ɛ́. Egi-ire-kã̀ kpókpó kà so èso-íbàɖí. Bɛ́ɛ̀ ké ní egi-íbàɖí gbo kà so èso-ire#ɛ́. Ó ɖi fee, bí ò rí èso-egi-kã̀ gé, egi-ìrɔ́ yèé egi‐ɛ̀ dzɛ́#ɛ́, nàa màá gbòkã́. À kà ká òrì ńǹtá-èkíkã́kò. Bɛ́ɛ̀ ké ní à kà ká èso-egi-ekũkũ-aworo gbo ńǹtá-sùyɛ̀#ɛ́. Ɔ̀nyà-ire náa nya ire fùɖá ńnɔ́-iŋɛ́-ire yèé ŋa kɔ̃́ inɔ́‐ɛ̀ si#ɛ́ ni. Tsí ɔ̀nyà-íbàɖí gbo náa nya íbàɖí fùɖá ńnɔ́-iŋɛ́-íbàɖí yèé ŋa ó kpaɖí si#ɛ́. Fee, afɔ̀ yèé wà ńnɔ́-ɔ̀nyà#á ní náa bɔ́ fùɖá nárũ‐ɛ̀#ɛ́. Tsí Yèésù wà wí fú ŋa ní: Kí tse tsí à wà kpe òŋu ní: Ɔ̀gá, Ɔ̀gá gé, tsí bí òŋu sì ɖíre iŋɛ́-kã̀ fú ŋa ni à kà tse si ńǹtá‐ɛ̀ ná? Ó ɖi, ɔ̀nyà kpó yèé náa wá ńɖɔ̀-òŋu, tsí wáa gbɔ́ afɔ̀-òŋu ŋa, tsí wà ń tsitsɛ́ tse#ɛ́, òŋu nákó ń sàwé ɔ̀nyà-kã̀ fú ŋa. Ó wà kíbí ɔ̀nyà-kã̀ yèé bàkó malé, tsí ó ɖɛ̃ ifò, tsí ifò#ɛ́ nɔnɔ̀ rere, tsí ó kpilɛ ilé#ɛ́ si ńǹtá-òkúta#á ni. Tsí òdzò wáa rɔ̀, tsí ògbúŋ̀gbu tsã̀ kpíkpɔ̀, tsí gbà nóòkpì-ilé#ɛ́, tsí ilé#ɛ́ kò mì dzígí, iŋɛ́ yèé tse#ɛ́, ó maá rere. Tsí ɔ̀nyà kpó yèé náa wá ńɖɔ̀-òŋu, tsí wáa gbɔ́ afɔ̀-òŋu ŋa, tsí kò wà ń tsitsɛ́ tse#ɛ́, òŋu nákó kɛ́ òŋu gbo, tsí ń sàwé ɔ̀nyà-kã̀ fú ŋa, tsí ká gbɔ́. Ó wà kíbí ɔ̀nyà-kã̀ yèé bàkó malé, tsí káà maá si ńlɛ̀ gbaŋgba náàrì ɖɛ̃ ifò#ɛ́ ni. Tsí òdzò wáa rɔ̀, tsí ògbúŋ̀gbu tsã̀ gbà nóòkpì-ilé#ɛ́, tsí ó ɖíwó ɖà ńlɛ̀ kpó gbòkã́ títí iŋɛ́-kã̀ kpókpó kò bɔ̀ ró. Bí ɔ̀nyà-ìrɔ́ méèdzì ŋa#á wà#á ńnɛ̀ɛ́.