Èfɛ́sì ŋa 3
3
Ɔ̀ɖáyé ɖá itsɛ́ fú Kpɔ́lù ní kó tse náàŋírĩ-ɛnɛ yèé kò dzɛ́ ɔma-Ìyúɖà ŋa#á
1Èmi Kpɔ́lù, à mú mi si nɛ́ɛ̀ŋà si, náàtsùgbé-itsɛ́ yèé Yèésù Kírísítò ɖá fú mi ní èmi kó tse fú ɛ̀ŋɛ yèé kò dzɛ́ ɔma-Ìyúɖà ŋa#á. 2Ǹ karalé ní ɛ̀ŋɛ kpó, è gbɔ́ ní Ɔ̀ɖáyé tse ore-ɔ̀fɛ́ fú mi ní èmi kó tsitsɛ́ fú ŋɛ́ nɔ̀! 3Fee, Ɔ̀ɖáyé nya ètò-kã̀, tsí ń ŋà mí. Ètò#ɛ́, ó tseé, tsí ń ɖúkù si ni. Tsí ǹ ti tsá ìtá‐ɛ̀ oɖé wáa lɔ fú ŋɛ́ ńǹsɛ̃̀ɛ̃́. 4Tsí bí è kã̀ã́, è nákó rí mà rere ní ǹ gbɔ́ òkpì-ètò yèé ó tse si ti nára-Kírísítò, ɛnɛ yèé Ɔ̀ɖáyé tsã̀, tsí bɛ̀ wá#á. 5Dzɔ̀ɔ́ dzɔ̀ɔ́#ɛ́, Ɔ̀ɖáyé kò nya ètò yèé ó tse ɖúkù si#ɛ́, tsí ń ɖíre fú ɔ̀nyà ŋa. Ó ɖi báàyí#ɛ́, ó gbà ńǹtá-Mímí‐ɛ̀, tsí nyàá ŋa ɛnɛ yèé ŋa ó tsã̀ ní ká dzɛ́ adzítsɛ́-Yèésù† òŋu agbáfɔ̀-Ɔ̀ɖáyé fɔ̀† ŋa#á. 6Tsí ètò yèé ó tse, tsí ń ɖúkù si#ɛ́ ní wà dzɛ́ ní kíbí ɛnɛ yèé kò dzɛ́ ɔma-Ìyúɖà ŋa#á, àŋa Yèésù Kírísítò méèdzì, à ɖi ɔ̀kã̀ntso si#ɛ́, iŋɛ́-ire yèé ŋa ó kpaɖí si fú ɛnɛ yèé dzɛ́ tɛ̀ɛ̀ ŋa#á nákó tɔwɔ́-àŋa ɔma-Ìyúɖà† ŋa méèdzì. Tsí àŋa ɔma-Ìyúɖà ŋa méèdzì, à wà kíbí ɔ̀nyà ɔ̀kã̀ntso gbo bɛ́. Tsí àlé yèé gbo ó ta si fú ɛnɛ yèé dzɛ́ tɛ̀ɛ̀ ŋa#á, àlé#ɛ́ dzɛ́ ti ɛnɛ yèé kò dzɛ́ ɔma-Ìyúɖà ŋa#á gbo. Iŋɛ́ yèé ikɔ̀ ɖíɖɔ̃̀#ɛ́ wà fɔ̀#ɛ́ ńnɛ̀ɛ́. 7Ikɔ̀ ɖíɖɔ̃̀#ɛ́ dzídzɛ́ fú ɔ̀nyà ŋa ní dzɛ́ itsɛ́ yèé Ɔ̀ɖáyé ɖá fú mi#ɛ́. Tsí itsɛ́ yèé ó ɖá fú mi#ɛ́, ó tse ore-ɔ̀fɛ́ fú mi ní èmi kó tseé ni. Tsí ikpá‐ɛ̀ wà tsitsɛ́ nára-mi. 8Náàŋírĩ-ɛnɛ yèé dzɛ́ ti Ɔ̀ɖáyé ŋa kpó#ɛ́, èmi ní dzɛ́ tsígíɖí lárè kpó fú ŋa#á. Ó ɖi, èmi#ɛ́ ní Ɔ̀ɖáyé sì bu irɔ̃ si néwo fú#ɛ́. Ó ní èmi kó dzíkɔ̀ ɖíɖɔ̃̀ fú ɛnɛ yèé kò dzɛ́ ɔma-Ìyúɖà ŋa#á ti nára-kíbí Kírísítò lákṹ tó gbà#á. Kírísítò lákṹ títí ɔ̀nyà-kã̀ kpókpó kàkó nyáa gbɔ́ òkpì-lílákṹ‐ɛ̀ tã́ láyé. 9Ɔ̀ɖáyé bɛ̀ mí ní kíbí ètò yèé òŋu tse ɖúkù si#ɛ́ nákó wáa lɔ gbà nɛ́kpa nɛ́kpa títí lɔ káà dzálɛ̀#ɛ́, èmi kó nyàá si ńgbaŋgba, tsí ɔ̀nyà kpó kó màá. Ɔ̀ɖáyé yèé ɖá iŋɛ́ ɔ̀kã̀lɔ́ɔ̀kã̀ kpó#ɛ́, ó ɖúku ètò#ɛ́ si ńnɔ́-ara‐ɛ̀ títí ńǹkpìnkpìlɛ̀-ayé#ɛ́ ni. 10Ó tse bɛ́ɛ̀, àtsùgbée báàyí#ɛ́, kó gbà ńǹtá-ɛgbɛ́-Yèésù Kírísítò, tsí nyà ɖíre fú ikpá ɔ̀kã̀lɔ́ɔ̀kã̀ kpó yèé wà ńǹgbèrí#ɛ́ ní ifɛ̀ɛ́nɔ́-òŋu kpɔ̀. 11Bɛ́ɛ̀ ní ó ti tse ètò#ɛ́ gbà si lɛ́lɛ́ǹlɛ̀lɛ̀#ɛ́ ńnɛ̀ɛ́. Tsí ńǹtá-Yèésù Kírísítò Ɔlá-wa ní ó gbà, tsí kpilɛ ètò#ɛ́. 12Tsí kíbí àwa Yèésù Kírísítò méèdzì, àa ɖi ɔ̀kã̀ntso si#ɛ́, tsí àa nɛ́ àkaralé gbo si ńǹtá‐ɛ̀#ɛ́, àa nákó nyáa gbódzú, tsí sɔ́ tìmá-Ɔ̀ɖáyé fú ara-wa òŋu àkaralé. 13Ńbɛ̀ɛ́, ǹ wà wo n fɔ̀ fú ŋɛ́ ní bí è wà gbɔ́ ní ǹ wà réré kpíkpɔ̀ náàtsùgbé-ŋɛ́#ɛ́, ara kó máa tì kú ŋɛ́ gìɖì. Kà kàa bɛ́ɛ̀, ìréré-mi kó wà kɛ́ éwo-ŋɛ́ lɔ ńǹgbèrí.
Kpɔ́lù tɔ́ wà wúùre fú ɛnɛ-Èfɛ́sì ŋa ró
14Àtsùgbée bɛ́ɛ̀#ɛ́, mà wà kálɛ̀, tsí wà wúùre fú Ɔ̀ɖáyé Boba-wa fú ŋɛ́. 15Òŋu ní ɖá aro ɔ̀kã̀lɔ́ɔ̀kã̀ kpó#ɛ́, yèé wà nɔ́ɔ̀rɔ̃ gbo, yèé wà ńǹtalɛ̀ bí gbo, àŋa kpó, òŋu ní wà, tsí à wà#á. 16Ó nɛ́ iyì lákṹ kpàtàkìì-kã̀. Ńbɛ̀ɛ́, ǹ wà wúùre fúu ní Mímí‐ɛ̀ kó ɖáàmí le ŋɛ́, tsí ɛ̀ɖɔ̃̀-ŋɛ́ kó gbó kpó kpãŋu. 17Tsí ǹ wà wúùre gbo ní Kírísítò kó wɔlé dzokó ńnɔ́-ŋɛ́, àtsùgbé-àkaralé yèé è nɛ́ si ńǹtá‐ɛ̀#ɛ́. Ǹ wà wò gbo ní àmúɖɔ̃̀-ŋɛ́ kó ta ogùgù múlɛ̀ kpó kpãŋu, kó máa tì mì dzígí gìɖì. 18Ńbɛ̀ɛ́, ɛ̀ŋɛ gbo, ɛnɛ-àtíbɔ̀ yèé ŋa dzɛ́ ti Ɔ̀ɖáyé#ɛ́ gbo, ɛ̀ŋɛ kpó, è nákó nyáa gbɔ́ òkpì-kíbí Kírísítò nɛ́ àmúɖɔ̃̀ fú wa tó gbà#á. Àmúɖɔ̃̀#ɛ́ kpɔ̀ títí kò nɛ́ ìsàwé. 19Nóòtítɔ́#ɛ́, àmúɖɔ̃̀ yèé Kírísítò nɛ́ fú wa#á, ɔ̀nyà-kã̀ kpókpó kàkó nyáa màá tã́ kpó láyé. Ó ɖi, ǹ wà wúùre ní ɛ̀ŋɛ òŋu e màá, àtsùgbée kíbí Ɔ̀ɖáyé wà gbà#á kó gbé ńnɔ́-ŋɛ́ bɛ́ɛ̀ kpó.
20Ɔ̀ɖáyé nɛ́kpá tó bɛ́ɛ̀. Tsí iŋɛ́ yèé ŋa kpó àa náa bèrèé#ɛ́ òŋu iŋɛ́ yèé ŋa kpó náa wà ńǹsérè fú wa#á nákó nyáa tse òlárèbɛ́ɛ̀ fú wa sã́ŋú sã́ŋú. Náa tse ŋá fú wa gbà ńǹtá-ikpá‐ɛ̀ yèé wà tsitsɛ́ nára-wa#á ni. 21Kùsɛ̀ɛ̀ fú Ɔ̀ɖáyé ńnɔ́-ɛgbɛ́-Yèésù Kírísítò yèé òŋu Kírísítò méèdzì ɖi ɔ̀kã̀ntso si#ɛ́. Kùsɛ̀ɛ̀ fúu títí lɔ náàrìtã́. Ɛ̀tsɛ.
Currently Selected:
Èfɛ́sì ŋa 3: ngl
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
