Èfɛ́sì ŋa 4

Olí-Yèésù ŋa wà kíbí ɔ̀nyà ɔ̀kã̀ntso bɛ́ ni

1Ńbɛ̀ɛ́, èmi yèé wà nɛ́ɛ̀ŋà si náàtsùgbé-itsɛ́ yèé ǹ wà tse fú Ɔlá-wa#á, ǹ wà ńǹkálɛ̀ fú ŋɛ́ ní ìlò-ŋɛ́ ŋa kó wà nyà ɖíre ní Ɔ̀ɖáyé kpè ŋɛ́ ní ɛ̀ŋɛ kó dzɛ́ tòŋu. 2È náa wà tɛ ara-ŋɛ́ bɔlɛ̀ kpó, tsí e wà nɛ́ àtɛ̀si gbo. È máa wà tse ìkparà. Ó ɖi, bí ìnàbí-kã̀ wà nɔ́ɔ̀kã̀ gìɖì oo, è náa gbódzú, tsí e tɔ́wɔ́ gbàá òŋu àmúɖɔ̃̀. 3Mímí-Ɔ̀ɖáyé† mú ŋɛ́ tse ɔ̀kã̀ntso si. Náàtsùgbée bɛ́ɛ̀, è náa tsikpá ɔ̀kã̀lɔ́ɔ̀kã̀ kpó, tsí e ɖɔ̃̀ si, tsí e banɛ́ ɔ̀kã̀ntso tsítse#ɛ́ gbo si. 4Àwa kpó, àa wà kíbí ɔ̀nyà ɔ̀kã̀ntso bɛ́ ni, tsí Mímí-Ɔ̀ɖáyé ɔ̀kã̀ntso#ɛ́ gbo ní tì wá ńǹtá-àwa kpó#ɛ́. Iŋɛ́-ire ɔ̀kã̀ntso ŋa#á ní àwa kpó, àa módzú si nɔ́ɔ̀nà si fú#ɛ́, tsí náàtsùgbée bɛ́ɛ̀ ní Ɔ̀ɖáyé kpè wá#á. 5Ɔlá-wa#á, ɔ̀kã̀ntso ní wà#á. Ɛ̀kɔ́ ɔ̀kã̀ntso gbo ní àwa kpó, àa gbà gbɔ́#ɛ́, tsí ìwɛ̀-Yèésù ɔ̀kã̀ntso gbo ní wà#á. 6Ɔ̀ɖáyé ɔ̀kã̀ntso gbo ní wà#á, tsí ó dzɛ́ Boba fú àwa kpó. Ó wà dzoyè si ńǹtá-àwa kpó, tsí náa wà gbà ńǹtá-àwa kpó gbo, tsí wà tsitsɛ́‐ɛ̀, tsí ó wɔlé dzokó ńnɔ́-àwa kpó gbo si.

7Ó ɖi, Kírísítò fú àwa kpó ńkpá-ɔ̀fɛ́, kṹnukṹ òŋu tɛ̀ɛ̀, ní ká ń tsitsɛ́ fú òŋu. Ńǹrɔ́-kíbí ó fɔ̀ ní òŋu nákó kpɛ̃́ ikpá#á fúnɛ gba#á, bɛ́ɛ̀ ní ó fú wa ńnɛ̀#ɛ́. 8Iŋɛ́ yèé tse tsí à kɔ si ńǸwé-Ɔ̀ɖáyé† ní:

“Kíbí ó làkóò ńǹgbèrí#ɛ́,

ó kɛ́ ɔ̀tɛ̀‐ɛ̀ yèé ó mú ŋa#á lɔ.

Tsí ó tsɔ̀yà ŋa fú ɔ̀nyà ŋa#á.”#4:8 Ìwé-Orĩ-ŋa 68:19 (Psaumes 68:19)

9Tsí kíbí à kɔɔ́ si ní ó lɔ ńǹgbèrí#ɛ́ fee, òkpì‐ɛ̀ fáà? Bí ó dzɛ́ ní ó lɔ ńǹgbèrí#ɛ́, àa kó gbɔ́ òkpì‐ɛ̀ ní ó tsɛ̃̀tsɛ̃̀ tì lɔ ńnɔ́-ilɛ̀ sã́ŋú sã́ŋú tã́ná. 10Tsí ɛnɛ yèé tì lɔ ńnɔ́-ilɛ̀#ɛ́, òŋu#ɛ́ ké ní lɔ ńǹgbèrí sã́ŋú sã́ŋú gbo#ɛ́. Ó tse bɛ́ɛ̀, àtsùgbée kó wà dzoyè ńǹɖìkíìɖì kpó náyé gbaŋgba#á. 11Òŋu ní tsɔ̀yà fú ɔ̀nyà kã̀ŋa#á. Ó tsɔ̀yà fú ɔ̀nyà kã̀ŋa ní ká dzɛ́ adzítsɛ́‐ɛ̀ ŋa, tsí ɔ̀nyà kã̀ŋa gbo dzɛ́ agbáfɔ̀-Ɔ̀ɖáyé fɔ̀† ŋa, tsí ɔ̀nyà kã̀ŋa gbo dzɛ́ adzíkɔ̀ ɖíɖɔ̃̀ fúnɛ wérí ŋa, tsí ɔ̀nyà kã̀ŋa gbo dzɛ́ aró-agbo-Ɔ̀ɖáyé òŋu akɔ́nɛ ŋa. 12Ó tse bɛ́ɛ̀, àtsùgbée ká nyáa tse tsí ɛnɛ yèé dzɛ́ ti Ɔ̀ɖáyé ŋa#á kpó, ká nyáa tsitsɛ́ yèé ó ɖá fú ŋa#á, tsí àkaralé-ɔma-ɛgbɛ́‐ɛ̀ ŋa kó ta ogùgù múlɛ̀ kpãŋu. Ɔma-ɛgbɛ́‐ɛ̀ ŋa wà fúu kíbí ara‐ɛ̀ bɛ́.

13Bí iŋɛ́ ŋa#á wà lɔ bɛ́ɛ̀, àwa kpó, àa nákó wáa tse ɔ̀kã̀ntso. Àa nákó tse ɔ̀kã̀ntso ńǹrɔ́-kíbí àa nɛ́ àkaralé si ńǹtá-Kírísítò gbà#á, òŋu ńǹrɔ́-kíbí àa ma Ɔma bíbí-Ɔ̀ɖáyé#ɛ́ gbà#á. Tsí àa nákó ɖonùgbó gbo. Ó ɖi, àa nákó ɖonùgbó dzálɛ̀, tsí wà kíbí Kírísítò ńǹrɔ́-kã̀ bɛ́ tútútú. 14Ńbɛ̀ɛ́, àa kàkó dzɛ́ maɖé ró. Àa kàkó wà kíbí ɔkɔ̃̀-odzómi yèé omi náa wà kɛ́, tsí awu gbo náa wà télè wérí#ɛ́. Ɛ̀kɔ́-òɖòbò ŋa kàkó nyáa ro ìsérè má fú wa, tsí wà télè wá wérí gbo ró. Arúnɛ ŋa gbo kàkó nyáa wà ɖɔ́gbɔ̃́, tsí wà ń rú wa ró. 15Kà kàa bɛ́ɛ̀, àa nákó wà fɔ òtítɔ́, tsí wà nɛ́ àmúɖɔ̃̀ gbo fúnɛ. Ńbɛ̀ɛ́, àa nákó wáa ɖonùgbó ńnɔ́-iŋɛ́ ɔ̀kã̀lɔ́ɔ̀kã̀ kpó, tsí wà kíbí ɛnɛ yèé dzɛ́ oléwo fú wa#á. Ɛnɛ#ɛ́, Kírísítò ni. 16Ó mú àwa kpó, tsí ń tse ɔ̀kã̀ntso, tsí àa wɔ̀ má rere si ńǹrɔ́-kíbí ìsìkéké ŋa gbo náa mú ìɖì kíìɖì-ara-nɛ, tsí ń tse ɔ̀kã̀ntso, tsí à náa wɔ̀ má rere si#ɛ́. Bí ìɖì kíìɖì-ara‐ɛ̀ɛ wà tsitsɛ́ yèé wo odzú‐ɛ̀#ɛ́ dzì ńǹɖì‐ɛ̀, ìwɔ ká-ɛ̀ɛ kpó nà ɖonùgbó, tsí àmí gbo náa kòɛ́. Bɛ́ɛ̀ ké ní ó dzɛ́ fú ɛgbɛ́-Kírísítò gbo#ɛ́. Bí ɔma-ɛgbɛ́‐ɛ̀ ŋa wà nɛ́ àmúɖɔ̃̀ fú ara-ŋa, tsí kṹnukṹ wà tsitsɛ́ yèé wo odzú‐ɛ̀#ɛ́ gbo dzì ńǹɖì‐ɛ̀#ɛ́, ɛgbɛ́#ɛ́ kpó nákó ɖonùgbó rere gbà ńǹtá-ikpá‐ɛ̀.

Àa kó lìlò titɔ̃

17Ńbɛ̀ɛ́, màa fɔ̀ɔ́, tsí màa tɔ́ fɔ̀ɔ́ fú ŋɛ́ òŋu ikpá yèé Ɔlá-wa fú mi#ɛ́ ró ní fee, è máa wà lìlò kíbí ɛnɛ yèé ŋa kò ma Ɔ̀ɖáyé#ɛ́ ró. Ìsérè-ŋa, ìsérè-akpotu ni. 18Ìsérè-ŋa kò tsí, tsí àyɛ̀ yèé Ɔ̀ɖáyé náa fúnɛ#ɛ́ kò tɔwɔ́-ŋa gbo. Iŋɛ́ yèé tse#ɛ́, à kò ma iŋɛ́-kã̀ kpókpó, tsí ɛ̀ɖɔ̃̀ gbo kã̀ ŋá. 19Adzá lá odzú-ŋa. Wérewère náa gba ìsérè-ŋa si gé ni, tsí à náa wà ńǹtsekíìtse ɔ̀kã̀lɔ́ɔ̀kã̀ kpó gbo tsítse si. À náa wà wò gìɖì ní àŋa má tse òlárèbɛ́ɛ̀.

20Ó ɖi, ɛ̀ŋɛ òŋu, kò tsi ɛ̀kɔ́ yèé à tse fú ŋɛ́ ti nára-Kírísítò#ɛ́ ńnɛ̀ɛ́. 21Ǹ karalé ní à wíìnyɛ̀ ti nára‐ɛ̀ fú ŋɛ́ rere, tsí à kɔ́ ŋɛ́ nóòtítɔ́ yèé wà ńnɔ́-ikɔ̀ ɖíɖɔ̃̀-Yèésù#ɛ́ gbo rere. 22À tsɛ̀kɔ́ fú ŋɛ́ ní ìlò yèé ŋa è náa lò dzɔ̀ɔ́ dzɔ̀ɔ́#ɛ́, e kɔ̀ ŋá dzɔ̀ɔ́. Ìrɔ́-ɔ̀nyà yèé è dzɛ́ dzɔ̀ɔ́ dzɔ̀ɔ́#ɛ́ ní náa sɔ́ ŋɛ́, tsí è náa wà lìlò nyɛ̀ŋɛ̀ ŋa#á, tsí awù yèé è náa nɛ́ ŋa#á, à rú ŋɛ́, tsí fà ŋɛ́ lɔ nɛ́ɛ̀rá gbo. 23Ó wà ní e kɔ ara-ŋɛ́ dzɔ̀ɔ́ fú Ɔ̀ɖáyé, tsí kó kparɔ ìsérè-ŋɛ́ ti títí ńnɔ́-ŋɛ́. 24Ó wà ní e ɖi ɔ̀nyà titɔ̃. Ɔ̀nyà titɔ̃#ɛ́, Ɔ̀ɖáyé ɖáa ńǹwànwà tòŋu ká‐ɛ̀ ni. Ìlò‐ɛ̀ dzɛ́ ìlò-òtítɔ́ òŋu ìlò mímá yèé òtítɔ́-Ɔ̀ɖáyé náa múnɛ lò#ɛ́ ni.

25Kíbí ó dzɛ́ bɛ́ɛ̀#ɛ́, è kɔ òɖòbò tsítse dzɔ̀ɔ́. Kṹnukṹ kó wà fɔ òtítɔ́ fú enìkéèdzì‐ɛ̀. Iŋɛ́ yèé tse#ɛ́, àwa kpó, àa wà kíbí akpá òŋu ɛsɛ̀ nára-ɔ̀nyà ɔ̀kã̀ntso bɛ́ ni. 26Bí è bínɔ́, è náa tsɔ́ éwo-ara-ŋɛ́, tsí e máa tse íbàɖí, odzúùrɔ̃̀ kó máa mù si ńǹtá-inɔ́ bíbí-ŋɛ́. 27È máa dzɛ́ fú Ètsù†, tsí kó tì rí kàlànfuru-kã̀ gìɖì nára-ŋɛ́. 28Ɛnɛ yèé wà tsolè, kó mí olè tsítse. Kà kàa kó tsolè, kó fá òógù ta, tsí kó wà fa ɔ̀nà-òtítɔ́, tsí òŋu ká‐ɛ̀ kó wà rí dzɛ nɔ́wɔ́-ara‐ɛ̀, àtsùgbée kó nyáa rí yèé nákó ń mɔ́wɔ́ gbè fú adzìyàkú ŋa#á. 29È máa wà fɔ afɔ̀-íbàɖí ŋa fùɖá nárũ-ara-ŋɛ́ ŋa ró. Kà kàa bɛ́ɛ̀, è náa wà fɔ afɔ̀ yèé ŋa nákó dzì ńǹɖì‐ɛ̀ fú ɔ̀nyà ŋa rere#ɛ́, àtsùgbée bí à wà gbɔ́ɔ, ni kó nɛ́ èrè fú ŋa. 30È máa wà mú ara kú Mímí-Ɔ̀ɖáyé†. Iŋɛ́ yèé tse#ɛ́, Ɔ̀ɖáyé tse tsí Mímí‐ɛ̀ tì wɔ̀ ńǹtá-ŋɛ́, tsí ó ń ɖíìsèdzè-ŋɛ́ ní ɛ̀ŋɛ kó dzɛ́ tòŋu títí fú ɔdzɔ́ yèé nákó wáa gbà ŋɛ́ dzɔ̀ɔ́ dzálɛ̀#ɛ́. 31È máa dzɛ́ ɔ̀nyà kíkorò. Inɔ́ kó máa wà sɔ ŋɛ́ tsúù ró, è máa wà bínɔ́ gbo ró. È máa wà rã́ã̀rã̀ gbo ró, tsí è máa wà búnɛ gbo ró. È máa tì tse iŋɛ́-inɔ́-kíkã-kã̀ kpókpó gìɖì ró. Fee, è ɖɛ̃lɛ̀, tsí e mú ìlò nyɛ̀ŋɛ̀ ŋa kpó, tsí e ń rì. 32È náa wà tsɔ̀nyà, tsí e wà gbɔ́ ɖíɖɔ̃̀ fú ara-ŋɛ́ ŋa gbo. Bí ɔ̀nyà-kã̀ tɛ enìkéèdzì‐ɛ̀ nɛ́sɛ̀, ɛnɛ nyɛ̀ŋɛ̀ kó ń tɔrɛ fúu kíbí Ɔ̀ɖáyé gbo tse àtsùgbé-Kírísítò, tsí mú àbi-ŋɛ́ ŋa, tsí ń tɔrɛ fú ŋɛ́#ɛ́.

Currently Selected:

Èfɛ́sì ŋa 4: ngl

Highlight

Copy

Compare